2ሳሜላ ማጻፋ
ጊዶ ቆፋ
ናምኣንꬆ ሳሜላ ማጻፋይ ኮይሮ ሳሜላ ማጻፋፔ ካሊዛይሳ ጊዲሺን ዳዊቲ ኮይሮ ዱጌሃ ባጋራ ዩሁዳ ካዎ [1-4]፥ ጉꬃራ ጋምኢሼ ፑዴሃ ባጋራ ዲዛ ኢስራኤሌካ ጉጂዲ ዴሬ ኡባስ ካዎ ጊዲዲ ሃሪዳይሳ ዮቲዛ ታሪኬ [5-24]። ማጻፋዚ ዳዊቲ ባ ካዎቴꬃ ኣሳናሲኔ ባ ማታ ሚንꬃናስ ዴራ ጊዶኒኔ ዴራፔ ካሬራ ዲዛ ሞርኬታራ ኢዚ ባጼቲዳ ሚኖ ባጼ ፓቲ ዮቴስ። ዳዊቲ ኣማኖን ሚኖኔ ጾሳ ሲቂዛዴ፤ ሄሳꬆካ ዴሬዛ ኣቻን ኣማኔቲዳዴ ጊዲዳይሳ ቆንጪሴስ፤ ሃራይካ ኢዚ ኢሲ ኢሲ ዎዴ ሜንጼ ኢታ ኦሶ ኦꬂዛይሳኔ ባ ኣሾ ኣሞ ፖላናስ ዳሮ ኢታ ናጋራ ኦꬂዳይሳ ፓቲ ዮቴስ። ጊዲኮካ ጾሳ ናቤ ናታኔይ ኢዛኮ ሺቂዲ ኢዚ ኦꬂዳ ናጋራ ኢዛ ኤሪሲን ኢዚ ባ ናጋራ ፓጺዲ ጾሲ ኢዛስ ኢሚዳ ቂጻቴዛ ኤኪዴስ።
ዳዊቴ ዴኦይኔ ኢዚ ኦꬂዳ ኦሶይ ኢስራኤሌ ኣሳ ዳሮ ሎኢዳ ጊሻስ ኢዛፔ ካሊዛ ዎዴታን ዴራ ቦላ ሜቶይ ጋኪሺን ጋኪሺን ኢስቲ ባንታስ ሃራ ካዎꬃናስ ኮይዛ ዎዴ፥ ዳዊቴ ና ዎይኮ ዳዊቴ ዛሬ ጊዲዲ ዳዊቴ ማላ ኣይሲዛ ኣስ ዴማናስ ኣሞቴቴስ።
ሃ ማጻፋይ ኦይኪዳ ኩሜꬃ ቆፋ
ዩሁዳን ዳዊቴ ካዎቴꬅ 1፡1—4፡12
ኩሜꬃ ኢስራኤሌን ዳዊቴ ካዎቴꬅ 5፡1—24፡25
ኢዛስ ኮይሮ ካዎቴꬃ ላይꬃታ 5፡1—10፡19
ዳዊቴኔ ቤርሳቤሆ 11፡1—12፡25
ሜቶኔ ዋዬ 12፡26—20፡26
ዉርሴꬃ ላይꬃታ 21፡1—24፡25
1
ዳዊቲ ሳኦሌ ሃይቆ ሲስ
1 ሳኦሊ ሃይቂዳፔ ጉዬ ዳዊቲ ኣማሌቄ ኣሳ ኦሊ ጾኒዲ ሲሚዴስ፤ ጺጊላጌንካ ናምኡ ጋላስ ጋምኢዴስ። 2 ሄꬓንꬆ ጋላስ ዳኬቲዳ ማይኦ ማይኢዲ ባ ሁኤ ቦላ ጉዱላ ላሊዲ ኢሲ ናቴꬃ ና ዳይሲ ሳኦሌ ጉታፔ ዪዴስ። ዳዊቴኮ ጋኪዳ ማላ ዛቁልꬅ ዚርጺ ጊዲ ቦንቾስ ኩሼ ዴንꬂዴስ።
3 ዳዊቲካ ኢዛ፥ «ኔ ኣዋፔ ያዲ?» ጊዲ ኦይቺዴስ።
ኢዚ ቃሴ፥ «ታኒ ኢስራኤሌ ኣሳይ ዲዛሶፔ ኬሳ ኤካ ያዲስ» ጊዴስ።
4 ዳዊቲ ቃሴ ኢዛ፥ «ኣዜ ዋኒዳይ ኣኔ ታስ ኡባ ዮታ» ጊዲ ኦይቺዴስ።
ኢዚካ ዳዊቴስ፥ «ኣሳዚ ኦላሶፔ ባቃቲዴስ፤ ዳሮይ ኩንዲዴስ፤ ሳኦሊኔ ኢዛ ና ዮናታኔይ ሃይቂዳ» ጊዴስ።
