1 ሂስቲኮ ኢንቴ ኪርስቶሳራ ኢሲፌ ዴንዲዳይታ ጊዲኮ ኪርስቶሲ ጾሳ ኣቻን ኡቲዳሶሆን ፑዴን ዲዛ ሃኖቴꬃ ኮዪቴ። ማዛ 110፡1 2 ኢንቴ ቆፋይ ፑዴ ቦላን ዲዛ ሚሻ ቦላ ጊዶ ኣቲን ሃ ቢታ ዮኦ ቦላ ጊዶፖ። 3 ጋሶይካ ኢንቴ ሃይቂዴታኔ ኢንቴ ዴኦይካ ኪርስቶሳራ ጾሳ ኣቻን ቆቴቲዴስ። 4 ኢንቴስ ዴኦ ጊዲዳ ኪርስቶሲ ቆንጪዛ ጋላስ ኢንቴካ ሄ ዎዴ ኢዛራ ኢሲፌ ቦንቾራ ቆንጫና።

5 ሄሳ ጊሻስ ኢንቴስ ቢታ ቦላ ዲዛ ኣሞቴꬅ ዲጊቴ፤ ሄይቲካ ላይማ፥ ቱናቴꬅ፥ ኣሾ ኣሞ፥ ኢታ ኣሞቴꬂኔ ኤቃስ ጎይኖ ማላ ጊዲዳ ጋጲጋጶ። 6 ሄይታንታ ጋሶን ጾሳ ሃንቆይ ጾሳስ ኣዛዜቶንታይታ ቦላ ያና። 7 ኢንቴካ ካሴ ዲዛ ዱሳን ሄ ሚሻታ ኦꬂዴታ።

8 ሃኢ ጊዲኮ ሃንቆ፥ ዪሎ፥ ጫሼ፥ ዚጊርሲኔ ዬላሲዛ ሃሳያ ሄይታንታ ሚሳቲዛይታ ኡባ ዲጊቴ። 9 ካሴ ጬጋ ኣሳቴꬅ ኢዛ ኦሶራ ጋꬂ ኢንቴፌ ቃሪ ዬጊዳ ጊሻስ ኢንቴ ኢንቴ ጋርሳን ኢሶይ ኢሳራ ዎርዶ ሃሳዮፒቴ። ኤፌ 4፡22 10 ባና ሜꬊዳይሳ ሚሳታና ማላ ኤራን ኦራጺዳ ኦራꬃ ኣሳቴꬅ ማይኢዴታ። ኤፌ 4፡24፤ ሜꬌ 1፡26 11 ሄን ጊሪኬ ኣስ ጊዲን ዎይኮ ኣይሁዳ ኣስ ዎይኮ ቃጻሬቲዳይታ ዎይኮ ቃጻሬቶንታይታ ዎይኮ ታማርዳይታኔ ታማሮንታይታ ዎይኮ ማሬቶንታይታ ዎይኮ ኣይሌ ዎይኮ ጎቃ ጌቴቲዛ ዱማቴꬂ ዴና፤ ኪርስቶሲ ሄይታንታ ኡባሳ፤ ቃሴ ኡባንካ ዴስ። *ታማርዳይታኔ ታማሮንታይታ ጊዛይሲ ካሴ ኮይሮ ጊሪኬ ቃላን ባርባሪያኔ ኣሲኩቴ ጉሲ ጊዲሺን ኢዚካ ዎራ ጊዶፌ ዪዳ ኣሳታኔ ጊሪኬ ቃላ ኤሮንታይታ ቤሴስ 12 ሄሳ ጊሻስ ዱማ ጊዲዲ ዶሴቲዳይቶ! ኢንቴ ጾሳስ ዶሬቲዳይታ ጊዲዳ ማላ ሚሼቴꬂኔ ኪያቴꬅ፥ ኣሽኬቴꬅ፥ ቦንቾኔ ዳንዳያ ማይኢቴ። ኤፌ 4፡2 13 ኢንቴ ኢሶይ ኢሳ ዳንዳይቴ፤ ኢንቴፌ ኢሳዴይ ኢሳዴ ቦላ ሚሼቲኮ ዮኦይካ ኢዛ ቦላ ዲኮ ኢሶይ ኢሳስ ኣቶ ኣቶ ጌቴቲቴ፤ ጎዳይካ ኢንቴስ ኣቶ ጊዳ ማላ ኢንቴካ ሃራ ኣሳስ ኣቶ ጊቴ። ኤፌ 4፡32 14 ሄሳ ኡባ ቦላ ኩሜꬃ ኢሲፌቴꬃን ሺሺ ቃቺዛ ሲቆ ማይኢቴ። 15 ኢንቴ ዉሪካ ኢሲ ኣሾ ጊዲዲ ሳሮቴꬃስ ጼይጌቲዳ ኪርስቶሳ ሳሮቴꬂ ኢንቴ ዎዚናን ካዎቶ፤ ኢንቴ ጋላቲዛይታ ጊዲቴ።

