1 ዳዊቲ ባናራ ዲዛ ዴራ ቆዲዴስ፤ ኢስታ ቦላ ሻላቃታኔ ማቶ ሃላቃታ ሹሚዴስ። 2 ሄሳፌ ጉዬ ዳዊቲ ጪጎ ጊዲዛ ባ ኦላንቻታ ኢዮኣቤ፥ ናምኣንꬆ ጪጎዛ ኢዮኣቤ ኢሻ ጹሪያ ና ኣቢሳዬ፥ ሄꬓንꬆ ጪጎዛ ጌቴ ዴሬ ኣስ ኢታዬ ኣዛዞን ኣቃና ማላ ኪቲዴስ። ካዎዚ ባ ኦላንቻታስ፥ «ቱማፔ ታኒካ ኢንቴናራ ኬዛና» ጊዴስ።

3 ኣሳቲ ጊዲኮ ኢዛ፥ «ኔኒ ኑናራ ኬዛናስ ቤሴና፤ ኑና ባቃቲሲዛ ሚሺ ዲኮ ኣሳይ ሄሳ ጊታ ሚሻን ቆዴና፤ ሃራይ ኣቶሺን ኑፔ ባጋይ ሃይቂኮካ ኢስቲ ዉዱ ጌቴና፤ ኔኒ ኔርካ ኑፔ ታሙ ሺያታፔ ኣꬋሳ፤ ሄሳ ጊሻስ ኔኒ ካታማን ኡታዳ ኑና ማዲኮ ሎኦ» ጊዳ።

4 ካዎዚካ፥ «ኢንቴስ ሎኦ ሚሳቲ ቤቲዛ ኡባ ታ ኦꬃና» ጊዴስ። ሄሳ ጊሻስ ዴሬይ ኡባይ ጼታን ጼታን፥ ሺያን ሺያን ሻኬቲ ሻኬቲ ሳልፊ ኬዚዛ ዎዴ ካዎዚ ጊምቤዛ ፔንጌን ኤቂ ዴስ። 5 ካዎዚ ኢዮኣቤ፥ ኣቢሳኔ ኢታዬ፥ «ታ ጊሻስ ጊዲ ታ ናዛ ኣቤሴሎሜ ቦላ ኢሲ ሜቶካ ጋꬆፍቴ» ጊ ኣዛዚዴስ። ካዎዚ ባ ና ኣቤሴሎሜ ጊሻስ ኣዛዚዛይታስ ኢሳስ ኢሳስ ኣዛዞ ኢሚሺን ኡባ ኦላንቻቲካ ሲዪዳ።

6 ኦላንቻቲ ኢስራኤሌ ኦላናስ ሳልፊዲ ኬዚዳ፤ ኦላዛ ኤፍሬሜ ዎራ ጊዶን ኦሌቲዳ። 7 ሄን ኢስራኤሌ ኣሳይ ዳዊቴ ኦላ ኣሳን ጾኔቲዴስ፤ ሄ ጋላስ ኬሂ ዳሮቲ ሃይቂዳ፤ 20,000 ኣሲ ሃይቂዴስ። 8 ኦላይ ዴራ ጋርሳን ኣኪ ኣኪ ቢዴስ፤ ሄ ጋላስ ኦላይ ዉርሲዳይሳፌ ዎራይ ሚቲ ꬋይሲዳ ኣሳይ ዳሬስ።

9 ሄ ዎዴ ኣቤሴሎሜይ ዳዊቴ ኣሳራ ቶሮንታ ዲሼ ጋይቲዴስ፤ ኣቤሴሎሜይ ባቁሎ ቶጊዲ ጪፒ ጊዳ ሃጋይ ዲዛ ዎላ ጋርሳራ ኣꬊ ቢሺን ኣቤሴሎሜ ሁኤ ቢናናይ ሃጋን ኦይኬቲዴስ፤ ኢዚ ቶጊዳ ባቁሎያ ኣꬋ ቢን ኢዚ ሳሎፔኔ ሳኣፔ ጊዶን ካቄቲ ኣቲዴስ።

10 ኢሳዴይ ኢዛ ቤኢዲ ኢዮኣቤስ፥ «ሄኮ ታኒ ኣቤሴሎሜይ ዎላ ቦላ ካቄቲ ዲዛይሳ ቤኣዲስ» ጊዴስ።

11 ኢዮኣቤይ ባስ ዮቲዳ ኣዴዛስ ዛሪዲ፥ «ኣይ ጋዲ? ሂስቲን ኔ ቤኢዳ ማላ ኣይስ ሄራካ ዎꬋዳ ቢታን ዬጋቤኪ? ኔ ሄሳꬆ ኦꬂዳኮ ታ ኔስ ታሙ ሳቂሌ ቢራኔ ኦላ ቃራታ ቃባቶ ኢማናኮሺን» ጊዴስ።

