1 ኤፍሬሜን ቦላ ጌዜን ሚኪያሳ ጌቴቲዛ ኢሳዴይ ዴስ። 2 ኢሲ ጋላስ ሚኪያሲ ባ ኣዮ፥ «ኔፔ ኢሲ ኣሲ 1,100 ሳቂሌ ቢራ ካይሶቲዳ ዎዴ ኔኒ ሄ ካይሶቲዳ ቢታኔዛ ቃንጊሺን ታኒ ሲያዲስ። ቤያ! ሄ ሚሻይ ታ ኣቻን ዴስ፤ ታ ኤካዲስ» ጊዴስ። ኢዛ ኣዬያ፥ «ታ ናዞ ኔና ጾሲ ኣንጆ!» ጋዱስ።

3 ናዚ 1,100 ሳቂሌ ቢራ ባ ኣዬይስ ዛሪዴስ፤ ኢዛ ኣዬያ፥ «ታኒ ታ ናዛ ጊሻስ ጾሳስ ዱማሳና፤ ሄ ቢራራ ሚꬃፌ ኦሴቲዲ ቢራን ሜሼቲዳ ኤቃ ጾስ ሜꬌቶ፤ ታኒ ዛራዳ ኔስ ኢማና» ጋዱስ። 4 ናዚ ባ ኣዬይስ ሚሻ ዛሪን ኢዛ ኣዬያ ሄ ቢራፔ 200 ሳቂሌ ቢራ ኤካዳ ሚꬅ ማሲዲ ቢራን ቲዪ ቲይዲ ኤቃ ሚስሌ ሜꬊዛ ኢሲ ሂላዛስ ኢማዱስ፤ ሄ ኦሴቲዳ ኤቃ ጾሳ ሚስሌዚ ሚኪያሳ ሶን ኡቲዴስ።

5 ሚኪያሲካ ኤቃስ ጎይኒዛሶይ ዴስ፤ ኢዚ ኤፉዴኔ ቴራፊሜ *ቴራፊሜ፡ ቴራፊሜ ጊዛይሳ ኢሲ ኢሲ ጌሻ ማጻፋ ቢርሼꬃቲ ኤቃ ጾሳታ ጊ ቢርሼቴስ። ኦꬂዲ ባ ናይታፔ ኢሳ ቄሴ ጊዲ ኦꬃና ማላ ዶሪዴስ። 6 ሄ ዎዴ ኢስራኤሌ ቢታን ካዎይ ባይንዳ ጊሻስ ኣሲ ባና ሎኢዳ ማላ ሃኔስ። ዳና 21፡25

7 ሄ ዎዴ ዩሁዳ ቢታን ቤቴሊሄሜ ካታማን ዲዛ ሌዌ ባጋፌ ጊዲዳ ኢሲ ናቴꬃ ኣሲ ዴስ። 8 ኢዛዴይካ ባስ ዳናሶ ኮያናስ ቤቴሊሄሜ ካታማፔ ዴንዲ ቢዴስ፤ ኢዚካ ኤፍሬሜ ዴሬን ቦላ ዙንቡላን ዲዛ ሚኪያሳ ሶ ጋኪዴስ።

9 ሚኪያሲ ኢዛስ፥ «ኔ ኣዋፔ ያዲ?» ጊ ኦይቺዴስ። ኢዚካ ዛሪዲ፥ «ታኒ ዩሁዳ ዴሬን ዲዛ ቤቴሊሄሜ ካታማፔ ያዲስ፤ ታ ቆሞይ ሌዌ። ሃኢ ታኒ ታስ ዱሳሶ ኮያይስ» ጊዴስ።

10 ሚኪያሲ ኢዛስ፥ «ታናራ ዴኣ፤ ታና ዞሪዛዴኔ ቄሴ ጊዳ። ታኒ ኔስ ላይꬃን ላይꬃን 10 ሳቂሌ ቢራ፥ ኩሜꬃ ማይኦኔ ሚዛ ካꬅ ኢማና» ጊዴስ። 11 ሄ ሌዌ ናቴꬃዚ ሚኪያሳራ ኢሲፌ ዴኣናስ ቆፋ ቃቺዴስ፤ ኢዚካ ሚኪያሳስ ዬሎ ማላ ሃኒዴስ። 12 ሚኪያሲ ኢዛ ባ ቄሴ ሂስቲዲ ሱንꬂን ኢዛ ሶን ዴኢዴስ። 13 ሚኪያሲካ፥ «ታ ሌዌ ቆሞፌ ቄሴ ዴሚዳ ጊሻስ ታስ ኡባ ሚሽ ጾሲ ሎኤꬃናይሳ ሃኢ ታ ኤራዲስ» ጊዴስ።