1 ኢስራኤሌ ቢታን ካሴ ካዎይ ካዎቶንታ ዎዴ ኤፍሬሜን ዙምቡላ ቦላ ሃሆን ሌዌ ቆሞታፔ ኢሳዴይ ዴስ። ሄ ኣዴዚ ዩሁዳ ቢታን ቤቴሊሄሜ ካታማፔ ባ ላጌꬂዛ ኢሲ ማጫሳዮ ኤኪ ዪዴስ። 2 ጊዶ ኣቲን ኢዛ ኢዛራ ኦዬታዳ *ኦዬታዳ ጊዛይሳ ኢብራዌታ ማጻፋን ላይማታዳ ጌስ። ዩሁዳ ቢታን ቤቴሊሄሜ ካታማን ዲዛ ባ ኣዋ ሶ ባዳ ሄን ኦይዱ ኣጊና ኡታዱስ። 3 ኢዚ ላጌꬆዚ ኢዞ ዮቲ ኣማንꬂዲ ዛሪ ኤኪ ያናስ ቆፋ ቃቺዴስ፤ ቢሼ ባ ኣይሌኔ ናምኡ ሃሬታ ኤኪዲ ቢዴስ፤ ኢዛ ሞካ ኤካዳ ባ ኣዋ ሶ ጌልꬃዱስ፤ ኢዚ ኣዋይ ኢዛ ቤኢዲ ኡፋይሳን ሞኪ ኤኪዴስ። 4 ናዪ ኣዋይ ኢዚ ሄን ታካና ማላ ዎሲን ኣዴዚ ሚሼኔ ኡዪሼ 3 ጋላስ ሄን ታኪዴስ። 5 ኦይዳንꬆ ጋላስ ማላዶ ዎንታራ ዴንዲ ባናስ ጊጌቲዳ፤ ጊዶ ኣቲን ናይ ኣዋይ ባ ናይ ላጌꬆዛስ፥ «ኔ ዳቡሮንታ ማላ ኣይኮ ዶናን ጌልꬃዳ ባ» ጊዴስ።

6 ሄሳ ጊሻስ ናምኡ ኣሳቲካ ኡቲዲ ኢሲፌ ሚዳኔ ኡዪዳ። ሄሳፌ ጉዬ ናይ ኣዋይ ኢዛ፥ «ሃያና፥ ሃች ኡፋዬታሼ ሃይሳን ታናራ ኣቃ» ጊዴስ። 7 ናይ ላጌꬆዚ ባናስ ዴንዲን ናይ ኣዋይ ኢዚ ቦንታ ኣቃና ማላ ዎሲን ሄን ኣቂዴስ። 8 ኢቻሻንꬆ ጋላስ ባናስ ማላዶ ዎንታራ ዴንዲን ናይ ኣዋይ ቃሴካ፥ «ኔ ዳቡሮንታ ማላ ኣይኮ ዶናን ጌልꬃዳ ባ» ጊዴስ፤ ሂስቲን ኢስቲ ናምኣይካ ካꬅ ኢሲፌ ሚዳ።

9 ኣዴዚ ባ ላጌꬆይራኔ ባ ኣይሌራ ባና ኬዚን ናይ ኣዋይ፥ «ሃኢ ሳኣይ ቃሚዳ ጊሻስ ሃይሳን ኡፋዬቲሼ ኣቂዲ ዎንቶ ማላዶራ ዴንዲዲ ኢንቴ ሶ ቢቴ» ጊዴስ። 10 ጊዶ ኣቲን ኢዚ ሄ ጋላስ ሄን ኣቃናስ ኮዮንታ ጊሻስ፥ ዴንዲዲ ጫናራ ዲዛ ናምኡ ሃሬታ፥ ባ ላጌꬆዮኔ ባ ኣይሌዛ ኤኪዲ ዬሩሳላሜ ጌቴቲዳ ያቡሴ ጋኪዴስ።

