8
1 ኡባፌ ዎልቃማ ጎዳይ፥ «ሄ ዎዴን ዩሁዳ ካዎታ ሜቄꬂ፥ ሹሜታ ሜቄꬂ፥ ቄሴታ ሜቄꬂ፥ ናቤታ ሜቄꬂኔ ዬሩሳላሜን ዲዛ ኣሳታ ሜቄꬂ ኡባይ ዱፎፔ ማጼቲዲ ኬዛና። 2 ሂስቲዲ ኢስቲ ሲቂዳ፥ ኪቴቲዳ፥ ካሊዳ፥ ዞሬ ኦይቺዳኔ ጎይኒዳ ኣርሼ ሲንꬃን፥ ኣጊና ሲንꬃኒኔ ሳሎ ጾሊንቴታ ኡባ ሲንꬃን ሚጬታና። ኢስታ ሜቄꬃይ ሺቄና ዎይኮ ሞጌቴና፤ ጊዶ ኣቲን ቢታ ቦላ ኦሌቲዳ ቡራ ማላ ጊዳና። 3 ሃ ኢታ ኣሳ ኩሼፔ ኣቲዳይቲ ኡባይ ታ ኢስታ ጎዳ ዬዲዳሶ ኡባን ዴኦፔ ሃይቆ ዶራና» ጌስ።
ናጋራ ጋሶን ጋኪዛ ቂጻቴ
4 ጎዳይ ታና፥ «ኣሳስ፥ ‹ኣሲ ኩንዲኮ ኩንዲዳሶሆፔ ሲሚዲ ዴንዴኔ?
ዎይኮ ኣሲ ባሊዳ ጊዲኮ
ጉዬፔ ባ ባላፔ ሲሜኔ?
5 ሂስቲን ሃይሲ ዴሬዚ
ኣይስ ጉዬ ሲሚ ቢዜ?
ዬሩሳላሜይ ኣይስ ኡባቶ
ጉዬ ሲማዜ?
ኢስቲ ጌኔ ኦሶ ሚንꬂ ኦይኪዳ፤
ሲማናስካ ኮዬቴና።
6 ታኒ ኢስታ ሎኤꬃ ኤዝጋዲስ፤
ኢስቲ ሱሬ ሃሳዬቴና፤
ታ ኣይ ኦꬃዲና?› ጌስ።
ጊዶ ኣቲን ባ ኢታ ኦሶ
ፓጺዛይ ኢሶይካ ዴና፤
ኦላስ ዲርጊዛ ፓራ ማላ
ኡባይካ ባስ ባስ ዎጼስ።
7 ሺሜላ ጌቴቲዛ ካፎቲ
ባንቲ ሲሚዛ ዎዴ ኤሬቴስ፤
ሃራጴቲ፥ ዳጊጬቲኔ
ዋላ ጌቴቲዛ ካፎቲ
ባ ዴንዲ ቢዛ ዎዴ ኤሬቴስ፤
ጊዶ ኣቲን ታ ዴሬይ
ጎዳ ዎጋ ኤሪቤና። *ዳጊጬይ ካፎ ቆሞ ጊዲዳይሳ ቆንጪሴስ።
8 ዎርዳንቻ ጻፌቲ ባንታ ቢኢሬን
ታ ዎጋ ዎርዶራ ጻፊዳ፤
ሂስቲን ዋኒዲ፥
‹ኑኒ ኣꬎ ኤራንቻ፤
ጎዳ ዎጋይ
ኑናራ ዴስ› ጌቲ?
9 ኣꬎ ኤራንቻቲ ዬላታና፤
ኢስቲ ካዉያናኔ
ዎጺማዴን ኦይኬታና።
ጎዳ ቃላራ
ኢስቲ ኤቄቲቺን
ኢስታስ ኣዛ ኤራቴꬂ ዲዜ?
10 ሄሳ ጊሻስ ታኒ ኢስታ ማቼታ
ሃራ ኣዚናታስ፥
ኢስታ ቢታታካ
ኣላጋታስ ኢማና፤
ጉꬃይካ ጊታይካ ኡባይ
ባንታ ጎኣስ ዪቄቴቴስ።
ናቤቲኔ ቄሴቲካ ኡባይ
ኣስ ባሌꬄቴስ።
11 ኢስቲ ታ ዴሬዛ ማዱንꬃ
ቄሪ ሚሻን ቆዲዲ
ማዶንታ ꬋሌ ኢሜቴስ፤
ሳሮይ ባይንዳ፥
‹ሳሮ፥ ሳሮ› ጌቴስ። ሂዚ 13፡10
12 ቱና ኦሶ ኦꬂዲ ዬላቲዶ?
