ኤርማሳ ቲንቢቴ
ጊዶ ቆፋ
ቲንቢቴ ዮቲዛ ኤርማሲ ኪርስቶሲ ዬሌታናፔ ካሴ ላፑን ጼቱ ላይꬃ ዉርሴꬃኒኔ ኡሱፑን ጼቱ ላይꬂ ዶሜቲዛ ዎዴ ዴኢዴስ። ኤርማሲ ዳሮ ዎዴ ኦꬂዳ ባ ኦሶን ኢስታ ኤቃ ጾሳ ጎይኖኒኔ ኢስታ ናጋራ ኦሶ ጋሶን ጾሳ ኣሳ ቦላ ጊታ ባሺ ጋካናይሳ ሚንꬂዲ ኤሪሲዴስ፤ ኢዚ ዮቲዳ ቲንቢቴታፔ ባጋይ ፖሌቲዛ ዎዴ ፓጻ ዲዲ ባ ኣይፌን ቤኢዴስ። ባቢሎኔ ካዎ ናቡካዳናጾሬይ ዬሩሳላሜ ኦይኪዲ ካታማዮኔ ጾሳ ኬꬃ ላሎይሳ፥ ዩሁዳ ካዎይኔ ኣሳፔካ ዳሪዛ ባጋይ ዲኤቲዲ ባቢሎኔ ቢዳይሳ ቤኢዴስ። ጉጂዲካ ኤርማሲ ኣሳይ ዲኦፔ ሲማናይሳኔ ኢስራኤሌ ካዎቴꬂ ሲሚ ኤቃናይሳ ካሴቲዲ ዮቲዴስ።
ኤርማሳ ማጻፋ ኦይዱ ኬሲዲ ቤኣናስ ዳንዳዬቴስ። 1። ኢዮሲያሳ፥ ኢዮኣቄሜ፥ ኢዮኣኪኔኔ ሴዴቂያሳ ካዎቴꬃ ላይꬃታን ዩሁዳ ኣሳሲኔ ኢስታ ካሌꬂዛይታስ ጾሳፌ ዪዳ ቃላ። 2። ዱማ ዱማ ቲንቢቴታ፥ ኤርማሳ ዴኦን ፖሌቲዳ ኣይፌ ዮኦታኔ ኤርማሳ ጻፌ ባሮኬይ ጻፊ ዎꬂዳ ዮኦታ። 3። ዱማ ዱማ ኣላጋ ቢታ ኣሳስ ጾሳፌ ዮቴቲዳ ቲንቢቴ ቃላ። 4። ዬሩሳላሜ ኦይኬቴꬂኔ ኣሳይ ዲኤቲዲ ባቢሎኔ ባናይሳ ዮቲዛ ጉጆ ታሪኬታ።
ኤርማሲ ባ ኣሳ ኬሂ ዎዚናፔ ሲቂዛዴኔ ኢስታ ቦላ ባሻ ፒርዳ ቲንቢቴ ኣꬃናስ ኬሂፔ ዳሮ ኢጺዛ ኣሳ። ናቤቴꬃን ኢዚ ኦꬃና ማላ ጾሲ ኢዛ ጼይጊዳ ጊሻስ ባና ጋኪዳ ሜቶ ጋሶን ኢዚ ጬጪዳ ሚኖ ጬጬይ ኢዛ ማጻፋ ጊዶን ዳሮ ሶሆን ጻፌቲ ኡቲዴስ። ጾሳ ቃላይ ኢዛ ዎዚና ጊዶን ታማ ማላ ጹጊዛ ጊሻስ ካሚዲ ዲጋናስ ዳንዳዮንታይሳ ቆንጪሲዴስ።
ሃ ማጻፋን ዲዛ ጊታ ቲንቢቴ ቃላታፔ ኢሶቲ ኢሶቲ ሜቶይ ኩሚዳ ኤርማሳ ላይꬃፌ ካንꬂዲ ጾሲ ኢስታስ ኢሚዛ ኦራꬃ ጫቆ ቃላይ ፖሌታና ዎዴዛ ቤሲዛይታ፤ ሄ ኦራꬃ ጫቆ ቃላይ ኣሳ ዎዚናን ጻፌቲዛ ጊሻስ ኢስታ ኣኬኪሲዛ ኣስታማሬ ኮሾንታ ኢስታ ናጋና። (31፡31-34)።
