ዳናታ ማጻፋ
ጊዶ ቆፋ
ዳናታ ማጻፋይ ኢስራኤሌ ኣሳይ ካናኔ ጌሊ ኦይኪዳ ዎዴፔ ዶሚዲ፥ ካዎይ ካዎቲን ካዎቴꬃይ ኤቃና ጋካናስ ዲዛ ታሪኬታ ኦይኪዴስ፤ ሄ ዎዴይ ኢስራኤሌ ኣሳይ ኤቃ ጾሳታ ጎይኖን ጾሳ ቦላ ማካላ ዳርሲዳ ዎዴ። ሃ ማጻፋይ ኦይኪዳ ታሪኬቲ፥ «ዳናታ» ጌቴቲዛ ሚኖ ኣሳቲ ኦꬂዳይሳ ቤሴቴስ። ሄ ዳናታፔ ዳሪዛ ባጋቲ ኦላ ቃራታ፤ ኢስታፌ ቃሴ ኬሂ ኤሬቲዳይ፥ ኢዛ ሚኖቴꬃይ ሼምፖ 13-16 ጋካናስ ጻፌቲዳ ሳምሶኔ ጌቴቲዛይሳ። ሃ ማጻፋፔ ኑኒ ዴሚዛ ጊታ ቲሚርቴይ፥ ኢስራኤሌ ኣሳ ዴኦይ ቱሙ ዴኦ ጊዲዛይ ኢስቲ ጾሳስ ኣማኔቲ ዲዛ ዎዴ ጊዲሺን ኢስቲ ኢዛስ ኣማኔቶንታ ኢጺዛ ዎዴታ ኡባን ኢስታ ቦላ ሜቶይ ጋኪዛይሳ ኤሪሴስ። ሄሳፌ ቦላራ ቃሴ ዎጋን ኣሳይ ጾሳስ ኣማኔቶንታ ኢጺዳ ጋሶን ኢስታ ቦላ ሜቶይ ጋኪኮካ ኢስቲ ናጋራ ፓጺ ሲሚዳ ዎዴ ኡባን ጾሲ ኢስታ ኣሼስ።
ሃ ማጻፋይ ኦይኪዳ ኩሜꬃ ቆፋ
ኢያሶይ ሃይቃና ዎዴ ጋካናስ ዲዛ ሃኖታታ 1፡1—2፡10
ኢስራኤሌ ዴሬ ዳናታ 2፡11—16፡31
ዱማ ዱማ ሃኖታ 17፡1—21፡25
1
ዩሁዳ ዛሬቲኔ ሲሞና ዛሬቲ ኣዶኒ-ቤዜቄ ኦሊ ኦይኪዳ
1 ኢያሶይ ሃይቂዳፔ ጉዬ ኢስራኤሌ ኣሳይ፥ «ካናኔ ቢታ ኣሳ ኦላናስ ኑ ዛሬታፔ ኮይሮቲዲ ኬዛናይ ኦኔ?» ጊዲ ጎዳ ኦይቺዴስ።
2 ሂስቲን ጎዳይ፥ «ዩሁዳ ዛሬቲ ኮይሮቲ ኬዜቶ፤ ታኒ ቢታ ኢስታ ኩሼን ኣꬃ ኢማዲስ» ጊዴስ።
3 ዩሁዳ ኣሳይ ባንታ ዳቦታ ጊዲዳ ሲሞና ዛሬታ፥ «ኑኒ ካናኔታራ ኦሌታና ማላ ኑና ሻኪን ጋኪዳሶ ኑናራ ኣꬊቴ። ሄሳፌ ጉዬ ኢንቴና ሻኮን ጋኪዳሶ ኢንቴናራ ኢሲፌ ባና» ጊዳ፤ ሂስቲን ሲሞና ዛሬቲኔ ዩሁዳ ዛሬቲ ኦላስ ኢሲፌ ቢዳ። 4 ሂስቲን ጎዳይ ካናኔታኔ ፓሪዜታ ኢስታ ኩሼን ኣꬂ ኢሚዴስ፤ ቤዜቄን 10,000 ኣስ ዎꬊዳ። 5 ቤዜቄ ጌቴቲዛሶን ኣዶኒ-ቤዜቄ*ኣዶኒ-ቤዜቄ፡ ኣዶኒ-ቤዜቄ ጉሲ ኢብራዌታ ቃላራ ቤዜቄ ጎዳ ዎይኮ ቤዜቄ ጌቴቲዛ ዴሬ ኣይሲዛዴ ጉሳ። ዴሚዲ ኢዛራ ኦሌቲዳ፤ ሂስቲዲ ካናኔታኔ ፓሪዜታ ጾኒዳ። 6 ኣዶኒ-ቤዜቄይ ባቃቲሺን ጎዲ ኦይኪዲ፥ ኢዛስ ኩሼ ማንꬃ ቢራꬌታኔ ቶሆ ማንꬃ ቢራꬌታ ቃንጺ ቃንጺ ዬጊዳ።
