2
1 ሄሳ ጊሻስ ታ ናዞ ኔኒ ጎዳ ዬሱስ ኪርስቶሳ ኪያቴꬃን ሚና። 2 ዳሮ ማርካታ ሲንꬃን ኔ ታፔ ሲዪዳይሳ ሃራታ ታማርሳናስ ዳንዳይዛይታሲኔ ኣማኔቲዳ ኣሳታስ ሃዳራ ኢማ።
3 ዬሱስ ኪርስቶሳስ ኣማኔቲዳ ሎኦ ዎታዳራ ማላ ታናራ ሜቶ ኤካ። 4 ዎታዳራቴꬃን ኦꬂዛዴይ ባ ሃላቃ ኡፋይሳናስ ዳፌቴስ ኣቲን ሃራ ባና ቃጼꬂዛ ኦሶን ጌሊ ኤሬና። 5 ሄሳꬆካ ጋዴ ዎጺዛዴይ ዎꬃ ዎጋ ናጎንታ ዎጺኮ ጾኖ ኣኪሊሌ ኤኬና። 6 ጎባ ጎሻንቻይ ባ ጎዪ ኬሲዳ ካꬃ ጼራ ሚዛዴ ጊዳናስ ቤሴስ። 7 ታ ኔስ ጊዛይሳ ኔ ዎዚናን ዎꬃ ሲዪኮ ጎዳይ ኔስ ዮኦ ኡባን ኣኬካ ኢማና።
8 ሃይቆፔ ዴንዲዳ ዳዊቴ ዜሬꬅ ጊዲዳ ዬሱስ ኪርስቶሳ ቆፓ፤ ታ ዮቲዛ ሚሺራቾ ቃላይካ ሄሳ። 9 ሄሳ ጋሶን ኢታ ኦꬂዳ ኣሳ ማላ ቃሼታና ጋካናስ ዋዬ ቤያይስ፤ ጊዶ ኣቲን ጾሳ ቃላይ ቃሼቴና። 10 ሄሳ ጊሻስ ኪርስቶሳ ባጋራ ዲዛ ኣቶቴꬂኔ ሜርና ቦንቾ ዴማና ዶሬቲዳይታ ጊሻስ ጋዳ ዉርሳካ ዳንዳያዲስ።
11 «ኑ ኢዛራ ኢሲፌ ሃይቂኮ
ኑ ኢዛራ ዴኦን ዳና።
12 ዳንዳያን ሚኒኮ
ኑ ኢዛራ ካዎታና።
ኑ ኢዛ ካዲኮ
ኢዚካ ኑና ካዳና። ማቶ 10፡33፤ ሉቃ 12፡9
13 ኑ ኢዛስ ኣማኔቶንታይታ ጊዲኮ
ኢዚ ሜርናስ
ኣማኔቲዳ ማላ ዳና።
ኢዚ ባርካ ባና
ካዳና ዳንዳዬና»
ጌቴቲዳ ቃላይ ኣማኔቲዳይሳ።
ሚኖ ኦሳንቻ
14 ሃይታ ሃ ዮኦታ ጊሻስ ኣሳ ቆፊሶ ኣጎፋ፤ ኣሳይ ባ ጊዶን ኢሶይ ኢሳራ ቃላ ጋሶን ፓላሜቶንታ ማላ ጾሳ ሱንꬃን ዞራ፤ ሄሳ ማላ ዮኦይ ሲዪዛይታ ሞሬስ። 15 ቱሙ ጾሳ ቃላ ዮቲዛዴ፥ ዬላቾንታ ኦሳንቻኔ ኣሲ ኔ ጊሻስ ሎኦ ማርካቲዛዴ ጊዳዳ ኔናቴꬃ ዉርሳ ጾሳ ሲንꬅ ሺሻናስ ሚና። 16 ጮ ሜላ ዶና ላላቤቴꬃፌ ሃካ፤ ሄሳ ማላ ዮኦን ዋጼቲዳ ኣሳቲ ጾሳፌ ሃኪ ሃኪ ቤቴስ። 17 ኢስታ ቲሚርቴይ ሳኪዲ ፓጾንታ ጌዴ ጉጂ ጉጂ ዳኬቲ ቢዛ ማዱንꬃ ማላ፤ ሄሜኔዎሲኔ ቃሴ ፊልጾሳ ጌቴቲዛይቲ ሄሳ ማላ ቲሚርቴ ታማርዛይታ ጊዶን ዴቴስ። 18 ሄይቲ ቱማቴꬃፌ ሃኪዲ ጮ ሜላ ዋዬቴስ፤ ኢስቲካ፥ «ሃይቆፔ ዴንꬂ ሃይሳፌ ካሴ ሃኒ ኣꬊዴስ» ጊዲ ኢሲ ኢሲ ኣሳ ኣማኖ ሺሪ ዬጌቴስ።
19 ጊዶ ኣቲን፥ «ጎዳይ ባስ ጊዲዛይታ ኤሬስ።» ቃሴካ፥ «ጎዳ ሱንꬅ ጼይጊዛይ ዉሪ ኢታፔ ሃኮ» ጊዛ ማታሜይ ኢዛ ቦላ ዲዛ ላሜቶንታ ጾሳ ዮቻይ ላሜቲቤና።
20 ኢሲ ጊታ ኬꬃን ዎርቃፌኔ ቢራፔ ጻላ ጊዶንታ ሚꬃፌኔ ኡርቃፌ ኦሴቲዳይቲ ዲዛይሳꬆ ሄይታንታፌካ ባጋይቲ ቦንቾ ኦሶስ፥ ባጋይቲ ቃሴ ሂራይሶ ኦሶስ ኤኬቴቴስ። 21 ሄሳ ጊሻስ ኦኒካ ሃይታ ታ ጊዳ ኢታ ዮኦታፔ ባና ጌሺኮ፤ ሄሳዴይ ቦንቾ ኦሶስ ጊዲዛዴኔ ኣንጄቲዳዴ፤ ጎዳ ጎኢዛዴኔ ሎኦ ኦሶስ ጊጌቲዳዴ ጊዳና።
22 ፓንꬃቴꬃ ኢታ ኣሞቴꬃፌ ባቃታ፤ ጌሻ ዎዚናራ ጎዳ ጼይጊዛ ኣሳታራ ጺሎቴꬅ፥ ኣማኖ፥ ሲቆኔ ሳሮቴꬅ ካላ።
23 ጎኣይኔ ሂዶታይ ባይንዳ ኤያታ ፓላማፔ ሃካ፤ ጋሶይካ ሄሳንታ ማላይ ኦሽ ካሌꬂዛይሳ ኔ ኤራሳ። 24 ጎዳ ኦሳንቻይ ኣሳራ ኦዬታናስ ቤሴና፤ ሄሳፌ ቦላራ ኣሳ ኡባ ኣቻን ኪያ፥ ኣስ ታማርሳናስ ዳንዳይዛዴኔ ሚኖ ኣስ ጊዳናስ ቤሴስ። 25 ኢዚ ባናራ ኤቄቲዛ ኣሳታ ኣሽኬቴꬃራ ኦይኪዛዴ ጊዳናስ ቤሴስ፤ ኦኔ ኤሪዛይ ኢስቲ ቱማ ኤራና ማላ ጾሲ ኢስታስ ማሬታናስ ዎዴ ኢማና ዳንዳዬስ። 26 ሄሲካ ኢስቲ ዩሺ ቆፒ ሲሚዲ ኢዛ ሼኔ ኩንꬃና ማላ ኢስታ ዲኢ ኤፊዳ ጻላኤ ናርጻፌ ኢስቲ ኬሲ ኤካና።