1 ጾሳ ሲንꬃኒኔ ሄሳꬆካ ፓጻ ዲዛይታ ቦላኔ ሃይቂዳይታ ቦላ ፒርዳናስ ዲዛ ዬሱስ ኪርስቶሳ ሲንꬃን ኢዛ ቆንጬꬃኔ ኢዛ ካዎቴꬃ ቆፋራ ሃይሳ ኔስ ሃዳራ ጋይስ። 2 ቃላ ሳባካ፤ ኔስ ጊጊን ዎይኮ ጊጎንታ ኣጊን ኔኒ ኔ ባጋራ ጊጌታ ኡታ፤ ዳሮ ዳንዳያራ ታማርሶን ኣሳ ሱሪሳ፤ ሃንቃኔ ዞራ። 3 ጋሶይካ ኣሳይ ዉሪ ሱሬ ጊዲዳ ቲሚርቴ ኤኮንታ ኢጻና ዎዴይ ያና፤ ሄሳፌ ቦላራ ኣሳይ ባ ኣሞራ ጋጊዛይሳ ኢስታ ሃይꬂ ሲያና ኮይዛይሳ ጻላ ኢስታስ ዮታና ማላ ባና ታማርሳና ዳሮ ኣስታማሬታ ባ ኣች ሺሻና። 4 ቱማ ሲያናፔ ባ ሃይꬅ ሃራሶ ዛሪዲ ሃይሲኤ ባጋ ሲማና። 5 ኔኒ ጊዲኮ ሃኒዛ ዮኦ ኡባን ሎዱ ጋ፤ ሜቶ ዳንዳያ፤ ሚሺራቾ ቃላ ዮቶ ኔስ ኦሶ ሂስታ፤ ኔ ኦሶዛካ ፖላ።

6 ታ ቃሴ ያርሼታናስ ማታ ኡታዲስ፤ ሃይሳ ሃ ኣላሜዛፔ ሻኬታ ቡሳ ዎዴይ ታስ ጋኪዴስ። 7 ሎኦ ባጼ ታ ባጼታዲስ፤ ታ ዎጻና ዎꬅ ዉርሳዲስ፤ ኣማኖካ ናጋዲስ። 8 ሲንꬃፌ ታስ ኣኪሊሌይ ጊጊ ኡቲዴስ፤ ሄሲካ ጺሎቴꬃ፤ ሄሳካ ቱሙ ፒርዲዛ ጎዳይ ሄ ጋላስ ታስ ኢማና፤ ሄሲካ ታስ ጻላ ጊዶንታ ኢዛ ዩሳ ላሞቲዛይታስ ኡባሲካ ኢማና።

9 ታኮ ኤሌላ ያናስ ኔስ ዳንዳዬቲዳ ማላ ኦꬃ። 10 ዴማሲ ሃይሳ ኣላሜዛ ሲቂዲ ታና ዬጊ ኣጊዲ ታሶሎንቄ ቢዴስ። ቃርቂሲ ጋላቲያ ቢዴስ፤ ቲቶሲ ጌዴ ዳልማጺያ ቢዴስ። ቆላ 4፡14፤ ፒልም 24፤ 2ቆሮ 8፡23፤ ጋላ 2፡3፤ ቲቶ 1፡4 11 ሉቃሲ ጻላ ታናራ ዴስ፤ ማርቆሲ ታና ኦሶን ማዲዛ ጊሻስ ኢዛ ኔናራ ኤካ ያ። ቆላ 4፡14፤ ፒልም 24፤ ሃዋ 12፡12፥25፤ 13፡13፤ 15፡37-39፤ ቆላ 4፡10፤ ፒልም 24 12 ቲቂቆሳ ኤፌሶኔ ዬዳዲስ። ሃዋ 20፡4፤ ኤፌ 6፡21-22፤ ቆላ 4፡7-8 13 ኔ ሃ ያሼ ታ ጺሮኣዳን ካርፑሴ ኣቻን ዎꬂዳ ታ ማቃኔ ማጻፋታ ሃራፔካ ጋልባን ጻፌቲዳ ማጻፋታ ታስ ኤካ ያ። ሃዋ 20፡6

14 ጻርቂማላ ቆጺዛ ኢስኪንዲሮሲ ታ ቦላ ዳሮ ቆሆ ጋꬂዴስ ሺን ጎዳይ ኢዛስ ኢዛ ኦሶ ማላ ኢማና። 1ጺም 1፡20፤ ማዛ 62፡12፤ ኦሮ 2፡6 15 ኢዚ ኑ ዮቲዛ ቃላ ኬሂ ኢጺዴስ፤ ኔካ ኢዛፔ ናጌታ።

16 ታና ሞቲዛ ዮኦዛስ ኮይሮ ታና ኣሻና ማርካ ታ ሺሺን ኦኒካ ታና ማዳና ዪቤና፤ ጊዶ ኣቲን ዉሪካ ታና ዬጊዲ ቢዳ። ሄሳካ ኢስታ ቦላ ጾሲ ቆሆ ሂስቲ ቆዶፖ። 17 ጊዶ ኣቲን ቃላ ኪታይ ታ ባጋራ ኩሜꬅ ዮቴታና ማላኔ ዴሬ ኣሳይ ዉሪ ሲያና ማላ ጎዳይ ታ ኣቻን ኤቂዲ ታና ሚንꬂዴስ፤ ጋሞ ዶናፔካ ታና ኣሺዴስ። 18 ጎዳይ ኢታ ዮኦ ኡባፌ ታና ኣሻና፤ ጌዴ ባ ሳሎ ካዎቴꬃስ ታና ሳሮራ ጋꬃና፤ ኢዛስ ሜርናፔ ሜርና ጋካናስ ቦንቾይ ጊዶ። ኣሚን።

19 ጲርሲቂላስ፥ ኣቂላስ፥ ሄኔሲፎሬ ሶ ኣሳሲካ ታ ሳሮካ ጋꬃ።ሃዋ 18፡2፤ 2ጺም 1፡16-17 20 ኤሪስጾሲ ቆሮንቶሴን ኣቲዴስ፤ ጺሮፎሞሲ ሳኬቲዳ ጊሻስ ኢዛ ታ ሚሊጼን ኣጋዲስ። ሃዋ 19፡22፤ ኦሮ 16፡23፤ ሃዋ 20፡4፤ 21፡29 21 ባልጎይ ጋካናፔ ሲንꬄታዳ ታኮ ሃ ጋካናስ ኔስ ዳንዳዬቲዳ ማላ ኦꬃ። ኤዉጉሎሲ፥ ጱዴሲ፥ ቃሴካ ሊኖሲ፥ ቂላዉዲያይኔ ኣማኒዛይቲ ዉሪካ ኔና ሳሮ ሳሮ ጊዳ። 22 ጎዳይ ኔናራ ጊዶ፤ ጎዳ ኪያቴꬂ ኢንቴናራ ጊዶ።