2ካዎታ ማጻፋ
ጊዶ ቆፋ
ካዎታ ማጻፋ ናምኣንꬆ ኪፊሌዚ ኮይሮ ኪፊሌዚ ኤቂዳሶፔ ዶሚዲ ኢስራኤሌ ካዎ ናምኣታ ጊሻስ ዮቴስ፤ ማጻፋዚ ናምኡ ዋና ዋና ኪፊሌታን ሻኬታናስ ዳንዳዬስ።
1. ኪርስቶሲ ዬሌታናፔ ካሴ ኡዱፉን ጼታንꬃ ላይꬃስ ባጋፌ ዶሚዲ ሳማሪያይ ኩንዳና ዎዴ ጋካናሲኔ ኪርስቶሳ ዬሌታፔ ካሴ 721 ላይꬃፌ ቢዲ ፑዴሃ ባጋ ካዎቴꬃይ ኩንዳና ጋካናስ ዲዛ ናምኡ ካዎታ ታሪኬ (1-17)።
2. ኢስራኤሌ ካዎቴꬃ ኩንዴꬃፌ ዶሚዲ ኪርስቶሲ ዬሌታናፔ ካሴ 586 ላይꬃን ካዎ ናቡካዳናጾሬይ ዬሩሳላሜ ኦይኪዲ ላላና ጋካናስ ዲዛ ዩሁዳ ካዎቴꬃ ታሪኬ (18-25)። ጎዶሊያሳይ ባቢሎኔ ካዎቴꬃፌ ጋርሳራ ዩሁዳ ዴሬ ሃሪዛዴ ጊዲዳይሳኔ ዩሁዳ ካዎ ኢዮኣኪኔይ ባቢሎኔን ቃሾ ኬꬃፌ ቢርሼቲዳይሳ ፒልጊ ዮቲሼ ታሪኬዛ ኩዬስ። ሃይሲ ሃ ሞሮዚ ኡባይካ ኢስራኤሌ ጋካናስ ዳንዳይዳይ ዩሁዳ ካዎይ፥ ኢስራኤሌ ካዎይኔ ዴሬዚ ጾሳስ ኣማኔቶንታ ኣጊዳ ጊሻሳ። ኢስራኤሌ ኣሳ ታሪኬይ ላሜታና ማላ ጋሶ ጊዲዳ ኣይፌ ዮኦቲ ዬሩሳላሜ ኩንዴꬂኔ ዩሁዳ ኣሳፔ ዳሪዛ ባጋታ ጎዴቴꬅ። ካዎታ ማጻፋን ናምኣንꬆ ኪፊሌዛን ኤላሳፔ ካሊዲ ኬሂ ኤሬቲዳ ናቤይ ኤልሳኤ።
ሃ ማጻፋይ ኦይኪዳ ኩሜꬃ ቆፋ
ሻኬቲዳ ካዎቴꬃታ 1፡1—17፡41
ናቤ ኤላሳ 1፡1—8፡15
ዩሁዳ ካዎታኔ ኢስራኤሌ ካዎታ 8፡16—17፡4
ሳማሪያ ኩንዴꬅ 17፡5-41
ዩሁዳ ካዎቴꬅ 18፡1—25፡30
ሂዝቂያሳፔ ቢዲ ኢዮሲያሳ ጋካናስ 18፡1—21፡26
ኢዮሲያሳ ኣይሶ 22፡1—23፡30
ዩሁዳስ ዉርሴꬃ ካዎታ 23፡31—24፡20
ዬሩሳላሜ ኩንዴꬅ 25፡1-30
1
ናቤ ኤላሳኔ ካዎ ኣካዚያሳ
