1 ሄሳፌ ጉዬ ጎዳይ ሙሴስ፥ «ቤያ፤ ታኒ ኔና ጊብጼ ካዋስ ጾሳ ማላ ኦꬃዲስ፤ ኔ ኢሻ ኣሮኔይ ኔ ዶና ጊዲዲ ኔ ጊሻስ ሃሳያና፤ 2 ታኒ ኔና ኣዛዚዳይሳ ኡባ ኔ ኢሻ ኣሮኔስ ዮታንዳሳ፤ ካዎዚ ኢስራኤሌ ናይታ ባ ቢታፌ ኬሲ ዬዳና ማላ ኢዚ ዮታና። 3 ጊዶ ኣቲን ታኒ ካዎዛ ዎዚና ሚንꬃና፤ ታኒ ጊብጼ ቢታን ታ ማላታኔ ማላሊሲዛ ሚሽ ዳርሳ ኦꬂኮካ፥ሃዋ 7፡36 4 ኢዚ ኢንቴ ዮቲዛይሳ ሲዬና። ሄ ዎዴ ታኒ ታ ኩሼ ጊብጼ ኣሳ ቦላ ዴንꬃና፤ ታኒ ታ ዴሬታ ኢስራኤሌ ናይታ ዎልቃማ ፒርዳን ጊብጼፔ ኬሳና። 5 ቃሴ ጊብጼቲ ታኒ ታ ቄሴ ጊብጼ ኣሳ ቦላ ዴንꬃዳ ኢስራኤሌ ናይታ ኢስታ ጊዶፌ ኬሲዛ ዎዴ ታኒ ጎዳ ጊዲዳይሳ ኢስቲ ኤራና» ጊዴስ።

6 ሙሴይኔ ኣሮኔይ ጎዳይ ኢስታ ኣዛዚዳ ማላ ኦꬂዳ። 7 ኢስቲ ካዎዛስ ዮቲዛ ዎዴ ሙሴስ ላይꬃይ ኦስፑን ታማ፤ ኣሮኔይ ቃሴ 83 ላይꬃ ኣሳ።

8 ጎዳይ ሙሴኔ ኣሮኔ፥ 9 «ካዎይ ኢንቴና፥ ‹ኣኔ ማላታ ታና ቤሲቴ› ጊኮ ኔኒ ኣሮኔ፥ ‹ኔ ጉፋ ኤካዳ ካዎዛ ሲንꬃን ዬጋ› ጋ፤ ሂስቲኮ ኢዚ ሾሽ ጊዳና» ጊዴስ። 10 ሂስቲን ሙሴይኔ ኣሮኔይ ካዎዛኮ ጌሊዲ ጎዳይ ኢስታ ኣዛዚዳ ማላ ኦꬂዳ፤ ኣሮኔይ ባ ጉፌ ካዎዛ ሲንꬃኒኔ ዳናታ ሲንꬃን ዬጊን ጉፌዚ ሾሽ ጊዲዴስ። 11 ሄሳፌ ጉዬ ካዎዚ ዳሮ ኤራንቻታኔ ቢቲዛይታ ጼይጊሲን ጊብጼ ዴሬ ማሮቲካ ባ ዴሬን ሄሳꬆ ኦꬂዳ። 12 ኢስቲ ዉሪካ ባ ጉፌ ጉፌ ጋዴን ዬጊን ጉፌቲ ዉሪካ ሾሽ ጊዲዳ ሺን ኣሮኔ ጉፌያ ኢስታ ጉፌታ ኡባ ሚታዱስ። 13 ጊዲኮካ ጎዳይ ዮቲዳ ማላ ካዎዛ ዎዚናይ ሚኒዳ ጊሻስ ኢዚ ኢስታ ዮኦ ሲዮንታ ኢጺዴስ።

