ዛሬꬆ ማጻፋ
ጊዶ ቆፋ
ዛሬꬆ ማጻፋይ ኢስራኤሌ ኣሳይ ባዞ ቢታን ዳሮ ዎዴ ሄሜቲሼ ካናኔ ጌላናስ ጉꬅ ኣሺዲ ሞኣቤ ዴሬን ጋምኢዳፔ ጉዬ ሙሴይ ኢስታስ ዛሪ ዛሪ ዮቲዳ ዮኦታ ኦይኪዴስ። ዛሬꬆ ማጻፋን ጻፌቲ ዲዛይቲ ዳሮ ጎኢዛ ሚሻታ ጊዶፌ ኢሲ ኢሲ ኦሶቲ ሃይሳፌ ካሊ ዲዛይታ፥ 1. ሙሴይ ካሴ ኣꬊዳ ኦይዱ ታሙ ላይꬃታን ሃኒዳ ዳሮ ጊታ ሃኖታ ዩሺ ቆፒዲ ዮቴስ። ጾሳይ ኢስታ ባዞ ቢታን ዎስቲ ዎስቲ ካሌꬂዳኮ ዴሬዛ ኣኬኪሶን ኣሳይ ጾሳስ ኣማኔቲዛ ኣስ ጊዳና ማላኔ ሱሬቴꬃን ኢዛስ ኣዛዜታና ማላ ቆፍሲዴስ። 2. ሙሴይ ታሙ ኣዛዞታ ዛሪ ዛሪ ዮቲሼ ሃራፔካ ኮይሮ ኣዛዞዛ ቢርሼꬂ ቢርሺ ዮቲዲ ዴሬዚ ጾሳስ ጻላ ጎይናና ማላ ቆፍሴስ፤ ሄሳራካ ጋꬂዲ ኢስራኤሌ ኣሳይ ኢስታስ ሂዶታን ኢሜቲዳ ዴሬዪን ዲሼ ኢስቲ ናጋናስ ቤሲዛ ዎጋታ ዱማ ዱማ ዎጋታ ቆንጪሲ ዮቲዴስ። 3. ሙሴይ ጾሲ ኢዛራ ጫቄቲዳ ቃላይ ኣይ ማላኮ ዴሬዛስ ቢርሺ ዮቲዲ ዴሬዚ ሄሳ ሄ ቃላስ ባ ኣማኔቴꬃ ኦራጺሳና ማላ ኢስታ ቆፍሲዴስ። 4. ኢያሶይ ሙሴሶሆን ጊዲዲ ጾሳ ዴራ ካሌꬃና ማላ ሹሜቲዴስ። ሙሴይ ጾሳ ኣማኔቴꬃ ጊሻስ ጊጊዳ ጊንጾ ዬጺዳፔ ጉዬ ኢስራኤሌ ዴራ ኡባ ኣንጂዳፔ ጉዬ ዮርዳኖሴ ሻፋፔ ኣርሼይ ዉሊዛ ባጋራ ዲዛ ሞኣቤ ዴሬን ሃይቂዴስ። ሃ ማጻፋስ ኣይፌ ዮኦይ ጾሲ ባ ዶሲዳይታኔ ዶሬቲዳ ባ ዴሬታ ኢዚ ኣሺዳይሳኔ ኣንጂዳይሳ ዮቴስ። ዴሬዚካ ጾሳ ኣንጆይ ኢዛፔ ሻኬቶንታ ሼምፖራ ፓጻ ዳና ማላ ጾሲ ኣሳስ ኦꬂዳ ኦሶ ኡባ ዎዴ ኣኬኪዲ ኢስቲ ጾስ ሲቃናሲኔ ኢዛስ ኣዛዜታናስ ቤሲዛይሳ ኣሳ ቆፍሲዴስ። ሃ ማጻፋስ ኣይፌ ቆፋታ ኦይኪዳ ጺቂሴቲ ሃ ማጻፋን ሼምፖ 6፡4-6 ጋካናስ ዲዛይታ ጊዲሺን ሄይቲካ ዬሱሲ፥ «ኣዛዞታ ኡባታፔ ኣꬊዛ ጊታ ኣዛዞታ» ጊዲ ኢስታስ ዮቲዳ ቃላታ ኦይኪዳይታ። ሄይቲካ፥ «ኔኒ ኔ ጎዳ ኩሜꬃ ዎዚናፔ፥ ኩሜꬃ ሼምፖፌ፥ ኩሜꬃ ዎልቃፌ ሲቃ» ጊዛይሳ።
ሃ ማጻፋይ ኦይኪዳ ኩሜꬃ ቆፋ
ሙሴይ ኮይሮ ሃሳይዳ ሃሳያ 1፡1—4፡49
