1 ኢዮኣቄሜይ ካዎቲዛ ዎዴ ባቢሎኔ ካዎ ናቡካዳናጾሬይ ዩሁዳ ቦላ ዎራጂዴስ፤ ኢዮኣቄሜይካ ኢዛስ 3 ላይꬅ ጊሪዴስ። ሄሳፌ ጉዬ ኢዚ ባ ቆፋ ላሚዲ ናቡካዳናጾሬ ቦላ ማካሊዴስ። ኤር 25፡1-38፤ ዳኔ 1፡1-2 2 ጎዳይ ባቢሎኔፔ፥ ኣራሜፔ፥ ሞኣቤፔኔ ኣሞኔፔ ፓንጋታ ኢዮኣቄሜ ቦላ ዬዲዴስ። ጎዳይ ባ ኦሳንቻታ ናቤታ ባጋራ ካሴ ዮቲዳ ቃላ ማላ ኢስቲ ዩሁዳ ꬋይሳና ማላ ሃይታ ዬዲዴስ። 3 ኢዚ ኢስታ ባ ሲንꬃፌ ሃሳና ማላ ሃይቲ ሃ ዮኦቲ ኡባይ ጎዳይ ኣዛዚዳ ማላ ዩሁዳ ቦላ ፖሌታና ዳንዳይዳ፤ ሄሲካ ሚናሴይ ኦꬂዳ ናጋራ ጊሻሲኔ ኢዚ ፖሊዳ ሃኖ ኡባ ጊሻሳ፤ 4 ቃሴካ ኢዚ ጺሎ ሱꬅ ጉሲዳ ጊሻሳ። ዬሩሳላሜይካ ጺሎ ሱꬃን ኩማና ማላ ኢዚ ኦꬂዳ ጊሻስ ጎዳይ ኢዛ ማራናስ ኮዪቤና።

5 ኢዮኣቄሜ ካዎቴꬃ ላይꬃን ሃኒዳ ሃኖቲኔ ኦሴቲዳ ሃራ ኦሶቲ ኡባይ ዩሁዳ ካዎታ ታሪኬ ማጻፋን ጻፌቲ ዴስ ጊዴኔ? 6 ኢዮኣቄሜይካ ሃይቂዲ ባ ኣዋታን ጋይቲዴስ፤ ኢዛ ና ኢዮኣኪኔይ ኢዛሶሆን ካዎቲዴስ።

7 ባቢሎኔ ካዎይ ሃꬂ ባይንዳ ጊብጼ ሻፋታፔ ቢዲ ኤፊራጺሴ ሻፋ ጋካናስ ኢዚ ሃሪዛ ዴሬታ ኡባ ኢዛ ኩሼፔ ዎꬂ ኤኪዳ ጊሻስ ጊብጼ ካዎዚ ባ ዴሬፔ ዛሪ ኦላ ኦሌታናስ ኬዚቤና።

8 ኢዮኣኪኔይ ካዎቲዛ ዎዴ ኢዛስ ላይꬃይ 18፤ ኢዚ ዬሩሳላሜን ኡቲዲ 3 ኣጊና ሃሪዴስ፤ ኢዛ ኣያ ኔሂሺቶ ጌቴታዉስ፤ ኢዛ ዬሩሳላሜ ኣስ ኤልናታኔ ና። 9 ካሴ ኢዛ ኣዋይ ኦꬆይሳꬆካ ኢዮኣኪኔይ ጎዳ ሲንꬃን ኢታ ኦሶ ኦꬂዴስ።

