1 ሄሳ ጊሻስ ጎዳ ኢንቴ ጾሳ ሲቂቴ፤ ኢዚ ኢንቴፌ ኮይዛ ኢዛ ዎጋ፥ ማራኔ ኣዛዞታ ኡባ ዎዴ ፖሊቴ። 2 ጎዳ ኢንቴ ጾሳ ሴራዛ ሄሲካ ኢዛ ጊታቴꬃ፥ ኢዛ ዎልቃኔ ኢዛስ ዲዛ ማታ ቤኢዳይኔ ኤሪዛይ ኢንቴ ናይታ ጊዶንታ ኢንቴና ጊዲዳይሳ ዩሺ ቆፒቴ። 3 ማላታታኔ ኢዚ ጊብጼ ካዎ ቦላኔ ኩሜꬃ ዴራ ቦላ ኦꬂዳ ጊታ ኦሶታ ኢንቴ ኢንቴ ኣይፌራ ቤኢዴታ። ኬሳ 7፡8-12 4 ቃሴ ኢስቲ ኢንቴና ካሊዲ ዬዴꬂዳ ዎዴ ጎዳይ ጊብጼ ቢታ ኦላንቻታ፥ ኢስታ ፓራታኔ ፓራ-ጋሬታ ዞኦ ኣባን ሚቲሲዲ ሃች ጋካናስ ኢስታ ሙሌራ ꬋይሲዳይሳ ቤኢዴታ። ኬሳ 14፡28 5 ኢንቴ ባዞፌ ዴንዲዲ ሃ ሃይሳ ጋካናስ ጎዳይ ኢንቴስ ኣይ ኦꬂዳኮ ኢንቴ ኤሬታ። 6 ኦሮቤሌ ቆሞታፔ ኤልያቤ ና ዳታኔኔ ኣብራሜ ቦላ ኢዚ ኦꬆይሳ ዩሺ ቆፒቴ፤ ኢስራኤሌ ናይቲ ቤዪሺን ቢታያ ዶዬታዳ ኢስታ፥ ኢስታሶ ኣሳ፥ ኢስታ ዱንካኔኔ ኢስታ ሃሮ ኡባ ሚታዱስ። ታይ 16፡31-32 7 ጎዳይ ኦꬂዳ ሃ ጊታ ኦሶታ ኡባ ኢንቴ ኢንቴ ኣይፌራ ቤኢዴታ።

8 ሂስቲኮ ኢንቴ ፒኒዲ ላታና ቢታዮ ኦይካናስ ኢንቴ ዎልቃ ዴማና ማላ ታኒ ሃች ኢንቴስ ኢሚዛ ኣዛዞታ ኡባ ናጊቴ። 9 ኢንቴ ኢዛ ኣዛዞታ ናጊኮ ጎዳይ ካሴ ኢንቴ ኣዋታሲኔ ኢስታ ዜሬꬃታስ ኢማናስ ጫቂዳ ኤሲኔ ማꬂ ኩሚዳ ሄ ሎኦ ቢታይን ኢንቴ ዳሮ ላይꬅ ዳና። 10 ኢንቴ ላታናስ ጌላና ቢታያ ኢንቴ ኬዚዲ ዪዳ ጊብጼ ቢታ ማላ ጊዱኩ፤ ጊብጼን ኢንቴ ካꬅ ዜሪዳፔ ጉዬ ሃꬂ ካꬃ ጊዶ ባና ማላ ዛራዛ ኢንቴ ቶሆን ዬꬊ ዬꬊ ቤሴታ። 11 ጊዶ ኣቲን ኢንቴ ዮርዳኖሴ ሻፋ ፒኒዲ ላታና ቢታያ ኢዚን ዙማቲኔ ሾባቲ ዲዛ ጊሻስ ኢዛ ኢራ ሃꬅ ኡዪዛ ቢታ። 12 ሃኖ ሃ ቢታዮ ሎኤꬂ ኦይኪዛይኔ ላይꬅ ኩሜꬅ ናጊዛይ ጎዳ ኢንቴ ጾሳ።

13 ሄሳ ጊሻስ ጎዳ ኢንቴ ጾሳ ሲቂቴ፤ ኩሜꬃ ዎዚናፔኔ ኩሜꬃ ሼምፖፌ ኢዛስ ኦꬂቴ፤ ታኒ ሃች ኢንቴስ ኢሚዛ ኣዛዞታ ፖሊቴ። 14 ኢንቴ ሄሳꬆ ኦꬂኮ ኢንቴ ካꬃ፥ ዎይኔኔ ዛይቴ ፓጬይ ባይንዳ ሺሻና ማላ ጎዳይ ኢንቴስ ባꬌሳ ኢራኔ ባልጎ ኢራ ዎዴን ዎዴን ቡኪሳና። 15 ጎዳይ ኢንቴ ሜሄታስ ማታ ዳርሳና፤ ኢንቴስ ኮሺዛ ካꬅ ኢሚን ኢንቴ ካላና። 16 ኢንቴ ጎዳፔ ሃኪዲ ኤቃ ጾሳታስ ኦꬃናሲኔ ጎይናናስ ጉዬ ሲሞንታ ማላ ናጌቲቴ።

17 ኢንቴ ናጌቶንታ ኣጊኮ ጎዳ ሃንቆይ ኢንቴ ቦላ ኤጺ ኬዛና፤ ኢራይ ቡኮንታ ማላኔ ቢታይ ካꬅ ኢሞንታ ማላ ኢዚ ሳሎ ጎርዳና፤ ኢንቴካ ጎዳይ ኢንቴስ ኢሚዳ ሎኦ ቢታይፌ ኤሶን ꬋያና።ሌዌ 26፡3-5፤ ዛሬ 7፡12-16፤ 28፡1-14

