1 ሄ ቢታን ካሴ ኣብራሃሜ ዎዴን ዲዛ ኮሻፔ ሃራ ኮሻይ ዴንዲዴስ፤ ሂስቲን ዪሳቂ ፊሊስጼሜ ካዎ ኣቢሜሌኬኮ ጌራሬ ቢዴስ። 2 ጎዳይ ዪሳቃስ ቆንጪዲ፥ «ጊብጼ ቢታ ዱጌ ቦፓ፤ ታኒ ኔስ ዮቲዛ ቢታን ዴኣ። 3 ሃ ቢታን ጉꬃ ዎዴ ኡታሻ፤ ታኒ ኔናራ ጊዳና፤ ኔና ኣንጃና፤ ኣይስ ጊኮ ሃይሳ ቢታ ኡባ ታኒ ኔሲኔ ኔ ዜሬꬃስ ኢማና፤ ታኒ ኔ ኣዋ ኣብራሃሜስ ጫቆ ጌሊዳ ኡፋይሳ ቃላ ሚንꬃና። 4 ኔ ዜሬꬃ ታኒ ሳሎ ጾሊንቴ ማላ ዳርሳና፤ ሃይሳ ቢታ ኡባ ታ ኢስታስ ኢማና፤ ቢታ ኣሳይ ኡባይ ኔ ዜሬꬃ ባጋራ ኣንጄታና። ሜꬌ 22፡16-18 5 ጋሶይካ ኣብራሃሜይ ታ ቃላ ሲዪዲ ኣዛዜቲዴስ፤ ታ ኢዛስ ዮቲዳይሳ ኢዚ ኡባ ናጊዳ ጊሻሳ» ጊዴስ። 6 ሄሳ ጊሻስ ዪሳቂ ጌራሬን ዴኢዴስ።

7 ሄ ቢታ ኣሳይ ኢርቢቃ ጊሻስ ዴንꬂዲ ዪሳቃ፥ «ሃና ኔስ ኣዜ?» ጊ ኦይቺዳ።

ኢዚካ ኢርቢቃይ ኬሃ ማላ ሎኦ ጊዲዳ ጊሻስ፥ «ታኒ ኢዛ ታ ማቾ ጊኮ ሃ ኣሳይ ኢዚ ጌዶን ታና ዎꬋናኮኔ» ጊ ባቢዳ ጊሻስ፥ «ሃና ታስ ሚቾ» ጊዴስ። ሜꬌ 12፡13

8 ዪሳቂ ሄን ዳሮ ዎዴ ዲዳፔ ጉዬ ፊሊስጼሜ ካዎ ኣቢሜሌኬይ ማስኮቴራ ዱጌ ጼሊዲ ዪሳቂ ባ ማቾ ኢርቢቃራ ኢዲሜቲሼ ካኢሺን *ኢዲሜቲሼ ካኢሺን፡ ቃቃቲሼ ካኢሺን ጊዛይሲ ኢዚራ ጋይታናስ ዚቲዛይሳ ቤሴስ። ቤኢዴስ። 9 ሄሳ ጊሻስ ኣቢሜሌኬይ ዪሳቃ ጼይጊሲዲ፥ «ሄኮ ኢዛ ኔስ ማቾ! ኔኒ ኣይስ ኢዞ ታ ሚቾ ጋዲ?» ጊ ኦይቺዴስ።

ኢዚካ፥ «ኢዛ ታ ማቾ ጊኮ ኢዚ ጋሶን ኣሳይ ታና ዎꬋና ጋዳ ባቢዳ ጊሻስ ጋዲስ» ጊዴስ።

10 ሂስቲን ኣቢሜሌኬይ፥ «ሃይሲ ኔኒ ኑ ቦላ ኦꬂዳይሲ ኣዜ? ታ ኣሳፔ ኢሲ ኣሲ ኔ ማቼይራ ኣቂዳኮ ኑ ቦላ ጎሜ ኤሃሼ ኣጋዳሳ» ጊዴስ። 11 ሄሳ ጊሻስ ኣቢሜሌኬይ ባ ኣሳ ኡባ፥ «ሃ ኣዴዛ ዎይኮ ኢዛ ማቾ ቦቺዛይ ኦኒካ ቱሙ ሃይቆ» ጊ ኣዛዚዴስ።

