23
ጺሮሴ ቦላ ዮቴቲዳ ቲንቢቴ
1 ጺሮሴ ቦላ ዮቴቲዳ ሚኖ ዮኦ፤
ጺሮሴይ ዲፒ ጊ ꬋይዳ ጊሻስ
ታርሴሴ ማርካቤቶ ዋሲቴ፤
ኬꬂኔ ዎዴቤይ
ባይንዳሶ ጊዳዱስ።
ቆጲሮሴ ቢታፌ
ዎሬይ ኬዚዴስ።
2 ኢንቴኖ ሃሩሮቶ!
ኢንቴኖ ዱሬቲዳ
ሲዶና ዛልኣንቻቶ!
ጮኡ ጊቴ!
3 ጊታ ኣባራ ሺሆሬፔ
ጺሮሴስ ካꬂ ዬስ፤
ጺሮሴ ኣቆታይ
ኣባዬፔ ቤቴስ፤
ኢዛ ካዎቴꬃታስ
ዛልኤ ባች ጊዳዱስ።
4 ሃኔ ሲዶና ካታማዬ!
ሃኔ ኣባ ሚጻዬ ኔኒ ዬላታ፤
ኣባይ፥ «ታኒ ሚጻታቤኬ፤
ናካ ዬላቤኬ፤
ኣቱማ ናይታኔ ማጫ ናይታ
ዲቻቤኬ» ጊዴስ።
5 ጺሮሴፔ ኬዚዛ ፓፑንꬃይ
ጊብጼ ቢታን ሲዬቲዛ ዎዴ
ኢስቲ ጬጫና።
6 ኢንቴኖ ሃሩሮቶ! ዚላሊቴ፤
ታርሴሴ ፒኒቴ።
7 ኢዚ ቶሆይ ኢዞ ሃኮ ዴሬ ኤፊዳራ
ሄን ኢዛ ኡታና ማላ
ኦꬂዳራ፥
ካሴ ቤኒ ካታማያ
ኢንጄኔ ኡፋይሳ ካታማያ ሃኒ?
8 ካላቻ ጎጺሲዳሪ ቦላ፥
ባ ዛልኣንቻታ
ዳናሲዳሪ ቦላ፥
ቢታ ቦላ ቦንቼቲዲ
ባይዚዛይቲኔ
ላሚዛይቲ ኢዚን ዲዛ
ጺሮሲ ቦላ
ሃይሳ ቆፒዳይ ኦኔ?
9 ኦቶሬቲዛይታ ኡባ
ቦንቾ ካዉሻናስ
ቃሴ ቢታ ቦላ
ꬎቁ ꬎቁ ጊዳይታ
ዚቂ ሂስታናስ
ጎዳይ ኡባፌ ዎልቃማ
ጾሳይ ሃልቺዴስ።
10 ኢንቴኖ ታርሴሴ ቢታ ኣሳቶ!
ኢንቴና ቴቂዛይ ባይንዳ ጊሻስ
ኣባዬ ሻፋ ማላ ኢንቴ
ቢታ ቦላን ኩሚዲ ጎጊቴ።
11 ጎዳይ ባ ኩሼዛ
ኣባ ቦላ ሚጪዴስ፤
ኢዚ ካዎቴꬃታካ
ዳጋንꬂዴስ፤
ካናኔ ሚጻቲ
ላሌታና ማላ ኣዛዚዴስ።
12 ቃሴካ፥ «ሃኔ ቆጼቲዳ
ሲዶና ጌላኦዬ!
ሃይሳፌ ጉዬ ኡፋዬቶፋ፤
ዴንዳ ቆጲሮሴ ፒና፤
ሄንካ ኔ ሳሮ ዴማካ» ጊዴስ።
13 ኣኔ ባቢሎኔ ቢታ ቤኢቴ፤
ሄ ቢታ ኣሳይ
ፓꬆንታ ኣስ ጊዲዴስ፤
ኣሶሬ ኣሳይ ኢዞ ባዞ ዶኣስ
ጉፋሶ ኬሲዴስ፤
ኢስቲ ባንታ ሻኮታ
ኢዚ ቦላ ጊምቢዳ፤
ኢዚ ሚጻታ ላሊዳ፤
ቡꬌቶይሲ ዶሬ ጊዲዴስ።
14 ኢንቴኖ ታርሴሴ
ማርካቤቶ፥ ዋሲቴ!
ኢንቴ ሚጻይ ላሌቲዴስ።
15 ሄ ዎዴ ጺሮሴ ካታማይ ኢሲ ካዎስ ዴኦ ላይꬃ ኬና ላፑን ታሙ ላይꬅ ዶጌታና፤ ሄሳፌ ጉዬ ላይማ ማጫሳይ ጊሻስ ዬጼቲዳ ዬꬂ ጺሮሴ ቦላ ዬጼታና።
16 ኢስቲ፥ «ሃኔ ዶጌቲዳ
ላይማ ማጫሳዬ!
ባጋና ዴንꬃ፤
ካታማይ ጊዶን ዩያ፤
ኔ ሃሳኤታና ማላ
ባጋና ሎኤꬃ ሾጫ፤
ዳሮ ማዛሙሬ ዬጻ» ጋና።
17 ላፑን ታሙ ላይꬂ ፖሌቲዳፔ ጉዬ ጎዳይ ጺሮሴ ቆፓና፤ ጊዶ ኣቲን ኢዛ ካሴ ባ ላይማ ኦሶን ሲማና፤ ሳኣ ቦላ ካዎቴꬃታ ኡባራ ባ ላይማቴꬃ ዛልኤ ዛልኣና። 18 ጊዲኮካ ኢዛ ዴሚዳ ኡባይኔ ዎꬌይ ጎዳስ ዱማታና፤ ዳጋቴናኔ ሱዴና፤ ኢዚ ዎꬌይ ጎዳ ሲንꬃን ዴኢዛይታስ ፓላሂዳ ካꬂኔ ሎኦ ማይኦ ጊዳና። ሂዚ 26፡1—28፡19፤ ኢዩ 3፡4-8፤ ኣሞ 1፡9-10፤ ዛካ 9፡1-4፤ ማቶ 11፡21-22፤ ሉቃ 10፡13-14