ጴጽሮሲ
ጻፊዳ ናምኣንꬆ ኪታ
ጊዶ ቆፋ
ሃዋሬ ጴጽሮሲ ናምኣንꬆ ኪታ ጻፊዳይ ዱማ ዱማሶን ዲዛ ቤኒ ኣማኒዛ ኣሳሳ፤ ሄ ኢዛ ኪታስ ኣይፌ ዮኦይ ዎርዶ ኣስታማሬታ ኢታ ኦሶኔ ኢስታ ቲሚርቴ ጋሶን ዪዳ ባላ ዴኦ ኣሳይ ኣጋና ማላሳ። ሄ ዎዴ ሜꬌቲዳ ሜቶታ ቢርሻናስ ዳንዳያናይ ዬሱስ ኪርስቶሳ ካሴ ባ ኣይፌራ ቤኢዳይታኔ ኢዚ ታማርሲሺን ባ ሃይꬃን ሲዪዳ ኣሳቲ ኢሚዳ ቲሚርቴ ባጋራ ጾሳ ጊሻሲኔ ጎዳ ዬሱስ ኪርስቶሳ ጊሻስ ቱሙ ኤራቴꬅ ዴሞ። ጻፌዚ ሃራፔካ ሎኤꬂ ናጌቲዳይ፥ «ኪርስቶሲ ሃ ሲሚ ዬና» ጊዛ ዎርዶ ቲሚርቴ ጊሻሳ፤ ኢዚ ሄሳ ጊሻስ ዮቲሼ፥ «ኪርስቶሲ ኤሌሊ ሲሚ ዮንታ ማላ ኢዛ ዲጊዛይ ኣሲ ዉሪካ ባ ናጋራፔ ሲሚዲ ኣታና ማላፔ ኣቲን ኦኒካ ꬋያና ማላ ኮዮንታ ጊሻሳ» ጌስ።
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1-2
ኣማኒዛይታ ጼይጌቴꬅ 1፡3-21
ዎርዶ ኣስታማሬታ 2፡1-22
ኪርስቶሳስ ናምኣንꬆ ዩሳ 3፡1-18
1
1 ዬሱስ ኪርስቶሳ ኦሳንቻኔ ኢዛን ሃዋሬ ጊዲዳ ሲሞና ጴጽሮሳፔ፥ ኑ ጎዳፔኔ ኑ ꬋሌ ዬሱስ ኪርስቶሳፔ ቤቲዳ ጺሎቴꬃ ባጋራ ኑ ዴሚዳ ኣማኖ ማላ ቦንቼቲዳ ኣማኖ ዴሚዳይቶ! 2 ጾሳኔ ኑ ጎዳ ዬሱሳ ኤሮን ኪያቴꬂኔ ሳሮይ ኢንቴስ ጊዶ።
ጾሳን ጼይጌቲ ኢዛን ዶሬቴꬅ
3 ባ ቦንቾኒኔ ባ ኪያቴꬃን ኑና ጼይጊዳይሳ ኑኒ ኢዛ ኤሪዳ ጊሻስ ኢዛ ጾሳቴꬃ ዎልቃይ ዴኦሲኔ ጾስ ጎይናናስ ኑስ ኮሺዛዝ ኡባ ኢሚዴስ። 4 ባ ቦንቾኒኔ ባ ኪያቴꬃን ቦንቾ ዎጋይ ዲዛይሳኔ ኬሂ ጊታ ጊዲዳ ኢዛ ሂዶታ ኑኒ ዴሚዶስ፤ ሄይታንታ ባጋራ ኢንቴ ኢታ ኣሞ ጋሶን ሃይሳ ሃ ኣላሜዛን ዲዛ ꬋዮፔ ኬሲ ኤኪዲ ጾሳቴꬃ ሃኖዛፔ ኢዛራ ጊሼቲዛዴንታ ጊዲዴታ።
5 ሄሳ ጋሶን ሃይሳፌ ካሊዛ ሚሻቲ ኢንቴስ ጉጄታና ማላ ኣኔ ሚኒቴ። ኣማኖ ቦላ ኪያቴꬅ፥ ኪያቴꬃ ቦላ ኤራቴꬅ፥ 6 ኤራቴꬃ ቦላ ባና ሃሮ፥ ባና ሃሮ ቦላ ዳንዳያን ሚኔቴꬅ፥ ዳንዳያን ሚኔቴꬃ ቦላ ጾሳስ ጎይኖ፥ 7 ጾሳስ ጎይኖ ቦላ ኢሻንታራ ዶሴቴꬅ፥ ኢሻንታራ ዶሴቴꬃ ቦላ ሲቆ ጉጂቴ። 8 ሃይቲ ኢንቴስ ዳሪ ዲዛዝ ጊዲኮ ሄይቲ ኢንቴና ኢንቴ ጎዳ ዬሱስ ኪርስቶሳ ኤሮን ጎኣይኔ ኣይፌይ ባይንዳይታ ጊዶንታ ማላ ናጋና። 9 ሃይቲ ሃ ሚሻቲ ባይንዳ ኣሲ ጊዲኮ ሃሆን ዲዛ ሚሽ ዴሞንታ ቆቄ ኣሳ ማላ፤ ሄሳዴይ ካሴ ኣꬊዳ ባ ናጋራፔ ጌዪዳይሳካ ባሌቲዴስ።