12 ዪሳቂ ሄ ቢታን ካꬅ ዜሪን ጎዳይ ኢዛ ኣንጂዳ ጊሻስ ሄ ላይꬃን ጼቱ ኩሼ ሺሺዴስ። 13 ኢዛስ ኣቆታይ ዳሪ ዳሪ ቢዳ ጊሻስ ኬሂ ዱሬቲዴስ። 14 ዪሳቃስ ዶርሲ፥ ሚዛ ዉዴይኔ ኣይሌቲ ኬሂ ዳሪዳ ጊሻስ ፊሊስጼሜ ኣሳይ ኢዛ ሚቃይኒዴስ። 15 ሄሳ ጊሻስ ኢዛ ኣዋ ኣብራሃሜ ዎዴን ኢዛ ኣዋ ኣይሌቲ ቦኪዳ ሃꬃ ኦላ ኡባ ፊሊስጼሜ ኣሳይ ቢታ ዛሪዲ ኩንꬂዴስ።

16 ሄ ዎዴ ኣቢሜሌኬይ ዪሳቃ፥ «ኑፔ ሻኬታዳ ባ፤ ኔኒ ኑፔ ኣꬋ ሚናዳሳ» ጊዴስ። 17 ሂዝጊን ዪሳቂ ሄፔ ዴንዲዲ ጌራሬ ሾባ ቢዲ ዱንካኔ ቶኪዲ ሄን ዴኢዴስ። 18 ኣብራሃሜይ ፓጻ ዲሼ ቦኪሲዳ ሃꬃ ኦላታ ኣብራሃሜይ ሃይቂዳፔ ጉዬ ፊሊስጼሜ ኣሳይ ቱጪዳ ሃꬃ ኦላታ ዪሳቂ ቃሴካ ቦካና ማላ ኦꬂዲ ካሴ ኢዛ ኣዋይ ሱንꬂዳ ሱንꬃን ጼይጊዴስ።

19 ዪሳቃ ኣይሌቲ ሾባን ሃꬃ ኦላ ቦኪሼ ቦኪዛ ኦላፌ ፑልቲዛ ሃꬅ ዴሚዳ። 20 ጊዶ ኣቲን ጌራሬን ሜሄ ሄሚዛይቲ ዪሳቃ ሜሄ ሄሚዛይታራ፥ «ሃꬃይ ኑይሳ» ጊ ኦዬቲዳ። ኢስቲ ኢዛራ ፓላሜቲዳ ጊሻስ ዪሳቂ ሄ ሃꬃ ኦላ፥ «ኤሴቄ»†ኤሴቄ፡ ኤሴቄ ጉሲ ኢብራዌታ ቃላራ፥ «ፓላማ» ጉሳ። ጊ ሱንꬂዴስ።

21 ሄሳፌ ጉዬ ኢስቲ ሃራ ሃꬃ ኦላካ ቦኪዳ፤ ጊዶ ኣቲን ኢስቲ ሄ ሃꬃ ኦላ ጌዶንካ ኦዬቲዳ፤ ሄሳ ጊሻስ ኢዚ ሄ ሃꬃ ኦላ፥ «ሲጺና»‡ሲጺና፡ ሲጺና ጉሲ ኢብራዌታ ቃላራ፥ «ሞርኬቴꬅ» ጉሳ። ጊ ሱንꬂዴስ። 22 ሄሳፌ ጉꬅ ሃራሶ ኣꬊ ሃራ ሃꬃ ኦላ ቦኪሲዴስ፤ ኢዛ ጋሶን ኦኒካ ኦዬቲቤና፤ «ጾሲ ሃኢ ኑስ ኣሲዴስ፤ ኑኒ ሃ ቢታን ዳራና» ጊዲ ኢዛ፥ «ኦሮቦቴ»§ኦሮቦቴ፡ ኦሮቦቴ ጉሲ ኢብራዌታ ቃላራ፥ «ኣሆሶ» ጉሳ። ጊ ሱንꬂዴስ።