ሙሴይ ናምኣንꬆ ሃሳይዳ ሃሳያ 5፡1—26፡19
ታሙ ኣዛዞታ 5፡1—10፡22
ዎጋታ፥ ማራታኔ ሴራታ 11፡1—26፡19
ኢስቲ ካናኔ ጌላናፔ ካሴ ኢስታስ ኢሜቲዳ ካሌꬆ ዎጋታ 27፡1—28፡68
ጫቆ ቃላ ኦራጺሶ 29፡1—30፡20
ሙሴይ ዉርሴꬃን ሃሳይዳ ቃላ 31፡1—33፡29
ሙሴ ሃይቆ 34፡1-12
1
ኢስራኤሌ ኣሳይ ሲና ዙማ ማታፔ ዴንዲ ባና ማላ ኢሜቲዳ ኣዛዞ
1 ሃይሳ ሃ ማጻፋን ዲዛ ቃላይ ዉሪካ ዮርዳኖሴ ሻፋፔ ሄ ፒንꬃን ኣርሼይ ሞኪዛ ባጋራ ዲዛ ባዞን ኢስቲ ዲሺን ሙሴይ ኢስራኤሌ ናይታስ ዮቲዳ ቃላ። ሙሴይካ ሃ ቃላ ዮቲዛ ዎዴ ኢስቲ ሱፌ ጌቴቲዛሶ ጊናራ ፓራኔ ካታማፔ ቃሴካ ሃራ ባጋራ ቶፔሌ፥ ላባ፥ ሃጺሮቴኔ ዲዛሃቤ ጌቴቲዛ ካታማታ ጊዶን ዲዛ ዮርዳኖሴ ሾባን ዴቴስ። 2 ሲና ዙማፔ ዴንዲዲ ቃዴሴ ባሪኔ ጋካናስ ኤዶሜ ዙማታ ቦላራ ኤፊዛ ቶሆ ኦጌራ ቢኮ ታማኔ ኢሲ ጋላስ ኤኬስ። 3 ጊብጼፔ ኢስቲ ኬዚዳፔ ኦይዱ ታማንꬆ ላይꬃን ታማኔ ኢሲንꬃ ኣጊናይ ጌሊዳ ኮይሮ ጋላስ ሙሴይ ዴሬዛስ ኤሪሳና ማላ ጎዳይ ኢዛስ ዮቲዳ ቃላ ኡባ ኢስታስ ዮቲዴስ። 4 ሄሲካ ሃኒዳይ ሃሴቦኔ ካታማን ካዎቲ ሃሪዛ ኣሞሬ ዴሬ ካዎ ሲሆኔኔ ኣስታሮቴን፥ ኤዲራኤ ካታማን ኡቲዲ ሃሪዛ ባሳኔ ካዎ ኣጌ ጾኒዳፔ ጉዬና። 5 ኣሳይ ዮርዳኖሴፔ ኣርሼይ ሞኪዛ ባጋራ ሞኣቤ ዴሬን ዲሺን ሙሴይ ሃይሳፌ ካሊ ዲዛ ጎዳ ዎጋ ቆንጪሴꬅ ዶሚዴስ፤
6 «ኑኒ ሲና ዙማ ቦላ ዲዛ ዎዴ ጎዳ ኑ ጾሳይ ኑስ፥ ‹ሄኮ ኢንቴ ሃይሳ ዙማ ቦላ ዳሮ ጋምኢዴታ፤ 7 ሃይሳፌ ጉዬ ኢንቴ ዲዛሶፔ ዴንዲ ጌዴ ጌዜቲዛ ኣሞሬታ ዴሬ፥ ኢስታ ሄራን ዲዛ ኣራቤ ዴሬን ዲዛ ጌዜኔ ጋꬋ፥ ኔጌቤ ዴሬ፥ ሜዲቴራኔ ኣባ ላንቄራ፥ ካናኔ ዴሬኔ ሊባኖሴ ባጋራ ካንꬂዲ ጊታ ሃꬃ ኤፊራጺሴ ሻፋ ጋካናስ ካንꬂ ቢቴ። 8 ሄኮ ታኒ ሃ ቢታዮ ኢንቴስ ኢማዲስ፤ ኢንቴካ ቢዲ ኢንቴ ኣዋታስ ኣብራሃሜስ፥ ዪሳቃስ፥ ያቆቤሲኔ ኢስታፌ ጉዬን ያና ኢስታ ዜሬꬃታስ ኢማናስ ጎዳይ ጫቂዳ ቢታዮ ላቲቴ› ጊዴስ» ጊዲ ዮቲዴስ።