ሃ ማጻፋይ ኦይኪዳ ኩሜꬃ ቆፋ
ጾሳን ኤርማሳ ዶሬቴꬅ 1፡1-19
ዩሁዳ ቦላኔ ኢስራኤሌ ቦላ ጾሲ ኤሃና ቂጻቴ 2፡1—25፡38
ዎርዶ ናቤታራ ኤርማሳ ኤቄቴꬅ 26—29
ጾሲ ባ ዴራ ዲኤቲዳሶፔ ዛራናይሳ 30—33
ዱማ ዱማ ኤርማሳ ኦሶታ 34—38
ዬሩሳላሜ ኩንዴꬂኔ ዩሁዳን ሜꬌቲዳ ሃኖታ 39—42
ጊብጼ ቢታን ኤርማሳ 43—44
ባሮኬስ ኪቴቲዳ ኪታ 45
ናቤዚ ዱማ ዱማ ዴሬታስ ዮቲዳ ቲንቢቴ 46—51
ዬሩሳላሜ ኩንዴꬃ ጊሻስ ዮቴቲዳ ዮኦታ 52
1
1 ቢኒያሜ ቢታን ኣናቶቴ ካታማን ዲዛ ቄሴታፔ ኢሳ ኪልቂያሳ ና ኤርማሲ ዮቲዳ ቃላይ ሃይሳፌ ካሊዛይሳ። 2 ኣሞኔ ና ዩሁዳ ካዎ ኢዮሲያሲ ካዎቲዳ ታማኔ ሄꬓንꬆ ላይꬃን ጎዳ ቃላይ ኤርማሳኮ ዪዴስ። 2ካዎ 22፡3—23፡27፤ 2ታሪ 34፡8—35፡19 3 ቃሴ ኢዮሲያሳ ና ዩሁዳ ካዎ ኢዮኣቄሜይ ካዎቲዳ ላይꬃታን ጎዳ ቃላይ ኤርማሳኮ ዪዴስ። ሄሳፌ ጉዬ ኢዮሲያሳ ና ሴዴቂያሲ ካዎቲን ታማኔ ኢሲንꬃ ላይꬃን ሄ ዎዴ ኢቻሻንꬃ ኣጊናን ዬሩሳላሜ ኣሳይ ዲኤቲዲ ባና ጋካናስ ጎዳ ቃላይ ኤርማሳ ባጋራ ኢዛስ ዮቴቲዴስ። 2ካዎ 23፡36—24፡7፤ 24፡18—25፡21፤ 2ታሪ 36፡5-8፤ 11፡21
ኤርማሳ ዶሬቴꬅ
4 ጎዳ ቃላይ ታኮ ሂዝጊሼ ዪዴስ።
5 «ኤርማሳ! ታኒ ኔና
ኔ ኣዬይ ኡሎን ሜꬋናፔ
ካሴ ኤራይስ።
ኔኒ ዬሌታናፔ ሲንꬃን
ታ ኔና ዱማሳ ዎꬃዲስ።
ቃሴካ ካዎቴꬃታስ ናቤ
ጊዳና ማላ ሹማዲስ።»
6 ሂስቲን ታኒ፥ «ኡባ ሃሪዛ ጎዳዉ! ታኒ ቡሮ ና ጊዲዳ ጊሻስ ኣይ ጋ ሃሳያናኮ ታ ኤሪኬ» ጋዲስ።
7 ጊዶ ኣቲን ጎዳይ ታና፥ « ‹ታኒ ና› ጎፓ። ታኒ ኔና ኪቲዛ ኣሳ ኡባኮ ባ። ታኒ ኣዛዚይሳ ኡባካ ዮታ። 8 ታኒ ኔና ኣሻናስ ኔናራ ዲዛ ጊሻስ ኔ ኢስታስ ያዮፋ፤ ታኒ ጎዳይ ሃይሳ ኔስ ዮታይስ» ጊዴስ።
