7
ጾሲ ዳዊቴስ ኢሚዳ ሂዶታ
(1ታሪ 17፡1-15)
1 ካዎዚ ባ ካዎቴꬃ ኬꬃን ዎፑ ጊ ኡቲዳፔኔ ጎዳይ ኢዛ ዩሾን ዲዛ ኢዛ ሞርኬታፔ ሼምፒሲዳፔ ጉዬ፥ 2 ናቤ ናታኔስ፥ «ሄኮ ታኒ ዚጋፔ ኬጼቲዳ ካዎቴꬃ ኬꬃን ዳይስ፤ ጾሳ ጫቆ ቃላ ታቦታይ ጊዲኮ ዱንካኔን ዴስ» ጊዴስ።
3 ናታኔይካ፥ «ጎዳይ ኔናራ ጊዲዳ ጊሻስ ኔ ቆፒዳ ኡባ ኦꬃ» ጊዴስ።
4 ሄ ጋላሳ ኦማርስ ጎዳ ቃላይ ናታኔኮ ዪዲ፥ 5 «ኔኒ ባዳ ታ ኣይሌ ዳዊቴስ፡ ታ ኢዛን ዳና ኬꬅ ኔ ኬጻካ። 6 ታኒ ኢስራኤሌ ኣሳ ጊብጼፔ ኬሶሶፌ ዶማዳ ሃች ጋካናስ ዱንካኔ ታስ ኣቆሶ ሂስታዳ ኢሲሶፔ ሃራሶ ዩያ ዩያ ዴኣዲስ ኣቲን ኬꬃን ዴኣቤኬ። 7 ታኒ ኢስራኤሌ ኣሳራ ቢዳሶ ኡባን ታ ዴሬ ኢስራኤሌ ናጋና ማላ ታ ኣዛዚን ካሌꬂዛይታፔ ኢሳ፥ ‹ኔ ታስ ዚጋ ሚꬃፌ ኣይስ ኬጻቤኪ?› ጊዳዴይ ዲዜ?
8 «ሃኢካ ታ ኣይሌ ዳዊቴስ ኡባፌ ዎልቃማ ጎዳይ፡ ታ ዴሬ ኢስራኤሌ ኔ ኣይሳና ማላ ታ ኔና ዴንꬃዲስ፤ ዶርስ ሄሚዛሶሆፔ ታ ኔና ኤካዲስ። 9 ኔ ቢዳሶ ኡባን ታ ኔናራ ጊዳዲስ፤ ኔ ሞርኬታ ኡባ ታ ኔ ሲንꬃፌ ꬋይሳዲስ፤ ሃኢካ ኢስታ ሱንꬃይ ቢታ ቦላ ኬሂ ኤሬቲዳ ዳሮ ጊታ ኣሳታፔ ኢሳ ሱንꬃ ማላ ታ ኔ ሱንꬃ ꬎቂሳና። 10 ኢዛስ ቡዞ ዱሳሶይ ዳና ማላ ሃይሳፌ ቃጾንታ ማላ ታ ዴሬ ኢስራኤሌስ ሶሆ ኢማናኔ ሚንꬃና። ሃይሳፌ ካሴ ሃኒዳ ማላ ሃይሳፌ ጉዬ ኢታ ዴሬይ ኢስታ ኡንኤꬄና። 11 ታ ዴሬ ኢስራኤሌ ካሌꬂዛይታ ታ ሹሚዳ ዎዴፔ ዶሚዲ ኢስቲ ኢዛ ቦላ ኦꬂዳይሳꬆ ሃይሳፌ ጉዬ ኢዛ ቦላ ኦሴቴና፤ ሄሳꬆካ ኔ ሞርኬታ ኡባፌ ታ ኔና ናጋና። ጎዳይ ባ ሁኤራ ኬꬅ ኔስ ኬጻናይሳ ኢዚ ዮቴስ። 12 ኔ ላይꬃ ዉርሳዳ ካሴ ኔ ኣዋታኔ ጋይቲዛ ዎዴ ኔና ላታና ዜሬꬅ ታ ኔፔ ኬሳና፤ ኢዛ ካዎቴꬃካ ታ ሚንꬃና።ማዛ 89፡3-4፤ 132፡11፤ ዮሃ 7፡42፤ ሃዋ 2፡30 13 ታ ሱንꬃስ ኬꬅ ኬጻናይ ኢዛ፤ ታኒካ ኢዛ ካዎቴꬃ ሜርናስ ሚንꬃና። 14 ታ ኢዛስ ኣዋ ጊዳና፤ ኢዚካ ታስ ና ጊዳና፤ ኢዚ ሞሮ ኦꬂኮ ኣስ ሙሪዛ ጉፌራ ታ ኢዛ ሙራና፤ ኣሳ ናይ ሊሶን ጋራፌቲዛ ማላ ታ ኢዛ ጋራፋና። ማዛ 89፡26-27፤ 2ቆሮ 6፡18፤ ኢብ 1፡5 15 ታ ማሮቴꬃ ኔፔ ካሴ ዲዛ ሳኦሌፔ ሃሲዳይሳꬆ ታ ኢዛፔ ሃሲኬ። 16 ኔ ኬꬃይኔ ኔ ካዎቴꬂ ታ ሲንꬃን ሜርናስ ሚኒ ዳና፤ ኔ ካዎቴꬃ ኣራታይካ ሜርናስ ሚኒ ዳና» ጊዴስ። ማዛ 89፡36-37
17 ናታኔይ ሃይሳ ኣጁታ ቃላ ኩሜꬅ ዳዊቴስ ዮቲዴስ።
ዳዊቴ ዎሳ
(1ታሪ 17፡16-27)
18 ሃይሳፌ ጉዬ ካዎ ዳዊቲ ጌሊ ጎዳ ሲንꬃን ኡቲዲ፥
«ኡባ ሃሪዛ ጎዳዉ! ኔ ታና ሃይሳስ ጋꬃናስ ታ ኦኔ? ታሶ ኣሳይካ ኣዜ? 19 ኡባ ሃሪዛ ጎዳዉ፥ ሃይሲ ኔ ሲንꬃን ጉꬅ ጊዲሺን ኔ ጊዲኮ ኔ ኣይሌዛሶይ ሲንꬃፌ ሃናናይሳ ዮታዳሳ፤ ኡባ ሃሪዛ ጎዳዉ! ኔ ኣሳራ ጋይቲዛ ሎሴ ኦጌይ ሃይሴ?