10 ሄ ዎዴ ባቢሎኔ ካዎ ናቡካዳናጾሬ ኦላ ጋዳዋቲ ዬሩሳላሜ ዪዲ ካታማዮ ጊዶꬂዳ። 11 ኦላ ጋዳዋቲ ካታማዮ ጊዶꬂዛ ዎዴ ናቡካዳናጾሬይ ባ ሁኤራ ሄ ካታማዮ ዪዴስ። 12 ዩሁዳ ካዎ ኢዮኣኪኔ ኣያ፥ ኢዛ ኣዣባቲ፥ ዳናቲኔ ሹሜቲ ኡባይ ባንታ ኩሼ ባቢሎኔ ካዎስ ኢሚዳ፤ ባቢሎኔ ካዎይ ካዎቲዳ ኦስፑንꬃ ላይꬃን ኢዮኣኪኔ ዲኢ ኤኪ ቢዴስ። ኤር 22፡24-30፤ 24፡1-10፤ 29፡1-2 13 ጎዳይ ካሴቲ ዮቲዳ ማላ ናቡካዳናጾሬይ ጾሳ ኬꬃኒኔ ካዎ ኬꬃን ዲዛ ኣቆታ ኡባ ዴንꬂ ኤፊዴስ። ኢስራኤሌ ካዎ ሶሎሞኔይ ጎዳ ኬꬃስ ዎርቃፌ ኦሲሲዳ ሚሽ ኡባ ኤኪ ቢዴስ። 14 ቃሴካ ዬሩሳላሜ ኣሳ ኡባ፥ ኦላ ጋዳዋታኔ ኦላንቻታ ኡባ፥ ሂላንቻታኔ ዎጋጬታ ኡባ ኢሲ ቦላ 10,000 ኣስ ዲኢ ኤኪ ባ ዴሬ ኤፊዴስ፤ ሄን ዴሬዛን ኣቲዳይቲ ፑꬃ ማንቆታ ጻላ።

15 ናቡካዳናጾሬይ ኢዮኣኪኔ ዲኢ ኤኪዲ ባቢሎኔ ኤፊዴስ፤ ሄሳꬆካ ካዎዛ ኣዬዮ፥ ኢዛ ማቼታ፥ ኢዛ ሹሜታኔ ዴሬን ኤሬቲዳ ጊታ ኣሳታ ዬሩሳላሜፔ ባቢሎኔ ኤፊዴስ። ሂዚ 17፡12 16 ቃሴካ ባቢሎኔ ካዎይ ሚኖኔ ኦላስ ጋኪዳ 7,000 ኦላንቻታ፥ 1,000 ሂላንቻታኔ ዎጋጬታ ኢሲ ቦላ ዲኢ ኤኪዲ ባቢሎኔ ኤፊዴስ። 17 ሄሳፌ ጉዬ ኢዮኣኪኔ ኣዋ ኢሻ ማታኒያ ኢዛሶሆን ካዎꬂዴስ፤ ኢዛ ሱንꬃ ላሚዲ ሴዴቂያሳ ጊ ሱንꬂዴስ።ኤር 37፡1፤ ሂዚ 17፡13

18 ሴዴቂያሲ ካዎቲዛ ዎዴ ኢዛስ ላይꬃይ 21፤ ኢዚ ዬሩሳላሜን ኡቲዲ 11 ላይꬅ ሃሪዴስ፤ ኢዛ ኣያ ኣምጻሎ ጌቴታዉስ፤ ኢዛ ሊቢና ኣስ ኤርማሳ ቢዮ። ኤር 27፡1-22፤ 28፡1-17 19 ኢዮኣቄሜይ ኦꬂዳ ማላ ኢዚካ ጎዳ ሲንꬃን ኢታ ሚሽ ኦꬂዴስ። 20 ሃይሲ ኡባይ ዬሩሳላሜ ቦላኔ ዩሁዳ ቦላ ጋካናስ ዳንዳይዳይ ጎዳ ሃንቆ ጋሶና፤ ዉርሴꬃን ኢዚ ኢስታ ባ ሲንꬃፌ ሃሲዴስ።

ሴዴቂያሲ ባቢሎኔ ካዎ ቦላ ማካሊዴስ። ሂዚ 17፡15