1 ጎዳ ኢንቴ ጾሳይ ኢንቴስ ኢሚዛ ቢታን ዲዛ ካዎቴꬃታ ꬋይሲዲ ኢንቴ ኢስታ ካታማታኒኔ ኬꬃታን ዴኦ ዶሚዛ ዎዴ፥ 2 ጎዳ ኢንቴ ጾሳይ ኢንቴስ ጺንጾ ኦꬂዲ ኢሚዛ ቢታን ዲዛ ካታማታፔ ሄꬑ ካታማታ ኢንቴስ ሻኪቴ። 3 ጎዳ ኢንቴ ጾሳይ ኢንቴስ ጺንጾ ኦꬂዲ ኢሚዛ ቢታ ሄꬑ ኬሲ ሻኪቴ፤ ሂስቲዲ ኣሴ ዎꬊዳ ኣሲ ኦኒካ ሄ ካታማታፔ ኢሳን ባቃቲ ኣታና ማላ ሄ ኤፊ ጋꬂዛ ኦጌ ጊግሲቴ። 4 ኢሲ ኣሲ ካሴ ኢዛራ ሞርኬቴꬂ ባይንዳዴ ዎꬋና ጊ ቆፖንታ ዲንጋቴ ኣስ ዎꬊኮ ሄሳዴይ ካታማታፔ ኢሲኔይን ቢ ጌሊዲ ባ ሼምፖ ኣሾ። 5 ሌሚሶስ ናምኡ ኣሳቲ ሚꬅ ቃንጻና ቢዳሶን ኢስቲ ሚꬅ ቃንጺሺን ሚꬃ ቃንጺዛ ቤዪጼዚ ዎይኮ ካልታዚ ቱቴዛፔ ቆፖንታ ኮሌቲ ቢዲ ኢዛራ ዲዛዴዛ ዎꬊኮ፥ ሄ ቤዪጼይ ኢዛ ኩሼፔ ኮሌቲ ቢ ዎꬊዳዴዚ ሄ ሄꬑ ካታማታፔ ኢሲ ካታማዮ ቢ ጌሊ ባ ሼምፖ ኣሾ። 6 ቆቴቲ ኣቲዛ ካታማይ ኤሶን ጋኬቶንታ ሃኮሶን ዲዛ ጊዲኮ ኦጌይ ኣዱቂዳ ጋሶን ሱꬅ ኣዛሪዛዴይ ኬሂ ሃንቄቲዲ ጎዲ ጋኪዲ ሃይቃናስ ቤሶንታይሳ ዎꬋናስ ዳንዳዬስ፤ ጋሶይካ ኢዚ ባ ሾሮ ዎꬊዳይ ሞርኬቴꬂ ዲዛ ጊሻስ ጊዴና። 7 ኢንቴ ሄꬑ ካታማታ ዱማ ሻካና ማላ ታ ኢንቴና ኣዛዚዛይ ሄሳ ጊሻሳ። 8 ጎዳ ኢንቴ ጾሳይ ካሴ ኢንቴ ኣዋታስ ጌሊዳ ሂዶታ ቃላ ማላ ኢዚ ኢንቴ ዛዋ ኣሲኮ፥ 9 ሃች ታ ኢንቴና ኣዛዚዳይሳ ኡባ ኢንቴ ፖሊኮ፥ ጎዳ ኢንቴ ጾሳካ ሲቂኮ ቃሴ ኢዛ ኦጌን ቢኮ ኢዚ ኢንቴስ ሃኖ ቢታዮ ኢሚዛ ጊሻስ ኣሲ ኢስታን ባቃቲ ቢዲ ኣታና ማላ ሃራ ሄꬑ ካታማታ ጉጂ ጊግሲቴ። 10 ኢንቴ ሄሳꬆ ኦꬂዛ ጋሶይካ ኢንቴ ኢዚን ዳና ማላ ጎዳ ኢንቴ ጾሳይ ኢንቴስ ጺንጾ ሂስቲ ኢሚዛ ቢታይን ጺሎ ሱꬂ ጉኮንታ ማላኔ ኢንቴካ ሱꬃ ኣጮን ኦይሼቶንታ ማላሳ።