7 ሂስቲን ኣዶኒ-ቤዜቄይ፥ «ኩሼ ማንꬃ ቢራꬌታኔ ቶሆ ማንꬃ ቢራꬌታ ታኒ ቃንጻ ቃንጻ ዬጊዳ ላፑን ታሙ ካዎቲ ታ ማዳፌ ዎꬊዳ ሱፓ ማጺ ሺሺዲ ሜቴስ። ካሴ ኢስታ ቦላ ታ ኦꬂዳ ጌኔ ማላ ጾሲ ታ ቦላ ኦꬂዴስ» ጊዴስ። ኢዛ ዬሩሳላሜ ኤሂን ሄን ሃይቂዴስ።
ዩሁዳ ዛሬቲ ዬሩሳላሜኔ ኬብሮኔ ኦይኪዳ
8 ዩሁዳ ኣሳይ ዬሩሳላሜ ኦሊ ኦይኪዴስ፤ ሂስቲዲ ኣሳ ጊꬃ ማሻን ቡሳኪ ዉርሲዲ ካታማ ታማን ጹጊዴስ።
9 ሄሳፌ ጉዬ ዩሁዳ ኣሳይ ጌዜን፥ ኔጌቤኒኔ ሄ ዴሬ ጋꬋን ዲዛ ካናኔታ ኦላናስ ቢዴስ። 10 ሂስቲዲ ካሴ ቂሪያቴ-ኣርባኤ ጌቴቲዛ ኬብሮኔ ካታማን ዲዛ ካናኔታ ኦሊዳ፤ ቃሴ ሻሻዬ፥ ኣሂማኔኔ ታሊማዬ ጌቴቲዛ ቆሞታ ጾኒዳ።
ኦቲንኤሌይ ዳቢሬ ካታማ ኦይኪዴስ
(ኢያ 15፡13-19)
11 ሄሳፌ ዴንዲዲ ዩሁዳ ኣሳይ ዳቢሬ ጌቴቲዛ ካታማን ዲዛ ኣሳ ኦላናስ ቢዴስ፤ ዳቢሬ ካታማይ ካሴ፥ «ቂሪያቴ-ሴፌሬ» ጌቴቴስ። 12 ካሌቤይ፥ «ቂሪያቴ-ሴፌሬ ኦሊዲ ኦይኪዛዴስ ታኒ ታ ናዮ ኣኪሳ ኢማና» ጊዴስ። 13 ሂስቲን ካሌቤስ ካሎ ኢሻ ቄናዜ ና ኦቲንኤሌይ ሄ ካታማ ኦሊዲ ኦይኪዴስ፤ ካሌቤይካ ባ ናዮ ኣኪሳ ኢዛስ ኢሚዴስ። †ዳቦ ጊዶን ኤኬቴꬂኔ ጌሌቴꬂ ዩሁዳ ቢታን ዲዛ ኢሲ ኢሲ ኣሳቲ ፖሊዛ ዎጋ።
14 ኣኪሳይ ኦቲንኤሌ ጌሊዛ ዎዴ፥ ኢዛ ባ ኣዋፔ ጋዴ ኦይቻ ኤካና ማላ ኦቲንኤሌይ ኢዞ ዞሪዴስ፤ ሂስቲን ኢዛ ባ ቶጊዳ ሜሄ ቦላፌ ዎꬋዱስ፤ ሂስቲን ካሌቤይ ኢዞ፥ «ታ ኔስ ኣይ ኦꬆ?» ጊዲ ኦይቺዴስ።
15 ኢዛካ፥ «ካሴ ኔ ታስ ኢሚዳ ጋዴይ ሃꬂ ባይንዳሶ ጊዲዳ ጊሻስ ፑልቶ ሃꬃራ ዲዛ ጋዴ ታስ ኢማርኪ!» ጋዱስ። ሂስቲን ካሌቤይ ኢዚስ ፑዴ ባጋራኔ ዱጌ ባጋራ ፑልቶራ ዲዛ ጋዴታ ኢሚዴስ።
