10
ኪርስቶሲ ኢሲቶ ሜርናስ ሺሺዳ ያርሾ
1 ሙሴ ዎጋይ ቡሮ ሲንꬃራ ያና ሎኦ ሃኖታስ ኤሾፔ ኣቲን ቱሙ ኣዳ ሜꬋይ ኢዛስ ዴና፤ ሄሳ ጊሻስ ላይꬃን ላይꬃን ፓጬይ ባይንዳ ሺሪ ሺሪ ሺሺዛ ያርሾይ ጾስ ጎይናናስ ሺቂዛ ኣሳ ጌሻናስ ሙሌካ ዳንዳይቤና። 2 ኣስ ሙሌራ ጌሻና ዳንዳይዛይሳ ጊዲዳኮ ኢስቲ ያርሾ ያርሻናይሳ ኣጌቴኔ? ቃሴካ ጾስ ጎይናና ሺቂዛ ኣሳይ ኢሲቶ ጌይዛኮ ባ ዎዚናራ ናጋራንቻ ጊዲዳይሳ ሲꬋና። 3 ጊዶ ኣቲን ሄይቲ ያርሾቲ ላይꬃን ላይꬃን ናጋራ ዛሪ ዛሪ ቆፍሴቴስ። 4 ጋሶይካ ዎፋኖታኔ ዴይሻታ ሱꬂ ኣሳፔ ናጋራ ዲጋናስ ዳንዳዬና።
5 ሄሳ ጊሻስ ኪርስቶሲ ሃይሳ ሃ ኣላሜዛ ዪዲ፥
«ኔኒ ኢሞታኔ
ያርሾ ኮያቤካ ሺን
ኔ ታስ ኣሾ ጊጊሳዳሳ። ማዛ 40፡6-8
6 ታማን ጹጌቲዛ ያርሾኔ
ናጋራ ጊሻስ ሺቂዛ ያርሾን
ኡፋዬታቤካ» ጊዴስ።
7 ሄ ዎዴ ታኒ፥
«ታ ጊሻስ ጌሻ
ማጻፋን ጻፌቲዳ ማላ፥
‹ጾሶ፥ ሄኮ ታኒ ኔ ሼኔ
ኦꬃናስ ያዲስ› » ጋዲስ።
8 ሙሴ ዎጋይ ሄሲ ሄሳꬆ ሃናና ማላ ኣዛዚኮካ ኢዚ ቃሴ ኮይሮ፥ «ያርሾ፥ ኢሞታ፥ ጹጌቲዛ ያርሾኔ ናጋራ ጊሻስ ሺቂዛ ያርሾ ኔ ኮያቤካኔ ኢዛን ኡፋዬታቤካ» ጌስ። 9 ካሌꬂዲካ፥ «ሄኮ ታ ኔ ሼኔ ኦꬃና ያዲስ» ጊዴስ። ናምኣንꬆዛ ኤሳናስ ኮይሮይሳ ዲጊዴስ። 10 ሃይሳን፥ «ኢዛ ሼኔ» ጊዛ ቃላ ማላ ሃራ ያርሾ ዛሬꬅ ሺሻናስ ኮሾንታ ማላ ዬሱስ ኪርስቶሳ ባጋራ ኢሲቶ ሺቂዳ ያርሾን ጌዪዶስ።
11 ቄሴይ ሃች ሃች ኤቂዲ ባ ኦሶ ፖሌስ፤ ኣስ ናጋራፔ ጌሻናስ ዳንዳዮንታይታ ዎንቲን ዎንቲን ሺሼስ። ኬሳ 29፡38 12 ኪርስቶሲ ጊዲኮ ያርሾ ኢሲቶ ሜርናስ ጊዳናይሳ ሺሺዲ ኣዋ ኡሻቻን ኡቲዴስ። 13 ሄ ጋላሳፌ ሲሚን ኢዛ ሞርኬቲ ኢዛ ቶሆ ጋርሳን ዬꬌታና ጋካናስ ናጎን ዴስ። 14 ጋሶይካ ኢሲቶ ሺሺዳ ያርሾን ጌያና ኣሳታ ሜርናስ ጌሺዴስ።
15 ሄሳ ሄ ሃኖዛ ጊሻስ ጺሎ ኣያናይካ ኑስ ማርካቴስ። ጎዳይ ኮይሮ፥
16 «ሄሳፌ ጉዬ ታ ኢስታራ ጌላና
ጫቆ ቃላይ ሃይሳ።
ታ ዎጋ ታ ኢስታ ዎዚናን
ዎꬃና፤
ኢስታ ዎዚናን ታ ጻፋና» ጌስ። ኤር 31፡33
17 ቃሴካ፥ «ታ ኢስታ ናጋራኔ
ማካላ
ናምኣንꬆ ቆፒኬ»
ጌስ ጎዳይ። ኤር 31፡34
18 ሄይታንቲ ዉሪካ ኣቶ ጌቴቲዳፔ ጉዬ ናምኣንꬆ ናጋራስ ሺቃና ሃራ ያርሾይ ዴና።
ዉርሴꬅ ጋካናስ ሚኒ ዳና ማላ ሺቂዳ ጼይስ
