33
ሙሴይ ኢስራኤሌ ኣሳስ ባዚዳ ባሳ ቃላ
1 ጾሳ ኣስ ሙሴይ ሃይቃናፔ ካሴቲዲ ኢስራኤሌ ኣሳስ ዎꬂዳ ባሴ ቃላይ ሃይሳፌ ካሊ ዲዛይሳ፤ 2 ሙሴይ፥
«ጎዳይ ሲና ዙማፔ ዪዴስ፤
ኤዶሜፔ ኣዋ ኣርሼይ
ኑ ቦላ ፖኢዴስ፤
ፓራኔ ዙማ ቦላፌካ
ኑስ ጾልቂዴስ፤
ኢዛስ ኡሻቻ ባጋራ
ታማ ላጮይ ዴስ፤
ቆዳይ ባይንዳ ኪታንቻቲ
ኢዛራ ኢሲፌ ዴቴስ።
3 ጎዳዉ! ኔኒ ዴራ
ኬሃ ሲቃሳ፤
ጌሻቲ ኡባይካ
ኔ ኩሼን ዴቴስ፤
ኔ ቶሆ ጋርሳን
ጉልባቲ ጎይኔቴስ፤
ሂስቲዲ ኔፔ
ኣዛዞ ኤኬቴስ።
4 ሙሴይ ኢሚዳ ዎጋይ
ኢስራኤሌ ኣሳስ
ላታ ጺንጾ።
5 ኢስራኤሌ ቆሞቲ ኡባይኔ
ዴራ ሃላቃቲ ሺቂን
ጎዳይ ባ ዴሬ
ኢስራኤሌ ኣሳ ቦላ
ካዎቲዴስ» ጊዴስ።
6 ኦሮቤሌ ቆሞታ ጊሻስ ሙሴይ፥
«ኦሮቤሌ ቆሞቲ
ዴቶ ኣቲን ሃይቆፌቶ፤
ኢስታ ቆዳይካ
ፓጮፎ» ጊዴስ።
7 ዩሁዳ ቆሞታ ጊሻስ ሙሴይ፥
«ጎዳዉ፥ ዩሁዳ ቆሞታ
ዋሶ ሲያ፤
ኢስቲ ባ ዳቦታራ
ኢሲፌቴꬃን
ዳና ማላ ኦꬃ፤
ኢስታስ ጊታ
ዎልቃ ኢማ፤
ኢስቲ ባ ሞርኬታራ
ኦሌቲሺን ኔኒ ኢስታ
ማዳ» ጊዴስ።
8 ሌዌ ቆሞታ ጊሻስ ሙሴይ፥
«ጎዳዉ! ኔኒ ኢስታ
ማሳን ፓጫዳሳ፤
ማሪባ ሃꬃ ኣቻን
ኢስታራ ፓላሜታዳሳ፤
ሄሳ ጊሻስ ቱሚሜይኔ
ኡሪሜይ ኔ ዶሲዳ
ኔ ኦሳንቻታስ ጊዶ። ኬሳ 17፡7፤ ታይ 20፡13
9 ኔ ጊሻስ ጊዲ
ኢስቲ ባና
ዬሊዳይታ ባሊዳ፤
ባ ዳቦታፔ ሻኬቲዳ፤
ባ ኢሻታፔ ሻኬቲዳ፤
ባ ናይታ ኣጊዳ፤
ኔ ቃላ ቦንቺዳ፤
ኔ ኢሚዳ
ጫቆ ቃላካ ናጊዳ።
10 ኢስቲ ኔ ዎꬂዳ
ማራ ያቆቤ፥
ኔ ዎጋካ ኢስራኤሌ
ኣሳ ታማርሴቴስ፤
ኢስቲ ኔ ሲንꬃን
ኤጻኔ ጩዋሴቴስ፤
ጹጌቲዛ ያርሾካ
ያርሾ ያርሺዛሶዛ ቦላ
ሺሼቴስ።
11 ጎዳዉ! ኔ ኢስታ
ዴኦ ኣንጃ፤
ኢስቲ ኦꬂዛ ኦሶ ኡባን
ኔ ኡፋዬታ፤
ኢስታ ሞርኬታ ሻያ
ኔ ዱꬃ፤
ኢስታ ኢጺዛይቲ
ናምኣንꬆ ዴንዶንታ ማላ
ዲጋ!» ጊዴስ።
12 ቢኒያሜ ቆሞታ ጊሻስ ሙሴይ፥
«ጎዳይ ሲቂዳ ኣሲ
ኢዛን ኣማኔቲ ዴስ፤
ኡባ ጋላስ
ኢስታ ኢዚ ናጌስ፤
ባ ሃሼን ቶኪዲ
ሼምፒሴስ» ጊዴስ።
13 ዮሴፌ ቆሞታ ጊሻስ ሙሴይ፥
«ጎዳይ ሳሎፔ ቡኪዛ ኢራን፥
ቢታፌ ፑዴ ኬዚዛ ፑልቶን
ኢንቴ ቢታ ኣንጆ።
14 ኣዋ ዎዴ ካጺዛ
ሎኦ ኣይፌ ኢሞ፤
ዎዴን ዎዴን ካጺዛ
ካꬃ ኣይፌን ኩሞ።
15 ቤኒሶፌ ዲዛ
ኢስታ ዙማቲኔ
ዙምቡላቲ ጮራኔ
ሎኦ ኣይፌን ኣንጄቴቶ።
16 ኢስታ ቢታይ
ሎኦ ሚሻን ኩሞ፤
ጹጌቲዛ ቱሻ ጊዶፌ