ሙሴይ ዴሬ ካሌꬂዛይታ ሹሚዴስ
(ኬሳ 18፡13-27)
9 ሙሴይ ዴሬዛስ፥ «ሄ ዎዴ ታኒ ኢንቴስ፥ ‹ታኒ ታርካ ኢንቴና ካሌꬃናስ ዳንዳይኬ። 10 ኢንቴ ጎዳይ ኢንቴ ቆዳ ሳሎ ጾሊንቴ ማላ ዳርሲዴስ። 11 ሃኢካ ኢንቴ ኣዋታ ጾሳይ ካሴ ኢንቴስ ኢሚዳ ሂዶታ ቃላ ማላ ሺ ዳኮ ጉጂዲ ኢንቴና ኣንጆ። 12 ጊዶ ኣቲን ሃኢ ኢንቴ ጋርሳን ዲዛ ፓላማ፥ ኦሻኔ ኢንቴ ሜቶዛ ታኒ ታርካ ዎስታ ቢርሻና ዳንዳያዚና? 13 ኢንቴ ኢንቴ ቆሞፌ ቆሞፌ ኣኬካይ፥ ኣꬎ ኤራቴꬂ ዲዛይታኔ ኦꬂ ሎሲዳይታ ዶሪቴ፤ ታኒካ ኢስታ ኢንቴ ቦላ ሹማና› ጋ ዮታዲስ።
14 «ኢንቴካ፥ ‹ኔ ሺሺዳ ቆፋይ ሎኦ› ጊ ኤኪዴታ። 15 ሄሳ ጊሻስ ኢሲ ኢሲ ቆሞፌ ኢንቴ ዶሪዳይታ ኦሶ ሎሲዳይታ፥ ኣꬎ ኤራንቻታኔ ኣኬኪዛይታ ኢንቴፌ ኤካዳ ባጋይታ ሻላቃታ፥ ባጋይታ ማቶ ሃላቃታ፥ ባጋይታ ሃምሳ ሃላቃታኔ ኣሲራ ሃላቃታ፥ ባጋይታ ቆሞታ ካሌꬂዛ ሃላቃ ሂስታ ሹማዲስ።
16 «ታ ሄ ዎዴ ኢስታስ፥ ‹ኢንቴ ዴራ ጋርሳን ዴንዲዛ ፓላማኔ ኦሽ ኤኪ ጌላይ ባይንዳ ሱሬ ፒርዳ ፒርዲቴ፤ ኢንቴ ዴራ ጊዶን ዎይኮ ሃራ ዴሬፔ ዪዲ ኢንቴ ጊዶን ዲዛ ኣሳስ ጌላይ ባይንዳ ሱሬ ፒርዳ ፒርዲቴ። 17 ኢንቴ ጌላ ፒርዳ ፒርዶፍቴ፤ ጉꬅ ጊዲን ጊታ ጊዲን ማዶ ፒርዳ ፒርዶፍቴ፤ ፒርዳይ ጾሳስ ጊዲዳ ጊሻስ ኣይ ኣሳስካ ባቦፍቴ፤ ኢንቴፌ ቦላ ጊዲዳይሳ ኡባ ታኮ ኤሂቴ፤ ሄሳ ታኒ ፒርዳና› ጋዲስ። 18 ኢንቴ ኦꬃናስ ቤሲዛይሳ ታ ኢንቴስ ሄ ዎዴ ሎኤꬃ ዮታዲስ።
ቃዴሴ ባሪኔፔ ዴሬዛ ዩዪ ዎቺዛይታ ኪቴቴꬅ
(ታይ 13፡1-33)
19 «ሄሳፌ ጉዬ ኑ ጎዳይ ኑና ኣዛዚዳ ማላ ሲና ዙማፔ ዴንዲዲ ኢንቴ ቤኢዳ ኢታ ባዞዛራ ካንꬂዲ ኣሞሬ ዴሬን ሻራ ሜንꬆራ ኣꬊ ቢዲ ቃዴሴ ባሪኔ ጋኪዶስ። 20 ታኒ ኢንቴስ፥ ‹ጾሳይ ኑና ላቲሳናስ ቃላ ጌሊዳ ሻራ ሜንꬆ ጊዲዳ ኣሞሬ ዴሬ ሄኮ ጋኪዴታ። 21 ሄ ዴሬዮ ሃኖ ቤኢቴ! ጎዳይ ኑ ኣዋታ ጾሳይ ቤኒ ኣዛዚዳ ማላ ኢንቴ ጌሊዲ ኢዞ ላቲቴ፤ ባቦፍቴኔ ሂዶታ ቃንጾፍቴ› ጋ ዮታዲስ።
