33
ዩሁዳ ካዎ ሚናሴ
(2ካዎ 21፡1-9)
1 ሚናሴይ ካዎቲዛ ዎዴ ኢዛስ ላይꬃይ 12፤ ኢዚ ዬሩሳላሜን 55 ላይꬅ ካዎቲዴስ። 2 ጎዳይ ኢስራኤሌ ኣሳ ሲንꬃፌ ጎዲ ኬሲዳ ኣሳቲ ኦꬂዛ ሄ ሃራሲዛ ሎሴታ ካሊዲ ኢዚካ ጎዳ ሲንꬃን ኢታ ሚሽ ኦꬂዴስ።ኤር 15፡4 3 ሚናሴይ ባ ኣዋ ሂዝቂያሲ ላሊዳ ጎይኒዛ ꬎቃሶሆታ ዛሬꬂዲ ኬጺዴስ፤ ባኣሌስ ያርሺዛሶሆታኔ ኣሼሮ ጌቴቲዛ ኤቃ ጾሳይ ሚስሌታ ሜꬊዴስ፤ ቃሴ ሳሎ ጾሊንቴታ ኡባሲካ ሆኪ ጎይኒዴስ። 4 ጎዳይ፥ «ታ ሱንꬃይ ሜርናስ ዬሩሳላሜን ዴኣና» ጊ ዎꬂዳ ጾሳ ኬꬃን ሚናሴይ ኤቃ ጾሳታስ ያርሺዛሶሆታ ጊግሲዴስ። 5 ጾሳ ኬꬃን ዴኢዛ ናምኡ ዛጎታን ሳሎ ጾሊንቴታ ኡባስ ያርሺዛሶሆታ ጊግሲዴስ። 2ታሪ 6፡6 6 ሄኖሜ ና ሾባን ባ ኣቱማ ናይታ ታማን ጹጊዲ ያርሺዴስ፤ ኢዚ ባ ሁኤንካ ቢቲዛዴ፥ ጎጂዛዴኔ ማሮꬂዛዴ ጊዲዲ ሞይቲሌ ጼይጊዛይታኔ ኢታ ኣያናታራ ሃሳዬቲዛይታ ዞሬ ኦይቺዴስ፤ ጎዳ ሲንꬃን ኢዚ ዳሮ ኢታ ሚሽ ኦꬂዲ ኢዛ ሃንቄꬂዴስ።
7 ሄሳፌ ጉዬ ባ ሜꬊዳ ኤቃ ሚስሌዛ ጾሳ ኬꬃ ጊዶን ኤሲዴስ፤ ሄ ጾሳ ኬꬃይ ጾሲ ዳዊቴሲኔ ኢዛ ና ሶሎሞኔስ፥ «ሃ ጾሳ ኬꬃኒኔ ኢስራኤሌ ኡባ ጊዶፌ ታኒ ዶሪዳ ዬሩሳላሜን ታኒ ታ ሱንꬃ ሜርናስ ጼይጊሳና። 8 ታኒ ኢስራኤሌ ኣሳ ሙሴ ባጋራ ኣዛዚዳ ኣዛዞ፥ ዎጋኔ ማራ ኡባ ኢስቲ ናጊ ፖሊኮ ታኒ ኢስታ ኣዋታስ ኢሚዳ ቢታፌ ኢስታ ቶሆ ሾዲሲኬ» ጊዴስ። 1ካዎ 9፡3-5፤ 2ታሪ 7፡12-18 9 ጊዶ ኣቲን ሚናሴይ ዩሁዳ ኣሳኔ ዬሩሳላሜ ኣሳ ባሌꬂዴስ፤ ሂስቲን ኢስታ ጎዳይ ኢስራኤሌ ኣሳ ሲንꬃፌ ꬋይሲዳ ካዎቴꬃቲ ኦꬂዳ ኢታፔ ኣꬊዳ ኢታ ኦꬂዳ።
ባ ናጋራ ጊሻስ ሚናሴ ሞꬌቴꬅ
10 ጎዳይ ሚናሴሲኔ ኢዛ ኣሳስ ሃሳይዴስ፤ ጊዶ ኣቲን ኢስቲ ኢዛ ሃሳያ ሲዮንታ ኢጺዳ። 11 ሄሳ ጊሻስ ጎዳይ ኣሶሬ ካዎ ኦላ ጋዳዋታ ኢስታ ቦላ ዴንꬂዴስ፤ ሂስቲን ኢስቲ ሚናሴ ሲꬌን ዳፎ ኣꬂዳ፤ ጻርቂማላ ሳንሳላታን ቃቺዲ ባቢሎኔ ቢታ ኤፊዳ። 12 ሚናሴይ ቱጋቲዳ ዎዴ ጎዳ ባ ጾሳ ኮዪዴስ፤ ባ ኣዋታ ጾሳ ሲንꬃን ባናቴꬃ ኬሂፔ ካዉሺዴስ። 13 ሚናሴይ ጾሳ ዎሲዳ ዎዴ ጾሳይ ኢዛስ ዎሴቲዴስ፤ ኢዛ ዋትዋቶዛካ ሲዪዴስ፤ ሂስቲዲ ዬሩሳላሜን ኢዛ ካዎቴꬃን ዛሪ ዎꬂዴስ። ሄሳን ጎዳይ ኢዚ ጾስ ጊዲዳይሳ ሚናሴይ ኤሪዴስ።
