5
ዎይኔ ቶኪዛ ጋዴ ጊሻስ ዮቴቲዳ ጊንጾ
1 ታኒ ታ ሲቆ ላጌዛ ጊሻሲኔ
ኢዛ ዎይኔ ቱራ
ቶኪዛሶሆ ጊሻስ
ሲቆ ማዛሙሬ ዬጻና።
ታኒ ሲቂዛ ላጌዛስ
ኣራዳ ዙምቡላን
ዎይኔ ቱራ ቶኪዛሶሆይ ዴስ።
2 ቢታ ቦኪዲ፥
ሹቻ ቆሪ ኬሲዲ፥
ኡባፌ ሎኢዛ
ዎይኔ ቱራ ቶኪዴስ፤
ሂስቲዲ ኢዛ ናጋናስ
ሻኮ ጊግሲዴስ፤
ዎይኔ ኡሹ ጉምኢዛሶሆ
ኦላ ቦኪ ጊግሲዴስ።
ሄሳፌ ጉዬ ሎኦ ኣይፌ ኣይፋና
ጊዲ ናጊዴስ፤
ጊዶ ኣቲን ጫላ ጳንቂዳ
ኣይፌ ኣይፊዴስ። ማቶ 21፡33፤ ማር 12፡1
3 ሂስቲን ታ ሲቆይ፥
«ኢንቴኖ ዬሩሳላሜን
ዴኢዛይቶ!
ኢንቴኖ ዩሁዳ ኣሳቶ!
ታፔኔ ታ ዎይኔ ቱራ
ቶኪዛ ሶሆዛፔ ጊዶን
ዴኢዛ ዮኦዛ
ኣኔ ሃኢ ኢንቴ ፒርዲቴ።
4 ታኒ ታ ዎይኔ ቱራ
ሶሆዛሲ ኦꬂዳይሳፌ
ሃራ ኣይ ኦꬃናይሲ ኣቲዴ?
ኢዚ ሎኦ ኣይፌ ኣይፋና ጋዳ
ታ ናጊሺን ኣይስ ጫላ ጳንቂዳ
ኣይፌ ኣይፊዴ?
5 ሃኢ ታኒ ታ ዎይኔ
ቶኪዛ ጋዴዛ ቦላ
ኦꬃናዝ ኢንቴስ ዮታይስ።
ዲርሳ ሾዳና፤
ኢዚካ ꬋያና ማላ ኦꬃና፤
ታኒ ጊምቤዛ ላላና፤
ሄ ሶሆይካ ዱሬታና።
6 ታኒ ሄ ሶሆዛ
ማጎ ቢታ ኦꬃና።
ሄ ቱራይ ጹንቄቴናኔ
ቡልኤቴና፤
ሂስቲን ኪንዲቾይኔ
ኣጉንꬂ ኢዛን ሞካና።
ኢራይ ኢዛን ቡኮንታ ማላ፥
ታኒ ሻራታ ኣዛዛና» ጊዴስ።
7 ኡባፌ ዎልቃማ
ጎዳ ዎይኔ ቶኪዛ ጋዴይ
ኢስራኤሌ ኣሳ።
ዩሁዳ ኣሳይ
ኢዚ ኡፋዬቲዛ ኣታኪልቴ።
ኢስቲ ሱሬ ፒርዳ ፒርዳና
ጊዲ ናጊዴስ፤
ጊዶ ኣቲን
ሱꬅ ጉሲሺን ቤዪዴስ።
ኢዚ ጺሎቴꬅ ኮዪዴስ፤
ጊዶ ኣቲን ሜቶ ዋሶ ሲዪዴስ።
8 ሃራታስ ሶሆይ
ꬋያናሼ ጋካናስ፥
ኬꬅ ኬꬃ ቦላ ጉጂዛይቶ!
ጋዴ ጋዴራ ጋꬂ ኦይꬂዲ፥
ኢንቴርካ ጻላ ቢታ ቦላ
ኣኪ ዴኢዛይቶ!