10 ታ ኢሻቶ! ሄሳ ጊሻስ ኢንቴ ጼይጌቲዳይሳኔ ዶሬቲዳይሳ ሻኪ ኤራናስ ኬሂ ኣሞቲዛይታ ጊዲቴ፤ ኢንቴ ሄሳꬆ ኦꬂኮ ሙሌካ ꬉጴቴኬታ። 11 ኢንቴ ሄሳꬆ ሃንኮ ሜርናፔ ሜርናስ ዲዛ ኑ ጎዳ ዬሱስ ኪርስቶሳ ካዎቴꬃን ጌላናስ ኢንቴስ ኩሜꬃ ማታይ ኢሜታና።
12 ኢንቴ ሃይታ ሃ ዮኦታ ኤሪዲኔ ኢንቴ ኤሪዳ ቱማን ሚኒ ዴኢኮካ ሄይታ ታኒ ኢንቴና ቆፍሳናፔ ጉዬ ጊኬ። 13 ታኒ ፓጻ ዲዛ ዎዴ ኡባን ኢንቴና ኡባ ዎዴ ዴንꬄꬃናይሲ ቤሲዛዝ ሚሳቲዲ ታስ ቤቴስ። 14 ኑ ጎዳ ዬሱስ ኪርስቶሲ ታስ ቆንጪሲዳ ማላ ታኒ ሃይሳ ኣላሜዛፔ ኤሌላዳ ሃይቃናይሳ ታ ኤራይስ። 15 ታኒ ሃኢ ሚኔቲዛይ ታ ሃይቃዳ ኢንቴፌ ሻኬቲዳፔ ጉዬ ኢንቴ ሃይታ ሃ ዮኦታ ኡባ ዎዴ ቆፓና ማላሳ።
ኪርስቶሳ ቦንቾ ባ ኣይፌን ቤኢዳ ማርካታ
16 ጎዳ ዬሱስ ኪርስቶሳ ዎልቃፌ ኢዛስ ዩሳ ጊሻስ ኑ ኢንቴስ ዮቲዳ ዎዴ ኑኒ ኑ ኣይፌራ ኢዛ ቦንቾዛ ቤኢዲ ማርካቶስ ኣቲን ኣሲ ጮ ሜላ ሜꬊ ኤኪዲ ጌኔ ሃሳይዛ ሃይሲኤ ማላ ጊዴና። 17 «ታኒ ኢዛን ኡፋዬቲዛዴይ ታ ዶሲዛ ታ ናዚ ሃይሳ» ጊዛ ቃላ ጊሪሳይ ጊታ ቦንቾራ ኢዛስ ዪዳ ዎዴ ኢዚ ጾሳ ኣዋፔ ቦንቾኔ ጊታቴꬅ ኤኪዴስ። 18 ኑኒ ኢዛራ ኣንጄቲዳ ዙማ ቦላ ዲሼ ሃይሳ ሳሎፔ ሃ ዪዳ ጊሪሳ ኑኒ ኑ ሃይꬃን ሲዪዶስ። ማቶ 17፡1-5፤ ማር 9፡2-7
19 ሄሲ ዉሪካ ካሴ ናቤቲ ዮቲዳይሲ ቱሙ ጊዲዳይሳ ሎኤꬂ ቆንጪሴስ፤ ሄሳ ጊሻስ ኢንቴ ꬉማሶን ዲዛ ጾምፔስ ሎኤꬂ ናጌቲዛይሳ ማላ ካሴ ናቤቲ ዮቲዳይሳ ሎኤꬂ ናጌቲቴ። ኢንቴ ሄሳꬆ ኦꬃናይ ጋዴይ ዎንታናስ፥ ባዞይ ዞኣና ጋካናሲኔ ዎንቲ ማꬃ ጾሊንቴዚ ኢንቴ ዎዚናን ፖኣና ጋካናሳ። 20 ኢንቴ ሃራፔ ኣꬂ ቆፓናስ ቤሲዛይ ጌሻ ማጻፋን ዲዛ ቲንቢቴ ቃላን ዮቴቲዳ ኣይ ሚሺካ ኦኒካ ባስ ሚሳቲዳ ማላ ቢርሻናስ ቤሴና። 21 ኣይ ቲንቢቴይካ ኣሳ ሼኔ ማላ ሙሌካ ዪቤና፤ ጊዶ ኣቲን ቲንቢቴይ ዉሪካ ጺሎ ኣያናይ ካሌꬂን ኢዛ ካሊዳ ኣሳቲ ጾሳፌ ኤኪዲ ዮቲዳዛ።