31
ጊብጼን ኣማኔቲዛይታስ ኣዬ ኣና
1 ፑዴ ኢስራኤሌ ጌሻኮ ጼሎንታይታስ፥
ጎዳፔ ማዶ ኮዮንታይታስ፥
ማዶ ዴማናስ
ዱጌ ጊብጼ ዎꬊዛይታስ፥
ፓራ-ጋሬታ ዳሮቴꬃኒኔ
ባ ፓራ ሚኖቴꬃን
ጬቄቲዛይታስ
ኣዬ ኣና።
2 ኢዚ ጊዲኮ ኣꬎ ኤራንቻ፤
ኢዚ ባሽ ኤሃና፤
ባ ቃላካ ላሜና፤
ኢታ ኦꬂዛይታ ቦላኔ
ቆሆ ኦꬂዛይታ
ማዲዛይታ ቦላ
ኢዚ ዴንዳና።
3 ጊብጼ ኣሳይ ኣሳፔ ኣቲን
ጾስ ዴቴና፤
ኢስታ ፓራቲካ ኣሾፔ ኣቲን
ኣያና ጊዴቴና።
ጎዳይ ባ ኩሼ ሚጪዛ ዎዴ
ኢዛ ማዲዛዴይ ꬉጴታና፤
ማዴቲዛዴይካ ኩንዳና፤
ናምኣይካ ኢሲፌ ꬋያና።
4 ጎዳይ ታስ፥ «ጋሞይ ዎይኮ
ዎዳላ ጋሞይ ሜሄ ኦይኪዲ
ዳሮ ሄንꬃንቻቲ
ጼይጌቲ ሺቂዲ
ኢዛ ቦላ ዪኮ ኢስታ ዋሶይ
ኢዛ ያሺሶንታይሳ
ኢስታ ዋሶይ
ኢዛ ዳጋንꬆንታይሳ ማላ
ኡባፌ ዎልቃማ ጎዳይ
ዙማ ቦላኔ ዙምቡላታ ቦላ
ኦላስ ዎꬋና።
5 ካፎይ ቦላራ ኣላንꬂዛ ማላ
ኡባፌ ዎልቃማ ጎዳይ
ዬሩሳላሜ ካማና፥
ናጋናኔ ኣሻና፤
ኢዚ ቦላራ ኣꬊዲ
ኢዞ ኣሻና» ጌስ።
6 ኢንቴኖ ኢስራኤሌ ኣሳዞ!
ኢንቴ ኬሂፔ
ማካሊዳይሳኮ ሲሚቴ።
7 ሄ ዎዴ ናጋራይ ኩሚዳ
ኢንቴ ኩሼቲ ቢራፔኔ
ዎርቃፌ ኦꬂዳ ኤቃ ጾሳታ
ኢንቴ ኡባይካ ዎራ ዬጋና።
8 «ኣሶሬይ ኣሳ
ማሻ ጊዶንታ
ማሻን ሃይቃና፤
ኣሾ ማይኢዳዴ
ማሻ ጊዶንታ
ሃራ ማሻይ ኢዛ ማና፤
ኢዚ ጊꬃ ማሻ ሲንꬃፌ ባቃታና፤
ናቴꬃቲ ዶሳይ ባይንዳ
ዎልቃꬆን ኦꬃና።
9 ሚኖ ሚጻይ ሺሮ ጋሶን ኩንዳና፤
ኦላ ጋዳዋቲካ
ኦላ ባንዲራ ቤኢዲ
ዳጋማን ኩማና»
ጌስ ታማይ ጺዮኔን፥
ታማ ጮጬይ
ዬሩሳላሜን
ዲዛ ጎዳይ።