1 ያቆቤይ ዴንዲዲ ሲንꬄ ቢሺን ጾሳ ኪታንቻቲ ኢዛራ ጋጊዳ። 2 ያቆቤይ ኢስታ ቤኢዲ፥ «ሃይሲ ጾሲ ኣቂዛሶ» ጊሼ ሄ ሶሆዛ ማሃናይሜ ጊ ሱንꬂዴስ።*ማሂናይሜ፡ ማሂናይሜ ጉሲ ኢብራዌታ ቃላራ፥ «ናምኡ ጩጋይ ኣቂዛሶ ዎይኮ ጉታታ» ጉሳ።

3 ያቆቤይ ሴይሬ ጌቴቲዛሶን ኤዶሜ ቢታን ዲዛ ባ ኢሻ ኤሳዌኮ ባፔ ሲንꬄ ኪታ ዬዲዴስ። 4 ኢዚ ኢስታ ቦላ ኪታ፥ «ኢንቴ ታ ጎዳ ኤሳዌስ ጋና ሚሺ ሃይሳ፤ ‹ኔ ኣይሌ ያቆቤይ፥ ታኒ ላባ ኣቻን ሃኖ ጋካናስ ጋምኣዲስ። 5 ታስ ሚዚ፥ ሃሬይ፥ ዶርሲ፥ ዴይሺ፥ ኣዴ ኣይሌቲኔ ማጫ ኣይሌቲ ዴቴስ፤ ሃኢ ታኒ ሃ ኪታ ታ ጎዳስ ኪቲዛይ ታስ ሎኦ ቆፓና ማላ ጋ ኪታዲስ› ጊዴስ» ጊ ኪቲዴስ።

6 ኪቴቲዳይቲ ያቆቤኮ ሲሚዲ ኢዛስ፥ «ኑኒ ኔ ኢሻ ኤሳዌኮ ቢዶስ፤ ሃኢ ኢዚ ቃሴ ኔናራ ጋጋናስ ዬስ፤ ኢዛራካ 400 ኣሲ ዴስ» ጊዳ።

7 ያቆቤይ ባቢዲ ሾቢዴስ፤ ባናራ ዲዛ ኣሳ 2 ጩጋን ጩጋን ሻኪዲ ባ ዶርሳ፥ ዴይሻ፥ ሚዛኔ ጋሜላ 2 ጩጋን ጩጋን ሻኪዴስ። 8 ኢዚ፥ «ኤሳዌይ ዪዲ ኢሲ ጩጋ ኦሊ ኤኪዛ ጊዲኮ ኣቲዳ ጩጋይ ኬሲ ኤካናኮ» ጊ ቆፒዴስ።

9 ሄ ዎዴ ያቆቤይ፥ «ኣቤት ጾሳዉ! ታ ኣዋ ኣብራሃሜ ጾሳዉ፥ ታ ኣዋ ዪሳቃ ጾሳዉ፥ ታና፥ ‹ኔ ዳቦታኮ ኔ ዴሬ ሲማ፤ ታኒ ኔስ ሎኦ ኦꬃና› ጊዳሶ፥ 10 ኔኒ ኔ ኣይሌዛስ ኦꬂዳ ኪያቴꬃሲኔ ኣማኔቴꬃስ ኡባስ ታኒ ቤሶንታ ኣሳ። ታኒ ሃ ዮርዳኖሴ ሻፋ ፒኒዛ ዎዴ ታስ ኢሲ ጉፌይፔ ኣቲን ኩሼን ሃራይ ዴና፤ ጊዶ ኣቲን ሃኢ ታኒ ናምኡ ጩጋ ዴሬ ጊዳዲስ። 11 ታ ኔና ዎሳይስ፤ ታ ኢሻ ኤሳዌ ኩሼፔ ታና ኣሻ፤ ጋሶይካ ኢዚ ዪዲ ታናኔ ታ ናይታ ኣዬታ ኢስታ ናይታራ ꬋይሳናኮ ጋዳ ባባዲስ። 12 ጊዶ ኣቲን ኔኒ ታና፥ ‹ታኒ ኔስ ቱሙ ሎኦ ኦꬃና፤ ታኒ ኔ ዜሬꬃይ ታይቤታናስ ዳንዳዬቶንታ ኣባ ሻሚንታ ማላ ኦꬃና› ጊዳይሳ ቆፓ» ጊ ዎሲዴስ። ሜꬌ 12፡17

13 ሄ ጋላሳ ኦማርስ ኢዚ ሄን ኣቂዳይ ባስ ዲዛ ኡባፌ ባ ኢሻ ኤሳዌስ ኢማናሳ። 14-15 ኢዚካ 200 ማጫ ዴይሻታኔ ናምኡ ታሙ ዴይሻ ኦርጌታ፥ 200 ማጫ ዶርሳታኔ 200 ꬋርሾታ፥ 300 ꬋንꬂዛ ጋሜላታኔ ኢስታ ማራታራ፥ 40 ሚዛታ፥ 10 ኮርማ ቦራታ፥ 20 ማጫ ሃሬታኔ 10 ዎዳላ ሃሬታ ቆሪ ኬሲዴስ። 16 ሄይታ ዉዴን ዉዴን ሻኪ ሻኪ ባ ኣይሌታ ኩሼን ዎꬂዲ ኣይሌታስ፥ «ታፔ ሲንꬃቲ ቢቴ፤ ዉዴዛ ኢሳ ኢሳፌ ሃሲ ሃሲ ላጊቴ» ጊዴስ።