ዩሁዳ ዛሬቲኔ ቢኒያሜ ዛሬቲ ኦሊ ጾኒዳ
16 ሙሴ ቦሎ ቄናዌዛ ዜሬꬃቲ ዩሁዳ ኣሳራ ዛምባይ ዳሪ ዲዛ ኢያርኮ ካታማፔ ዴንዲዳ፤ ሂስቲዲ ኣራዴ ጌቴቲዛ ካታማፔ ዱጌሃ ባጋራ፥ ኔጌቤን ዲዛ ዩሁዳ ባዞ ቢዳ፤ ሂስቲዲካ ሄን ዲዛ ኣሳ ጊዶን ኡቲዳ።
17 ዩሁዳ ኣሳይ ሲሞና ኣሳራ ኢሲፌ ቢዲ፥ ጻፋቴ ጌቴቲዛ ካታማን ዲዛ ካናኔታ ኦሊ ጾኒዴስ፤ ካታማዮካ ሙሌራ ꬋይሲዴስ። ሂስቲዲ ሆርማ ‡ሆርማ፡ ሆርማ ጉሲ ኢብራዌታ ቃላራ ሙሌራ ꬋይሲዴስ ጉሳ። ጊዲ ሱንꬂዴስ። 18 ዩሁዳ ኣሳይ ጉጂዲ ጋዛ፥ ኣስቄሎናኔ ኣቃሮኔ ካታማታ ኢስታ ዩሾን ዲዛ ዴሬታካ ኦሊ ኦይኪዴስ።
19 ጎዳይ ዩሁዳ ኣሳራ ዲዛ ጊሻስ፥ ዙማቲ ዳርዛሶ ጌዜ ቢታ ኢስቲ ኦይኪዳ፤ ጊዶ ኣቲን ጋርስ ዴምባቲ ኡቲዳ ቢታን ዲዛ ኣሳታስ ቢራታፔ ኦሴቲዳ ኦላ ፓራ-ጋሬቲ ዲዛ ጊሻስ፥ ዩሁዳ ኣሳይ ኢስታ ዴንꬂ ጎዳናስ ዳንዳይቤና። 20 ሙሴይ ጊዳ ማላን ኬብሮኔ ካታማ ካሌቤስ ኢሚዳ፤ ሂስቲን ካሌቤይ ኤናቄ ዛሬ ሄꬑ ቆሞታ ዴራፔ ዴንꬂ ጎዲዴስ። 21 ጊዶ ኣቲን ቢኒያሜ ዛሬቲ ዬሩሳላሜን ዲዛ ያቡሴ ኣሳታ ዴራፔ ዴንꬂ ጎዶንታ ኣጊዳ ጊሻስ ሃች ጋካናስ ያቡሴቲ ቢኒያሜ ዛሬታራ ዬሩሳላሜን ኢሲፌ ዴቴስ። ኢያ 15፡63፤ 2ሳሜ 5፡6፤ 1ታሪ 11፡4
ኤፍሬሜ ቆሞቲኔ ሚናሴ ቆሞቲ ቤቴሌ ኦሊ ኦይኪዳ
22 ዮሴፌ ቆሞቲ ቤቴሌ ኦላናስ ዎራጂዳ፤ ጎዳይካ ኢስታራ ዴስ፤ 23 ኢስቲካ ቤቴሌ ካታማ ዩዪ ጾሞሲዛ ኣሳታ ኪቲዳ፤ ካሴ ሄ ካታማይ ሱንꬂ ሎዛ ጌቴቴስ። 24 ኪቲን ኢስቲ ካታማፔ ኬዚ ቢዛ ኢሲ ኣዴዛ ዴሚዲ፥ «ካታማ ጊዶ ዋኒ ጌላናስ ዳንዳዬቲዛኮ ኑና ቤሳ፤ ኔ ቤሲኮ ኑኒ ኔስ ኪያና» ጊዳ። 25 ሂስቲን ኢዚ ኢስታ ቤሲዴስ፤ ሄሳፌ ጉዬ ካታማን ዲዛ ኣሳ ጊꬃ ማሻን ቡሳኪዳ፤ ጊዶ ኣቲን ሄ ኣዴዛኔ ኢዛሶ ኣሳ ኡባ ሼምፖ ኣሺዳ። 26 ጉዬፔ ሄ ኣዴዚ ሂቴ ጌቴቲዛ ዴሬ ቢዲ፥ ሄን ካታማ ኤሲዴስ፤ ሄ ካታማይ ሱንꬃ ሎዛ ጊ ሱንꬂዴስ፤ ሄ ካታማያካ ሃች ጋካናስ ሄ ሱንꬃን ጼይጌታዉስ።