9 ጎዳይ ባ ኩሼ ዬዲዲ ታ ሜቴርሻታ ቦቺዲ፥ «ሄኮ ኔ ዮታና ታ ቃላ ኔ ዶናን ዎꬃዲስ። 10 ኔኒ ሾዳናሲኔ ላላናስ፥ ꬋይሳናሲኔ ሺራ ዬጋናስ፥ ኬጻናሲኔ ቶካናስ ዴሬታ ቦላኔ ካዎቴꬃታ ቦላ ታኒ ሃች ኔና ሹማዲስ» ጊዴስ።
11 ጎዳ ቃላይ ታኮ ዪዲ፥ «ኤርማሳ! ኔ ኣይ ቤኣይ?» ጊ ኦይቺዴስ። ታኒካ፥ «ኦቾሎኔ ሃጋ ቤኣይስ» ጋዲስ።
12 ጎዳይ ታና፥ «ኔኒ ሊኬ ቤኣዳሳ። ታኒካ ታ ቃላይ ፖሌታናይሳ ቲሺ ሂስታ ቤኣይስ» ጊዴስ።
13 ጎዳ ቃላይ ቃሴካ ታኮ ዪዲ፥ «ሃራይ ኣዚ ኔስ ቤቲዜ?» ጊ ኦይቺዴስ። ታኒካ ዛራዳ፥ «ኢሲ ፔንቲዛ ኦቶይ ፑዴሃ ባጋፌ ሃ ጌዲ ጊ ኡቲዳይሲ ቤቴስ» ጋዲስ።
14 ጎዳይ ታስ፥ «ፑዴሃ ባጋፌ ባሺ ꬉቂዲ ሃ ቢታን ዲዛ ኣሳ ኡባ ቦላ ጉካና። 15 ታኒ ፑዴሃ ባጋን ዲዛ ካዎቴꬃታ ሃ ያና ማላ ጼይጋና፤ ዬሩሳላሜኒኔ ኢዚ ዩሾን ዲዛ ዩሁዳ ካታማታ ቦላ ሜቶ ጋꬂዲ ኢስታ ኦይካና፤ ሄሳፌ ጉዬ ዬሩሳላሜ ጌሊዛ ፔንጌታ ቦላ ባንታ ኣራታ ሚጫና።
16 «ዩሁዳ ኣሳይ ታና ኣጊዲ፥
ሃራ ኤቃ ጾሳታስ
ኤጻኔ ጩዋሲዳ ጊሻስ፥
ባ ኩሼን ኦꬂ ኬሲዳይታ
ጎይኒዳ ጊሻስ
ታ ዴራ ቦላ ፒርዳ ኣዋጃዲስ።
17 «ኔኒ ጊዲኮ ጊጌታ! ዴንዳ ኤቃዳ ታኒ ኔና ኣዛዚዛይሳ ኡባ ኢስታስ ዮታ፤ ኢስታስ ያዮፋ። ኔኒ ኢስታስ ያዪኮ ታኒ ኔና ኢስታ ሲንꬃን ጉጃ ያሺሳና።
18 «ሃች ታኒ ኔና ሃ ቢታ ኡባ ቦላ፥ ዩሁዳ ካዎታ ቦላ፥ ሃላቃታ ቦላ፥ ቄሴታ ቦላኔ ሃ ቢታ ኣሳ ቦላ ኔ ኤቄታ ዳንዳያና ማላ ጊምቤቲዳ ካታማ፥ ቢራታ ቱሲኔ ጻርቂማላፔ ኦሴቲዳ ቢራታ ዲርሳ ማላ ኦꬃዲስ። 19 ኢስቲ ኔናራ ኦሌታና፤ ጊዶ ኣቲን ታኒ ኣሻናስ ኔናራ ኢሲፌ ዲዛ ጊሻስ ኔና ጾኔቴና። ታኒ ጎዳይ ሃይሳ ኔስ ዮታይስ» ጊዴስ።