ቺ! ሙሌካ ዬላቲቤቴና።
ኢስቲ ዬላይ ኣዛኮካ ኤሬቴና።
ሄሳ ጊሻስ
ኢስቲካ ኩንዲዳይታራ
ኢሲፌ ኩንዳና፤
ታ ኢስታ ቃጻዪዛ ዎዴ
ኢስቲ ካዉያና» ጌስ። ኤር 6፡12-15
13 ጎዳይ፥ «ኢስቲ ጎዪ ኬሲዳ
ካꬅ ኡባ
ታ ኢስታፌ ኤካይቻና፤
ኢስታ ዎይኔ ቱራን
ኣይፌይ ꬋያና፤
ባላሴ ሚꬂካ ኣይፌ ኢሜና፤
ኢስታ ቦንጮቲካ ቆካና፤
ታኒ ኢስታስ ኢሚዳይሲ
ኢስታፌ ኤኬቲቻና» ጌስ።
14 ሂስቲን ኣሳቲ፥
«ኑኒ ሃይሳን ኣይስ ኡቲኖ?
ኣኔ ኢሲ ቦላ ሺቂቴ፤
ጊምቤቲ ኡቲዳ ካታማታን
ባቃቲ ቢዲ ሄን ሃይቆስ፤
ጎዳ ኑ ጾሳይ ኑና
ሃይቃና ማላ ፒርዲዴስ፤
ኑኒ ኢዛ ቦላ
ናጋራ ኦꬂዳ ጊሻስ
ኑ ኡያና ማላ ማርዜራ ዲዛ
ሃꬅ ኢሚዴስ።
15 ‹ሳሮይ ያና› ጊዲ
ሂዶታ ኦꬂዶስ፤
ጊዶ ኣቲን
ሎኦ ሚሺ ዪቤና።
‹ኑኒ ፓጻና› ጊዲ ኣሞቲዶስ፤
ጊዶ ኣቲን ዳጋማ ጻላ ጊዲዴስ።
16 ሞርኬታ ፓራ ፔኖይ
ዳኔ ካታማፔ ሲዬቴስ፤
ኢስታ ዎዳላ ፓራታ ጫሻን
ቢታይ ኡባይ ቃጼስ፤
ቢታዮኔ ቢታይ ቦላ
ዲዛ ኡባ፥
ካታማዮኔ ኢዚን ዲዛ ኡባ
ሚታናስ ዪዳ» ጌቴስ።
17 ጎዳይ፥ «ቤኢቴ፥
ታኒ ማርዜራ ዲዛ ሾሻታ፥
ሙሬኒዛይታ ሂላቴꬂ
ቴቃናስ ዳንዳዮንታ
ሃሶ ሾሻታ
ኢንቴ ጊዶ ዬዳና፤
ኢስቲ ኢንቴና ዱካና» ጌስ።
ኤርማሲ ዴራስ ጬጪዳ ጬጬ
18 ታ ጬጪዛ ዎዴ
ታና ሚንꬄꬂዛይሶ!
ታ ዎዚናይ ኬሂ ሜቂዴስ።
19 ታ ኣሳይ ሃሆ ቢታን ዲሼ
ዋሲዛ ዋሶ ሲያ።
ኢስቲ፥ «ጎዳይ ጺዮኔን ዴኔ?
ኢዚ ካዎይካ ሄን ዴኔ?»
ጊዲ ዋሴቴስ።
ሂስቲን ጎዳይ ኢዛስ፥
«ኢስቲ ባስ ማሲዳ ሚስሌታን፥
ሃዳ ጊዲዳ ኤቃ ጾሳታን
ታና ኣይስ ሃንቄꬂዶ?» ጌስ።
20 ሂስቲን ኣሳይ፥
«ሄኮ ካꬃ ሺሾ
ዎዴይ ኣꬊዴስ፤
ቦኔይካ ዉሪዴስ፤
ኑኒካ ኣቲቤኮ»
ጊዲ ዋሴቴስ።
21 ታ ዴሬይ ማዱንጺሺን
ታኒካ ማዱንጻዲስ፤
ዬካዲሲኔ ዳጋማዲስ።
22 ጋላኣዴን ቲዪዛ ꬋሌይ ዴኔ?
ዎይኮ ሄን ኣኪሜይ ዴኔ?
ሂስቲን ታ ዴራ ማዱንꬂ
ኣይስ ፓጺቤኔ?