1 ካዎ ኢዮኣቄሜይ ዩሁዳን ካዎቲዳ ሄꬓንꬆ ላይꬃን ባቢሎኔ ካዎ ናቡካዳናጾሬይ ዬሩሳላሜ ዶዲዴስ። 2ካዎ 24፡1፤ 2ታሪ 36፡5-7 2 ጎዳይ ዩሁዳ ካዎ ኢዮኣቄሜ ኣማርዳ ጾሳ ኬꬃ ሚሻታራ ኢዛ ኩሼን ኣꬂ ኢሚዴስ፤ ኢዚካ ባ ጾሳ ኬꬃን ዎꬃና ሳናኦሬ ኤፊዴስ፤ ኢዚ ዲኢ ኤፊዳ ጾሳ ኬꬃ ሚሻ ኡባካ ባ ኤቃ ጾሳታ ሚሼ ዎꬂዛ ኬꬃን ዎꬂዴስ። 3 ሄሳፌ ጉዬ ካዎ ናቡካዳናጾሬይ ባ ኦሳንቻታ ሃላቃ ኣሺፌናዜይ ካዎሶ ኣሳፔኔ ዳናታ ዜሬꬃፌ ጊዲዳ ኢስራኤሌታ ኤሃና ማላ ኣዛዚዴስ። 4 ሄ ዶሬቲዳይቲ ናቴꬂኔ ካዎ ኬꬃን ኦꬃናስ ዳንዳይዛ ኤራቴꬂ ዲዛይታ ጊዳና ማላ፥ ማላ ሎኦታ፥ ኣꬎ ኤራቴꬂ ዲዛይታ፥ ዩሺ ቆፒዛይታ፥ ኡባ ኤሶን ኤኪዛይታኔ ኢስታ ኣሳቴꬃ ቦላ ቦሬይ ባይንዳይታ ጊዳና ማላ ቆፍሲዴስ፤ ሄይታ ቃሴ ባቢሎኔ ቃላኒኔ ሄ ዴሬ ቃላን ጻፎ ዎጋ ታማርሳና ማላ ኣዛዚዴስ። 2ካዎ 20፡17-18፤ 24፡10-16፤ 2ታሪ 36፡10፤ ኢሳ 39፡7-8 5 ኢስቲ ማና ካꬂኔ ኡያና ዎይኔ ኡሺ ካዎዛ ማዳፌ ጊዳና ማላ ኣዛዜቲዴስ፤ ሂስቲዲ ሄꬑ ላይꬅ ታማሪ ኤሪዳፔ ጉዬ ኢስቲ ካዎዛ ሲንꬅ ሺቂዲ ካዎ ኬꬃን ኦꬃና ማላ ዮኦይ ቃሼቲዴስ።

6 ሄ ዶሬቲዳይታ ጊዶፌ ዩሁዳ ቆሞፌ ዳኔሊ፥ ሃናኒያይ፥ ሚሻኤሌይኔ ኣዛሪያሲ ዪዳ። 7 ካዎዛ ሹሜታ ሃላቃይ ኢስታ ሱንꬃ ላሚዲ ዳኔላ ቢልጻሶሬ፥ ሃናኒያ ሲዲራቃ፥ ሚሻኤሌ ሚሳቃ፥ ኣዛሪያሳ ቃሴ ኣብዲናጎ ጊ ሱንꬂዴስ።

8 ዳኔሊ ካዎዛ ማዳፌ ሚዲኔ ዎይኔ ኡሻ ኡዪዲ ባና ቱኒሶንታ ማላ ቆፋ ቃቺዴስ፤ ሂስቲዲ ሄሳ ሄ ቆፋዛ ኤሮ ጊ ኤካና ማላ ኣሺፌናዜ ዎሲዴስ። 9 ጾሲ ዳኔላስ ሹሜዛ ሲንꬃን ቴማ ኢሚዲ ቃꬌታና ማላ ኦꬂዴስ። 10 ጊዶ ኣቲን ኣሺፌናዜይ ካዎዛስ ባቢዳ ጊሻስ ዳኔላስ፥ «ኢንቴ ማና ካꬂኔ ኡያና ኡሹ ኢንቴስ ኣዛዚዳይ ካዎዛኮ፤ ኢንቴ ቃሴ ሃንኮ ናቴꬃታፔ ጊልቂዲኔ ላፊ ቤቲኮ ካዎፔ ኢንቴ ቦላ ሜቶ ጋሲሳና» ጊ ዮቲዴስ።

