1 ጎዳ ቃላይ ታኮ ዪዲ፥ 2 «ሃይሶ ኣሳ ናዉ! ኢሲ ኣይፔ ዬሌቲዳ ናምኡ ማጫቲ ዴቴስ። 3 ኢስቲ ቡሮ ናቴꬃን ዲሼ ጊብጼ ቢታን ላይማቴꬅ ዶሚዳ፤ ሄን ኢስቲ ዲሺን ꬋንꬂ ቲራን ኡቲዴስ፤ ኣዴ ናይቲ ኢዛን ካኢዳ፤ ኢስታ ጌላኦቴꬃይካ ኤኬቲዴስ። 4 ኢስታፌ ባይራይ ሱንꬃይ ኦሆሎ፤ ካሎይ ሱንꬂ ኦሆሊቦ። ኢስታ ናምኣካ ታ ኤኪን ታስ ማጫ ናይታኔ ኣቱማ ናይታ ዬሊዳ። ኦሆላ ሳማሪያ፥ ኦሆሊባ ዬሩሳላሜ ቆንጪሴቴስ።

5 «ኦሆላ ታስ ማቾ ጊዳ ኡታዳ ሃራራ ላይማታዱስ፤ ኦላንቻ ጊዲዳ ባ ሲቆ ኣሶሬታራ ላጌꬃናስ ኣሞታዱስ። 6 ኢስቲ ኦቻ ቴራ ሚሳቲዛ ማይኦ ማይኢዳ ዴሬ ኣይሲዛይታኔ ኣዛዚዛይታ፤ ኢስቲ ኡባቲካ ማላ ሎኦ፥ ናቴꬂኔ ፒላታ ቶጋንቻታ። 7 ኢዛ ባናቴꬃ ላይማቴꬃስ ዶሬቲዳ ኣሶሬ ኣሳስ ኣꬃ ኢማዱስ። ኢዚራ ላይማቲዳ ኣሳታ ኤቃ ጾሳታ ኡባን ቱናዱስ። 8 ኢዛ ጊብጼን ዶሚዳ ላይማቴꬃ ኣጋቤኩ፤ ሄን ኢዚ ዬላጋቴꬃ ዎዴ ኣቱማሳቲ ኢዚራ ዚንኢዳ፤ ኢዚ ጌላኦቴꬃ ꬋንꬃ ጎርፔሬꬂዳ፤ ባ ኣሞቲዳ ኣሞቴꬃ ኢዚ ቦላ ፖሊዳ።

9 «ሄሳ ጊሻስ ኢዚራ ኢሲፌ ላይማታና ኣሞቲዳ ኣሶሬ ላጌꬆታስ ታኒ ኢዞ ኣꬃ ኢማዲስ። 10 ኢስቲ ኢዞ ቃሪዲ ካሎ ኣሺዳ፤ ኢዚ ኣቱማ ናይታኔ ማጫ ናይታ ኢዚፔ ቦንቂዳ፤ ኢዞካ ማሻን ሲፊዳ፤ ኢዛካ ማጫሳታ ማታን ሃይሲኤስ ኣታዱስ፤ ፒርዳይ ኢዚ ቦላ ፒርዴቲዴስ።

11 «ኢዚ ሚቺያ ኦሆሊባይ ሄሳ ቤኣሼ ዚታኒኔ ላይማቴꬃን ባ ሚቼይፌ ኣꬋ ሞሬቲዳሮ ጊዳዱስ። 12 ቃሴካ ሃሪዛይታራኔ ኣዛዚዛይታራ፥ ሴሎ ማይኦ ማይኢዳ ኦላንቻታራ፥ ፒላታ ቶጋንቻታራኔ ማላ ሎኦ ጊዲዳ ኣሶሬ ናቴꬃታራ ላይማታናስ ኣሞታ ካላዱስ። 13 ኢዛካ ባና ቱኒሲዳይሳ ቤኣዲስ፤ ኢስቲ ናምኣይካ ኢሲ ኦጌ ቢዳ።