11 ጊዲኮካ ኢሲ ኣሲ ሞርኬቴꬃን ዴንዲዲ ጌማን ዛማዲ ኡቲዲ ቃꬌታይ ባይንዳ ኣስ ዎꬊዳፔ ጉዬ ባ ሼምፖ ኣሻናስ ሄ ካታማታፔ ኢሲኔይን ባቃቲ ቢኮ፥ 12 ኢዚ ዲዛ ካታማ ጪማቲ ኢዚ ባቃቲ ቢዳ ካታማፔ ኣስ ኪቲ ኤሂሲዲ ሃይቂዳይሳ ሱꬅ ኣዛሪዛዴስ ኣꬂ ኢሜቶ። 13 ኢዛስ ኣይኮካ ቃꬌቶፍቴ፤ ኢንቴስ ኡባ ሚሺ ሎኦ ጊዳና ማላ ሼምፖ ዎꬊዛይታ ኢስራኤሌ ጊዶፌ ꬋይሲቴ።

14 ጎዳ ኢንቴ ጾሳይ ኢንቴስ ኢሚዛ ጺንጾን ቤኒ ኣሳቲ ኢንቴሲኔ ኢንቴ ሾሮስ ጊዶን ኤሲዳ ዛዋ ሾዶፍቴ።

15 ኣሲ ሞሪዳ ሞሮ ሻኪ ኤራናስ ኢሲ ማርካይ ጻላ ጊዴና፤ ናምኡ ዎይኮ ሄꬑ ማርካይ ማርካታና ቤሴስ። ታይ 35፡30፤ ዛሬ 17፡6፤ ማቶ 18፡16፤ ዮሃ 19፡31፤ 2ቆሮ 13፡1፤ 1ጺም 5፡19፤ ኢብ 10፡28 16 ኢሲ ኢታ ኣሲ ሃራ ኣስ ዎርዶራ ሞቲኮ፥ 17 ናምኣቲካ ሄ ዎዴ ጎዳ ሲንꬃን ኦꬂዛ ቄሴታ ሲንꬃኒኔ ፒርዲዛ ዳናታ ሲንꬃን ኤቄቶ። 18 ሄ ፒርዲዛይቲካ ሄ ዮኦዛ ሎኤꬂ ፒልጊ ጼሌቶ፤ ሄ ማርካቲዛዴዚ ባ ኢሻዛ ቦላ ዎርዶራ ማርካቲዳይሲ ቱሙ ጊዲኮ፥ 19 ኢዚ ሄ ሞቶዛ ባ ኢሻ ቃጻይሳናስ ቆፒዳ ቂጻቴዛን ባ ሁኤስ ቃጻዬቶ፤ ሂስቲዲ ሄሳ ማላ ኢታ ኦꬂዛይሳ ኢንቴ ጊዶፌ ዲጊቴ። 20 ሂስቲኮ ሃራ ኣሳይ ሄሳ ሲዪዲ ባባና፤ ሄሳ ማላ ኢታ ኦሶይ ኢንቴ ጊዶን ኦሴቴና። 21 ሄሳ ማላ ኢታ ኦꬂዛይታስ ሙሌካ ቃꬌቶፍቴ፤ ሼምፖ ዎꬊዳዴ ዎꬊቴ፤ ኣይፌ ቶይሲዳዴስ ኣይፌ ቶይሲቴ፤ ኣች ሜንꬂዳዴስ ኣች ሜንꬂቴ፤ ኩሼ ሜንꬂዳዴስ ኩሼ ሜንꬂቴ፤ ቶሆ ሜንꬂዳዴስ ቶሆ ሜንꬂቴ።ኬሳ 21፡23-25፤ ሌዌ 24፡19-20፤ ማቶ 5፡38