5
ዲቦራይኔ ባራቄይ ዬጺዳ ዬꬃ
1 ሄ ጋላስ ዲቦራይኔ ኣቢኖኣሜ ና ባራቄይ ሃይሳፌ ካሊዛ ዬꬃ ዬጺዳ።
2 «ካሌꬂዛይቲ
ኢስራኤሌ ካሌꬂሺን፥
ዴሬይካ ባ ሼኔን ሃሬቲሺን
ጎዳ ጋላቲቴ!
3 «ኢንቴኖ ካዎቶ! ሃይሳ ሲዪቴ!
ኢንቴኖ ዴሬ ሃሪዛይቶ! ኤዝጊቴ!
ታኒ ጎዳስ ዬጻና፤
ኢስራኤሌ ጎዳስ
ጋላታ ማዛሙሬ ዬጻና።
4 «ኣቤት ጎዳዉ!
ኔኒ ሴይሬ ዴሬፔ
ዴንዲዳ ዎዴ፥
ኔኒ ኤዶሜ ቢታፌ
ኬዚዳ ዎዴ፥
ቢታይ ቃጺዴስ።
ሳሎፔ ኢራይ ቡኪዴስ፤
ኤ፥ ኢራይ ሻራታፔ
ዱጌ ቡኪዴስ።
5 ጎዳ ኢስራኤሌ ጾሳ
ሲንꬃኒኔ
ሲና ጎዳ ሲንꬃን
ዙማቲ ቃጺዳ። ኬሳ 19፡18
6 «ኣናቴ ና ሻምጋሬ ዎዴኒኔ
ያኤሌ ዎዴን ኦጌይ ሳሚዴስ፤
ዛልኣንቻቲካ
ሄ ቢታራ ካንꬂ ቤቴና።
ኦጌዛራ ቢዛይቲካ
ኦጋ ኣጊዲ ሃራሶራ ቢዳ።
7 ኢስራኤሌ ማንዳራቲ
ኣሲ ዶንታ ባዞ ጊዲዳ።
ታኒ ዲቦራይ ኢስራኤሌ ኣሳስ
ኣዮ ጊዳዳ ዴንዳና ጋካናስ
ጾኒዲ ኣቲዳይ ባዋ።
8 ኢስራኤሌ ኣሳይ ኣላጋ ጾሳታ
ዶሪዳ ዎዴ፥
ቢታን ኦላይ ዴንዲዴስ፤
ኦይዱ ታሙ ሺ ኢስራኤሌ ኦላንቻታ ጊዶን
ኢሲ ጎንዳሌይ ዎይኮ
ኢሲ ቶራይ ቤቲቤና።
9 ታ ዎዚናይ
ኢስራኤሌ ዳናታራ ዴስ፤
ኣሳ ጊዶን ዶሳን ባና
ኣꬂ ኢሚዳይታራ ዴስ።
ጎዳይ ጋላቴቶ!
10 «ኢንቴኖ ኮሬቲዳ
ቦꬃ ሃሬ ቶጊዛይቶ!
ኢንቴኖ ሎኦ ኣራታን ኡቲ
ኣሌቄቲዛይቶ!
ኢንቴኖ ቶሆን ሄሜቲዛይቶ!
11 ሃꬃ ፑልቶታ ሄራን
ዬጼቲዛ ዬꬃ ሲዪቴ፤
ኢስታ ጎዳይ ጾኒዳይሳ
ኣኬኪሴስ፤
ቃሴ ኢስራኤሌ ኣሳይ
ጾኒዳይሳ ናሼስ።
«ጎዳ ኣሳይካ
ካታማ ጌሊዛ ፔንጌታኮ
ዱጌ ዎꬊዴስ።
12 ‹ዲቦራ! ቤጋ! ቤጋ!
ቤጎታዳ ዬꬃ ዬጻ።
ኔኖ፥ ኣቢኖኣሜ ና
ባራቄ፥ ዴንዳ!
ኔ ዲኢዳይታ ኤካዳ
ሲንꬄ ጉጃ።›
13 «ሄሳፌ ጉዬ ኣቲዳ ኣሳቲ
ሃላቃታኮ ዱጌ ዎꬊዳ።
ጎዳ ኣሳቲ ኦሌታናስ ጊጊዲ
ባራቄኮ ዪዳ።
14 ካሴ ኣማሌቄ ዛሬቲ ዲዛሶን ዲዛ
ኤፍሬሜ ኣሳፔ
ኢሲ ኢሲ ኣሳቲ ዪዳ።
ቃሴ ሃራቲ ቢኒያሜ
ዜሬꬃታፔ
ኢስታ ካሊዳ።
ማኪሬ ዛሬታፔ ዳናቲ፥
ዛቢሎኔ ዛሬታፔ
ካዎቴꬃን ኡቲዛይቲ ዪዳ።
15 ዪሳኮሬ ዜሬꬃፌ ዳናቲ
ዲቦሪራ ዪዳ፤
ኤ፥ ዪሳኮሬይኔ
ባራቄይካ ዪዳ፤
ኢስቲካ ባራቄ ካሊዲ
ዱጌ ዙሌዛ ዎꬊዳ።
ጊዶ ኣቲን ኦሮቤሌ ዛሬቲ
ቆፋን ሻኬቲ ዎꬊዳ፤
ያናኮኔ
ዮንታኮ ሲꬊዳ።
16 ኔ ኣይስ ዶርሳ ዪሬ ጊዶን ኡታዲ?
ዶርስ ሄሚዛይታ
ዋይቄꬅ ሲያናስ ኡታዲ?
