52
ጾሳይ ዬሩሳላሜ ኣሻና
1 ሃኔ ጺዮኔ ዴንዳ፤ ዴንዳ፤
ዎልቃ ማይኣ፤
ጌሻ ካታማዬ
ዬሩሳላሜ!
ኔ ቦንቾ ማይኦ ማይኣ፤
ሃይሳፌ ጉዬ ቃጻሬቶንታይኔ
ቱናይ ኔ ጊዶ ጌሌና። ኣጁ 21፡2፥27
2 ሃኔ ዬሩሳላሜ፥ ዴንዳ፤
ጉዱላ ፒታ፤ ኔ ኣራታን ኡታ።
ዲኤቲዳ ጺዮኔ ናዬ፥
ኔ ቆꬌን ቃሼቲዳ
ሳንሳላታ ኬሳ ዬጋ።
3 ጎዳይ፥ «ኢንቴ ጮ
ሃዳ ባይዜቲዴታ፤
ሃኢካ ሚሺ ባይንዳ
ጮ ኢንቴ ዎዜታና» ጌስ።
4 ኡባ ሃሪዛ ጎዳይ፥
«ኮይሮ ታ ዴሬይ ዴኣናስ
ዱጌ ጊብጼ ዎꬊዴስ፤
ጉዬፔ ኣሶሬይ ጋሶይካ ባይንዳ
ኡንኤꬂ ሃሪዴስ።
5 ‹ሂስቲን ታ ዴሬይ
ጋሶይካ ባይንዳ
ዲኤቲ ቢቺን
ታስ ሃን ኣዚ ዲዜ?›
ኢስታ ሃሪዳይቲ
ኢስታ ቦላ ቂልጪዳ፤
ጋላስ ኩሜꬅ ታ ሱንꬃ
ፓጬይ ባይንዳ ጫዬቴስ። ኦሮ 2፡24
6 ሄሳ ጊሻስ ታ ዴሬይ
ታ ሱንꬃ ኤራና፤
ሄ ጋላስ ካሴካ ዮቲዳይ
ታና ጊዲዳይሳ ኢስቲ ኤራና።
ኤ ሄሲ ታና» ጌስ።
7 ዙማ ቦላ ኤቂዳ ቶሆቲ፥
ሚሺራቾ ኤኪ ዪዛ ቶሆቲ፥
ሳሮቴꬅ ዮቲዛይቲ፥
ሎኦ ሚሺራቾ ዮቲዛይቲ፥
ኣቶቴꬅ ኣዋጂዛይቲ፥
ጺዮኖካ፥
«ኔ ጾሳይ ካዎቲዴስ»
ጊዛ ቶሆቲ ኣይ ማላ ሎኦ!ናሆ 1፡15፤ ኦሮ 10፡15፤ ኤፌ 6፡15
8 ሃኔ ሲያ! ኔና ናጊይዛይቲ
ባንታ ቃላ ꬎቁ ሂስቲዳ።
ኢሲ ቦላ ኢሊሊሼ ዬጼቴስ፤
ጎዳይ ጺዮኔ ሲሚዛ ዎዴ፥
ኢስቲ ኢዛ
ባንታ ኣይፌራ ቤኣና።
9 ኢንቴኖ ዬሩሳላሜን
ቆሌቲዳ ሶሆቶ!
ኢንቴ ኢሲ ቦላ ኢሊሊሳን ዬጺቴ፤
ጎዳይ ባ ዴራ ሚንꬄꬂዴስ፤
ዬሩሳላሜ ካታማካ ዎዚዴስ።
10 ጎዳይ ባ ጌሻ ቄሳ
ካዎቴꬃታ ኡባ
ሲንꬃን ቆንጪሳና፤
ቃሴ ቢታ ጋጻን ዲዛ ኡባይካ
ኑ ጾሳ ኣቶቴꬃ ቤኣና።
11 ኢንቴኖ ጎዳ ኬꬃ
ሚሻታ ቶኪዛይቶ!
ሻኬቲቴ፥ ሻኬቲቴ፤
ሄፔ ኬዚቴ።
ቱና ሚሽ ቦቾፍቴ፤
ሄፔ ኬዚቴ፤
ኢንቴ ሁኤሲካ ጌይቴ። 2ቆሮ 6፡17
12 ጊዲኮካ ኤሶን ኬዜኬታ፤
ዎይኮ ቤቲ ቤኬታ፤
ጎዳይ ኢንቴፌ ሲንꬅ ኣꬊዲ
ኢንቴና ካሌꬃና፤
ኢስራኤሌ ጾሳይካ
ጉዬራ ኢንቴና ናጋና።
ሜቶይ ኢዛ ጋኪዛ ኦሳንቻ
13 ጎዳይ፥ «ቤኢቴ፥
ታ ኣሽካራይ ኣኬካን ኦꬃና፤
ኢዚ ኤሬቲዳዴ ጊዳና፥
ኢዚ ꬎቁ ꬎቁ ጋና፤
ኢዚ ኬሂ ቦንቼታና።
14 ዳሮ ኣሳይ ኢዛን
ዳጋማናሼ ጋካናስ
ኣስ ኡባፌ ቆሄቲዳ ጊሻስ
ኢዛ ሜꬋይ
ኣሳ ሜꬋፔ ላሜቲዴስ።
15 ሄሳ ጊሻስ ኢዚ
ዳሮ ካዎቴꬃታ ማላሊሳና፤
ኢዛ ጋሶን ካዎቴꬃቲ
ባንታ ዶና ኦይካና፤
ኢስታስ ዮቴቶንታይሳ
ኢስቲ ቤኣና፤
ኢስቲ ሲዪ ኤሮንታ
ሚሽ ኣኬካና» ጌስ። ኦሮ 15፡21