ኢስራኤሌ ኣሳይ ባስ ኢሜቲዳ ቢታፌ ዴንꬂ ጎዶንታ ኣጊዳ ኣሳታ
27 ሚናሴ ዛሬቲ፥ ቤቲ-ሻኣኔ፥ ታኢናኬ፥ ዶሬ፥ ዪቢላኣሜኔ ማጊዶ ካታማታኒኔ ኢስታ ዩሾን ዲዛ ሞꬃታን ዲዛ ኣሳታ ኬሲ ጎዶንታ ኣጊዳ ጊሻስ ካናኔቲ ሄን ባንታ ዴኦ ሚንꬂ ኦይኪዳ። 28 ኢስራኤሌ ኣሳይ ሚኒዳ ዎዴ ካናኔታ ባስ ዎልቃን ኦሲሲዳ፤ ጊዶ ኣቲን ኢስታ ሙሌራ ቢታፌ ኬሲ ጎዲቤቴና። ኢያ 17፡11-13 29 ኤፍሬሜ ዛሬቲካ ጌዜሬ ጌቴቲዛ ካታማን ዲዛ ካናኔታ ኬሲዲ ጎዶንታ ኣጊዳ ጊሻስ ካናኔ ኣሳቲ ሄን ኢስታራ ኢሲፌ ዱስ ዶሚዳ። ኢያ 16፡10 30 ዛቢሎኔ ዛሬቲ ቂቲሮኔ ካታማኒኔ ናሂላሌ ካታማን ዲዛ ኣሳታ ኬሲ ጎዶንታ ኣጊዳ ጊሻስ ካናኔቲ ሄን ኢስታራ ኢሲፌ ዴኢዳ፤ ጊዶ ኣቲን ዛቢሎኔ ዛሬቲ ኢስታ ባስ ዎልቃን ኦሲሲዳ። 31 ኣሴሬ ዛሬቲካ ኣኮን፥ ሲዶናን፥ ኣሂላቤን፥ ኣኪዚቤን፥ ሄልቤን፥ ኣፌቄኒኔ ኤራሆቤን ዲዛ ኣሳታ ኬሲ ጎዲቤቴና። 32 ካናኔቲ ኬዞንታ ኣጊዳ ጊሻስ ኣሴሬ ዛሬቲ ኢስታራ ሄን ኢሲፌ ዴኢዳ። 33 ኒፍታሌሜ ዛሬቲካ ቤቲ-ሼሚሼ ካታማኒኔ ቤቲ-ኣናቴ ካታማን ዲዛ ኣሳታ ኬሲዲ ጎዲቤቴና፤ ጊዶ ኣቲን ካናኔታራ ሄን ኢሲፌ ዴኢሺን ቤቲ-ሼሚሼኔ ቤቲ-ኣናቴ ካታማ ኣሳታ ባስ ዎልቃን ኦሲሲዳ። 34 ኣሞሬቲ ዳኔ ዛሬታ ፑዴ ዙማቲ ዲዛሶ ጌዜፌ ዱጌ ዴምባሶ ዎꬎንታ ማላ ዲጊዳ። 35 ኣሞሬቲ ሃሪ-ሄሬሴ ዴሬን፥ ኣያሎኒኔ ሻኣልቢሜ ጌቴቲዛ ካታማታን ዴኦ ሚንꬂዳ፤ ጊዶ ኣቲን ኤፍሬሜ ዛሬቲኔ ሚናሴ ዛሬቲ ሚኒ ሚኒ ቢዲ ባንታስ ዎልቃን ኦሲሲዳ። 36 ኣሞሬታ ዴሬ ዛዋይ ኣኪራቢሜ ጌቴቲዛሶራ ኣꬊ ቢዲ ሴላራ ካንꬂዲ ሄራ ኣꬊ ቤስ።