11 ሄሳፌ ጉዬ ዳኔላ፥ ሃናኒያ፥ ሚሻኤሌኔ ኣዛሪያሳ ናጊ ካꬅ ሚዛና ማላ ሹሜታ ሃላቃ ኣሽፌናዜይ ዎሲዳዴኮ ዳኔሊ ቢዲ፥ 12 «ኑኒ ኣታኪልቴ ሚሼኔ ሃꬅ ኡዪሼ ጋምኣና ማላ ኔ ኑና ኔ ኦሳንቻታ ኣኔ ታሙ ጋላስ ጋካናስ ፓጫ ቤያ። 13 ሄሳፌ ጉዬ ኑና ሃንኮ ካዎዛ ማዳፌ ሚዛ ናቴꬃታራ ጋꬃ ፓጫ ጼላዳ ኔ ዶሲዳዝ ኑ ቦላ ኦꬃ» ጊዴስ።

14 ኢስታ ናጊዛይሲካ ሄ ቆፋዛ ኤኪዲ ታሙ ጋላስ ጋካናስ ኢስታ ፓጪዴስ።

15 ሄ ታሙ ጋላሳይ ዉሪዳፔ ጉዬ ካዎዛ ማዳፌ ሚዛ ናቴꬃ ኡባፌ ኣꬊዲ ኢስታ ኣሳቴꬃይ ሎኢዲኔ ኦርዲዲ ቤቲዴስ። 16 ሄ ጋላሳፌ ዶሚዲ ኢስታ ናጊዛይሲ ካዎ ማዳፌ ኢስታስ ዪዛ ሎኦ ቁማኔ ዎይኔ ኡሻ ኣጊዲ ኣታኪልቴ ኢሞ ኦይኪዴስ።

17 ጾሲካ ሄ ኦይዱ ናቴꬃታስ ኣꬎ ኤራቴꬅ፥ ጻፎ ኤራቴꬂኔ ኣኬካ ኢሚዴስ፤ ዳኔላስ ጊዲኮ ሄሳፌካ ቦላራ ኣጁታኔ ኣጉሞ ቢርሺዛ ኤራቴꬅ ዴስ።

18 ካሴ ካዎዚ ዎꬂዳ ሄꬑ ላይꬃይ ጋኪን ኣሽፌናዜይ ሄ ናቴꬃታ ኡባ ኤኪ ኤፊዲ ናቡካዳናጾሬ ሲንꬅ ሺሺዴስ። 19 ካዎዚካ ኢስታ ኡባ ሃሳይሲዳ ዎዴ ኢስታ ጊዶፌ ዳኔላራ፥ ሃናኒያራ፥ ሚሻኤሌራኔ ኣዛሪያሳራ ጊናቲዛ ኣሲ ቤቲቤና፤ ሄሳ ጊሻስ ኢስቲ ካዎዛ ሲንꬃን ኦꬃና ማላ ዶሬቲዳ። 20 ካዎዚ ኦይቺዳ ኣይ ኣꬎ ኤራቴꬃኒኔ ኣኬካን ኢዚ ኣይሲዛ ዴሬን ዲዛ ማሮታፔ፥ ሳጋታፔ፥ ታሙ ኩሼፔ ኣꬊ ቤቲዳ። 21 ዳኔሊካ ፓሪሴ ካዎ ቂሮሲ ካዎቲዳ ኮይሮ ላይꬅ ጋካናስ ካዎቴꬃ ጋርሳን ኦꬂሼ ጋምኢዴስ።