5 ሄሳፌ ጉዬ ዳዊቲ ዎሬዛ ኢዛስ ዮቲዳ ናዛ፥ «ሳኦሊኔ ኢዛ ና ዮናታኔይ ሃይቂዳይሳ ኣዛን ኤራዲ?» ጊ ኦይቺዴስ።
6 ዎሬዛ ኢዛስ ዮቲዳ ናቴꬃ ናዚ ኢዛስ ዛሪዲ፥ «ቶሮንታ ዳሼ ታኒ ፑዴ ጊልቦኣ ዙማ ቦላ ኬዛዲስ፤ ሳኦሊ ሄን ባ ቶራ ቦላ ዜምፒ ዲሺን ፓራ-ጋሬቲኔ ቶጋ ኣሳይ ጎዴሬꬂሼ ኢዛ ቦላ ጋኪ ዎꬊዳ። 7 ኢዚካ ጉዬ ሲሚ ጼሊዲ ታና ቤኢዲ ጼይጊዴስ፤ ታኒካ፥ ‹ታ ኔስ ኣይ ኦꬆ?› ጋዲስ።
8 «ኢዚካ ታና፥ ‹ኔ ኦኔ?› ጊ ኦይቺዴስ። ታኒካ ኢዛስ፥ ‹ታኒ ኣማሌቄ ኣሳ› ጋዳ ዮታዲስ።
9 «ኢዚካ ታስ፥ ‹ታ ሃይቃናስ ቶቃይስ፤ ጊዶ ኣቲን ታስ ሼምፖይ ኬዞንታ ኢጺዴስ፤ ዛይ ሃ ያ፤ ታና ሼምፒሳ› ጊዴስ። 10 ሂስቲን ታኒ ኢዚ ኩንዲቺዳፔ ጉዬ ኣቶንታይሳ ኤራዳ ታ ኢዛኮ ሺቃዳ ኢዛ ዎꬋዲስ። ኢዛ ሁኤ ቦላ ዲዛ ካላቻዛኔ ኢዛ ቄሴ ሳጋዮዛ ኤካዳ ሄኮ ታ ጎዳስ ኤሃዲስ» ጊዴስ። 1ሳሜ 31፡1-6፤ 1ታሪ 10፡1-6
11 ሄሳፌ ጉዬ ዳዊቲኔ ኢዛራ ዲዛ ኣሳይ ኡባይ ባንታ ማይኦ ዳኪዳ። 12 ኢስቲ ማሻን ሲፌቲዳ ጊሻስ ሳኦሌሲኔ ኢዛ ና ዮናታኔስ፥ ጎዳ ኦላንቻታሲኔ ኩሜꬃ ኢስራኤሌ ኣሳስ ካዮቲዳ፥ ዬኪዳኔ ኦማርስ ጋካናስ ጾሚዳ።
13 ዳዊቲ ቃሴ ሄ ዎሬዛ ኢዛስ ኤሂዳ ናቴꬃዛ፥ «ኔ ኣዋፔ ያዲ?» ጊ ኦይቺዴስ። ናዚካ፥ «ታኒ ኔ ዴሬን ቤቲ ዲዛ ኣማሌቄ ኣሳ ና» ጊዴስ።
14 ዳዊቲ ቃሴ፥ «ሂስቲን ኔኒ ጎዳይ ቲይዳይሳ ꬋይሳናስ ኔ ኩሼ ዋና ጻላ ዴንꬃዲ?» ጊ ኦይቺዴስ።
15 ሄሳፌ ጉዬ ዳዊቲ ናቴꬃታፔ ኢሳ ጼይጊዲ፥ «ኔኒ ኢዛኮ ሺቃዳ ኢዛ ዎꬋ» ጊዴስ። ሄ ናቴꬃዚ ኣማሌቄዛ ጫዲ ዎꬊዴስ። 16 ዳዊቲካ ኣማሌቄዛ፥ « ‹ጎዳይ ቲይዳይሳ ታኒ ዎꬋዲስ› ጋዳ ኔ ቦላ ኔርካ ኔ ማርካቲዳ ጊሻስ ኔ ሱꬃ ጎሜይ ኔ ቦላ ጊዶ!» ጊዴስ።
ሳኦሌ ጊሻሲኔ ዮናታኔ ጊሻስ ሺቂዳ ዚላሳ ጊንጾ
17 ዳዊቲ ሳኦሌ ጊሻሲኔ ዮናታኔ ሃይቆ ጊሻስ ዚላሊሼ ዬኪዴስ። 18 ቃሴካ፥ «ዎንዳፌ ሚላስ» ጌቴቲዛ ዚላሳ ዩሁዳ ዴራ ታማርሳና ማላ ኣዛዚዴስ። ሄሲ ያሻሬ ማጻፋን ጻፌቲ ኡቲዴስ። ኢያ 10፡13
19 «ሃይሶ ኢስራኤሌ!
