19
ኢስራኤሌ ዳናታ ጊሻስ ዚላሌቲዳ ዚላስ
1 ጎዳይ፥ «ኢስራኤሌ ዳናታ ጊሻስ ዚላስ ዚላላና ማላ ታስ ዮቲዴስ፤
2 ኢዚካ ታስ፥
« ‹ኔ ኣያ ካሴ
ጋሞታ ጊዶን
ኣይ ማላ ጋሞ!
ዎዳላ ጋሞታ
ጊዶን ኢቻዱስ፤
ባ ማራታካ ሄን ዲቻዱስ።
3 ባ ማራታፔ ኢሳ ኢዛ ዲቺን፥
ኢዚ ሚኖ ጋሞ ጊዲዴስ፤
ኢዚ ሻንካቴꬅ ታማርዲ
ኣስ ሚዴስ።
4 ካዎቴꬃቲ ኡባይ ኢዛ ሃኖ ሲዪዳ፤
ኢስቲ ቦኪዳ ኦላን
ጌሊዲ ኦይኬቲዴስ፤
ኢስቲካ ኢዛ ሲꬌን ዳፎ ኣꬂ
ጎቺዲ ጊብጼ ቢታ ኤፊዳ።
5 « ‹ኢዛ ሂዶታ ኦꬂዳይሲ
ጫልቃሚዳይሳ፥
ኢዛ ናጊዳይሲ ፖሌቶንታይሳ
ቤኢዳ ዎዴ፥
ባ ማራታ ጊዶፌ
ናምኣንꬆዛ ዲቻዳ፥
ሚኖ ጋሞ ኬሳዱስ።
6 ኢዚ ጋሞታ ጊዶን ኖቹ ጊዴስ፤
ሚኒ ሚኒካ ቢዴስ፤
ዎꬊ ሙስ ኤሪዲ ኣሳካ ሚዴስ።
7 ኢዚ ኢስታ ሚጻ ሜንꬄሬꬂዴስ፤
ኢስታ ካታማታካ ካይዚሲዴስ፤
ቢታይኔ ቢታን ዲዛ ኣሳይ ኡባይ
ኢዛ ጻጎፔ ዴንዲዳይሳን
ኮኮሪዳ።
8 ኢዛ ዩሾን ዲዛ ካዎቴꬃቲ
ኡባይ ኢዛ ቦላ ዴንዲዳ፤
ባንታ ዴሬ ኡባፌ
ኢዛ ቦላ ሺቂዳ፤
ባንታ ጊቴ ኢዛ ኦይካና ዬጊዳ፤
ኢዚ ኢስታ ኦላን
ጌሊዲ ኦይኬቲዴስ።
9 ሲꬌን ዳፎ ዬጊዲ
ኮꬃ ጊዶን ጌልꬂዳ፤
ባቢሎኔ ካዎኮ ኤፊዳ፤
ናምኣንꬆ ኢዛ ጬንጉርሲ
ኢስራኤሌ ዙማታ ቦላ
ሴቴቶንታ ማላ፥
ኢስቲ ኢዛ ቃሾ ኬꬅ ጌልꬂዳ።
10 « ‹ኔ ኣያ ሃꬃ
ዶናን ቶኬቲዳ
ዎይኔ ቱራ ማላ፤
ጎሻ ጋዴን ዳሮ ሃꬂ ዲዛ
ጊሻስ፥ ዳዪዳ ኣይፊዳ
ዎይኔ ቱራ ሚሳታዱስ።
11 ኢዚ ሃጋቲ ካዎቴꬃስ
ቤሲዛ ሚኖ ጉፌታ።
ጪፒ ጊዳ ሃይꬃታ ጊዶን፥
ባ ኣዱሳቴꬃኒኔ
ባ ጮራ ሃጋታን
ሎኣ ቤታዱስ።
12 ጊዶ ኣቲን ሃንቆን ꬎቃሌታዱስ፤
ዱጌ ቢታን ኦሌታዱስ፤
ኣርሼይ ሞኪዛ ባጋ ጫርኮይ
ኢዞ ሜሊሲዴስ፤
ኢዛ ኣይፊዳ ኣይፌዛ ቆቆፊዴስ፤
ሚኖ ኢዚ ሃጋቲ ዳጋሚዳ፤
ታማይካ ኢስታ ሚዴስ።
13 ሃኢ ሃꬅ ሳሜቲዳ ሜላ ቢታን
ባዞን ቶኬታዱስ።
14 ኢዚስ ዎጋ ሃጋታ
ኢሳፌ ታማይ ኬዚዴስ፤
ኢዛ ኣይፊዳ ኣይፌዛ ሚዴስ፤
ካዎቴꬃስ ጊዲዛ ኢሲ ሚኖ
ሃጋይካ ኣቲቤና፤
ሃይሲ ዚላሳ፤ ጬጬ ጋላስ
ሚላሳስ ጊዳና› ጋ» ጊዴስ።