11 ኢስቲ ያቡሴ ማቲሺን ሳኣይ ኬሂ ቃሚዳ ጊሻስ ኣይሌዚ ባ ጎዳስ፥ «ያቡሴን ጌሊ ኣቂዲ ኣይስ ዎንቲን ቦኮኒ?» ጊዴስ።

12 ጎዳዚ ኢዛስ ዛሪዲ፥ «ኣካይ! ሃይሳ ኢስራኤሌ ዴሬ ካታማ ጊዶንታ ኣሳ ዴሬ ካታማን ኣቆኮ፤ ጌዴ ጊቢኣ ጋካናስ ካንꬂ ቡስ ባና» ጊዴስ። 13 ቃሴ ዛሬꬂዲ ባ ኣይሌዛስ፥ «ሃ ያ፥ ኑኒ ጊቢኣ ካታማን ዎይኮ ኤራማ ካታማን ኣቂዛሶ ዴሚዲ ሄን ኣቃና» ጊዴስ። 14 ሂስቲዲ ሲንꬅ ቡስ ጉጂዳ፤ ኢስቲ ቢዲ ቢኒያሜ ቢታን ዲዛ ጊቢኣ ካታማ ማቲሺን ኣርሼይ ዉሊዴስ። 15 ኢስቲ ጊቢኣ ካታማ ጌሊዲ ዱቡሺዛ ዴምባን ኡቲዳ፤ ጊዶ ኣቲን ሄፔ ኢስታ ባሶ ኤፊዲ ኣይሲዛ ኣሲ ቤቲቤና።

16 ሄ ጋላሳ ኦማርስ ኤፍሬሜ ዴሬ ሻራ ሜንꬆ ቦላፌ ዪዲ ጊቢኣን ዲዛ ኢሲ ጪማ ኣዴዚ ባ ጋዴን ኦꬂ ፔኢዲ ሶ ሲሚ ዪሼ ኢስቲ ዲዛሶ ጋኪዴስ፤ ሄ ዎዴ ሄ ዴሬን ዲዛ ኣሳይ ቢኒያሜ ዛሬታ፤ 17 ጪማ ኣዴዚካ ሄ ካታማን ዲዛ ዴምባን ኡቲዳ ኣዴዛ ቤኢዲ፥ «ኔ ኣዋፔ ዪዳ ኣሴ? ኣዋ ባይ?» ጊዲ ኦይቺዴስ።

18 ኢማꬃዚ ዛሪዲ፥ «ኑኒ ዩሁዳ ቢታን ዲዛ ቤቴሊሄሜ ካታማፔ ዪዶስ። ሃኢ ኤፍሬሜ ዴሬን ዙምቡላ ቦላ ሃሆን ዲዛ ኑሶኔ ጾሳ ኬꬅ ቤꬃ ቦላ ዲሺን ጋዴይ ቃሚን ሃይሳን ኡቲዶስ፤ ጊዶ ኣቲን ሃኖ ጋካናስ ኑና ባሶ ኤፊ ኣይሳና ኣስ ዴሚቤኮ። 19 ኑ ሃሬታስ ኡቱላይኔ ሃርቆይ ዴስ፤ ታስ፥ ታናራ ዲዛይታስ ማና ሺንቄይኔ ኡዪዛ ኡሺ ዲዛ ጊሻስ ሃራ ኣይኮካ ኮሼና» ጊዴስ። 20 ጪማ ኣዴዚ፥ «ሃ ዪቴ ታሶን ኣቂቴ! ኢንቴ ኮይዛይሳ ኡባ ታኒ ኢንቴስ ኢማና፤ ዱቡሻ ዴምባን ኣቆፒቴ» ጊዴስ። 21 ሄሳ ጊሻስ ኢስታ ባ ሶ ኤፊዲ ኢስታ ሃሬታስካ ሃርቆ ዬጊዴስ። ሄሳፌ ጉዬ ኢማꬃቲ ባንታ ቶሆዛ ሜጬቲዲ ካዎ ሚዳ ኡሺካ ኡዪዳ።