ኔ ቦንቾይ ዙምቡላታ ቦላ
ጫዴቲ ሃይቂዴስ፤
ኦላ ቃራቲ ዋኒ
ሃይሳꬆ ኩንዲዶ!
20 «ፊሊስጼሜ ማጫ ናይቲ
ኡፋዬቶንታ ማላ፥
ቃጻሬቶንታ ኣሳ ማጫ ናይቲ
ኢሊሎንታ ማላ፥
ሃይሳ ጌቴን ዎሬሶፒቴ፤
ኣስቄሎናንካ ኣዋጆፍቴ።
21 «ኢንቴኖ ጊልቦኣ ዙማቶ!
ኢንቴ ቦላ ኢራይ ቡኮፎ፤
ጻዛይካ ኢንቴ ቦላ ዶፖ፤
ያርሾስ ጊዲዛ ካꬂ
ኢንቴ ጎሻ ቢታን ሞኮፎ።
ሄን ኦላ ቃራዛ
ጎንዳሌይ ቱኒዴስ፤
ሳኦሌ ጎንዳሌይ
ሃይሳፌ ጉዬን
ዛይቴን ቁጬቴና።
22 ዮናታኔ ዎንዳፌይ
ዎꬎንታ ሲሚ ኤሬና፤
ሳኦሌ ማሻይካ
ሞርኬ ቃንጼሬꬂ ዬጌስ፤
ዎልቃማታካ
ሜንꬄሬꬂ ዬጌስ፤
ኢዛ ሞርኬታካ ዎꬊዴስ።
23 «ሳኦሊኔ ዮናታኔይ
ሼምፖራ ፓጻ ዲሼ
ሲቄቲዛይታኔ ቆፋን ጋይቲዛይታ።
ሃይቂሼካ ሻኬቶንታይታ፤
ጎሌ ካፎፔ ፒላቲዛይታ፤
ጋሞፌካ ሚኒዛይታ።
24 «ኢንቴኖ ኢስራኤሌ ማጫሳቶ!
ኦቻ ቴራ ሚሳቲዛ ኣልኦ
ቃሚሳ ኢንቴና ማይዚዳ፤
ኢንቴ ማይኦዛ ዎርቃ
ጺባቤን ኣሌቂሲዳ፤
ሳኦሌስ ዬኪቴ።
25 «ኦላ ቃራቲ
ዋኒ ሃይሳ ማላ ኦላሶን ኩንዲዶ!
ዮናታኔይ ኔ ዙምቡላታ ቦላ
ጫዴቲ ሃይቂዴስ።
26 ታ ኢሻ ዮናታኔ!
ታኒ ኔ ጊሻስ ካዮታዲስ፤
ኔ ታስ ኬሃ ኣልኦኮሺን፤
ኔ ሲቆይ ታና
ማላሊሲዛዛኮሺን
ማጫ ሲቆፔካ ኬሂ
ኣꬌስኮሺን።
27 «ኦላ ቃራቲ ዋኒ ኩንዲዶ!
ኦላ ማሳራቲካ ዋኒ
ሃዳ ጊዳኔ!»