14 ጎዳይ ሙሴስ፥ «ካዎዛ ዎዚናይ ሙሚን ኣሳ ኢዚ ዬዶንታ ኢጺዳ ጊሻስ፥ 15 ካዎዚ ሻፋ ቢዛ ዎዴ ማላዶራ ኔኒ ኢዛኮ ባዳ ኢዛራ ጋጋና ማላ ኣባዬ ሻፋ ዶናን ኤቃ፤ ሄ ባሼ ሾሻን ላሜቲዳ ጉፌዛ ኦይካ ኤካዳ ባ። 16 ኔኒ ኢዛ፥ ‹ጎዳ ኢብራዌታ ጾሳይ ኔና፥ «ባዞን ታስ ጎይናና ማላ ታ ኣሳ ዬዳ» ጊዲ ታና ኔኮ ኪቲዴስ ሺን ሃኖ ጋካናስ ኔኒ ኤሮ ጋቤካ። 17 ጎዳይ፥ «ታኒ ጎዳ ጊዲዳይሳ ኔኒ ሃይሳን ኤራና» ጊዴስ። ታኒ ኣባዬ ሻፋ ሃꬃ ታ ኩሼን ዲዛ ጉፌዛን ሾጪኮ ሃꬃይ ሱꬃን ላሜታና። 18 ኣባዬ ሻፋ ሞሌይካ ሃይቃና፤ ሻፋይካ ጺንቃና፤ ጊብጼቲ ሄ ሻፋ ሃꬃ ኡያናስ ዳንዳዬቴና› ጋዳ ዮታ» ጊዴስ።

19 ጎዳይ ሙሴስ፥ «ኔኒ ኣሮኔስ፥ ‹ኔ ጉፌ ኦይካዳ ጊብጼ ሃꬃታ ቦላ፥ ሻፋታ ቦላ፥ ዛራ ሃꬃታ ቦላኔ ኤሊዳ ሃꬂ ዲዛሶ ኡባ ቦላ ኔ ኩሼ ፒዲሳ› ጋ፤ ኢዚ ባ ኩሼ ፒዲሲኮ ሃꬂ ዉሪ ሱꬃን ላሜታና፤ ጊብጼ ቢታ ኡባን፥ ሃራይ ኣቶሺን፥ ሚꬃፌኔ ሹቻፌ ዎጪ ኬሲዳ ሃꬅ ቲጊዛ ሚሻታ ኡባን ሱꬂ ኩማና» ጊዴስ። ሉቃ 11፡20

20 ሙሴይኔ ኣሮኔይ ጎዳይ ኣዛዚዳ ማላ ኦꬂዳ። ካዎዛ ሲንꬃኒኔ ዳናታ ሲንꬃን ኣሮኔይ ባ ጉፌዛ ዴንꬂዲ ሻፋ ሃꬃ ሾጪን ሃꬂ ዉሪ ሱꬃን ላሜቲዴስ። 21 ሄ ሻፋ ሃꬃ ጊዶን ዲዛ ሞሌቲ ሃይቂዳ፤ ሻፋ ሃꬂ ኬሂ ጺንቂዳ ጊሻስ ጊብጼ ኣሳይ ኡያናስ ዳንዳይቤና። ጊብጼ ቢታይ ኩሜꬅ ሱꬅ ጻላ ጊዲዴስ። 22 ጊዶ ኣቲን ጊብጼ ማሮቲ ባ ቢታን ኢዛꬆካ ኦꬂዳ፤ ጎዳይ ዮቲዳ ማላካ ካዎዛ ዎዚናይ ሚኒዳ ጊሻስ ሙሴይኔ ኣሮኔይ ዮቲዳይሳ ሲዮንታ ኢጺዴስ። 23 ሄሳፌ ጉዬ ካዎዚ ሄሳስ ኣይኮ ባቦንታ ዲሼ ባ ሶ ሲሚ ቢዴስ። 24 ጊብጼ ኣሳይ ዉሪ ኣባዬ ሻፋ ሃꬃ ኡያናስ ዳንዳዮንታ ጊሻስ፥ ኡዪዛ ሃꬅ ዴማናስ ኣባዬ ሻፋ ኣቻን ኦላ ቦኪዳ።

25 ጎዳይ ሃꬃ ሱꬃን ላሚን ላፑን ጋላስ ጊዲዴስ።