1 ኢስራኤሌ ኣሳ ቦራይ ዎይኮ ዶርሲ ꬋይዲ ዎራ ቢሺን ኢንቴ ዴሚኮ ጮኡ ጊ ኣꬎፍቴ፤ ኢዛ ጎዳስ ላጋ ኤፋ ኢማ። 2 ጊዶ ኣቲን ሜሃዴይ ዲዛሶይ ሃሆ ጊዲኮ ዎይኮ ሄ ሜሃዴይ ኦናኮ ኔ ኤሮንታ ኣጊኮ ሜሄዛ ኔሶ ኤካዳ ባ፤ ሜሃዴይ ኮዪሼ ዪኮ ኢዛይሳ ኢዛስ ዛራ። 3 ማይኦ ጊዲን ዎይኮ ሃሬ ጊዲን ዎይኮ ሃራ ኣይ ሚሺካ ኔ ባጋ ኢስራኤሌ ኣሳፔ ꬋዪን ኔ ዴሚዳ ጊዲኮ ዛራዳ ኢዛዴስ ኢማ።

4 ኔ ባጋ ኢስራኤሌ ኣሳስ ሃሬይ ዎይኮ ቦራይ ኦጌን ኩንዲን ኔ ቤኢዳ ጊዲኮ ማዳዳ ዴንꬃ ኣቲን ቤኣሼ ዬጋ ኣꬎፋ።ኬሳ 23፡4-5

5 ጎዳ ኢንቴ ጾሳይ ሄሳꬆ ኦꬂዛይታ ኢጺዛ ጊሻስ ማጫቲ ኣቱማሳታ ማይኦ፥ ኣቱማሳቲ ማጫሳታ ማይኦ ማይኦፌቶ።

6 ኔ ኦጌ ቢሺን ካፎይ ባ ኬꬃን ሚꬃ ቦላ ዎይኮ ቢታ ቦላ ዬሊዳ ጪዬታ ዎይኮ ጱጱሌ ሃጳ ዲዛ ካፎ ኔ ዴሚዳ ካፎዮ ጪዬታራ ጋꬃ ኔሶ ኤፎፓ። 7 ጪዬታ ኔሶ ኤካ ባናስ ዳንዳያሳ፤ ኣዬዮ ጊዲኮ ኢዛ ፒራꬋ ባና ማላ ዬዳ፤ ኔኒ ሄሳꬆ ኦꬂኮ ኔስ ሎኦ ጊዳናኔ ኔ ዳሮ ላይꬅ ዳና።

8 ኔ ኦራꬃ ኬꬅ ኬጻሼ ሄ ኬꬃ ካራፔ ኣሲ ኩንዲዲ ሱꬃ ኣጮን ኔና ኦይሺሶንታ ማላ ኬꬃ ካራ ቦላ ቴቄ ዎꬃ።*ኬꬃ ካራ ቦላ ቴቄ ዎꬃ ጊዛይሲ ኢስራኤሌ ቢታን ኬꬅ ኬጺሼ ኬꬃ ካራይ ቦላን ዴምባ ጊዲዳ ጊሻስ ኣሲ ቦላፌ ኩንዶንታ ማላ ጋጻራ ቴቄ ዎꬄቴስ።

9 ኔኒ ዎይኔ ሚꬅ ቶካሼ ኢዛ ጊዶን ሃራ ዜሬꬅ ዜሮፓ፤ ኔ ሃራ ዜሪኮ ዎይኔ ሚꬃ ኣይፌፔ ጊዲን ዎይኮ ሃራ ኔ ዜሮ ካꬃፌ ጎኤታናስ ዳንዳያካ። ሌዌ 19፡19

10 ቦራኔ ሃሬ ኢሲፌ ኢሲ ቃምባራን ዋጻ ጎዮፓ።

11 ሱፌፔኔ ፑቶፌ ዋላኬቲ ዳዴቲዳ ማይኦ ማይኦፋ።

12 ኔ ማይኣና ማይኦስ ኦይዱ ባጋራካ ማጫራ ሜꬋ።ታይ 15፡37-41

13 ኢሲ ኣሲ ማቾ ኤኪዳ ማላ ኢዚራ ኣቂ ሲሚዲ ኢዞ ኢጺኮ፥ 14 «ሃኖ ማጫሳዮ ኤካዲስ ሺን ኢዚስ ጌላኦቴꬃ ዎጋይ ባዋ» ጊዲ ዎርዶራ ኢዚ ሱንꬁ ሞሪኮ፥ 15 ሄ ናዮ ዬሊዳይቲ ናያ ጌላኦ ጊዲዳይሳስ ማርካ ኤሂዲ ሄ ካታማን ዲዛ ጪማታ ቤሴቶ። 16 ናይ ኣዋይ ኢስታስ፥ «ታኒ ታ ናዮ ሃይሳ ኣዴዛስ ኢማዲስ ሺን ሃኢ ኢዚ ኢዞ ኢጺዳይሳ ቆንጪሲዴስ። 17 ‹ኔ ናይስ ጌላኦቴꬂ ባዋ› ጊዲ ታ ናይ ሱንꬁ ሞሪዴስ፤ ታ ናይስ ጌላኦቴꬂ ዲዛይሳስ ሃይሲ ማርካ» ጊዲ ሄ ዴሬ ካሌꬂዛይታ ሲንꬃን ኢዚ ኢዞ ኤኪሺን ማይኦ ቦላ ጉኪዳ ሱꬃራ ዲዛ ማላታ ጫርቃዛ ቤሶ። 18 ሄ ካታማዮ ካሌꬂዛይቲ ኣዴዛ ሾጪ ቃጻዬቶ። 19 ቃሴካ ኢዚ ኢስራኤሌ ናይታፔ ጌላኦቴꬃራ ዲዛ ኢሲኔይ ሱንꬁ ሞሪዳ ጊሻስ ኢሲ ጼቱ ሳቂሌ ቢራ ናይ ኣዋስ ማጋጮ ቃንጾ፤ ሄሳፌ ጉዬ ናያካ ኢዛስ ማቾ ጊዱ፤ ኢዚ ሼምፖራ ፓጻ ዲዛ ላይꬅ ኡባን ኢዞ ኣንጂ ዬዳናስ ዳንዳዬና።