ኢንቴስ ኣዬ ኣና!
9 ኡባፌ ዎልቃማ ጎዳይ
ታኒ ታ ሃይꬃራ ሲዪሺን፥
«ጊታ ኬꬃቲ ካይዚ ኣታና፤
ሄ ሎኦ ኬꬃታን ዴኣናስ
ኣሲ ꬋያና።
10 ታሙ ዋጻ ቦራታን
ቶኪዳ ዎይኔ ኣይፌፔ
ኢሲ ኦቶ ጊዲዛ ዎይኔ
ኡሺ ጻላ ኬኣና፤
ታሙ ቁንኣ ካꬅ ዜሪን
ኢሲ ቁንኣ ካꬂ
ጻላ ኣይፋና» ጊዴስ።
11 ማꬆሲዛ ኡሹ ኮያናስ
ማላዶ ጉራራ ዴንዲዲ
ዎይኔ ኡሻን
ጹጌታና ጋካናስ፥
ሳኣ ቃሚሲዛይታስ ኣዬ ኣና!
12 ኢስታ ጊቢራሶሆን ማሲንቆይ፥
ዲꬂ፥ ካራቤይ፥ ሱሱልኤይኔ
ዎይኔ ኡሺ ዴስ፤
ጊዶ ኣቲን
ኢስቲ ጎዳ ኦሶዛስ
ዉዴቲቤቴና፤
ኢዚ ባ ኩሼን ኦꬂዳ
ኦሶካ ቦንቺቤቴና።
13 ሂስቲን ታ ዴሬይ
ኣኬካ ꬋይዳ ጊሻስ
ዲኤቲ ባና፤
ኢስታ ሹሜቲ ኮሻን ሃይቃና፤
ኢስታ ዴሬ ኣሳይካ
ሃꬃ ሳሞን
ጹጌቲ ሃይቃና።
14 ዱፎይ ባ ጎምፓ ኣሳዱስ፤
ባ ዶናካ
ዛዋፔ ቦላራ ዶያዱስ፤
ዬሩሳላሜን ዴኢዛ
ጊታ ኣሳቲኔ
ሃንኮ ዴሬይ፥ ዎጫሚዛይታኔ
ጉፒዛይታ ኢሲ ቦላ ሚታና።
15 ኣሲ ኡባይ ቶሼታናኔ
ካዉያና፤
ኦቶራንቻቲ ኡባይ ዬላታና።
16 ጊዶ ኣቲን ኡባፌ
ዎልቃማ ጎዳይ፥
ሱሬ ፒርዳን
ꬎቁ ꬎቁ ጋና፤
ጌሻ ጾሳይ
ባ ጌሻቴꬃ
ባ ጺሎቴꬃን ቤሳና።
17 ሄ ዎዴ ዶርሳቲ
ባንታ ቆሮን
ሄሜቲዛ ማላ ሄሜታና፤
ዶርሳ ላቃቲ ላሌቲዳ ዱሬታ
ኬꬃታ ሶሆን ማታ ማና።
18 ጪሞ ዎዶሮን ናጋራ
ጎቺዛይታስ፥
ፓራ-ጋሬ ዎዶሮን ኢታቴꬅ
ጎቺዛይታስ ኣዬ ኣና!
19 «ኑኒ ኑ ኣይፌራ ቤኣና ማላ
ኣኔ ጾሲ ኤሌሎ!
ባ ኦሶካ ኤሶሶ!
ኑኒ ኤራና ማላ
ኢስራኤሌ ጌሻይ
ቆፒዳ ቆፋይ
ማታን ፖሌቶ»
ጊዛይታስ ኣዬ ኣና!
20 ኢታ ሎኦ፥ ሎኦዛ ኢታ ጊዛይታስ፥
ꬉማ ፖኦ
ፖኦዛ ꬉማ ኦꬂዛይታሲኔ
ጫሚዛይሳ ማልኦ፥
ማልኢዛይሳ ጫሞ
ኦꬂዛይታስ ኣዬ ኣና!
