1 ሄሳፌ ጉዬ ጎዳ ቃላይ ኣጁታን ኣብራሜኮ ዪዲ፥ «ኣብራሜ፥ ባቦፋ! ታኒ ኔስ ጎንዳሌ፤ ኔ ኣንጆይ ኬሂ ጊታ» ጊዴስ።

2 ኣብራሜይ፥ «ኣቤት ኡባ ሃሪዛ ጎዳዉ! ታስ ሙሌካ ናይ ባይንዳ ጊሻስ ኔኒ ኢሚዛ ኢሞታይ ታስ ኣይሴ? ዳማስቆ ዴሬ ኣስ ኤልኤዜሬይ ታና ላታና» ጊዴስ። 3 ቃሴካ ኣብራሜይ፥ «ኔኒ ታስ ኣይኮ ና ኢማቤካ፤ ሄሳ ጊሻስ ታሶን ዲዛ ኣይሌይ ታና ላታናስ ዴስ» ጊዴስ።

4 ጎዳ ቃላይ ኢዛኮ ዪዲ፥ «ሃይሲ ኣይሌይ ኔና ላቴና፤ ኔፔ ዬሌቲዳይ ኔና ላታና» ጊዴስ። 5 ሄሳፌ ጉዬ ጎዳይ ኣብራሜ ካሬ ኬሲዲ፥ «ፑዴ ሳሎ ጼላ፤ ኔኒ ጾሊንቴታ ታይባናስ ዳንዳይኮ ታይባ፤ ኔ ዜሬꬃይካ ሃይሳ ማላ ጊዳና» ጊዴስ። ኦሮ 4፡18፤ ኢብ 11፡12

6 ኣብራሜይካ ጎዳ ኣማኒዴስ፤ ኢዛ ኣማኖይካ ጺሎቴꬃን ቆዴቲዴስ። ኦሮ 4፡3፤ ጋላ 3፡6፤ ያቆ 2፡23

7 ቃሴካ ጎዳይ ኢዛ፥ «ኔ ሃይሳ ቢታ ላታና ማላ ታ ኔስ ኢማናስ ኡሬ ጌቴቲዛ ካላዳዌታ ካታማፔ ኔና ኬሳ ኤሂዳ ጎዳይ ታና ዲኪና?» ጊዴስ።

8 ጊዶ ኣቲን ኣብራሜይ ኢዛ፥ «ኣቤት ኡባ ሃሪዛ ጎዳዉ! ታኒ ሃይሳ ቢታ ላታናይሳ ኣዛን ኤሮ?» ጊዴስ።

9 ጎዳይካ ኢዛ፥ «ሄꬑ ላይꬃ ኡስ፥ ሄꬑ ላይꬃ ዴይሽ፥ ሄꬑ ላይꬃ ዶርሳ ላቃኔ ናምኡ ቆሞ ሃራጴታ ታስ ኤካ ያ» ጊዴስ። 10 ኢዚ ሄይታ ኡባታ ኢዛስ ኤኪ ኤፊ ሹኪዲ ጊዶን ናምኡ ናምኡ ኬሲ ሻኪዲ ኢሳ ኢሳ ጊናን ዎꬂዴስ፤ ጊዶ ኣቲን ካፎታ ናምኡ ኬሲቤና። 11 ሄ ዎዴ ኣንኮ ካፎቲ ሄ ኣሾዛ ቦላ ኡቲን ኣብራሜይ ኢስታ ጎዲዴስ።

12 ኣርሼይ ዉሊዛ ዎዴ ኣብራሜ ዎልቃማ ꬊስኮይ ኦይኪን ዳጋንꬂዛ ጊርዲ ጊዳ ꬉማይ ኢዛ ቦላ ꬉሚዴስ።ኢዮ 4፡13-14 13 ሂስቲን ጎዳይ ኢዛስ፥ «ኔ ዜሬꬃይ ሃራ ቢታን ቤቴ ጊዲ ዳናይሳ ኔኒ ቱማፔ ኤራ፤ ኢስቲ ኣይሌቲዲ 400 ላይꬅ ዬꬌቲ ሃሬታና። ኬሳ 1፡1-14፤ ሃዋ 7፡6 14 ኣይሌሲዲ ኢስታ ሃሪዛ ካዎቴꬃ ታ ቃጻያና፤ ሄሳፌ ጉዬ ኢስቲ ዳሮ ኣቆራ ሄ ቢታፌ ኬዛና። ኬሳ 12፡40-41፤ ሃዋ 7፡7 15 ኔኒ ጊዲኮ ኔ ኣዋታኮ ሳሮን ባና፤ ኔ ኬሃ ጪማዳ ሃይቃናኔ ሞጌታና። 16 ኦይዳንꬆ ዬሌታን ኔ ዜሬꬃይ ሃ ቢታ ሲማና፤ ኣይስ ጊኮ ኣሞሬ ዴሬ ኣሳ ናጋራይ ቡሮ ኩሞንታ ጊሻሳ» ጊዴስ።

17 ኣርሼይ ዉሊን ጋዴይ ꬉሚዳፔ ጉዬ ጮጬ ታማ ላጮይኔ ጩዋይ ቤቲዲ ሄ ናምኡ ናምኡ ኬዚ ሻኬቲዳ ኣሾታ ጊዶራ ካንꬂዴስ። 18 ሄ ጋላስ ጎዳይ ኣብራሜስ፥ «ጊብጼ ሻፋፔ ዶሚዲ ኤፊራጺሴ ጌቴቲዛ ጊታ ሻፋ ጋካናስ ሃ ቢታ ታኒ ኔ ዜሬꬃስ ኢማዲስ። ሃዋ 7፡5 19-21 ሄይቲካ ቄናዌታ፥ ቄናዜታ፥ ቃዲሞኔታ፥ ሂቴታ፥ ፓሪዜታ፥ ኤራፋይሜታ፥ ኣሞሬታ፥ ካናኔታ፥ ጌርጌሴታኔ ያቡሴታ ቢታ» ጊ ጫቂዴስ።