12 ጊዶ ኣቲን ኣዴዚ ዛሪዲ፥ «ኑኒ ሲዪሺን ካዎዚ፥ ‹ናቴꬃዛ ኣቤሴሎሜ ቦላ ቆሆይ ጋኮንታ ማላ ታ ጊሻስ ጊዲ ሚንꬂ ናጊቴ› ጊዲ ኔና፥ ኣቢሳኔ ኢታዬ ኣዛዚዳ ጊሻስ 1,000 ሳቂሌ ቢራ ኔ ታስ ኢሚዳኮካ ታኒ ታ ኩሼ ካዎዛ ናዛ ቦላ ዎꬂኬ። 13 ሃራ ባጋራ ታኒ ታ ሼምፖስ ሚሼቶንታ ኣጋዳ ታ ኢዛ ዎꬊዳኮ ካዎዛፔ ቆቴቲ ኣቲዛ ሚሺ ባይንዳ ጊሻስ ኔኒ ኔ ባጋራ ታኮ ሺቃካ» ጊዴስ።

14 ኢዮኣቤይ ኣዴዛስ፥ «ሃይሳፌ ጉዬ ሃይሳ ማላ ሃሳያን ታ ኔናራ ዎዴ ዉርሲኬ» ጊዴስ፤ 3 ቶራ ኤኪ ቢዲ ኣቤሴሎሜይ ሚꬃ ቦላ ካቄቲ ዲዛሶን ቡሮ ሼምፖ ኬዞንታ ዲሺን ቶራታ ጾንጊዲ ኢዛስ ዎዚና ኣይፌን ጫዲዴስ። 15 ሄሳꬆካ ኢዮኣቤ ኣዣቢዛ ታማቲ፥ ኣቤሴሎሜ ጊዶꬂ ጫዲ ዎꬊዳ።

16 ሄሳፌ ጉዬ ኢዮኣቤይ ዛዬ ፑኒዲ ኢስታ ዲጊዳ ጊሻስ ኦላንቻቲ ኢስራኤሌ ዬዴꬂዛይሳ ኣጊዳ። 17 ኣቤሴሎሜ ዎራ ጊዶ ኤፊዲ ጪማ ኦላን ዬጊዳ፤ ጊታ ሹቻታ ኢዛ ቦላ ዶሪዳ። ሄ ዎዴ ኢስራኤሌ ኣሳይ ኡባይ ባሶ ባሶ ባቃቲዴስ።

18 ኣቤሴሎሜይ፥ «ታ ሱንꬅ ጼይጊሲዛ ናይ ታስ ዴና» ጊዲ ኢዛ ሃሳኢሳና ማላ ሼምፖራ ፓጻ ዲዛ ዎዴ ካዎ ዙሌ ጌቴቲዛሶን ባ ሱንꬃን ሃዉልቴ ኤሲ ዎꬂዳ ጊሻስ ሄ ሶሆዚ ሃች ጋካናስ ኣቤሴሎሜ ሃዉልቴ ጌቴቴስ።

19 ሄ ዎዴ ሳዶቄ ና ኣኪማሲ፥ «ጎዳይ ኢዛ ሞርኬታ ቦላ ኮሜ ኮጺዳይሳ ዎጻ ባዳ ታኒ ካዎዛስ ሚሺራቾ ዮታና» ጊዴስ።

20 ኢዮኣቤይ፥ «ሃች ሚሺራቾ ቃላ ኤፋናይ ኔና ጊዳካ፤ ካዎዛ ናይ ሃይቂዳ ጊሻስ ሃች ጊዶንታ ሃራ ጋላስ ኤፋንዳሳ» ጊዴስ።

21 ሄሳፌ ጉዬ ኢዮኣቤይ ቶጵያ ዴሬ ኣዴዛስ፥ «ኔ ቤኢዳይሳ ባዳ ካዎዛስ ዮታ» ጊዴስ፤ ቶጵያ ዴሬ ኣዴዚ ኢዮኣቤስ ኩሼ ዴንꬂ ቤሲዲ ዎጺ ቢዴስ።