17 ኡባፌ ሲንꬃን ቢዛይሳ፥ «ታ ኢሻ ኤሳዌይ ኔናራ ጋጊዲ ኔና፥ ‹ኔ ኦኔ? ኣዋ ባይ? ኔ ሲንꬃን ዲዛ ሜሄይ ዉሪ ኦናሴ?› ጊ ኦይቺዛ ጊዲኮ፥ 18 ‹ኔኒ ኢዛስ ሃይቲ ኔ ኣይሌ ያቆቤሳ፤ ኢዚ ሃይታ ዬዲዳይካ ታ ጎዳ ኤሳዌስ ኢማናሳ፤ ቃሴ ኢዚካ ኑፔ ጉዬራ ዬስ› ጋ» ጊ ኣዛዚዴስ።

19 ቃሴካ ናምኣንꬆኔ ሄꬓንꬆ ጩጋታሲኔ ዉዴዛ ካሊዛ ሃራ ኡባታስ ሃይሳꬆ፥ «ኢንቴ ኤሳዌራ ጋጊዛ ዎዴ ሃይሳꬆካ ጌታ፤ 20 ‹ኔ ኣይሌ ያቆቤይ ኑፔ ጉዬራ ዬስ› ጎንታ ኣጎፍቴ» ጊዴስ፤ ኢዚ ሄሳꬆ ጊዳይ፥ «ታኒ ታፔ ሲንꬄ ኢማናስ ኪቲዳይሳን ኢዛ ሃንቆ ዶሺሳና፤ ሄሳፌ ጉዬ ታኒ ኢዛራ ጋጊዛ ዎዴ ኢዚ ታና ሞኪ ኤካናኮ ኦኔ ኤሪዛይ» ጊ ቆፒዴስ። 21 ሄሳ ጊሻስ ባ ኢሚዛይሳ ባፔ ሲንꬃሲ ዬዲዴስ፤ ጊዶ ኣቲን ኢዚ ባ ሁኤስ ሄ ጋላሳ ኦማርስ ሄን ባ ዲዛሶን ኣቂዴስ።

22-23 ሄ ጋላሳ ኦማርስ ያቆቤይ ዴንዲዲ፥ ባ ናምኡ ማቼታ፥ ባ ናምኡ ኣይሌታ ባ ናይታ ታማኔ ኢሲኔታ ኤኪዲ ያቦቄ ጌቴቲዛ ሻፋ ጋኪዴስ፤ ኢዚ ኢስታኔ ባስ ዲዛይታ ኡባ ፒንꬂ ዬዲዴስ፤ 24 ጊዶ ኣቲን ያቆቤይ ባርካ ሄን ኣቲዴስ።

ሄ ዎዴ ኢሲ ኣሲ ጋዴይ ዎንታና ጋካናስ ኢዛራ ባጼቲዴስ። 25 ሄ ኣዴዚ ኢዛ ጾናናስ ዳንዳዬቶንታይሳ ቤኢዲ ያቆቤስ ዎዲራ ቦቺን ኢዛ ዎዲራይ ዶጪዴስ። 26 ሂስቲን ሄ ኣዴዚ ኢዛ፥ «ጋዴይ ዎንታና ጌስ ታና ዬዳ» ጊዴስ። ሆሴ 12፡3-4

ጊዶ ኣቲን ያቆቤይ ኢዛ፥ «ኔ ታና ኣንጆንታ ዬዲኬ» ጊዴስ።

27 ኣዴዚካ ኢዛ፥ «ኔ ሱንꬂ ኦኔ?» ጊ ኦይቺን ኢዚ፥

«ያቆቤ» ጊ ዛሪዴስ።

28 ኣዴዚካ ኢዛ፥ «ሃይሳፌ ሲንꬃን ኔ ሱንꬂ ኢስራኤሌ †ኢስራኤሌ፡ ኢስራኤሌ ጉሲ ኢብራዌታ ቃላራ፥ «ባጼቴስ» ጉሳ። ጌቴቶ ኣቲን ያቆቤ ጌቴቶፎ፤ ኣይስ ጊኮ ኔኒ ጾሳራኔ ኣሳራ ባጼታዳ ጾናዳሳ» ጊዴስ።

29 ያቆቤይ ኢዛ፥ «ኔ ሱንꬂ ኦኔ?» ጊ ኦይቺዴስ።

ኣዴዚካ፥ «ኔኒ ታ ሱንꬁ ኣይስ ኦይቻይ?» ጊ ሲሚዲ ኢዛ ሄን ኣንጂዴስ። ዳና 13፡7-18

30 ሄሳ ጊሻስ ያቆቤይ ሄ ሶሆዛ ጲንኤሌ ‡ጲንኤሌ፡ ጲንኤሌ ጉሲ ኢብራዌታ ቃላራ፥ «ጾሳ ኣይፌሶ» ጉሳ። ጊ ሱንꬂዴስ፤ ኣይስ ጊኮ ኢዚ፥ «ታኒ ጾሳ ታ ኣይፌራ ቤኣዳ ሃይቆንታ ኣታዲስ» ጊዴስ። 31 ኢዚ ፓኑኤሌፔ ዴንዲዛ ዎዴ ኢዛ ቦላ ጻልቄይ ኬዚዴስ፤ ኢዚ ባ ዎዲራ ጊሻስ ዎቢዴስ። 32 ያቆቤ ዎዲራይ ዴሼቲዳ ጊሻስ ኢስራኤሌ ኣሳይ ሃች ጋካናስካ ጌዳ ጊዶን ዲዛ ፓሻ ኣሾ ሚ ኤሬቴና።