22 «ኢንቴ ኡባቲካ ታኮ ዪዲ፥ ‹ሄ ቢታይን ዲዛ ካታማቲ ኣይ ማላኮ ቃሴ ኑና ሄ ጋꬃና ኦጌይካ ኣይ ማላ ኦጌኮ ቢ ዎቺ ሲሚዲ ኑስ ዮታና ኣሳታ ኑ ጋርሳፌ ኣኔ ዶሮስ› ጊዲ ታና ኦይቺዴታ።
23 «ሄሳ ሂስታናይሲ ታስ ሎኦ ሚሳቲ ቤቲን ኢንቴ ጋርሳፌ ቆማፌ ቆማፌ ኢሲ ኢሲ ኣስ ዶራዳ ታማኔ ናምኡ ኣሳታ ዬዳዲስ። 24 ኢስቲካ ሻራ ሜንꬆ ዴራራ ካንꬂ ቢዲ ኤሽኮሌ ሾባ ጋካናስ ዩዪ ጾሞሲ ጼሊዳ። 25 ኢስቲካ ሄን ባ ቤኢዳ ሚꬃ ኣይፌፔ ኣማርዳይሳ ኤኪ ዪዲ ጎዳ ኑ ጾሳይ ኑስ ኢማና ቆፒዳ ቢታያ ኬሃ ሎኦ ቢታ ጊዲዳይሳ ኑስ ቆንጪሲ ዮቲዳ።
26 «ጊዶ ኣቲን ጎዳ ኢንቴ ጾሳ ኣዛዞ ቦላ ማካሊዳ ጊሻስ ሄ ቢታዮ ጌላናስ ኮዪቤኬታ። ዛሬ 9፡23፤ ኢብ 3፡16 27 ኢንቴ ኢንቴ ዱንካኔን፥ ‹ጾሲ ኑና ኢጺዴስ፤ ኢዚ ኑና ጊብጼፔ ኬሲዳይ ሃይታ ኣሞሬ ኣሳታን ኑና ዎꬊሳናሲኔ ኢስታ ኩሼን ኑና ኣꬂ ኢማናሳ፤ 28 ሂስቲን ኑ ሄ ኣዛስ ቢዞኒ? ኑኒ ባቦስ፤ ኑኒ ኪቲዳ ኣሳቲ ሄን ዲዛ ኣሳይ ዉሪካ ሚኖኔ ኬሂ ኣዱሳታ ጊዲዳይሳ ቃሴካ ኢስቲ ዲዛ ካታማታ ጊምቤይ ሳሎ ጋኪዳይሳ ኑስ ዮቲዳ፤ ኬሂ ኣዱስ ጊዲዳ ኤናቄ ናይታ ቤኢዳ› ጊዲ ዙዙሚዴታ።
29 «ጊዶ ኣቲን ታኒ ኢንቴስ፥ ‹ሃይታ ሃ ኣሳታስ ባቦፍቴኔ ዳጋሞፍቴ። 30 ኢንቴፌ ሲንꬃራ ቢዛ ጎዳ ኢንቴ ጾሳይ ካሴ ኢንቴ ኣይፌን ቤኢሺን ጊብጼታ ቦላ ኦꬆይሳ ማላ ሃኢካ ኢዚ ኢንቴ ጊሻስ ኦሌታና። 31 ኣዋይ ባ ና ኣልኢሲዛ ማላ ኢንቴ ቢዛ ባዞ ቢታ ኡባን ኢዚ ኢንቴና ካሌꬂሼ ኢንቴና ሳሮን ሃይሳ ዎስቲ ጋꬂዳኮ ኢንቴ ቤዪዴታ። ሃዋ 13፡18 32-33 ሃ ኡባ ታ ዮቲንካ ኢንቴ ዱንካናና ሶሆዛ ቤሳናሲኔ ኢንቴ ባና ኦጌ ቤሳናስ ኦማርስ ቱሳ ታማን፥ ጋላስ ቱሳ ማላ ሻራን ኢንቴና ካሌꬂዳ ኢንቴ ጎዳን ኣማኔቲቤኬታ። ኢብ 3፡19
ጾሳይ ኢስራኤሌ ኣሳስ ኢሚዳ ቂጻቴ