14 «ኢዛ ባ ላይማቴꬃን ጉጃ ጉጃ ባዱስ፤ ኢዛ ጎዳ ቦላ ዎጬቲ ኦሴቲዳ ጼቃ ዞኦ ቃላሜን ቲዬቲዳ ካላዳዌ ዴሬ ኣዴታ ሚስሌ ቤኣዱስ። 15 ኢስቲካ ባንታ ጼሳን ቃባቶ ዳንጪዳይታኔ ባንታ ሁኤ ቦላ ቁራጬ ጻጺዳይታ። ኢስቲ ኡባይካ ካላዳዌፔ ዪዳ ባቢሎኔ ዴሬ ዳናታ ሚሳቴቴስ። 16 ኢዛ ኢስታ ሚስሌታ ቤኢዳ ማላ ዚታ ኣሞን ጹጌታዳ ካላዳዌታኮ ኣስ ኪታዱስ። 17 ባቢሎኔቲካ ኢዚኮ ዪዲ ኢዚ ሂጻኮ ጌሊዳ፤ ባንታ ዚታ ኣሞን ኢዞ ቱኒሲዳ፤ ኢዛ ኢስታን ቱኒዳፔ ጉዬ ኢዛ ኢስታ ኢጻዳ ኢስታፌ ሃራሶ ሼርኢ ጋዱስ። 18 ኢዛ ቆንጬን ላይማቲዳፔኔ ባ ካሎቴꬃ ቃሪዳ ዎዴ፥ ታኒ ኢዚ ሚቼይፌ ሃራሶ ሼርኢ ጊዳ ማላ ኢዞ ኢጻዳ ኢዚፔ ሼርኢ ጋዲስ። 19 ጊዶ ኣቲን ካሴ ጊብጼን ኢዛ ናቴቴꬃን ላይማቲዳይሲ ቆፌቲን ካሴይሳፌ ኣꬋ ላይማታዱስ። 20 ኢስታ ኣቱማቴꬃይ ሃሬይሳ ማላ፥ ኢስታፌ ኬዚዛ ዜሬꬃይ ዎዳላ ፓራይሳ ማላ ጊዲዳ ባ ላጌꬆታራ ላይማታናስ ኣሞታዱስ። 21 ኔኒ ጊብጼ ቢታን ዲዛ ዎዴ ኔ ጌላኦቴꬃ ኢሚዳይሳኒኔ ኔ ናቴቴꬃ ꬋንꬃን ኣቱማሳቲ ካኢዳይሳን ኔ ጌላኦቴꬃ ቱናቴꬃ ኣሞታዳሳ።

22 «ሃኔ ኦሆሊቤ! ኡባ ሃሪዛ ጎዳይ፥ ‹ኔ ኢጻዳ ኢስታፌ ሼርኢ ጊዳ ኔ ላጌꬆታ ታ ኔ ቦላ ዴንꬃና፤ ኢስታካ ኡባ ባጋፌ ታ ኔ ቦላ ኤሃና። 23 ኢስቲካ ባቢሎኔታኔ ካላዳዌታ፤ ኢስታራ ፓቆዴ፥ ሱሄ፥ ቆኣይኔ ኣሶሬቲ ኡባይ ዴቴስ፤ ሄይቲካ ማላ ሎኦኔ ሚኖ ጊዲሺን ኡባቲካ ፓራ ቶጊዲ ዴሬ ኣይሲዛይታኔ ኣዛዚዛይታ፥ ፓራ-ጋሬ ኣዛዚዛይታኔ ꬎቃ ሹሜታ። 24 ኢስቲ ኦላ ማሳራ፥ ፓራ-ጋሬኔ ጋሬ ኤኪዲ ዳሮ ዴሬይ ኔ ቦላ ያና፤ ኢስቲ ዎጋ ጎንዳሌኔ ቄሪ ጎንዳሌ ኦይኪዲ፥ ቢራታ ቆቤ ዎꬂዲ፥ ኔ ዩሾን ሳልፋና፤ ኢስቲ ኔ ቦላ ፒርዳና ማላ ታ ኔና ኢስታስ ኣꬃ ኢማና፤ ኢስቲካ ባ ዎጋን ኔና ቃጻያና። 25 ታ ዚልኤቴꬃ ሃንቆ ኔ ቦላ ኤሃና፤ ኢስቲካ ኔ ቦላ ሃንቆን ኬዛና፤ ኢስቲ ኔ ሲꬌኔ ኔ ሃይꬅ ቃንጻና፤ ኔ ባጋታፔ ኣቲዳይቲ ማሻን ሲፌታና፤ ኔ ማጫ ናይታኔ ኣቱማ ናይታ ኔፔ ቦንቂ ኤካና፤ ኢስታፌ ጫሻ ኣቲዳይታካ ታማይ ማና። 26 ኢስቲ ኔ ማይኦ ቃሪ ኤካና፤ ዶሬቲዳ ኔ ኣሌቆታ ኔፔ ዎꬂ ኤካና። 27 ኔኒ ጊብጼን ዶሚዳ ላይማቴꬃኔ ዚታ ታ ኔፔ ዲጋና፤ ኔካ ኔ ኣይፌታ ሄይታንታኮ ዴንꬃካ፤ ሃይሳፌ ጉዬ ኔ ጊብጼ ቆፓካ› ጌስ።

28 «ኡባ ሃሪዛ ጎዳይ፥ ‹ኔኒ ሃራሴታዳ ኢስታፌ ሼርኢ ጊዳይታሲኔ ኔ ኢጺዛይታስ ታ ኔና ኣꬃዳ ኢማና። 29 ኢስቲካ ኔና ኢጺሼ ኔኮ ሺቃና፤ ኔ ዳቡርዳይሳ ኡባ ኔፔ ኢስቲ ቦንቃና፤ ኔ ኣዬይ ኡሎፔ ኬዚዳ ማላ ካሎ ኣሻና። ዬላቺዛ ኔ ዚታ ኣሞይ ቆንጫና፤ ኔ ላይማቴꬃይኔ ዛዋይ ባይንዳ ቱናቴꬃይ ሃይሳ ኔ ቦላ ኤሂዴስ። 30 ጋሶይካ ኔኒ ካዎቴꬃታራ ላይማታናስ ኣሞታዳ ኢስታ ኤቃ ጾሳታን ቱናዳሳ። 31 ኔኒ ኔ ሚቼይ ኦጌን ቢዳ ጊሻስ ታኒ ኔና ኢዚ ጹኣ ኦይꬃና› ጌስ።