ቆንጪዳ ጎዳ
ኪያቴꬂ ዳሮ፤
ዮሴፌይ ባ ኢሻታ ጊዶን
ሃላቃ ጊዲዳ ጊሻስ
ሃ ኣንጆቲ ኡባይ
ኢዛ ጋኬቶ።
17 ዮሴፌ ቴማይ
ኮርማ ቦራ ማላ ያሺሶ፤
ኢዛ ካጬቲ
ሜንꬃ ካጬ ማላ
ሚኖ ጊዴቶ፤
ኢዛ ካጬቲ ሺያን ቆዴቲዛ
ሚናሴ ዛሬታኔ
ታሙ ሺያን ቆዴቲዛ
ኤፍሬሜ ዛሬታ፤
ሄ ካጬታን ኢዚ
ካዎቴꬃታ ቃይጫና፤
ቢታ ጋጻ ጋካናስ
ኢስታ ኢዚ ጎዳና» ጊዴስ።
18 ዛቢሎኔ ቆሞታ ጊሻሲኔ ዪሳኮሬ ቆሞታ ጊሻስ ሙሴይ፥
«ዛቢሎኔ! ኔኒ
ኔ ኬሳን ኡፋዬታ፤
ዪሳኮሬ! ኔኒካ
ኔ ዱንካኔ ጊዶን ኡፋዬታ።
19 ኢስቲ ዴሬዛ ፑዴ
ዙማ ቦላ ጼይጊዲ
ሄን ጺሎቴꬃ
ያርሾ ያርሻና፤
ባንታስ ኣቆታኔ
ዱሬቴꬅ ኣባፌኔ
ሻሚንታፌ ዴማና» ጊዴስ።
20 ጋዴ ቆሞታ ጊሻስ ሙሴይ፥
«ጋዴ ቆሞታ ዛዋ
ኣሲዳ ጾሳይ ጋላቴቶ፤
ጋዴይ ሞርኬታ
ሜንꬄሬꬃናስ
ጋሞ ማላ ሻንካቴስ።
21 ሃላቃታስ ቤሲዛ ቢታዚ
ኢዛ ናጌስ፤
ኢዚካ ሎኦ ቢታ
ባስ ዶሪዴስ፤
ዴራ ካሌꬂዛይቲ ሺቂዳ
ዎዴ ኢዚ ጎዳ ሼኔኔ
ጺሎ ፒርዳ ፒርዲዴስ» ጊዴስ።
22 ዳኔ ቆሞታ ጊሻስ ሙሴይ፥
«ዳኔይ ባሳኔፔ
ጉፒ ኬኢዛ
ዎዳላ ጋሞ ማላ» ጊዴስ።
23 ኒፍታሌሜ ቆሞታ ጊሻስ ሙሴይ፥
«ኒፍታሌሜይ ጎዳ
ማታን ዶሴቲዴስ፤
ጎዳ ኣንጆንካ ኩሚዴስ፤
ኢዛ ዛዋይ ኣባፌ ኣꬊዲ
ዱጌሃ ባጋ ጋኪዴስ» ጊዴስ።
24 ኣሴሬ ቆሞታ ጊሻስ ሙሴይ፥
«ኣሴሬ ቆሞቲ
ሃራ ቆሞታፔ
ኣꬊ ኣንጄቲዳይታ ጊዴቶ፤
ኢስቲ ባ ኢሻታ ጊዶን
ዶሴቲዳይታ ጊዴቶ፤
ኢስታ ቢታይ
ዛይቴን ኩሞ።
25 ኢስታ ካታማታ ፔንጌቲ
ቢራታኒኔ ጻርቂማላን
ሚኒ ጎርዴቴቶ፤
ባ ዲዛ ላይꬅ ኡባን
ኢስቲ ዎልቃማ ጊዴቶ» ጊዴስ።
26 ኢስራኤሌ ኣሳዉ!
ሳሎፔ ኢንቴና ማዳናስ
ባ ቴማራ ሻራ ቦላ ሄሜቲዛ
ኢንቴ ጾሳ ማላ
ሃራ ጾሲ ዴና።
27 ሜርና ጾሳይ
ኢንቴስ ዱሳሶ፤
ሜርናስ ዲዛ ኢዛ ቄሴቲ
ኢንቴፌ ጋርሳራ
ዲዲ ካፌቴስ፤
ኢንቴ ሞርኬታ ኢዚ
ኢንቴ ሲንꬃፌ ጎዳና፤
ኢንቴ ኢስታ ꬋይሳና ማላ
ኢዚ ኢንቴና ማዳና።
28 ሄሳ ጊሻስ ኢስራኤሌ
ኣሳይ ሳሎፔ ኢራይ
ኢዚን ቡኪዛ ቢታይን፥
ካꬂኔ ዎይኔ ኡሺ
ኢዚን ኩሚዳ ቢታይን
ሂርጋይ ባይንዳ
ሳሮን ዴኣና።
29 ኢስራኤሌ ኣሳዉ!
ኢንቴ ኣይ ማላ
ኣንጄቲዳ ዴሬ!
ጎዳይ ኣሺዳ
ኢንቴ ማላይ ኦኔ?
ኢዚ ኢንቴስ ጎንዳሌኔ
ኢንቴና ማዲዛይሳ፤
ኢዛን ኢንቴ ጾኒዛ
ጊꬃ ማሻ፤
ኢንቴ ሞርኬቲ
ኢንቴ ሲንꬃን ጉፋናና፤
ኢንቴካ ኢስቲ ጎይኒዛሶታ ላላና።