1 ሄሳፌ ጉዬ ታኒ ሲዪሺን ባ ቃላ ꬎቁ ሂስቲዲ፥ «ካታማዮ ቃጻያና ዶሬቲዳይቲ ባ ኦላ ሚሻ ኦይኪዲ ሃ ዬቶ» ጊ ዋሲሺን ሲያዲስ። 2 ሄኮ ꬋይሲዛ ኦላ ሚሽ ባ ኩሼን ኦይኪዳ ኡሱፑን ኣሳቲ ፑዴሃ ባጋን ዲዛ ጋና ባጋ ፔንጌዛራ ዪዳ፤ ኢስታራ ላይኖ *ላይኖ፡ ላይኖ ጌቴቲዛይሲ ኣማራꬆ ቃላን ቤፍታ ዎይኮ ሃሬ ጌቴቴስ። ማይኢዲ፥ ባ ሚሌን ጻፊዛ ሚሽ ኮሮጆን ኦይኪዳ ኢሲ ኣሲ ዴስ። ኢስቲ ጊዶ ጌሊዲ ጻርቂማላፔ ኦሴቲዳ ያርሺዛሶ ላንቄን ኤቂዳ።

3 ሄሳፌ ጉዬ ኢስራኤሌ ጾሳ ቦንቾይ ኪሩቤፔ ቦላራ ካሴ ባ ዲዛሶፔ ዴንዲዲ ጾሳ ኬꬃ ዳርማች ቢዴስ። ጎዳይ ላይኖ ማይኢዲ ባ ሚሌን ጻፊዛ ሚሽ ኮሮጆን ኦይኪዳ ኣዴዛ ጼይጊዴስ። 4 ጎዳይ ጼይጊዲ ኢዛ፥ «ዬሩሳላሜ ካታማ ኡባ ባዳ ኢዚ ጊዶን ኦሴቲዳ ሃራሲዛ ኤቃ ጾሳታ ጊሻስ ሚሼቲዲ ዬኪዛ ኣሳታ ሊጴ ቦላ ማላታ ዎꬃ» ጊዴስ። ኣጁ 7፡3፤ 9፡4፤ 14፡1

5 ታኒ ሲዪሺን ኢዚ ሃራታስ፥ «ኢዛ ጌዶ ካሊዲ ካሊዲ ካታማይን ዲዛ ዎꬊቴ! ኦናካ ሚሼቲ ኣሾፍቴ። 6 ጪማታ፥ ናቴꬃታኔ ጌላኦታ፥ ማጫሳታኔ ጉꬃ ናይታ ኡባካ ሹኪቴ፤ ጊዶ ኣቲን ማላታራ ዲዛ ኣስ ኦናካ ቦቾፍቴ። ዎꬎ ታ ኬꬃን ዶሚቴ» ጊዴስ። ሄሳ ጊሻስ ኢስቲ ጾሳ ኬꬃ ሲንꬃን ኤቂዲ ዎꬎ ጪማታን ዶሚዳ።

7 ሄሳፌ ጉዬ ጎዳይ ኢስታስ፥ «ታ ኬꬃ ቱኒሲቴ፤ ዛጎታካ ኣሃን ኩንꬂቴ፤ ቢቴ» ጊዴስ፤ ኢስቲካ ኬዚዲ ካታማ ጊዶን ኡባን ዩዪዲ ዎꬎ ዶሚዳ። 8 ኢስቲ ዎꬎን ዲሺን ታኒ ታርካ ሊጴ ቦላ ዱጌ ቢታን ጉፋናዳ ኣዬ ኣና! «ኣቤት ኡባ ሃሪዛ ጎዳዉ! ኔኒ ዬሩሳላሜ ቦላ ባሽ ዬዳዳ ኢስራኤሌ ኣሳፔ ኣቲዳ ጫሻታ ኡባ ꬋይሳና ሃናይ?» ጋ ዋሳዲስ።

9 ኢዚ ዛሪዲ ታስ፥ «ኢስራኤሌ ኬꬃ ናጋራይኔ ዩሁዳ ኬꬃ ናጋራይ ኬሂ ዳሪዴስ፤ ቢታያ ሱꬅ ጻላ ጊዳዱስ፤ ቃሴ ካታማያ ጌላቴꬃን ኩማዱስ፤ ጋሶይካ ኣሳይ፥ ‹ጎዳይ ቢታ ኣጊዴስ፤ ጎዳይ ቤኤና› ጌቴስ። 10 ሄሳ ጊሻስ ታኒ ኢስታስ ኢስታ ሃኖ ማላ ኢማና ኣቲን ታ ኢስታስ ቃꬌቲኬ፤ ኢስታ ቦላ ዪዛ ሜቶፔ ታ ኢስታ ኣሺኬ» ጊዴስ።

11 ሄሳፌ ጉዬ ላይኖ ማይኢዲ፥ ባ ሚሌን ጻፊዛ ሚሽ ኮሮጆን ኦይኪዳ ኢሳዴይ ሲሚዲ፥ «ኔኒ ታና ኣዛዚዳ ማላ ኦꬃዲስ» ጊዴስ።