ጌሻ ማጻፋ ሜꬌቴꬃ 30

1 ኤራሄላ ያቆቤስ ናይ ኢዚፔ ዬሌቶንታይሳ ኤራዳ ባ ሚቼይ ቦላ ቃናታዱስ፤ ሄሳ ጊሻስ ኢዛ ያቆቤ፥ «ታስ ና ኢማ፤ ኢጺስ ጊኮ ታ ሃይቃና» ጋዱስ።

2 ያቆቤይ ኤራሄሊ ቦላ ሃንቄቲዲ፥ «ታና ኔስ ዬሎ ዲጋናስ ጾሳ ጋዲ?» ጊዴስ።

3 ኢዛካ፥ «ታ ኣይሌዮ ቢሊሃ ሂኖ ቤኣ፤ ኢዛ ታ ጊሻስ ዬላና ማላ ኔኒ ኢዞ ኤካ፤ ሂስቲኮ ኢዚ ባጋራ ታኒካ ና ኣዮ ጊዳና» ጋዱስ። 4 ኤራሄላ ባ ኣይሌዮ ቢሊሃ ማቾ ሂስቲ ኤካና ማላ ኢዛስ ኢሚን ያቆቤይ ኢዞ ኤኪዴስ። 5 ቢሊሃ ሻራዳ ኣቱማ ና ያቆቤስ ዬላዱስ። 6 ሂስቲን ኤራሄላ፥ «ጾሲ ታስ ፒርዲዴስ፤ ታ ዎሳካ ሲዪዲ ታስ ኣቱማ ና ኢሚዴስ» ጋዱስ፤ ሄሳ ጊሻስ ዬሌቲዳ ናዛ፥ «ዳኔ» ጋ ሱንꬃዱስ።*

7 ኤራሄሊ ኣይሌያ ቢሊሃይ ቃሴካ ሻራዳ ያቆቤስ ናምኣንꬆ ኣቱማ ና ዬላዱስ። 8 ኤራሄላካ፥ «ታኒ ታ ሚቼይራ ዎልቃማ ባጼ ባጼታዳ ጾናዲስ» ጋሼ ናዛ ኒፍታሌሜ ጋ ሱንꬃዱስ።†

9 ሊያይ ባስ ዬሎይ ኤቂዳይሳ ቤያዳ ባ ኣይሌዮ ዚልፎ ኤፋዳ ያቆቤስ ማቾ ሂስታ ኢማዱስ። 10 ሊያ ኣይሌ ዚልፋ ያቆቤስ ኣቱማ ና ዬላዱስ። 11 ሊያይካ፥ «ሃይሲ ኣይ ማላ ሎኦ ቃዳ!» ጋሼ ናዛ ጋዴ ‡ ጋዳ ሱንꬃዱስ።

12 ሊያ ኣይሌያ ዚልፋይ ያቆቤስ ናምኣንꬆ ኣቱማ ና ዬላዱስ። 13 ሊያይካ፥ «ታኒ ኬሃ ኡፋዬታዲስ! ማጫሳይካ ታና ኡፋዬቲዛሮ ጋና» ጋዱስ፤ ሄሳ ጊሻስ ኢዛ ናዛ ኣሴሬ § ጋ ሱንꬃዱስ።

14 ጊስቴ ማጻ ኣጊናን ኦሮቤሌይ ጋዴ ጊዶ ቢዲ ኢንኮዬ ቴራ ዴሚዲ ባ ኣዮ ሊያስ ኤሂዴስ፤ ኤራሄላ ሊያ፥ «ኔ ናይ ኤሂዳ ኢንኮዬዛፔ ኣኔ ታስ ኢማ» ጋዱስ።

15 ጊዶ ኣቲን፥ «ኔ ታ ኣዚናዛ ታፔ ዎꬃ ኤኪዳይሲ ጊዶንታ ኢጺን ቃሴ ታ ናዛ ኢንኮዬዛ ኤካኔ?» ጋዱስ።

ኤራሄላካ፥ «ሂስቲኮ ኔ ናዛ ኢንኮዬዛ ጊሻስ ያቆቤይ ሃቻ ቃማ ኔናራ ኣቆ» ጋዱስ።

16 ሄ ጋላሳ ኦማርስ ያቆቤይ ኦሶሶፔ ሲሚሺን ሊያይ ኢዛ ሞካናስ ኬዛዳ፥ «ኔኒ ታናራ ኣቃና ኮሼስ፤ ኣይስ ጊኮ ታኒ ታ ና ኢንኮዬዛን ኔና ኪራስ ኤካይቻዲስ» ጊን ኢዚ ሄ ጋላሳ ኦማርስ ኢዚራ ኣቂዴስ።

