1 ዳዊቲ ዙማፔ ጉꬅ ኣꬊ ቢዳ ማላ ጺባ ጌቴቲዛ ሜምፌቦስቴ ኦሳንቻይ 200 ሶሎ፥ ዛቢቤፔ ኡኬቲዳ ቄሪ ኡኬꬅ ጼታታ፥ ባላሴፔ ኡኬቲዳ 100 ቄሪ ኡኬꬂኔ ኢሲ ሉካሞ ኩሜꬅ ዎይኔ ኡሺ ጫኔቲዳ ናምኡ ሃሬታ ላጊ ኤኪዲ ኢዛራ ጋይታና ዪዴስ። 2ሳሜ 9፡9-10

2 ዳዊቲ ጺባ፥ «ሃይሳ ኡባ ኣዛስ ኤሃዲ?» ጊ ኦይቺዴስ። ጺባይካ፥ «ሃሬታ ካዎ ኬꬃ ኣሳቲ ቶጋና ማላ፥ ሶሎዛኔ ኡኬꬃታ ናቴꬃቲ ማና ማላ፥ ዎይኔ ኡሻዛ ባዞን ዳቡሪዳ ኣሳይ ኡያና ማላ ኤሃዲስ» ጊዴስ።

3 ሄሳፌ ጉዬ ካዎዚ፥ «ኔ ጎዳ ናዚ ኣዋኔ?» ጊ ኦይቺዴስ።

ጺባይ ዛሪዲ፥ «ኢዚ፥ ‹ኢስራኤሌ ኣሳይ ሃች ታ ኣዋ ካዎቴꬅ ታስ ዛራና› ጊ ቆፒዳ ጊሻስ ሃኢ ዬሩሳላሜን ኡቲዴስ» ጊዴስ። 2ሳሜ 19፡26-27

4 ሄሳፌ ጉዬ ካዎዚ ጺባስ፥ «ካሴ ሜምፌቦስቴስ ዲዛይ ኡባይ ሃይሳፌ ጉዬ ኔሳ» ጊዴስ፤

ጺባይ፥ «ዳሮ ኣሽኬቴꬃን ሲንꬃ ጉꬅ ጉፋናዳ ታ ኔስ ኩሼ ዴንꬃና፤ ካዎ ታ ጎዳዉ ኔ ሲንꬃን ታስ ኣዮቴꬂ ቤቶ» ጊዴስ።

5 ካዎ ዳዊቲ ባሂሪሜ ጋኪሺን ሳኦሌ ኬꬃ ኣሳ ቆሞፌ ኢሳዴይ ፑቱ ጊዴስ፤ ኢዚካ ጌራ ና ሺምኤ፤ ኢዚ ዶቂሼ ኬዚዴስ። 6 ካዎዛ ዎታዳራቲኔ ካዎ ቦንቾ ናጊዛ ዛቤቲ ኡባይ ዳዊቴፔ ሃዲርሳ ባጋራኔ ኡሻቻ ባጋራ ዲሺንካ ዳዊቴ ቦላኔ ኢዛ ሹሜታ ቦላ ሹች ጫዲዴስ። 7 ሺምኤይ ኢዛ ዶቂሼ፥ «ኬዛ! ሃይሳፌ ኬዛ! ሃይሶ ሼምፖ ዎꬊዳይሶ! ሃይሶ ኢታዞ! 8 ኢዛፔ ኔ ካዎቴꬃ ዎꬃ ኤኪዳ ሳኦሌ ኬꬃ ኣሳ ኡባ ሱꬃ ጎዳይ ኔ ቦላ ዛሪሼ ዴስ። ጎዳይ ኔ ካዎቴꬃ ኔ ና ኣቤሴሎሜስ ኣꬂ ኢሚዴስ፤ ኔኒ ሼምፖ ዎꬊዳ ኣስ ጊዲዳ ጊሻስ ቤያ ኔ ቦላ ሜቶይ ዪዴስ» ጊዴስ።

9 ሄሳፌ ጉዬ ጹሪያ ና ኣቢሳዬይ ካዎዛስ፥ «ሃይሲ ሃይቄꬃ ካናይ፥ ካዎዛ ታ ጎዳ ዎስቲ ዶቂዜ? ታ ፒና ባዳ ኢዛ ቆꬌ ቃንጻና» ጊዴስ።

10 ጊዶ ኣቲን ካዎዚ፥ «ኢንቴኖ ጹሪያ ናይቶ! ኢንቴና ታናራ ጋꬂዛ ኣይ ሚሽ ዲዜ? ጎዳይ፥ ‹ዳዊቴ ዶቃ› ጊን ኢዚ ታና ዶቂዛ ጊዲኮ፥ ‹ሃይሳ ኣይስ ኦꬃዲ?› ጊዲ ኢዛ ኦይቻና ዳንዳይዛይ ኦኔ?» ጊዴስ።