20 ጊዶ ኣቲን ኢዚ ጊዳይሲ ቱሙ ጊዲ ቤቲኮ ቃሴ ኢዛ ጌላኦ ጊዲዳይሳ ቆንጪሲዛ ማላታይ ባይንዳ ኣጊኮ፥ 21 ኢዛ ባ ኣዋ ሶን ዳሼ ላይማታዳ ኢስራኤሌ ኣሳ ዬላቺዛ ኦሶ ኦꬂዳ ጊሻስ ኢዞ ኢዚ ኣዋ ኬꬃ ካሬ ኤፌቶ፤ ሄ ካታማን ዲዛ ኣሳይ ኢዞ ሹቻራ ጫዲ ዎꬎ፤ ሄሳꬆ ሂስቲዲ ኢንቴ ጊዶፌ ኢታ ሚሽ ዲጊቴ።

22 ኢሲ ኣሲ ሃራ ኣሳ ማቺራ ዚንኢ ቤቲኮ ናምኣይካ ሃይቄቶ፤ ሄሳꬆ ሂስቲዲ ኢንቴ ጊዶፌ ኢታ ሚሽ ዲጊቴ።

23 ኣይ ኣሲካ ካታማ ጊዶን ኣዚና ጌላና ጊጋ ኡቲዳ ጌላኦይራ ዚንኢዲ ቤቲኮ፥ 24 ናምኣታካ ሄ ካታማይፔ ካሬ ኬሲዲ ሹቻን ጫዲ ዎꬊቴ፤ ጌላኦያ ካታማ ጊዶን ዳሼ፥ «ታና ኣሺቴ» ጋዳ ዋሶንታ ጊሻስ ሃይቃናስ ቤሴስ፤ ቃሴ ኣዴዚ ሃራ ኣሳራ ጊጋ ዲዛሪራ ዚንኢዲ ዎጋ ሜንꬂዳ ጊሻስ ሃይቃናስ ቤሴስ፤ ሄሳꬆ ሂስቲዲ ኢንቴ ጊዶፌ ኢታ ሚሽ ዲጊቴ።

25 ኢሲ ኣሲ ሃራ ኣሳስ ጊጋ ኡቲዳ ጌላኦዮ ኢዛ ዲዛ ካታማፔ ሃራሶን ዴሚ ዎልቃꬂዲ ኢዚ ጌላኦቴꬃ ኤኪዳ ጊዲኮ ሄሳዴይ ጻላ ሃይቆ። 26 ናያ ሃይቆስ ጋꬂዛ ናጋራ ኦꬆንታ ጊሻስ ኢዞ ቦቾፍቴ፤ ሃይሳ ማላ ኦሶይ ኢሲ ኣሲ ጌኔራ ባ ላጌዛ ሼምፖ ዎꬊዛይሳራ ኢሲ ጊና። 27 ሄሲካ ሄ ኣዴዚ ሃራ ኣሳስ ጊጌታ ኡቲዳ ጌላኦያ ባ ዲዛ ካታማፔ ካሬን ዲሺን ዴሚዲ ኢዞ ኦይኪዳ ጊሻሲኔ ኢዛ ዋሲዳኮካ ኢዞ ኣሻና ኣሲ ባይንዳ ጊሻሳ።

28 ኣይ ኣሲካ ሃራ ኣሳራ ጊጌቶንታ ጌላኦይራ ዚንኢሼ ኦይኬቲኮ፥ 29 ናይ ኣዋስ ኢቻሽ ታሙ ሳቂሌ ቢራ ቃንጺዲ ኢዞ ባስ ማቾ ሂስቶ፤ ዎልቃን ኢዚራ ዚንኢዳ ጊሻስ ሃይቃና ጋካናስካ ኢዞ ኣንጂ ዬዳናስ ዳንዳዬና። ኬሳ 22፡16-17

30 ኦኒካ ባ ኣዋ ማቾ ኤኪዲ ዎይኮ ኢዚራ ዚንኢዲ ባ ኣዋ ዬላሶፖ። ሌዌ 18፡8፤ 20፡11፤ ዛሬ 27፡20