1 ኢዩይ ካዎቲዳ ላፑንꬃ ላይꬃን ኢዮኣሲ ካዎቲዴስ፤ ኢዚ ዬሩሳላሜን ኡቲዲ 40 ላይꬅ ሃሪዴስ፤ ኢዛ ኣያ ሳቢዮ ጌቴቲዛራ ቤርሳቤሄ ካታማን ዬሌታዱስ። 2 ቄሴ ዮዳሄይ ታማርሲዛ ዎዴ ኡባን ኢዮኣሲ ጎዳ ሲንꬃን ሎኦ ሚሽ ኦꬂዴስ። 3 ጊዶ ኣቲን ዙምቡላታ ቦላን ጎይኒዛሶሆታ ꬋይሲቤና፤ ዴሬዚካ ሄ ሶሆታን ያርሾ ሺሾኔ ኤጻኔ ጩዋሴꬅ ጉጂ ጉጂ ቢዴስ።

4 ኢዮኣሲ ቄሴታ፥ «ዴሬዛ ቆዳን ሺቂዳ ሚሻ፥ ኣዲናን ጌሊዳ ሚሻ ቃሴካ ኣሳይ ባ ሼኔን ጎዳ ኬꬃስ ኢሚዳ ዱማ ዱማ ሚሻ ኡባ ኢሲሶ ሺሺቴ። ኬሳ 30፡11-16 5 ቄሴቲ ኢሶይ ኢሶይ ሚሻዛ ሺሺዛይታ ኩሼፔ ኤኬቶ፤ ሄ ሚሻዚ ኮሺዛ ማላ ጾሳ ኬꬃ ጊዶን ሞሬቲዳ ሶሆታ ኦራጺሳና ኬዞ» ጊዴስ።

6 ጊዶ ኣቲን ኢዮኣሲ ካዎቲን ቢዲ ናምኡ ታማኔ ሄꬓንꬆ ላይꬂ ጋካናስ ቄሴቲ ጾሳ ኬꬃዛ ጋርሳን ሞሬቲዳ ሶሆታ ኦራጺሲቤቴና። 7 ሄሳ ጊሻስ ኢዮኣሲ ቄሴ ዮዳሄኔ ሃራ ቄሴታካ ባኮ ጼይጊ ሺሺዲ፥ «ኣይስ ጾሳ ኬꬃ ጊዶን ሞሬቲዳይታ ዛሪ ሎኤꬆንታ ኣጊዴቲ?» ጊ ኦይቺዴስ። ቃሴካ፥ «ሃይሳፌ ሲንꬃን ሚሻይ ጾሳ ኬꬃዛ ጊዶን ሞሬቲዳይሳ ኦራጺሳናስ ኬዞ ኣቲን ሚሻ ኦይኪዛ ኣሳታፔ ኤኮፍቴ» ጊዴስ። 8 ቄሴቲካ ሄሳፌ ጉዬ ዴራፔ ሚሼ ሺሾንታ ማላኔ ጾሳ ኬꬃካ ባንታርካ ኦራጺሶንታ ማላ ቃላ ቃቺዳ።

9 ሄሳፌ ጉዬ ቄሴ ዮዳሄይ ኢሲ ሳጺኔ ኤኪዲ ኢዛስ ካማዛ ሉኪዲ ጾኤ ኬሲዴስ፤ ኤፊዲ ጾሳ ኬꬃን ጌሊዛሶፔ ኡሻቻ ባጋራ ያርሾ ያርሺዛሶሆዛ ኣቻን ዎꬂዴስ። ካሬዛ ናጊዛ ቄሴቲካ ጾሳ ኬꬃስ ዪዛ ሚሽ ኡባካ ሄ ሳጺኔዛን ጌልꬄቴስ። 10 ሳጺኔዛ ጊዶን ዳሮ ሚሺ ዲዛይሳ ቤዪ ቤኢዲ ካዎዛ ጻፌዚኔ ቄሴታ ሃላቃይ ዪዲ ዪዲ ጾሳ ኬꬃስ ዪዳ ሚሻ ቆዲ ቆዲዲ ካራጺቴን ጌልꬂ ቃቺ ዎꬄቴስ። 11 ሄ ሚሻዛ ሜዛኔይ ኤሬቲዳፔ ጉዬ ጎዳ ኬꬃዛ ኦሶ ኣላፌቴꬃን ኦሲሳና ማላ ሚሻዚ ዶሬቲዳ ኣሳታስ ኢሜቴስ፤ ሄሲካ ጾሳ ኬꬃ ኬጺዛ ኣናጼታስ፥ ጊምቤ ጊምቢዛይታስ፥ 12 ሹች ማሲዛይታስ፥ ሹቻፌ ዱማ ዱማ ሜꬋ ጊግሲዛይታሲኔ ጾሳ ኬꬃ ኦራጺሳናስ ሚꬃሲኔ ማሴቲዳ ሹቻስ ኬዜስ።