19 ሄሳ ጊሻስ ታ ኢሻቶ! ኑኒ ዬሱስ ኪርስቶሳ ሱꬃ ባጋራ ጌዴ ኡባፌ ዱማ ጌሽ ጌቴቲዛሶዮ ጌላናስ ጻላቴꬅ ዴሚዶስ። 20 ሄሲካ ማጋላሻ ባጋራ፤ ኢዚ ባ ኣሾ ባጋራ ኑስ ዶይዳ ኦራꬂኔ ዴኦ ጊዲዳ ኦጌና። 21 ጾሳ ኬꬃ ቦላ ሹሜቲዳ ቄሴታ ሃላቃይ ኑስ ዲዛ ጊሻስ፥ 22 ኑኒ ኑ ኢታ ቆፋፔ ጌያናስ ኑ ዎዚና ኣራጬቲዲ ኑ ኣሳቴꬃካ ጺሎ ሃꬃን ሜጬቲዲ ቱሙ ዎዚናፔኔ ኩሜꬃ ኣማኖን ጾሳኮ ኣኔ ሺቆስ። ሌዌ 8፡30፤ ሂዚ 36፡25 23 ኑስ ሂዶታ ቃላ ኢሚዳዴይ ኣማኔቲዛዴ ጊዲዳ ጊሻስ ኑኒ ኣማኒዲ ኢዛ ጊሻስ ማርካቲዛ ሂዶታፔ ያኔ ሃ ጎንታ ኣኔ ሎኤꬂ ኦይኮስ። 24 ሲቆኒኔ ሎኦ ኦሶን ኑ ሚኒ ዳና ማላ ኣኔ ኢሶይ ኢሳ ቆፊሶስ። 25 ኣኔ ኑ ኡባ ጋላስ ኢሶይ ኢሳራ ጋኪ ጋኪ ኢሶይ ኢሳ ሚንꬄꬆስ ኣቲን ኢሲ ኢሲ ኣሳቲ ሺቆ ኣጊዳ ማላ ኣኔ ኑኒ ሺቆዛ ኣጎኮ፤ ሃራፔካ ጎዳ ዬሱሲ ማታቲዳይሳ ቆፒሼ ካሴፔ ሚኒ ሺቂቴ።
26 ኑኒ ቱማ ሻኪ ኤሪዲ ኤኪዳይሳፌ ጉዬ ኤሪሼ ናጋራ ኦꬂኮ ሃይሳፌ ጉዬ ናጋራ ጊሻስ ሺቃናስ ሃራ ያርሾይ ዴና። 27 ሃራይ ቡሮ ሃናና ዳሮ ባቢሲዛ ፒርዳይ ጾሳ ሞርኬታ ጹጋና ናጊዛ ሚኖ ታማይ ጻላ ዴስ። ኢሳ 26፡11 28 ሙሴ ዎጋ ካꬊዳ ኣሲ ናምኡ ዎይኮ ሄꬑ ማርካቲ ማርካቲኮ ማሮይ ባይንዳ ሃይቆን ቃጻዬቴስ። ዛሬ 17፡5-7፤ 19፡15 29 ሂስቲን ጾሳ ና ካꬊዳ ኣሲ ኢዛን ጌዪዳ ጫቆ ሱꬃ ሂራይሶ ሚሻ ማላ ቆዲዳዴሲኔ ኢዛ ኪያቴꬃ ኣያና ኢሴꬂዳዴስ ኣይ ማላ ሄሳፌ ኣꬊዛ ፒርዳይ ኢዛስ ቤሲዛ ኢንቴስ ሚሳቲዜ?ኬሳ 24፡8 30 «ታኒ ኢዛስ ሃሎ ኬሳና፤ ኢዛዴ ኦሶ ማላ ኢዛዴስ ታ ዛራና» ጊዳይሳ ኑ ኤሮስ። ቃሴካ፥ «ጎዳይ ባ ዴሬዛ ቦላ ፒርዳና» ጌስ ጎዳይ። ዛሬ 32፡35-36 31 ዴኦ ጾሳ ኩሼን ኩንዴꬂ ዳሮ ባቢሴስ።
32 ኢንቴስ ኢሲቶ ፖኦይ ፖኢዳፔ ጉዬ ሜቶ ዎዴ ዳሮ ባጼን ኢንቴ ካሴ ሚኒ ኤቂዳ ቤኒ ዎዴዛ ዩሺ ቆፒቴ። 33 ኢሲ ኢሲ ዎዴ ኢንቴ ዴሬ ዱላታ ሲንꬃን ጫሻሲኔ ጎዴቴꬃስ ኣꬊ ኢሜቲዴታ፤ ቃሴ ሃራ ዎዴካ ሄሳ ማላ ዋዬይ ኢስታ ቦላ ጋኪዳ ኣሳታራ ኢንቴካ ኢሲፌ ዋዬ ቤዪዴታ። 34 ኢንቴ ኢንቴስ ሃራፔ ኣꬊዛ ሜርናስ ዳና ሃሮይ ዲዛይሳ ኤሪዛ ጊሻስ ቃሼቲዳይታስ ሚሼቲዴታኔ ኢንቴ ሃሮይ ቦንቄቲሺን ኡፋይሳን ዳንዳይዴታ።
35 ሄሳ ጊሻስ ጊታ ዋጋይ ዲዛ ካሴ ኢንቴ ኣማኔቴꬃ ኣጎፍቴ። 36 ኢንቴ ጾሳ ሼኔ ፖሊዲ ኢዚ ኢንቴስ ኢሚዳ ኡፋይሳ ቃላ ኤካናስ ሚኒ ኤቃናስ ኢንቴና ኮሼስ። 37 ጋሶይካ ጉꬃ ዎዴፔ ካሊዲ፥ «ያናይሲ ኢዚ ያና፤ ጋምኤና፤» 38 ጺሎ ኣሲ ጊዲኮ ኣማኖን ዴኦ ዴማና፤ ጉዬ ኡንዱዲዛዴይ ዲኮ ታ ሼምፖያ ኢዛዴ ቦላ ኡፋዬቱኩ።
39 «ኑኒ ጊዲኮ ኣማኒዲ ኣቲዳይታ ባጋ ኣቲን ጌዴ ጉዬ ኡንዱዲ ꬋይዛይታ ባጋ ጊዶኮ» ጊዴስ።