21 ባንታና ባርካ፥
«ታኒ ኣꬎ ኤራንቻ!
ታኒ ቃራ ጊዲኪና!»
ጊ ቆፒዛይታስ ኣዬ ኣና!
22 ዎይኔ ኡሻን ኤሬቲዳይታሲኔ
ማꬆሲዛ ኡሹ ዋላካናስ
ጎቢዛይታስ ኣዬ ኣና!
23 ማታኤ ኤኪዲ፥
ሞራንቻታ
ጺሊሲዛይታሲኔ
ጺሎ ኣሳታሲ ሱሬ ፒርዳ
ዲጊዛይታስ ኣዬ ኣና!
24 ኢስቲ ኡባፌ ዎልቃማ ጎዳ
ዎጋ ኢጺዳ ጊሻስ፥
ኢስራኤሌ ጌሻ ቃላካ
ካꬊዳ ጊሻስ፥
ታማ ላጮይ
ቡጻ ኦይኪዛ ማላኔ
ሜላ ማታይ ኤጺ ꬋይዛ ማላ
ኢስታ ጻጶይ ዎቃና፤
ኢስታ ጪሻይካ ቡሄ ማላ
ላሌቲ ꬋያና፤
25 ጎዳ ሃንቆይ ኢዛ ዴራ ቦላ
ኤጺ ኬኢዴስ፤
ኢዚ ባ ኩሼ ዴንꬂዲ
ኢስታ ሾጪዴስ።
ዙማቲ ቃጺዳ፤
ሃይቂዳ ኣሳ ኣሃይ
ኦጌ ቦላ ፒቲ ዬጊዳ
ቡራ ማላ ጊዲዴስ፤
ሂስቲ ፔኢንካ
ኢዛ ሃንቆይ ሲሚቤና፤
ኢዛ ኩሼይ ሃኢካ
ዴንዲዳ ማላ ዴስ።
26 ጎዳይ ሃኮን ዴኢዛ
ካዎቴꬃታስ
ማላታ ꬎቃን ኤሴስ፤
ሳኣ ጋጻን ዴኢዛ
ሞርኬታስካ ዋይቄስ፤
ኢስቲካ ኤሶን ቢቻሪሼ
ፑቱ ጋና።
27 ኢስታ ጊዶን ዳቡራንቻይኔ
ዎቤይ ዴና፤
ኢስታፌ ኢሶይኔ
ꬊስኬናኔ ኢቼና።
ጼሳን ጊጺዳ ቃባቶይካ
ቢርሼቴና፤
ኢስታ ጫማ ዳፎይካ
ዱጼና።
28 ኢስታ ዪሻይ ሆጼ፤
ኢስታ ዎንዳፌይካ
ዋጼቲ ኡቲዴስ።
ኢስታ ፓራታ ቂንጫፊሌይ
ዛላ ሹቻ ማላ፤
ኢስታ ፓራ-ጋሬታ ኤርዞይካ
ጎቴ ማላ።
29 ኢስታ ጻጎይካ
ጋሞ ጻጎ ማላ፤
ዎዳላ ጋሞታ ማላ
ጻጌቴስ፤
ባንታስ ሚዛ ሚሽ
ሻንካቲ ኦይኪዲ ጻጌቴስ፤
ኢስቲ ኦይኪዳይሳ
ቶኪ ኤኪ ቤቴስ፤
ኢስታፌ ዎꬂ ኤካናይ
ኦኒካ ዴና።
30 ሄ ጋላስ ኢስቲ
ጊታ ኣባ ዳምባላ ማላ፥
ኢስራኤሌ ቦላ ጉማና፤
ኦኒካ ዱጌ ዛሪ
ቢታ ጼሊኮ
ꬉማኔ ሜቶ ቤኣና፤
ፖኦይካ ሻራን ካሜታና።