22 ኢስቲ ኡፋዬቲሺን ካታማፔ ዎርባላ ኣሳቲ ዪዲ ኬꬃ ዩሾን ዩዪ ኣꬊዲ፥ «ካሬ ዶያ» ጊዲ ፔንጌ ቆጼꬅ ዶሚዳ፤ ኢስቲ ሄ ኬꬃ ጎዳ፥ «ሃኢ ኔሶ ጌሊዳ ኣዴዛ ሃ ኬሳ፤ ኑኒ ኢዛራ ዚንኣናስ ኮዮስ!» ጊዳ።

23 ኬꬃ ጎዳይ ካሬ ኬዚዲ ኢስታስ፥ «ሃኢ ታ ኢሻቶ! ሄሳ ማላ ፓላ ሚሽ ኦꬆፍቴ፤ ሃይሲ ኣዴዚ ታ ኢማꬃ። 24 ቤኢቴ! ታስ ጌላኦ ናያኔ ኢዛ ላጌꬆያ ሃይሳን ዴቴስ። ታኒ ኢስታ ኢንቴስ ካሬ ኬሳና፤ ሄ ዎዴ ኢስታ ኢንቴ ኮዪዳይሳ ኦꬂቴ፤ ጊዶ ኣቲን ሃ ኣዴዛ ቦላ ሄሳ ማላ ሃራሲዛ ኦሶ ኦꬆፍቴ» ጊዴስ። ሜꬌ 19፡5-8 25 ጊዶ ኣቲን ኣሳቲ ኢዚ ጊዛይሳ ሲዮንታ ኢጺዳ። ሄሳ ጊሻስ ሌዌ ዛሬዚ ባ ላጌꬆዮ ኢስታስ ካሬ ኬሲ ዬዲዴስ፤ ሳኣይ ዎንታና ጋካናስ ላሜቲ ላሜቲ ኢዚራ ዚንኢዲ ሳኣይ ዎንታና ጊሺን ዬዲዳ። 26 ኢዛካ ዎንታናስ ባዞይ ዞኢሺን ያዳ ኢዚ ጎዳይ ኣቂዳ ጪማ ኣዴዛ ኬꬃ ፔንጌን ኩንዳዱስ፤ ጻልቄይ ኬዛና ጋካናስ ሄሳን ፖርጩ ጋ ኢቻዱስ። 27 ሄ ጋላስ ማላዶ ኢዚ ጎዳዚ ዴንዲዲ ባ ኦጌ ባናስ ኬꬃ ፔንጌ ዶይዲ ኬዚሺን ኢዛ ላጌꬆያ ኬꬃ ፔንጌን ባ ኩሼ ሚጫዳ ኢቺዳሮ ቤኢዴስ። 28 ኢዚ ኢዞ፥ «ዴንዳ ኣኔ ቦስ!» ጊዴስ፤ ጊዶ ኣቲን ኢዛ ኢዛስ ኣይኮካ ዛራቤኩ፤ ሄሳፌ ጉዬ ኢዚ ኣሃ ሃሬዛ ቦላ ጫኒ ኤኪዲ ባሶ ቢዴስ። 29 ሶ ጋኪዳ ማላ ማሻ ኤኪዲ ባ ላጌꬆይ ኣሃ 12 ኬሲ ቃንጼሬꬂዴስ፤ ኩሜꬃ ኢስራኤሌ ዴራ ጋካና ማላ ኢሲ ኢሲ ቃንጾ 12 ኢስራኤሌ ቆሞታስ ዬዲዴስ። 1ሳሜ 11፡7 30 ሄሳ ቤኢዳ ኡባይ፥ «ኢስራኤሌ ኣሳይ ጊብጼ ቢታፌ ኬዞሶፌ ሃች ጋካናስ ሃይሳ ማላ ሚሺ ሃኒቤና፤ ኑኒካ ቤዪቤኮ፤ ኣኔ ሃይሳ ኢሲፌ ኣኬኪ ዞሬቲዲ ኢሲ ሚሽ ኦꬆስ» ጊዳ።