22 ሳዶቄ ና ኣኪማሲ ኢዮኣቤስ፥ «ባ ሃና ሃኖ፤ ኣኔ ዛይ ሃይሳ ቶጵያ ኣዴዛ ጌዶራ ታኒካ ዎጻይስ» ጊዴስ።

ኢዮኣቤይ ጊዲኮ፥ «ኔ ኣይስ ባና ኮያዲ? ኔስ ኢሞታ ኢሚሲዛ ኣይ ሚሺራቾ ኤካዳ ባይ?» ጊዴስ።

23 ኣኪማሲካ፥ «ባ ሃና ሃኖ፤ ታ ባና ኮያይስ» ጊዴስ።

ሄሳ ጊሻስ ኢዮኣቤይ፥ «ሂስቲኮ ዎጻ!» ጊዴስ። ሄሳፌ ጉዬ ኣኪማሲ ዴምባን ዲዛ ኦጌዛራ ዎጺ ቶጵያ ዴሬ ኣዴዛፔ ሲንꬃቲ ቢዴስ።

24 ዳዊቲ ካሬ ባጋ ፔንጌፌኔ ጊዶ ፔንጌፌ ጊዶን ዲሺን ዛቤዚ ዲርሳ ጊምቤ ቦላ ዲዛ ሻኮ ካራ ኬዚዲ ካሬ ጼሊሼ ኢሲ ኣሲ ባርካ ዎጺዛይሳ ቤኢዴስ። 25 ናጊዛይሲ ጼይጊዲ ሄሳ ካዎዛስ ዮቲዴስ፤

ካዎዚካ፥ «ባርካ ዪዛዴ ጊዲኮ ሎኦ ሚሺራቾ ኤኪ ዪዛዴ ጊዳና» ጊዴስ፤ ኣዴዚ ማቲ ማቲ ዪዴስ።

26 ቃሴካ ናጊዛይሲ ሃራ ኣሲ ዎጺሺን ቤኢዴስ፤ ዛቤዛካ ጼይጊዲ፥ «ሄኮ ሃራ ኣሲ ባርካ ዎጺ ዪሼ ዴስ» ጊዴስ።

ካዎዚ፥ «ሄሳዴይካ ሎኦ ዎሬ ኤኪ ዪዛ ጊዳና ቤሴስ» ጊዴስ።

27 ናጊዛይሲ፥ «ኮይሮይሳ ዎꬂ ሳዶቄ ና ኣኪማሴ ዎꬅ ሚሳቴስ» ጊዴስ።

ካዎዚ፥ «ኢዚ ሎኦ ኣሳ፤ ኢዚ ሚሺራቾ ቃላ ኤኮንታ ዬና» ጊዴስ።

28 ኣኪማሲ ኬሂ ዋሲዲ ካዎዛስ፥ «ኡባ ሚሺካ ኢንጄቲዴስ» ጊዴስ፤ ሄሳፌ ጉዬ ቢታ ቦላ ዛቁልꬅ ዚርጺ ጊዴስ፤ ካዎዛሲካ ኩሼ ዴንꬂዲ፥ «ታ ጎዳ ካዎዛ ቦላ ባንታ ኩሼ ዴንꬂዳ ኣሳታ ኣꬂ ኢሚዳ ጎዳ ኔ ጾሳይ ጋላቴቶ!» ጊዴስ።

29 ካዎዚካ ኢዛ፥ «ታ ና ኣቤሴሎሜይ ሎኦ ዲዜ?» ጊ ኦይቺዴስ።

ኣኪማሲካ፥ «ኢዮኣቤይ ካዎዛ ኦሳንቻዛኔ ታና ኔ ኣይሌዛ ኪቲሺን ጊታ ሺሮ ቤኣዲስ፤ ጊዶ ኣቲን ኢዚ ኣዛኮ ታ ኤራቤኬ» ጊዴስ።

30 ካዎዚካ ኢዛ፥ «ኣኔ ኢሲ ባጋ ኣꬋ ኤቃ» ጊዴስ። ኢዚካ ኣꬊ ኤቂዴስ።

31 ሄሳፌ ጉዬ ቶጵያ ዴሬ ኣዴዚ ጋኪዲ፥ «ታ ጎዳ ካዎ፥ ሚሺራቾ! ጎዳይ ሃች ኔ ቦላ ዴንዲዳ ሞርኬታ ኡባፌ ኔና ኣሺዴስ» ጊዴስ።

32 ካዎዚካ ቶጵያ ዴሬ ኣዴዛ፥ «ታ ና ኣቤሴሎሜይ ሎኢ ዲዜ?» ጊ ኦይቺዴስ።

ቶጵያ ዴሬ ኣዴዚካ፥ «ታ ጎዳ ካዎዛ ሞርኬቲኔ ኔና ቆሃና ኔ ቦላ ዴንዲዛ ኡባቲ ሄ ናቴꬃዛ ማላ ጊዴቶ» ጊዴስ።

33 ካዎዚ ኬሂ ጬጪዴስ፤ ጊምቤዛ ፔንጌ ቦላ ዲዛ ፖቄ ቦላ ኬዚዲ ሄን ዬኪዴስ፤ ቢሼካ፥ «ታ ና ኣቤሴሎሜ! ታ ና ኣቤሴሎሜ! ኔ ጊሻስ ታ ሃይቃርኪና! ታ ና ኣቤሴሎሜ ዎ! ታ ና ኣቤሴሎሜ ዎ!» ጊዴስ።