17 ጾሲ ሊያ ዎሳ ሲዪዴስ፤ ሄሳ ጊሻስ ኢዛ ቃንꬃታዳ ኢቻሻንꬆ ኣቱማ ና ያቆቤስ ዬላዱስ። 18 ሊያይካ፥ «ታኒ ታ ኣይሌዮ ታ ኣዚናስ ኢሚዳ ጊሻስ ጾሲ ሄሳ ኪራ ታስ ቃንጺዴስ» ጋሼ ናዛ ዪሳኮሬ * ጋዳ ሱንꬃዱስ።

19 ሊያይ ቃሴካ ሻራዳ ኡሱፑንꬃ ኣቱማ ና ያቆቤስ ዬላዱስ። 20 ሊያይ፥ «ጾሲ ታስ ኣልኦ ኢሞታ ኢሚዴስ፤ ታኒ ታ ኣዚናስ ኡሱፑን ናይታ ዬሊዳ ጊሻስ ሃኢ ኢዚ ታና ቦንቻና» ጋዱስ። ሄሳ ጊሻስ ኢዛ ናዛ ዛቢሎኔ † ጋ ሱንꬃዱስ። 21 ሄሳፌ ጉዬ ኢሲ ማጫ ና ዬላዳ ኢዞ ዲና ‡ ጋ ሱንꬃዱስ።

22 ጾሲ ኤራሄሎ ቆፒዴስ፤ ኢዚ ዎሳካ ሲዪዲ ኢዚስ ዬሊዛ ኡሎ ዶይዴስ። 23 ኢዛካ ሻራዳ ኣቱማ ና ዬላዱስ፤ «ጾሲ ታ ዬላ ታፔ ዴንꬂዴስ፤ 24 ጎዳይ ታስ ሃራ ኣቱማ ናካ ጉጄሬኔ!» ጋሼ ናዛ ዮሴፌ § ጋ ሱንꬃዱስ።

ያቆቤይኔ ላባ ፓላሜቴꬅ

25 ኤራሄላ ዮሴፌ ዬሊዳፔ ጉዬ ያቆቤይ ላባ፥ «ታኒ ታ ኣዋ ቢታ ሲማና ማላ ታና ሞይዛ። 26 ታኒ ኢስታ ጊሻስ ኔስ ኦꬂዳ ታ ማቼታኔ ታ ናይታ ታስ ኢማ፤ ታኒ ባና፤ ኣይስ ጊኮ ታኒ ኔስ ኣይ ማላ ኦꬂዳኮ ኔ ኤራሳ» ጊዴስ።

27 ቃሴ ላባይ ኢዛስ፥ «ታኒ ኔስ ኢሲ ሚሽ ዮታይስ፤ ጎዳይ ኔ ጌዶን ታና ኣንጂዳይሳ ታ ቤያዲስ። 28 ኔ ኤካና ዳሞዛ ታስ ዮታ፤ ታኒ ኔስ ኢዛ ቃንጻና» ጊዴስ።

29 ያቆቤይ፥ «ታኒ ኔስ ዎስታ ኦꬂዳኮ ኔ ሜሄይካ ዋኒ ዬሌቲዳኮ ኔኒ ኤራሳ። 30 ታኒ ያናፔ ካሴ ኔስ ዲዛ ጉꬃይ ሃኢ ኬሂ ዳሪዴስ፤ ታ ኣꬊዳ ኡባሶን ጎዳይ ኔና ኣንጂዴስ፤ ጊዶ ኣቲን ሃኢ ታኒ ታሶ ኣሳስ ኣይዴ ኦꬆ?» ጊዴስ።

31 ላባይ፥ «ታኒ ኔስ ኣይ ኢሞ?» ጊ ኢዛ ኦይቺን፥ ያቆቤይ፥ «ታስ ኣይኮካ ኢሞፋ፤ ጊዶ ኣቲን ኔኒ ታስ ኢሲ ሚሽ ኦꬂኮ ታኒ ኔ ዉዴዛ ቃሴካ ሄማናኔ ናጋና። 32 ታኒ ሃች ኔ ሜሄ ኡባ ጊዶራ ኣꬋና፤ ሄን ኔ ዶርሳፌ ማሳራ ዎይኮ ፑንጫራ ኡባ፥ ዶርሳ ላቃ ካሬꬃታ ኡባ፥ ዴይሻፌ ፑንጫራኔ ማሳራ ጊዲዳይታ ኡባ ታ ሻካና፤ ሄይታንቲ ታ ዳሞዛ ጊዴቶ። 33 ሄሳ ጊሻስ ታ ጺሎቴꬂ ኔኒ ታስ ቃንጺዳ ዳሞዛ ታይባናስ ሲንꬃፌ ኔ ዪዛ ዎዴ ኤሬታና፤ ታ ዴይሻፌ ጻላቃ ጊዶንታይ ዎይኮ ካሬꬅ ጊዶንታ ኢሲ ላቃይ ታ ኣቻን ቤቲኮ ካይሶቲዳ ማላ ቆዴቶ» ጊዴስ።