13 ጾሳ ኬꬃዛስ ጌሊዳ ሚሻፌ ጊዲኮ ጾሳ ኬꬃስ ሶ ጊዶ ኦሶስ ኮሺዛ ቢራ ጹኣታ፥ ታማ ቃጴታ፥ ዲስቴታ፥ ዲንኬታኔ ሃራ ዎርቃፌ ጊዲን ቢራፔ ኦሴቲዛ ሚሻታስ ኬዚቤና። 14 ሄ ሚሻፌ ጾሳ ኬꬃዛ ኦራጺሲዛይታስ ጻላ ቃንጼቲዴስ። 15 ኬꬃ ኦራꬂዛ ኣሳታስ ሚሽ ቃንጻናስ ዶሬቲዳ ኣሳቲ ሙሌራ ኣማኔቲዳይታ ጊዲዳ ጊሻስ ኢስታ ካሊ ጼሊዛዴ ኮሺቤና። 2ካዎ 22፡7 16 ቆሆ ጊሻስ ሺቂዛ ያርሾይኔ ናጋራ ጊሻስ ሺቂዛ ያርሾይ ጊዲኮ ሃይቲ ቄሴታስ ጊዲዳ ጊሻስ ጾሳ ኬꬃ ጌሌቴና። ሌዌ 7፡7 17 ሄ ዎዴ ኣራሜ ካዎ ኣዛሄሌይ ኬዚዲ ጌቴ ቦላ ሜቶ ጋꬂዲ ኢዞ ኦይኪዴስ፤ ቃሴካ ዬሩሳላሜ ቦላ ሜቶ ዬጋናስ ሄ ሲሚዴስ። 18 ዩሁዳ ካዎ ኢዮኣሲ ጊዲኮ ካሴ ኢዛ ኣዋቲ ዩሁዳ ካዎቲ ኢዮሳፊጼይ፥ ኢዮራሜይ፥ ኣካዚያሲ ጾሳስ ዱማ ሻኪዳ ሚሻታ ኡባ ኢዚ ባርካ ሻኪ ዎꬂዳ ዱማቲዳ ኢሞታታ ሄሳꬆካ ጾሳ ኬꬃኒኔ ካዎ ሚሻታ ዎꬂዛ ሚንጃ ኬꬃን ቤቲዳ ዎርቃ ኡባ ኢሲ ቦላ ሺሺዲ ኣራሜ ካዎ ኣዛሄሌስ ዬዲዴስ፤ ኣዛሄሌይ ዬሩሳላሜ ዩስ ኣጊዲ ጉዬ ሲሚዴስ።

19 ኢዮኣሲ ባ ካዎቴꬃ ላይꬃታን ኦꬂዳ ሃራ ኦሶቲኔ ኢዚ ፖሊዳ ሃኖቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ? 20 ኢዛ ሹሜቲካ ኢዛ ቦላ ዴንዲዳ፤ ዱጌ ሲላ ዎꬂዛ ኦጌዛ ቦላ ቤቴሚሎኔን ኢዛ ዎꬊዳ። 21 ኢዛ ዎꬊዳይቲካ ሹሜቲ ሺምኣታ ና ዮዛካሬኔ ሾሜሬዬ ና ዮዛባዴ፤ ኢዚ ሃይቂዲ ካሴ ባ ኣዋታ ኡባታ ማላ ዳዊቴ ካታማን ሞጌቲዴስ፤ ኢዛ ና ኣማሲያሲ ኢዛሶሆን ካዎቲዴስ።