1 ዳዊቲ ዉርሴꬃን ሃሳይዳ ቃላይ ሃይሳፌ ካሊዛይሳ፤

8 ዳዊቴስ ኤሬቲዳ ቃራ ኣሳታ ሱንꬂ ሃይሳፌ ካሊዛይሳ፤ ኮይሮይሲ ታሂኪሞኔ ዴሬ ኣስ ዮሼቢ-ባሼቤቴ ጊዲሺን ኢዚ ሄꬑ ሃላቃታስ ሃላቃ፤ ኢዚካ ኢሲ ኦላን ባ ቶራ ጾንጊዲ 800 ኣስ ዎꬊዳ ቃራ።

9 ናምኣንꬆዚ ኣሂሆሄ ዴሬ ኣስ ዶዴ ና ኤልኤዜሬ፤ ኦሌታናስ ኢሲ ቦላ ሺቂዳ ፊሊስጼሜ ኣሳይ ኤቄቲዛ ዎዴ ኢስራኤሌ ኣሳይ ባቃቲዴስ፤ ዳዊቴራ ዲዛ ሄꬑ ቃራታ ጋርሳፌ ኢሶይ ኢዛ። 10 ኢዚ ጊዲኮ ባ ኤቂዳሶ ዬዲቤና፤ ኢዛ ኩሼይ ኣርጋጫናሼኔ ማሻራ ኢሲፌ ኦይኬታናሼ ጋካናስ ፊሊስጼሜታ ኦሊዴስ፤ ሄ ጋላስ ጎዳይ ኢዛስ ጊታ ጾኖ ኢሚዴስ። ባቃቲ ቢዳ ኦላንቻቲ ሃይቂዳ ኣሳፔ ኦላ ሚሺኔ ማይኦ ጻላ ቃራታናስ ኤሌኤዜሬኮ ጉዬ ሲሚዳ።

11 ሄꬓንꬆዚ ሃራሬ ዴሬ ኣስ ኣጌ ና ሻማ፤ ፊሊስጼሜቲ ሌሃን ኩሜꬅ ሚሲራይ ዜሬቲዳ ጋዴን ኢስቲ ኢሲ ቦላ ሺቂ ዲሺን ኢስራኤሌ ኦላንቻቲ ፊሊስጼሜታ ሲንꬃፌ ባቃቲዳ። 12 ሻማይ ጊዲኮ ባ ኤቂዳሶ ዬዲቤና፤ ሄ ኦላ ኤቄቲዲ ፊሊስጼሜታ ዎꬊዴስ፤ ሄ ጋላስ ጎዳይ ጊታ ጾኖ ኢሚዴስ።

13 ካꬃ ሺሾ ዎዴ ፊሊስጼሜ ኦላንቻቲ ኤራፋይሜ ዙሌን ዱንካኒ ኡቲዳሼ ሄꬑ ታሙ ሃላቃታፔ ሄꬓቲ ዳዊቲ ዲዛሶ ኣዱላሜ ጎንጎሎ ዪዳ። 14 ሄ ዎዴ ዳዊቲ ሚጻ ጊዶን ዴስ፤ ፊሊስጼሜ ኦላንቻቲ ቤቴሊሄሜን ዴቴስ። 15 ዳዊቲ ላሞቲዲ፥ «ቤቴሊሄሜ ፔንጌ ኣቻን ዲዛ ኦላ ሃꬃፌ ታስ ኦኔ ኤሃናይ!» ጊዴስ። 16 ሄሳ ጊሻስ ኤሬቲዳ ኦላ ቃራ ሄꬓቲ ፊሊስጼሜ ኦላንቻታ ጊዶራ ካንꬂ ቢዲ ቤቴሊሄሜ ፔንጌ ኣቻን ዲዛ ሃꬃ ኦላፌ ዱቂ ዳዊቴስ ኤሂዳ፤ ኢዚ ጊዲኮ ጎዳ ሲንꬃን ያርሾ ሂስቲ ጉሲዴስ ኣቲን ኡዪቤና። 17 «ኣቤት ጎዳዉ! ሃይሳ ማላ ኦሶ ታ ዎስታ ኦꬆ? ሃይሲ ታፔ ሃኮ! ሃይሲ ባንታ ሼምፖ ቦላ ፒርዲዳ ኣሳታ ሱꬅ ዴኔ?» ጊዲ ዳዊቲ ኡያና ኮዪቤና፤ ሄኮ ኤሬቲዳ ሄꬑ ኦላ ቃራቲ ኦꬂዳ ጎባቴꬃ ኦሶይ ሄሳ።

18 ጹሪያ ና ኢዮኣቤ ኢሻ ኣቢሳዬይ ሄꬑ ኤሬቲዳ ኦላ ቃራታስ ሃላቃ፤ ሄꬑ ጼቱ ኣሳ ቦላ ባ ቶራ ጾንጊዲ ዎꬊዳኔ ሃ ሄꬑ ቃራታ ማላ ኤሬቲዳ ጎባ ኣሳ። 19 ኣቢሳዬይ ሄꬓታፔ ቦላራ ኬሂ ኤሬቲዳ ኣስ ጊዴኔ? ኢዚ ኢስታፌ ጊዶንታ ኣጊኮካ ኢዚ ኢስታስ ሃላቃ።

20 ሃራ ኤሬቲዳ ቃራይ ቃብጺኤሌ ዴሬ ኣስ ዮዳሄ ና ባናያይ ጊታ ኤሬቲዳ ኦሶ ኦꬂዴስ። ኢዚካ ናምኡ ኤሬቲዳ ሞኣቤ ኣሳታ ዎꬊዴስ፤ ቃሴካ ሻቺ ቡኪዳ ጋላስ ኦላ ጊዶ ጌሊዲ ጋሞ ዎꬊዴስ። 21 ሄሳꬆካ ኢሲ ጊታ ጊብጼ ኣስ ዎꬊዴስ፤ ሄ ጊብጼ ኣዴዚ ባ ኩሼን ቶራ ኦይኪዴስ፤ ጊዶ ኣቲን ባናያይ ኢዛራ ኦሌታናስ ጉፌ ኦይኪዲ ኢዛኮ ቢዴስ፤ ጊብጼ ኣዴዛ ኩሼፔ ኢዛ ቶራ ዎꬂ ኤኪዲ ኢዛ ቶራን ኢዛ ዎꬊዴስ።

22 ዮዳሄ ና ባናያ ጎባቴꬂ ሄሳ፤ ኢዚካ ኤሬቲዳ ሄꬑ ቃራ ኣሳታ ማላ ኤሬቲዳ ጎባ ኣሳ። 23 ኢዚ ሄ ሄꬑ ታሙ ኣሳታፔ ኣꬊ ቦንቼቲዳዴ፤ ጊዶ ኣቲን ኤሬቲዳ ሄꬑ ቃራ ኣሳታ ማላ ሳቤቴና። ዳዊቲ ባናያ ባ ቦንቾ ዛቤታ ቦላ ሹሚዴስ።

24 ሄ ሄꬑ ታማታፔ ባጋይታ ሱንꬂ ሃይሳፌ ካሊዛይሳ።