34 ላባይ፥ «ኔ ጊዳ ማላ ጊዶ» ጊዴስ። 35 ሄ ጋላሲካ ላባይ ጻላቃ ጊዲዳ ኦርጌታ ኡባ፥ ጻላቃ ጊዲዳ ማጫ ዴይሼታኔ ካሬꬃ ዶርሳ ላቃታ ኡባ ኬሲዲ ሄማና ማላ ባ ኣቱማ ናይታስ ኢሚዴስ። 36 ሂስቲዲ ሄ ሜሄዛራ ሄꬑ ጋላሳ ኦጌ ያቆቤፔ ሃኪ ቢዴስ፤ ጊዶ ኣቲን ያቆቤይ ኣቲዳ ላባ ሜሄታ ሄንꬅ ጌሊዴስ።

37 ያቆቤይ ሚꬃፌ ቃዬ ጉፌ ኬሲዲ ባጋ ፖቂዲ ባጋ ፖቆንታ ኣጊዲ ጉፌዛ ባጋ ካሬꬅ፥ ባጋ ቦꬅ ሂስቲዲ ዋራርዴስ። * 38 ሜሄይ ሃꬄ ኡያና ዪዛ ኡባ ዎዴ ሜሄቲ ሃꬅ ኡዪዛ ጎንጌ ጊዶን ጉፌታ ዎꬂዴስ፤ ሜሄቴꬅ ኬዚዳ ሜሄቲ ሃꬅ ኡያናስ ዪዛ ዎዴ፥ 39 ሄ ጉፌታ ሲንꬃን ሜሄቲዳ፤ ኢስቲካ ማሳራ፥ ጻላቃኔ ባታካ ላቃታ ዬሊዳ። 40 ያቆቤይ ላቃታ ሜሄታፔ ሻኪዲ ዱማ ዎꬂዴስ፤ ኣቲዳ ሜሄታ ማሳራኔ ጻላቃ ጊዲዳይታ ላባ ሜሄ ሲንꬅ ዛሪዴስ፤ ሄሳꬆ ያቆቤይ ባ ሜሄ ላባ ሜሄራ ዋላኬቶንታ ማላ ዱማ ሻኪ ዎꬂዴስ።

41 ጎባ ሚኖ ማጫ ዶርሳቲኔ ዴይሻቲ ሜሄቴꬅ ኬዚዛ ዎዴ ኣይዴ ጊዲንካ ኢስቲ ሄ ጉፌታ ኣቻን ሜሄታና ማላ ያቆቤይ ሄ ጉፌታ ሃꬃ ጎንጌ ጊዶን ሜሄታ ሲንꬃን ዎꬂዴስ። 42 ጉፌዛ ላፋ ሜሄታ ሲንꬃን ዎꬄና፤ ሄሳ ጊሻስ ላፋ ላፋ ሜሄቲ ላባስ ጊዲን ጎቢዛይቲ ያቆቤስ ጊዲዳ። 43 ሄሳꬆ ሃኒዲ ያቆቤይ ኬሂ ዱሬቲዲ፥ ዳሮ ሜሄ ዉዴ፥ ማጫ ኣይሌታኔ ኣቱማ ኣይሌታ፥ ዳሮ ጋሜላታኔ ሃሬታ ሃሪዴስ።

*30:6 ዳኔ ጉሲ ኢብራዌታ ቃላራ፥ «ታስ ፒርዲዴስ» ጉሳ።

†30:8 ኒፍታሌሜ ጉሲ ኢብራዌታ ቃላራ፥ «ባጼ» ጉሳ።

‡30:11 ጋዴ፡ ጋዴ ጉሲ ኢብራዌታ ቃላራ፥ «ሎኦ ቃዳ» ጉሳ።

§30:13 ኣሴሬ፡ ኣሴሬ ጉሲ ኢብራዌታ ቃላራ፥ «ኡፋይሳ» ጉሳ።

*30:18 ዪሳኮሬ፡ ዪሳኮሬ ጉሲ ኢብራዌታ ቃላራ፥ «ኦሶ ዋጋ» ጉሳ።

†30:20 ዛቢሎኔ፡ ዛቢሎኔ ጉሲ ኢብራዌታ ቃላራ፥ «ቦንቾ» ጉሳ።

‡30:21 ዲና፡ ዲና ጉሲ ኢብራዌታ ቃላራ፥ «ፒርዲዴስ» ጉሳ።

§30:24 ዮሴፌ፡ ዮሴፌ ጉሲ ኢብራዌታ ቃላራ፥ «ታስ ጉጆ ዎይኮ ቁጪዴስ» ጉሳ።

*30:37 ዋራርዴስ፡ ዋራርዴስ ጊዛይሳ ኢሲ ኢሲ ባጋ ጋሞꬆ ቃላን ዋራንኪዴስ ጌቴቴስ።