ኦሮቤሌ ዛሬቲ
ቆፋን ሻኬቲ ዎꬊዳ፤
ያናኮኔ ዮንታኮ ሲꬊዳ።
17 ጋላኣዴ ዛሬቲ
ዮርዳኖሴ ሻፋፔ
ሄ ፒንꬃን ኣቲዳ፤
ዳኔ ዛሬቲ ኣይስ ማርካቤ ጊዶን ጋምኢዶ?
ኣሴሬ ዛሬቲ ባ ዲዛሶን ኣቲዳ፤
ሜዲቴራኔ ኣባ ላንቄንካ ዴኢዳ።
18 ዛቢሎኔ ዛሬቲ
ባንታ ሼምፖ
ሃይቆስ ኣꬂ ኢሚዳ።
ኒፍታሌሜ ዛሬቲካ
ኢስታꬆካ
ኦላ ዴምባን ኦꬂዳ።
19 «ካዎቲ ዪዲ
ማጊዶ ፑልቶታ ማታን ዲዛ
ታኢናኬን ኦላ ኦይኬቲዳ።
ካናኔ ካዎቲካ ሄን ኦሌቲዳ፤
ዲኢ ኤካናስ
ኣይኮ ሚሺካ
ዴሚቤቴና።
20 ሳሎ ጾሊንቴቲ ኢዛራ ኦሌቲዳ።
ባንታ ሃኖታን ሲሳራራ
ኦላ ቃቃጱ ጊዳ።
21 ቤኒ ቂሶኔ ሻፋ ኪጻይ
ኢስታ ዴንꬂ ኤፊዴስ፤
ኢስቲካ ሃሮን ሜጬቲ ꬋይዳ፤
ታ ሼምፖዬ ሚና፤
ዎልቃንካ ሲንꬅ ጉጃ።
22 ሄሳፌ ጉዬ ቶጋ ኣሳቲ
ቶጋን ኣዳራሲ ዪዳ።
ቶጋ ፓራታ ጊሪሳይ
ዳዳ ጊሪሳ ማላ።
23 ጎዳ ኪታንቻይ፥
‹ሜሮዜ ቃንጊቴ!
ሄን ዲዛ ኣሳ ኢሲፌ ቃንጊቴ!
ጋሶይካ ኢስቲ ጎዳ ኣሳ
ኦላን ማዶንታ ኢጺዳ።
ዎልቃማ ኢስታ ሞርኬታራ
ኦሌታናስ ኬዚቤቴና› ጊዴስ።
24 «ቄናዌ ዴሬ ኣስ
ሄቤሬ ማቺያ
ያኤላ ማጫሳ ኡባፌ
ኣንጄቲዳሮ ጊዱ።
ዱንካኔ ጊዶን ዲዛ
ማጫሳ ኡባፌ
ኢዛ ኣንጄቲዳሮ ጊዱ።
25 ሲሳሪ ኢዞ፥
‹ታና ሃꬅ ኡሻ› ጊ ዎሲዴስ፤
ኢዛ ጊዲኮ
ሜቃ ማꬅ ሺሻዱስ፤
ሎኦ ዋንጫን ኢዛስ ኢማዱስ።
26 ኢሲ ኩሼን ዱንካና ꬊሽኬ፥
ኡሻቻ ኩሼን
ኦሳንቻታ ቆይጼ ኦይካዱስ፤
ሲሳራ ሁኤን ꬊሺካዱስ፤
ሃይꬃ ጮርጮሮራ
ሉካ ኬሳዱስ።
27 ቦልቁ ጊ ኩንዲዴስ፤
ኢዚ ቶሆ ጋርሳንካ ጉፋኒዴስ፤
ሄ ኩንዲዳ ሶሆን ሃይቂዴስ።
28 «ሲሳራ ኣዬያ
ማስኮቴራ ቤኣዱስ፤
ማስኮቴ ጾኤራካ
ቲሺ ሂስታ ጼላሼ፥
‹ታ ናዛ ፓራ-ጋሬይ
ኣይስ ጋምኢዴ?
ፓራ-ጋሬቲ ኤሶቲዲ
ኣይስ ሲሚቤቴኔ?›
ጋዳ ዋሳ ኦይቻዱስ።
29 ኣꬎ ኤራቴꬂ ዲዛ
ኢዚ ማጫሳቲ
ኢዚ ኦይሻ ዛሪዳ፤
ጊዶ ኣቲን ኢዛ ባ ቆፋን ባስ፥
30 ‹ኢስቲ ዲኢዲ ኤሂዳይሳ
ጊሼቲ ኤኪሺን
ኢሳዴ ኢሳዴ
ኢሲ ኢሲ ጌላኦይ ዎይኮ
ናምኡ ናምኡ
ጌላኦቲ ጋኬቴስ።
ሲሳራስ ኢስቲ ዱማ ዱማ
ቃላሜን ኦሴቲዳ
ኣሌቆ ማይኦ ኢማና፤
ቃሴ ታስካ ቆꬌን ጻጻናስ
ጺሊፌን ኣሌቂዲ ሎኢዛ
ማይኦታ ኤሃና› ጋዱስ።
31 «ኣቤት ጎዳዉ!
ኔ ሞርኬቲ ኡባይ
ሄሳꬆ ሃይቄቶ!
ጊዶ ኣቲን ኔ ሲቆቲ
ማላዶ ሞኪዛ
ኣርሼዳ ጶሌቶ።»
ሄሳፌ ጉዬ ቢታይ ኦይዱ ታሙ ላይꬅ ዎፓ ዴሚዴስ።