14 ሄሳፌ ጉዬ ሚናሴይ ዙሌን ዲዛ ጊዮኔ ፑልቶዛስ ኣርሼይ ዉሊዛ ባጋፌ ዶሚዲ ሞሌ ፔንጌ ጋካናስ ዲዛ ዳዊቴ ካታማስ ካሬ ባጋራ ዲዛ ጊምቤዛ ኦፌሌ ዙምቡላ ጊዶ ዬጊዲ ካሴይሳፌ ꬎቁ ሂስቲ ጊምቢዴስ፤ ጊምቤቲ ኡቲዳ ዩሁዳ ካታማታ ኡባን ኦላ ጋዳዋታ ዎꬂዴስ።
15 ኣላጋ ጾሳታኔ ኤቃ ሚስሌ ጾሳ ኬꬃፌ ዲጊዴስ፤ ጾሳ ኬꬃን ዲዛ ዙምቡላ ቦላኔ ዬሩሳላሜን ኢዚ ኦꬂዳ ያርሾሶታ ኡባ ላሊዴስ፤ ሄ ካታማፔ ካሬ ኬሲ ኦሊዴስ። 16 ቃሴካ ሚናሴይ ጎዳስ ያርሺዛሶዛ ኦራጺሲዴስ፤ ኢሲፌቴꬃ ያርሾኔ ጋላታ ያርሾ ኢዛን ያርሺዴስ፤ ዩሁዳ ኣሳካ ጎዳስ ኢስራኤሌ ጾሳስ ጎይናና ማላ ኣዛዚዴስ። 17 ኣሳይ ጎይኒዛ ዙምቡላታ ቦላ ያርሾ ያርሺዛይሳ ኣጎንታ ኢጺኮካ ኢስቲ ያርሺዛይ ኢሲ ጎዳ ባንታ ጾሳሳ።
ሚናሴ ሃይቆ
(2ካዎ 21፡17-18)
18 ሚናሴይ ባ ካዎቴꬃ ላይꬃታን ኦꬂዳ ኦሶቲ፥ ኢዚ ባ ጾሳ ዎሲዳ ዎሳይኔ ጎዳ ኢስራኤሌ ጾሳ ሱንꬃን ናቤቲ ኢዛስ ዮቲዳይሲ ኢስራኤሌ ካዎታ ታሪኬ ማጻፋን ጻፌቲ ኡቲዴስ። 19 ቃሴ ኢዛ ዎሳይኔ ጾሳይ ኢዛስ ዎሴቲዳይሲ፥ ኢዚ ኦꬂዳ ናጋራይኔ ናቆይ ኡባይ ሚናሴይ ባና ካዉሻናፔ ካሴ ኦꬂዳ ዙምቡላታ ቦላ ጎይኒዛሶቲ፥ ኢዚ ኤሲዳ ኣሼሪ ሚስሌቲኔ ኤቃ ጾሳቲ ኡባይ ናቤታ ታሪኬ ማጻፋን ጻፌቲ ኡቲዳ። 20 ሚናሴይ ባ ኣዋታꬆ ሃይቂዴስ፤ ሂስቲን ሚናሴ ኢዛ ካዎቴꬃ ኬꬃን ሞጊዳ፤ ኢዛ ና ኣሞኔይ ኢዛሶሆን ካዎቲዴስ።
ዩሁዳ ካዎ ኣሞኔ
(2ካዎ 21፡19-26)
21 ኣሞኔይ ካዎቲዛ ዎዴ ኢዛስ ላይꬃይ 22፤ ኢዚ ዬሩሳላሜን ናምኡ ላይꬅ ካዎቲዴስ። 22 ኢዛ ኣዋ ሚናሴይ ኦꬂዳ ማላ ኢዚካ ጎዳ ሲንꬃን ኢታ ሚሽ ኦꬂዴስ፤ ኢዛ ኣዋ ሚናሴይ ኦሲሲዳ ኤቃ ሚስሌታ ኡባስ ጎይኒዴሲኔ ኢስታስ ያርሺዴስ። 23 ጊዶ ኣቲን ኢዛ ኣዋ ሚናሴይ ባናቴꬃ ካዉሺዳ ማላ ኢዚ ባናቴꬃ ጎዳ ሲንꬃን ካዉሺቤና፤ ኣሞኔይ ሞሮ ቦላ ሞሮ ጌዴ ጉጂ ጉጂ ቢዴስ።
24 ኣሞኔ ሹሜቲ ኢዛ ቦላ ማቄቲዲ ኢዛ ካዎቴꬃ ኬꬃ ጊዶን ኢዛ ዎꬊዳ። 25 ሄሳፌ ጉዬ ሄ ዴሬ ኣሳቲ ካዎ ኣሞኔ ቦላ ማቄቲዲ ኡባታ ዎꬊዳ፤ ሂስቲዲ ኣሞኔ ሶሆን ኢዛ ና ኢዮሲያሳ ካዎꬂዳ።