32 «ኡባ ሃሪዛ ጎዳይ፥

35 «ሄሳ ጊሻስ ኡባ ሃሪዛ ጎዳይ፥ ‹ኔኒ ታና ዶጊዳ ጊሻሲኔ ታስ ዞኮ ዛሪዳ ጊሻስ ኔኒ ኔ ላይማቴꬃኔ ዚታ ጋቴ ቶካና› ጌስ» ጊዴስ።

36 ጎዳይ ታስ፥ «ሃይሶ ኣሳ ናዉ! ኦሆሊ ቦላኔ ኦሆሊቢ ቦላ ኔ ፒርዳኔ? ሂስቲኮ ሃራሲዛ ኢስታ ኦሶዛ ኔ ኢስታስ ዮታ። 37 ኢስቲ ላይማቲዳ፤ ኢስታ ኩሼይካ ሱꬃን ሞሬቲዴስ። ኢስቲ ባንታ ኤቃ ጾሳታራ ላይማቲዳ፤ ባንታ ኤቃ ጾሳታስ ቁማ ጊዳና ማላ ሃራይ ኣቶሺን ኢስቲ ታስ ዬሊዳ ናይታካ ኢስታስ ታማን ጹጊ ያርሺዳ። 38 ሄሳፌካ ሃራ ሚሽ ኢስቲ ታ ቦላ ኦꬂዳ፤ ሄ ጋላሲካ ጾሳ ኬꬃ ታይሳ ቱኒሲዳ፤ ታ ሳምባታካ ካዉሺዳ። 39 ኢስቲ ባንታ ናይታ ኤቃ ጾሳታስ ያርሺዳ ጋላስ ታ ኬꬃ ጌሊዲ ቱኒሲዳ። ኢስቲ ታ ኬꬃን ሄሳ ማላ ኦꬂዳ።

40 «ሄሳፌካ ቦላራ ኣዴቲ ሃኮ ቢታፌ ያና ማላ ኣስ ኪቲዳ፤ ኢስቲካ ዪዳ፤ ኔኒ ኔ ቦላ ሜጬታዳሳ፤ ኔ ኣይፌሶ ፑላሳዳኔ ኣሌቆታን ፑላታዳ ናጋዳሳ። 41 ሎኢ ጊጊዳ ኣርጄታን ኡታዳሳ፤ ታ ኤጻኔዛኔ ዛይቴዛ ኔ ዎꬂዳ ጻራጴዛ ኣርጄታ ሲንꬃን ዎꬃዳሳ።

42 «ካኢዛ ኣሳታ ካቺ ኢዚ ዩሾን ዴስ፤ ሺሮ ሜꬊዛ ኣሳታራ ባዞፌ ዪዳ ማꬆቲዛይቲ ዴቴስ፤ ማጫሳይ ቦላኔ ኢዚ ሚቼይ ቦላ ሳጋዮ፥ ኢስታ ሁኤንካ ካይሺዛ ካላቻ ዎꬂዳ። 43 ታኒካ ታ ዎዚናን፥ ‹ኢዚ ቦላይ ላይማቴꬃን ጊልቂዳሪራ፥ ሃኢካ ኢዚ ዴኦይ ሄሳ ማላ ጊዲዳሪራ ላይማ ማጫሳይራ ዚንኤቶ› ጋዲስ። 44 ኢስቲካ ኢዚራ ዚንኢዳ፤ ኣሲ ላይማ ማጫሳራ ዚንኢዛ ማላ ሃ ዬላይ ባይንዳ ማጫስ ኦሆሊራኔ ኦሆሊባራ ዚንኢዳ። 45 ጌሻቲ ጊዲኮ ላይማ ማጫሳታ ቦላኔ ሼምፖ ዎꬊዛ ማጫሳታ ቦላ ቤሲዛ ፒርዳ ፒርዳና፤ ኢስቲ ላይማ ማጫስ ጊዲዳ ጊሻስ ኢስታ ኩሼይ ሱꬃን ሞሬቲዴስ።

46 «ኡባ ሃሪዛ ጎዳይ ዴራ ኢስታ ቦላ ዴንꬄꬃ ኤሃ፤ ሺሮሲኔ ቦንቃስ ኢስታ ኣꬃ ኢማ። 47 ዴሬይ ኢስታ ሹቻን ኩራካና፤ ኢስቲ ጊꬃ ማሻን ኢስታ ቃንጼሬꬃና፤ ኢስታ ኣቱማ ናይታኔ ማጫ ናይታ ዎꬋና፤ ኢስታ ኬꬃካ ጹጋና።