1 ኣካቤይ ሃይቂዳፔ ጉዬ ሞኣቤ ዴሬይ ኢስራኤሌ ዴሬ ቦላ ዴንዲዴስ። 2 ሄ ዎዴ ኣካዚያሲ ሳማሪያን ዲዛ ባ ኢልፒኔ ፖቄ ቦላፌ ማስኮቴራ ዱጌ ኩንዲዲ ሳኬቲዴስ፤ ሄሳ ጊሻስ ኢዚ፥ «ኣኔ ኢንቴ ቢዲ ታ ሳኮዛ ጊሻስ ታ ፓጻናኮ ኣቃሮኔ ኤቃ ጾሳ ባኣሊ-ዜቡላ ታስ ኦይቺቴ» ጊዲ ኣስ ኪቲዴስ።
3 ጎዳ ኪታንቻይ ቴሲቤ ዴሬ ኣስ ናቤ ኤላሳስ፥ «ኔኒ ዴንዳዳ ሳማሪያ ካዎይ ኪቲዳ ኣሳታራ ጋይታናስ ኬዛ ባዳ ሄ ኣሳታስ፥ ‹ኢንቴ ኣቃሮኔ ኤቃ ጾሳ ባኣሊ-ዜቡላ ኦይቻናስ ቢዛይ ኢስራኤሌን ጾሲ ባይንዳ ጊሻሴ?› ጋዳ ኢስታ ኦይቻ። 4 ሄሳ ጊሻስ ጎዳይ፥ ‹ኔ ኢቺዳ ሂጻፔ ዴንዳካ፤ ቱማፔ ኔ ሃይቃና› ጌስ» ጊዴስ፤ ሄሳፌ ጉዬ ኤላሲ ቢዴስ።
5 ኪቴቲ ቢዳ ኣሳቲ ካዎዛኮ ጉዬ ሲሚ ዪን ኢዚ ኢስታስ፥ «ኣይስ ሲሚ ዪዴቲ?» ጊ ኦይቺዴስ።
6 ኢስቲካ ኢዛስ፥ «ኢሳዴይ ኑናራ ጋይታናስ ዪዲ ጎዳይ፥ ‹ኢንቴ ኢንቴና ኪቲ ዬዲዳይሳኮ ሲሚ ቢዲ ኣቃሮኔ ኤቃ ጾሳ ባኣሊ-ዜቡላ ኦይቻናስ ኔኒ ኣስ ኪቲዳይ ኢስራኤሌን ጾሲ ባይንዳ ጊሻሴ? ሄሳ ጊሻስ ኔ ኢቺዳ ሂጻፔ ዴንዳካ፤ ቱማፔ ኔ ሃይቃና› ጊዴስ» ጊዳ።
7 ካዎዚካ ኢስታስ፥ «ኢንቴናራ ጋይታና ዪዲ ኢንቴስ ሄሳꬆ ጊዳይ ኢዚ ኣይ ማላ ኣሴ?» ጊዲ ኦይቺዴስ።
8 ኢስቲካ ኢዛስ፥ «ኑስ ዮቲዳይሲ ኢስኬራ ዲዛ ማይኦ ማይኢዴስ *ኢስኬራ ዲዛ ማይኦ ማይኢዴስ ጊዛይሲ ኣዴዚ ኢስካማ ጉሳ ጊዳና ዳንዳዬስ። ማቶ 3፡4፤ ማር 1፡6፤ ጼሳን ዳፎ ዳንጪዴስ» ጊዳ። ካዎዚ ኢስታስ፥ «ታ ኢዛ ኤራዲስ፤ ሄሲ ቴሲቤ ዴሬ ኣስ ኤላሳ» ጊዴስ።
9 ሄሳፌ ጉዬ ካዎዚ ሃምሳ ሃላቃዛ ኢቻሽ ታሙ ዎታዳራታራ ኤላሳኮ ዬዲዴስ። ሃምሳ ሃላቃዚ ኤላሲ ዲዛ ዙምቡላ ሁኤ ኬዚዲ፥ «ሃይሶ ጾሳ ኣሶ! ካዎይ ኔና ሃ ዱጌ ዎꬋ ጌስ» ጊዴስ።