11 ሄሳፌ ጉዬ ዳዊቲ ኣቢሳዬኔ ባ ሹሜታ ኡባ፥ «ታ ጉልባቴፔ ኬዚዳ ታ ናዚ ታና ꬋይሳና ኮይኮ፥ ሃይሳ ቢኒያሜ ቆሞዛ ጊሻስ ኣይስ ማላሌቴቲ? ሄሳ ጊሻስ ኣጋጊቴ! ጎዳይ ኢዛ ዶቃ ጊዲ ዬዲዳ ጊዲኮ ዶቆ። 12 ጎዳይ ታ ካዉሻቴꬃ ቤኢዲ ሃቻ ዶቄꬃ ጊሻስ ኢዚ ታስ ሎኦ ኦꬃናኮ ኦኔ ኤሪዛይ» ጊዴስ።

13 ሄሳ ጊሻስ ዳዊቲኔ ኢዛራ ዲዛ ኣሳይ ባ ኦጌ ሲንꬅ ጉጂዴስ፤ ሺምኤይ ኢዛ ጊናራ ዲዛ ላዳራ ቢሼ ዶቄስ፥ ሹች ጫዴሲኔ ቢታ ኢዛ ቦላ ላሌስ። 14 ካዎዚኔ ኢዛራ ኢሲፌ ዲዛ ኣሳቲ ኡባይ ባንቲ ባና ጊ ቆፒዳሶ ጋኪዳ፤ ኬሂ ዳቡሪዳ ጊሻስ ሄን ሼምፒዳ።

15 ሄ ዎዴ ኣቤሴሎሜይኔ ኢስራኤሌ ኣሳይ ኡባይ ዬሩሳላሜ ዪዳ፤ ኣክጾፌሌይ ኢዛራ ኢሲፌ ዴስ። 16 ዳዊቴ ላጌ ኣርኬ ዴሬ ኣስ ሁሼይ ኣቤሴሎሜኮ ዪዲ፥ «ካዎ! ሜርናስ ካዎታ! ካዎ! ሜርናስ ካዎታ!» ጊዴስ።

17 ኣቤሴሎሜይ ሁሼስ፥ «ኔ ላጌዛስ ዲዛ ኣማኔቴꬃይ ኔስ ሃኖ ጻላ? ኔ ኣይስ ኔ ላጌዛራ ባቤኪ?» ጊ ኦይቺዴስ።

18 ሁሼይ ኣቤሴሎሜስ ዛሪዲ፥ «ሄሳ ታ ዎስታ ኦꬃኔ? ታኒ ጎዳን፥ ሃ ዴሬዛኒኔ ኢስራኤሌ ኣሳ ኡባን ዶሬቲዳዴ ባጋ ጊዳና፤ ኢዛዴራ ኢሲፌ ዳና። 19 ሂስቲን ታ ኢዛ ናዛስ ሃጋዞንታ ኦናስ ሃጋዞ? ኔ ኣዋስ ታ ሃጋዚዳ ማላ ኔስካ ሃጋዛና» ጊዴስ።

20 ኣቤሴሎሜይ ኣክጾፌሌ፥ «ኣኔ ኑስ ዞሬ ኢማ፤ ኑ ኣይ ኦꬂኖ?» ጊዴስ።

21 ኣክጾፌሌይ ኢዛስ ዛሪዲ፥ «ካዎ ኬꬃ ናጋና ማላ ኔ ኣዋይ ኣጊ ቢዳ ኢዛ ላጌꬆታራ ጌላ ዚንኣ፤ ሄሳፌ ጉዬ ኔኒ ኔ ኣዋ ኬሃ ኢጺዳይሳ ኩሜꬃ ኢስራኤሌይ ሲዪኮ ኔናራ ዲዛ ኡባታ ቄሴይ ሚናና» ጊዴስ። 22 ሄሳ ጊሻስ ኣቤሴሎሜስ ፖቄ ቦላ ዱንካኔ ቶሊዳ፤ ሄን ኩሜꬃ ኢስራኤሌ ዴሬይ ቤኢሺን ባ ኣዋ ላጌꬆታራ ዚንኢዴስ። 2ሳሜ 12፡11-12

23 ሄ ዎዴ ኣክጾፌሌይ ኢሚዛ ዞሬይ ኡባይ ጾሳ ቃላይ ዞሪዛይሳ ሚሳቲ ቆዴቴስ፤ ዳዊቲኔ ኣቤሴሎሜይ ኣክጾፌሌ ዞሬ ሄሳꬆ ሂስቲ ኤኬቴስ።