(ታይ 14፡20-45)
34 «ኢንቴ ዙዙሚዳ ዙዙንꬃ ጾሲ ሲዪዲ ሃንቄቲዴስ፤ 35 ሄሳ ጊሻስ፥ ‹ታኒ ካሴ ኢንቴ ኣዋታስ ኢማና ጋዳ ጫቂዳ ሄ ሎኦ ቢታዮ ሃ ኢታ ዬሌታፔ ኢሶይካ ጌሌና። ኢብ 3፡18 36 ዮፊኔ ና ካሌቤይ ጻላ ሄ ቢታዮ ጌላና፤ ኢዚካ ኩሜꬃ ዎዚናፔ ኣማኔቲ ቤቲዳ ጊሻስ ሄ ኢዚ ቤኢዳ ቢታዮ ኢዛሲኔ ኢዛ ዜሬꬃታስ ታ ኢማና› ጊ ጫቂዴስ።
37 «ኢንቴ ጋሶን ጎዳይ ታና ሃንቄቲዲ፥ ‹ሙሴ ኔኒካ ሄ ዴሬዮ ጌላካ። 38 ጊዶ ኣቲን ኔና ማዲዛ ናዌ ና ኢያሶይ ሄ ቢታዮ ጌላና፤ ሄ ቢታዮካ ላታና ማላ ኢስራኤሌ ናይታ ካሌꬃናይ ኢዛ ጊዲዳ ጊሻስ ኔ ኢዛ ሚንꬄꬃ› ጊዴስ።
39 «ቃሴካ ጎዳይ ኢንቴስ፥ ‹ኢንቴ ኑ ናይቲ ዲኤታና› ጊዳ ኢታኔ ኪያ ሻኪ ኤሮንታ ቂ ናይቲ ጻላ ሄ ቢታዮ ጌላና፤ ታኒ ሄ ቢታዮ ኢስታስ ኢማና፤ ኢስቲካ ሄ ቢታዮ ላታና። 40 ኢንቴ ጊዲኮ ሲሚዲ ዞኦ ኣባኮ ኤፊዛ ኦጌዛራ ዱጌ ባዞ ቢቴ» ጊዴስ።
41 «ኢንቴካ፥ ‹ሙሴ! ኑኒ ኑ ጎዳ ቆሂዶስ፤ ሃኢ ጎዳይ ኑ ጾሳይ ኑና ኣዛዚዳ ማላ ኑ ኦሌታና› ጊዴታ፤ ሄ ሻራ ሜንꬆ ዴሬዮ ዎራጆይ ካዉሻ ሚሽ ሚሳቲ ቤቲን ኢሶይ ኢሶይ ኦላስ ጊጌቲዴታ» ጊዴስ።
42 ጎዳይ ጊዲኮ፥ «ታ ኢንቴናራ ኬኦንታ ጊሻስ ኦላስ ኬዞፒቴ፤ ኢንቴ ኢጺስ ጊ ኬዚኮ ኢንቴ ሞርኬቲ ኢንቴና ጾናና» ጊዲ ታስ ዮቲዴስ። 43 ታኒካ ጎዳይ ታስ ዮቶይሳ ኢንቴስ ዮታዲስ ሺን ኢንቴ ኢጺዴታ። ኢዛ ቦላካ ማካሊዴታ፤ ኦቶሮ ዳሮፔ ዴንዲዳይሳን ኢንቴ ሄ ሻራ ሜንꬆ ቢታዮ ኦላናስ ቢዴታ። 44 ሄ ዙምቡላታ ቦላ ዲዛ ኣሞሬ ዴሬ ኣሳቲ ኢንቴናራ ኦላ ኦይኬቲዳ፤ ኢስታ ኦላንቻቲ ማꬃ ማላ ኢንቴ ቦላ ዪዲ ሆርማ ጋካናስ ኢንቴና ዬዴꬂዳ፤ ዙምቡላቲ ዳሪ ኡቲዳ ኤዶሜ ዴሬን ኢንቴና ጾኒዳ። 45 ሄሳ ጊሻስ ኢንቴ ሲሚ ዪዲ ጎዳ ሲንꬃን ዬኪዴታ፤ ጊዶ ኣቲን ኢዚ ኢንቴ ዬሆዛኔ ዋሶዛ ሲዪዲ ኢንቴና ማዳናስ ኮዪቤና። 46 ሂስቲን ኢንቴ ቃዴሴን ዳሮ ዎዴ ጋምኢዴታ።