23 ሄሳፌ ጉዬ ዪሳቂ ፑዴ ቤርሳቤሄ ጌቴቲዛሶ ኬዚዴስ። 24 ሄ ቢዳ ጋላስ ቃማራ ጎዳይ ኢዛስ ቆንጪዲ፥ «ታኒ ኔ ኣዋ ኣብራሃሜ ጾሳ፤ ታኒ ኔናራ ዲዛ ጊሻስ ባቦፋ! ታኒ ኔና ኣንጃና፤ ታ ኣይሌ ኣብራሃሜ ጊሻስ ኔ ዜሬꬃ ታ ዳርሳና» ጊዴስ። 25 ዪሳቂ ሄን ያርሺዛሶ ኬጺዲ ጎዳ ሱንꬅ ጼይጊዴስ፤ ሄን ኢዚ ባ ዱንካኔዛ ቶኪዴስ፤ ቃሴ ሄን ኢዛ ኣይሌቲ ሃꬃ ኦላ ቦኪዳ።

26 ሄሳፌ ጉዬ ኣቢሜሌኬይ ባና ዞሪዛ ኣሁዛታኔ ባ ዎታዳራታ ሃላቃ ፒኮሌ ኤኪዲ ጌራሬፔ ዪሳቃኮ ዪዴስ። ሜꬌ 21፡22 27 ዪሳቂ ኢስታስ፥ «ኢንቴ ካሴ ታና ኢጺዲ ኢንቴ ቢታፌ ኬሲ ዬዲዲ ሃኢ ቃሴ ታኮ ኣይ ኤካና ዪዴቲ?» ጊዴስ።

28 ኢስቲ ኢዛ፥ «ጎዳይ ኔናራ ዲዛይሳ ቱሙ ኑኒ ቆንጬን ቤኢዶስ፤ ሄሳ ጊሻስ ኑሲኔ ኔስ ጊዶን ጫቆ ቃላይ ዴኣና ኮሼስ ጎስ። 29 ጊዶ ኣቲን ኑኒ ኔስ ኪያቴꬅ ጻላ ኦꬂዲ ኔና ሳሮቴꬃን ሞይዚዶስ፤ ሄሳꬆካ ኔኒ ኑ ቦላ ኢታ ሚሽ ኦꬆንታ ማላ ኣኔ ኔናራ ጫቆ ጫቄቶስ፤ ሃኢ ኔና ጎዳይ ኣንጂዳይሲ ቆንጪዴስ» ጊዳ። 30 ሄ ዎዴ ዪሳቂ ኢስታስ ጊቢራ ጊግሲን ሚዳኔ ኡዪዳ። 31 ዎንቴꬃ ጋላስ ማላዶ ዎንታራ ዴንዲዲ ኢስቲ ኢሶይ ኢሳራ ጫቄቲዳ። ዪሳቂ ኢስታ ሞይዚን ኢስቲ ኢዛፔ ሳሮን ሻኬቲዲ ቢዳ።

32 ሄ ጋላስ ዪሳቃ ኣይሌቲ ዪዲ ባ ቦኪዳ ሃꬃ ኦላ ጊሻስ፥ «ኑኒ ሃꬅ ዴሚዶስ» ጊ ኢዛስ ዮቲዳ። 33 ኢዚ ሄ ሃꬃ ኦላ፥ «ሳቤሄ»*ሳቤሄ፡ ሳቤሄ ጉሲ ጫቆ ጉሳ። ጊ ሱንꬂዴስ፤ ሄሳ ጊሻስ ሄ ካታማ ሱንꬂ ሃች ጋካናስ ቤርሳቤሄ †ቤርሳቤሄ፡ ቤርሳቤሄ ጉሲ ጫቆ ሃꬃ ኦላ ጉሳ። ጌቴቴስ።

34 ኤሳዌ ላይꬂ 40 ጊዲዳ ዎዴ ቢኤሬ ና ዮዲቶኔ ኤሎኔ ና ባሴማቶ ማቾ ኤኪዴስ፤ ኢስቲ ናምኣይካ ሂቴ ቢታ ኣሳ። 35 ኢስቲካ ዪሳቃኔ ኢርቢቃ ሚሺሲሼ ዴኢዳ።