10 ኤላሲካ ዛሪዲ ሃምሳ ሃላቃዛስ፥ «ታኒ ጾሳ ኣስ ጊዲኮ ሳሎፔ ታማይ ዎꬊዲ ኔናኔ ኔናራ ዲዛ 50 ኣሳ ሞ!» ጊዴስ። ሄሳፌ ጉዬ ታማይ ሳሎፔ ዎꬊዲ ሃምሳ ሃላቃዛኔ ኢዛራ ዲዛ ኣሳ ኡባ ዲፒ ሂስቲዴስ።
11 ካዎዚ ቃሴ ሃራ ሃምሳ ሃላቃኔ ኢቻሽ ታሙ ዎታዳራታ ኪቲዴስ፤ ሃምሳ ሃላቃዚካ፥ «ሃይሶ ጾሳ ኣሶ! ካዎይ ኔና ኤሶን ሃ ዎꬋ ጌስ» ጊዴስ።
12 ኤላሲካ ዛሪዲ፥ «ታኒ ጾሳ ኣስ ጊዲኮ ታማይ ሳሎፔ ዎꬊዲ ኔናኔ ኔናራ ዲዛ 50 ኣሳ ሞ!» ጊዴስ፤ ሄሳፌ ጉዬ ታማይ ሳሎፔ ዎꬊዲ ኢዛኔ ኢዛራ ዲዛ ኣሳ ዲፒ ሂስቲዴስ። ሉቃ 9፡34
13 ሄሳ ጊሻስ ካዎዚ ሄꬓንꬆ ሃምሳ ሃላቃዛኔ ኢዛራ 50 ኣስ ዬዲዴስ፤ ሃ ሄꬓንꬆ ሃምሳ ሃላቃዚ ቢዲ ኤላሳ ሲንꬃን ጉልባቲዲ፥ «ኣቤት ጾሳ ኣሶ! ታ ሼምፖይኔ ሃይታ ኔ ኣይሌ ኢቻሽ ታማታ ሼምፖይ ኔ ሲንꬃን ቦንቼቶ። 14 ሃይሳፌ ካሴ ሳሎፔ ዎꬊዳ ታማይ ናምኡ ሃምሳ ሃላቃታኔ ኢስታራ ዲዛ ኣሳታ ኡባ ሚዴስ፤ ሃኢ ጊዲኮ ታ ሼምፒያ ኔ ሲንꬃን ቦንቼቱ» ጊዴስ።
15 ጎዳ ኪታንቻዚ ኤላሳ፥ «ኔኒ ኢዛራ ዱጌ ዎꬋ፤ ኢዛስካ ባቦፋ!» ጊዴስ። ሄሳ ጊሻስ ኤላሲ ኢዛራ ኢሲፌ ካዎዛኮ ዱጌ ዎꬊዴስ። 16 ኢዚ ካዎዛስ፥ «ጎዳይ፥ ‹ኔኒ ኣቃሮኔ ኤቃ ጾሳ ባኣሊ-ዜቡላ ኔ ጊሻስ ኦይቻናስ ኣሳታ ኪታ ዬዲዳይ ኢስራኤሌን ጾሲ ባይንዳ ጊሻሴ? ኔኒ ሄሳ ኦꬂዳ ጊሻስ ሃኢ ኔ ኢቺዳ ሂጻፔ ሙሌካ ዴንዳካ፤ ቱሙ ኔ ሃይቃና› ጊዴስ» ጊዲ ዮቲዴስ።
17 ሄሳ ጊሻስ ኤላሲ ኢዛስ ዮቲዳ ጎዳ ቃላ ማላ ኣካዚያሲ ሃይቂዴስ። ኣካዚያሳስ ኣቱማ ናይ ባይንዳ ጊሻስ ኢዮሳፊጼ ና ኢራሜይ ዩሁዳ ዴሬ ቦላ ካዎቲዳ ናምኣንꬆ ላይꬃን ኢዛ ኢሻ ኢዮራሜይ ኢዛሶሆን ካዎቲዴስ። 18 ኣካዚያሲ ባ ዎዴን ኦꬂዳ ኦሶቲኔ ኢዚ ፖሊዳ ኦሶቲ ኡባይካ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?