20 «ዳዊቲ ኔና ሃይሳፌ ቦላራ ሃራ ኣይ ጋና ዳንዳይዜ? ኡባ ሃሪዛ ጎዳዉ፥ ኔ ኣይሌዛ ኔ ኤራሳ። 21 ኔ ቃላዛ ጊሻሲኔ ኔ ዎዚና ቆፋ ማላ ኔ ሃይሳ ጊታ ሚሽ ኦꬃዳሳ፤ ኔ ኣይሌዚ ኤራና ማላ ቆንጪሳዳሳ።
22 «ኡባ ሃሪዛ ጎዳዉ፥ ኔ ኣይ ማላ ጊታ! ሙሌካ ኔና ሚሳቲዛይ ኦኒካ ዴና፤ ኑኒ ኑ ሃይꬃራ ሲዪዳ ማላ ኔፔ ኣቲን ሃራ ጾሲ ዴና።
23 «ባ ዴሬ ጊዳና ማላ ኢዛ ኣሻናስ ጾሲ ኢዛፔ ሲንꬃራ ቢዳ ዴሬይ፥ ባ ሱንꬃስ ኦꬃና ማላ ካዎቴꬃታኔ ኢስታ ኤቃ ጾሳታ ባ ሲንꬃፌ ጎዲዲ ጊታኔ ያሺሲዛ ማላታ ኦꬂዲ ጊብጼፔ ዎዚ ኤኪዳ ኔ ዴሬ ኢስራኤሌ ማላይ ቢታ ቦላ ኦኒ ዲዜ?ዛሬ 4፡34 24 ኔ ዴሬዛ ኢስራኤሌ ሜርናስ ኔስ ቡዞ ዴሬ ኦꬃዳ ሚንꬃዳሳ፤ ጎዳዉ፥ ኔ ኢዛ ጾስ ጊዳዳሳ።
25 «ሃኢካ ጎዳ ጾሳዉ፥ ኔኒ ኔ ኣይሌዛሲኔ ኢዛ ኬꬃስ ኢሚዳ ሂዶታ ሜርናስ ናጋ፤ ኔ ዮቲዳ ማላካ ፖላ፤ 26 ሄሳ ጊሻስ ኔ ሱንꬂ ሜርናስ ጊታ ጊዳና፤ ኣሳይካ፥ ‹ኡባፌ ዎልቃማ ጎዳይ ኢስራኤሌ ጾሳ› ጋና። ኔ ኣይሌ ዳዊቴ ኬꬃይ ኔ ሲንꬃን ሚኖ ጊዳና።
27 «ኣቤት ኡባፌ ዎልቃማ ጎዳዉ፥ ኢስራኤሌ ጾሳዉ፥ ‹ታ ኔስ ኬꬅ ኬጻና› ጋዳ ሄሳ ታስ ኔ ኣይሌዛስ ቆንጪሳዳሳ። ሄሳ ጊሻስ ኔ ኣይሌዚ ሃ ዎሳዮ ዎሳናስ ባ ዎዚናን ጻሊዴስ። 28 ኣቤት ኡባ ሃሪዛ ጎዳዉ! ኔኒ ጾሳ፤ ኔ ቃላይካ ኣማኔቲዳይሳ፤ ሃይሳ ሎኦ ሚሽ ኦꬃናስ ኔኒ ኔ ኣይሌዛስ ሂዶታ ኢማዳሳ። 29 ኢዚ ኔ ሲንꬃን ሜርናስ ሚኒ ዳና ማላ፥ ሃኢካ ኔ ኣይሌዛ ኬꬅ ኣንጃርኪ! ኣቤት ኡባ ሃሪዛ ጎዳዉ! ሃይሳ ኔርካ ኔ ዮታዳሳ፤ ኔ ኣንጆን ኔ ኣይሌዛ ኬꬂ ሜርናስ ኣንጄታና» ጊዴስ።