18 ኢንቴ ሃ ኣዛዞታ ኡባ ዎዴ ኢንቴ ዎዚናኒኔ ኢንቴ ቆፋን ዎꬂቴ፤ ኢንቴስ ማላታ ጊዳና ማላ ኢስታ ኢንቴ ቄሴን ቃቺቴ፤ ቃሴካ ኢንቴስ ሊጴ ቦላካ ኦይꬂቴ። 19 ኢንቴ ናይታ ታማርሲቴ፤ ኢንቴሶን ኡቲሼ ዎይኮ ኦጌን ሄሜቲሼካ ዎይኮ ሼምፒዛሶን ጊዲንካ ዎይኮ ኦሶ ኡባን ኢስታ ጊሻስ ሃሳዬቲቴ። 20 ኢንቴ ኬꬃ ፔንጌ ቆሲላꬃ ቦላኔ ኢንቴ ጊቤ ፔንጌ ቦላ ጻፊ ዎꬂቴ።ዛሬ 6፡6-9 21 ኢንቴ ሄሳꬆ ኦꬂኮ ኢንቴ ጎዳይ ካሴ ኢንቴ ኣዋታስ ኢማናስ ጫቂዳ ቢታይ ቦላ ኢንቴ ላይꬃይኔ ኢንቴ ናይታ ላይꬃይ ሳኣፔ ቢዲ ሳሎ ጋካና ኬና ኣዱቃና።

22 ጎዳ ኢንቴ ጾሳ ሲቃናስ፥ ኢዛ ኦጌ ኡባ ካላናሲኔ ኢዛን ኣማኔታናስ ታኒ ሃች ኢንቴስ ኢሚዛ ኣዛዞታ ሚንꬂዲ ናጊቴ። 23 ኢንቴ ሄሳꬆ ኦꬂኮ ጎዳይ ሃይታ ኢንቴ ሲንꬃን ዲዛ ካዎቴꬃታ ኡባ ኬሲ ጎዳና፤ ኢንቴኒካ ጮራቴꬃኒኔ ዎልቃን ኢንቴፌ ሚኖ ጊዲዳ ዴሬታ ቢታ ላታና። 24 ኢንቴ ቶሆን ኢንቴ ዬꬊዳ ቢታይ ዉሪካ ኢንቴስ ጊዳና፤ ኢንቴ ዛዋይ ዱጌሃ ባጋራ ዲዛ ባዛፌ ቢዲ ፑዴሃ ባጋራ ዲዛ ሊባኖሴ ዙማ ጋካና፤ ቃሴካ ኣርሼይ ሞኪዛ ባጋራ ኤፊራጺሴ ሻፋፔ ቢዲ ኣርሼይ ዉሊዛ ባጋራ ዲዛ ሜዲቴራኔ ኣባ ጋካና። 25 ኢንቴናራ ኣይ ኣሲካ ኤቄታናስ ዳንዳዬና፤ ጎዳ ኢንቴ ጾሳይ ኢንቴስ ኢሚዳ ሂዶታ ቃላ ማላ ኢንቴ ቢዛሶ ኡባን ኣሳይ ኢንቴና ቤኢዲ ዳጋማና ማላኔ ያያና ማላ ኦꬃና።ኢያ 1፡3-5

26 ሄኮ! ታኒ ሃች ኣንጆፌኔ ቃንጌꬃፌ ኢሳ ኢንቴ ዶራና ማላ ኢንቴ ሲንꬃን ዎꬃዲስ። 27 ታ ሃች ኢንቴስ ኢሚዛ ጎዳ ኢንቴ ጾሳ ኣዛዞታ ናጊኮ ኢንቴ ኣንጄታና። 28 ጊዶ ኣቲን ታኒ ኢንቴና ሃች ኣዛዚዛ ጎዳ ኢንቴ ጾሳ ኣዛዞታ ናጎንታ ኢጺዲ ኢንቴ ኤሮንታ ሃራ ኤቃ ጾሳታ ጎይናናስ ኢዛ ኦጌፔ ካሬ ኬኢዛ ጊዲኮ ኢንቴ ቃንጌታና። 29 ጎዳ ኢንቴ ጾሳይ ኢንቴ ላታና ቢዛ ቢታዮ ላቲሲዳ ዎዴ ኣንጆዛ ጋሪዛኔ ዙማ ቦላ ቃሴካ ቃንጌꬃ ኤባሌ ዙማ ቦላ ኣዋጃ። ዛሬ 27፡11-14፤ ኢያ 8፡33-35 30 ሄ ዙማቲ ዮርዳኖሴ ሻፋፔ ኣርሼይ ዉሊዛ ባጋራ ኣራቤን ዲዛ ካናኔ ቢታን ጌልጌላ ካታማፔ ሲንꬃ ባጋራ ዲዛ ሞሬ ሚꬃ ኣቻን ዴቴስ። 31 ኢንቴ ሄን ዳና ማላ ጎዳ ኢንቴ ጾሳይ ኢንቴስ ኢሚዳ ቢታዮ ላታናስ ኢንቴ ዮርዳኖሴ ሻፋ ፒኒዲ ላቲዛ ዎዴ፥ 32 ታ ኢንቴስ ሃች ኢሚዛ ዎጋኔ ማራ ኡባ ሎኤꬂ ናጊቴ።