1 ሄሳ ጊሻስ ኮይሮፔ ኪርስቶሳ ጊሻስ ኢሜቲዳ ቲሚርቴዛ ኣጊዲ ኣኔ ጌዴ ሚኖ ቲሚርቴኮ ቦስ። ሃይቂዳ ኦሶፔ ማሮቴꬃን ጌሎ ጊሻሲኔ ጾሳን ኣማኖ ጊሻስ ኣኔ ኢዛን ቡሮ ዎꬊ ማꬎኮ። 2 ሄሳꬆካ ጺንቃታ ጊሻሲኔ ኩሼ ኣሳ ቦላ ዎꬆ ጊሻስ ቃሴካ ሃይቂዳይታ ዴንꬃ ጊሻሲኔ ሜርና ፒርዳ ጊሻስ ቡሮ ዎꬂ ዶሞኮ። 3 ጾሳ ሼኔ ጊዲኮ ኑ ሄሳꬆ ኦꬃና።

4 ባ ኣማኖ ካዲዳ ኣሳታ ኢስታ ማሮቴꬃን ዎስቲ ዞራኔ? ሄ ኣሳቲ ፖኦይ ኢስታስ ኢሲቶ ፖኢዳይታ ሳሎ ኢሞቴꬃ ኤኪ ቤኢዳይታ፥ ጺሎ ኣያና ኤኪ ቤኢዳይታ፥ 5 ጾሳ ሎኦ ቃላኔ ቡሮ ያና ኣላሜዛ ዎልቃ ኤኪ ቤኢዳይታ፥ 6 ዛሪ ካዲዳይታ፥ ኢስታ ናምኣንꬆ ዛሪ ማሮቴꬃን ኤኮይ ዳንዳዬቴና፤ ጋሶይካ ኢስቲ ባ ሞሮስ ጾሳ ና ዛሪ ካቄቴሲኔ ካዉሼቴስ።

7 ኡባ ዎዴ ኢራ ኡዪዛ ቢታያ ቃሴካ ኢዛ ጎዪዛዴስ ኣይፌ ኢሚዛ ቢታያ ጾሳ ኣቻን ኣንጄታዱስ። 8 ጊዶ ኣቲን ኣጉንꬂኔ ኦዶሮይ ሞኪዛ ቢታያ ጎኣይ ባይንዳሮ ጊዳና፤ ሄ ቢታይስ ቃንጌቴꬂ ማታን ዴስ፤ ኢዚ ዉርሴꬂ ታማን ጹጌቴꬅ ጊዳና። ሜꬌ 3፡17-18

9 ታ ኢሻቶ! ኑኒ ሄሳꬆ ሃሳይኮካ ኢንቴስ ኢንቴ ኣቶቴꬃራ ኦይኬቲዳ ሎኦ ሚሺ ዲዛይሳ ኑ ሲꬎኮ። 10 ካሴ ጊዲን ዎይኮ ሃኢ ጊዲንካ ኢንቴ ኣማኒዛይታ ማዲዳይሳኔ ኢዛ ሱንꬃ ጊሻስ ኢንቴ ቤሲዳ ሲቆቴꬃ ባላናስ ጾሲ ማካላንቻ ጊዴና። 11 ኢንቴስ ኢሜቲዳ ሂዶታይ ፖሌታና ጋካናስ ኢንቴፌ ኢሲ ኢሲ ኣሲ ሄሳ ማላ ኦሶ ዉርሴꬅ ጋካናስ ጌንጪዲ ኦꬃና ማላ ኑ ኣሞቶስ። 12 ኣማኖኒኔ ዳንዳያን ኢንቴ ኢዛ ሂዶታ ቃላ ላቲዛይታ ሚሳታናፔ ኣቲን ዶታኣታ ጊዳናይሳ ኑ ኮዮኮ።

13-14 ጾሲ ኣብራሃሜስ ሂዶታ ኢሚዳ ዎዴ ጫቂሼ ሃራ ኢዛፔ ኣꬊዛዴይ ባይንዳ ጊሻስ ባርካ ባናን፥ «ታ ኔና ቱማፔ ኣንጃና፤ ታኒ ኔ ዜሬꬅ ዳርሳና» ጊ ጫቂዴስ። ሜꬌ 22፡16-17 15 ኣብራሃሜይካ ጌንጪ ናጊዳፔ ካሊዲ ኢዛስ ኢሜቲዳ ሂዶታ ዴሚዴስ።

16 ኣሳይ ጫቆ ጫቂሼ ባፔ ꬎቃን ጫቄስ፤ ጫቆዚካ ጌቴቲዳይሲ ፖሌታና ማላ ሚንꬂዛ ጊሻስ ጫቂዳይታ ጊዶን ፓላማይ ዴንዲኮ ካሴ ጫቆ ቃላይ ዲጌስ። 17 ጾሲ ላሜቶንታ ባ ቆፋ ሂዶታ ቃላ ላታናይታስ ቆንጪሳና ማላ ኮዪዳ ጊሻስ ጫቆ ቃላን ሚንꬂዴስ። 18 ጾሲ ኣይ ዎዴካ ዎርዶታናስ ዳንዳዬና፤ ኢዚ ላሜቶንታ ናምኡ ሚሻታን ኑ ሲንꬃን ዲዛ ሂዶታ ኦይካናስ ኢዛኮ ሺቂዳ ኑኒ ጊታ ሚኖቴꬅ ዴማና ማላ ኦꬂዴስ። 19 ኑኒካ ሼምፖ ቴቄ ጊዲዳ ሚኖኔ ኣማንꬂዛ ሂዶታ ዴሚዶስ፤ ሄ ሂዶታይካ ማጋላሻዛፔ ጉዬ ባጋራ ዲዛ ጌዴ ጾሳ ኬꬃ ጊዶ ጌሌስ። *ማጋላሻ ጊዛይሳ ኢሲ ኢሲ ባጋ ጋሞꬆን ቃላን ማጋራጃ ጌቴስ። ሌዌ 16፡2 20 ሄ ሶዚካ ኑ ጊሻስ ዬሱሲ ካሴቲ ጌሊዳሶ፤ ኢዚካ ማልኬጼዴቄ ሹሜቴꬃ ማላ ሜርናስ ቄሴታ ሃላቃ ጊዲዴስ።