1 ታፔ ጪማዛፔ፥ ቱማፔ ታ ሲቂዛ ታ ሲቆ ላጌ ጋዪዮሳስ፥ ሃዋ 19፡29፤ ኦሮ 16፡23-24፤ 1ቆሮ 1፡14

2 ታ ኢሻዞ! ኔ ሼምፖይ ሎኦን ዲዛ ማላ ኔ ኣሳቴꬃይ ሎኦ ዳና ማላኔ ኔ ኦꬂዛዚ ዉሪካ ኔስ ጊጋ ጊዳና ማላ ታ ኔስ ዎሳይስ። 3 ኔኒ ቱማስ ኣማኔቲዳዴ ጊዲዳ ማላ ቃሴካ ኔ ሃኖይ ዉሪ ቱሙ ጊዲዳይሳ ኢሲ ኢሲ ኣማኒዛ ኣሳቲ ታኮ ዪዲ ኔ ጊሻስ ዮቲን ሲያዳ ታ ዳሮ ኡፋዬታዲስ። 4 ጋሶይካ ታ ናይቲ ሎኦኒኔ ቱማን ሲሜሬቲሺን ሲሳፌ ኣꬊዛ ሃራ ኡፋይሲ ታስ ዴና።

5 ታ ኢሻዞ! ኢስቲ ኔስ ኢማꬅ ጊዲኮካ ኔኒ ኔ ኢሻታስ ኦꬂዳ ሚሼ ኡባን ኣማኔታዳሳ። 6 ኔ ቦላ ኣይ ማላ ሲቆይ ዲዛኮ ኢስቲ ኔ ጊሻስ ዎሳ ኬꬃ ኣሳ ሲንꬃን ማርካቲዳ፤ ኢስቲ ቢዛ ኦጌን ጾስ ኡፋይሲዛ ሃኖን ኔ ኢስታ ማዲኮ ሎኦ ኦꬃሳ። 7 ኣይስ ጊኮ ኢስቲ ጾሳ ኣማኖንታይታፔ ኣይኮካ ኤኮንታ ኪርስቶሳ ሱንꬃ ጊሻስ ሜላ ኬዚዳ። 8 ሄሳ ጊሻስ ኑ ኢሲፌ ቱማስ ኦꬃና ማላ ሄይታንታ ማላታ ሞኪ ኤካናስ ቤሴስ።

9 ታኒ ዎሳ ኬꬃስ ሃይሳፌ ካሴ ጻፋዲስ፤ ጊዶ ኣቲን ካሌꬂዛዴ ጊዳና ኮይዛ ዲዮጺራጾሲ ኑኒ ጊዛዝ ኤኬና። 10 ሄሳ ጊሻስ ታ ሄ ቢኮ ኢዚ ባ ኢታ ቃላን ኑ ሱንꬅ ሞራናስ ኦꬂዳይሳ ታ ኢንቴስ ቆንጪሳና፤ ሄሲካ ኢዛስ ጊዶንታ ኢጺን ኣማኒዛ ኣሳ ሞኪ ኤኬና፤ ሞኪ ኤካና ኮይዛይታካ ዲጌሲኔ ዎሳ ኬꬃፌ ኬሲ ጎዴስ።

11 ታ ኢሻዞ! ሎኦታ ሚሳታ ኣቲን ኢታ ኣሳታ ሚሳቶፓ፤ ሎኦ ኦꬂዛዴይ ዉሪካ ጾሳ ኣሳ፤ ኢታ ኦꬂዛዴይ ጊዲኮ ጾስ ቤዪቤና። 12 ዲሜጺሮሳስ ኣሲ ዉሪ ሎኦ ማርካቴስ፤ ቱማይካ ኢዛስ ማርካታዉስ፤ ኑኒካ ኢዛስ ማርካቶስ፤ ኢንቴካ ኑ ማርካይ ቱሙ ጊዲዳይሳ ኤሬታ።

13 ታ ኔስ ጻፋና ቡሮ ዳሮ ዮኦይ ዴስ ሺን ዋራቃታን ጻፋናስ ኮይኬ። 14 ታ ኔና ማታ ዎዴ ቤያናስ ሂዶታ ኦꬃይስ፤ ሄ ዎዴ ኑ ኢሲፌ ኡቲ ሃሳያና።

15 ኣኔ ሳሮን ዳ፤ ኔ ላጌቲ ኔና ሳሮ ሳሮ ጌቴስ፤ ታ ላጌታ ሱንꬃን ሱንꬃን ጼይጋዳ ሳሮ ጋ።