16 ኪርስቶሳ ቃላይ ኢንቴናን ኩሜꬅ ጊዶ፤ ኢንቴ ኢንቴ ጋርሳን ኣꬎ ኤራቴꬃን ታማርቴኔ ዞሬቲቴ፤ ዬꬃኒኔ ሳባን ኣያና ዬꬃን ጋላታራ ጋꬂ ኢንቴ ዎዚናራ ጾሳስ ዬጺቴ። 17 ኢዛ ባጋራ ጾሳ ኣዋስ ጋላታ ሺሺሼ ቃላን ጊዲን ዎይኮ ኦሶን ኢንቴ ኦꬂዛይሳ ኡባ ጎዳ ዬሱሳ ሱንꬃን ኦꬂቴ።

18 ማቼቶ! ጎዳ ኣቻን ኢንቴስ ቤሲዛ ሚሽ ጊዲዳ ጊሻስ ኢንቴ ኣዚናታስ ኣዛዜቲቴ። ኤፌ 5፡22፤ 1ጴጽ 3፡1 19 ኣዚናቶ! ኢንቴ ኢንቴ ማቼታ ሲቂቴኔ ኢስታስ ሜንጼ ኢቶፒቴ። ኤፌ 5፡25፤ 1ጴጽ 3፡7

20 ናይቶ! ኢንቴ ጎዳ ኡፋይሳና ማላ ኢንቴ ኢንቴና ዬሊዳይታስ ኡባ ሚሻን ኣዛዜቲቴ። ኤፌ 6፡1 21 ኣዋቶ! ናይቲ ሂዶታ ቃንጾንታ ማላ ኢንቴ ናይታ ሃንቄꬆፍቴ።ኤፌ 6፡4

22 ኣይሌቶ! ኣስ ኡፋይሳናሲኔ ጮ ኣይፌሶን ቤታናስ ጊዶንታ ሱሬ ዎዚናፔ ኢንቴ ጎዳስ ባቢቴ፤ ሃይሳ ሃ ቢታን ሃሪዛ ጎዳታስካ ሃኖ ኡባን ኣዛዜቲቴ። ኤፌ 6፡5-8 23 ኢንቴ ኦꬂዛ ሚሽ ኡባ ኣሳስ ጊዶንታ ጎዳስ ኦꬂዛ ማላ ታይቢዲ ኩሜꬃ ዎዚናፔ ኦꬂቴ። 24 ኢንቴ ጎዳ ኣቻፌ ኢንቴ ኦሶ ማላ ኤካናስ ላታይ ዲዛይሳ ኢንቴ ኤሬታ፤ ኢንቴ ኦꬂዛይ ጎዳ ዬሱስ ኪርስቶሳሳ። 25 ቆሆ ኦꬂዳዴይ ባ ኦꬂዳሪ ኩሼ ኤካና፤ ኢዛ ኣቻን ዱማ ማዶይ ዴና። ዛሬ 10፡17፤ ኤፌ 6፡9