10
ጾሴኔ ኤቃ ጾሳታ
1 ኢንቴኖ ኢስራኤሌ ኣሳቶ!
ጎዳይ ኢንቴስ ዮቲዛ ቃላ ሲዪቴ!
2 ጎዳይ፥ «ካዎቴꬃታ ኦጌ
ኢንቴ ታማሮፒቴ።
ኢስቲ ሳሎ ቦላ
ማላታ ቤኢዲ ሺሮቲኮካ፥
ኢንቴ ሺሮቶፒቴ።
3 ጋሶይካ ዴሬታ ዎጋይ ሃዳ።
ኢስቲ ሚꬅ ዎራፔ ቃንጼቴስ፤
ሂላይ ማሲ ጊጊሴስ።
4 ኢስቲ ቢራኒኔ
ዎርቃን ኣሌቂሴቴስ፤
ቃጾንታ ማላ ናሪቃራ
ሚሲማሬን ꬊሺኪዲ
ኦይꬄቴስ።
5 ኢስታ ኤቃ ጾሳቲ
ኢስታ ካꬃ ጊዶን
ዶኣ ዳጋንꬃናስ
ኤሲዛ ሚስሌ ማላ።
ሃሳያናስ ዳንዳዬቴና።
ሄሜታናስ
ኢስቲ ዳንዳዮንታ ጊሻስ
ኣሳይ ኢስታ ቶኬስ።
ኢስቲ ኢታ ጊዲን
ዎይኮ ሎኦ ሚሽ
ኢንቴ ቦላ ኦꬃናስ
ዳንዳዮንታ ጊሻስ
ኢስታስ ሙሌካ ያዮፍቴ» ጌስ።
6 ኣቤት ጎዳዉ!
ኔ ማላይ ኦኒካ ዴና።
ኔኒ ጊታ፤
ኔ ሱንꬃይካ ጊታኔ ዎልቃማ።
7 ኣቤት ካዎቴꬃታስ ካዎ!
ኔስ ያዮንታይ ኦኔ?
ኔስ ቦንቾይ ቤሴስ፤
ጋሶይካ ኣꬎ ኤራንቻታ
ጋርሳኒኔ
ኢስታ ካዎቴꬃታ ኡባ ጋርሳን
ኔ ማላይ ዴና። ኣጁ 15፡4
8 ሃዳ ጊዲዳ ሚꬃፌ ማሴቲዳ
ኤቃ ጾሳታፔ
ቲሚርቴ ታማርዛ ኡባይ
ኤያኔ ዳማ።
9 ሄ ኤቃ ጾሳቲ ታርሴሴፔ
ዪዳ ቢራኒኔ
ኡፋዜፔ ዪዳ
ዎርቃን ኣሌቄቲዳ።
ኢስቲ ዎይኔ ኡሻኒኔ
ኦቻ ቴራ ሚሳቲዛ
ሜꬋራ ዲዛ
ማይኦን ካሜቲዳ።
ኢስቲ ኡባይ ኩሼ ኦሶ
ሂላታን ኦሴቲዳ።
10 ጊዶ ኣቲን ጎዳይ ቱሙ ጾሳ፤
ኢዚ ዴኦ ጾሳኔ ሜርና ካዎ።
ኢዚ ሃንቄቲዛ ዎዴ
ቢታይ ቃጼስ፤
ካዎቴꬃቲካ
ኢዛ ዪሎ ዳንዳዬቴና።
11 ጎዳይ፥ «ኢንቴካ፥ ‹ሄይቲ ሳሎኔ
ሳኣ ሜꬎንታ ጾሳቲ
ሳኣፔኔ ሳሎ ጋርሳፌ
ꬋያና› ጌታ» ጌስ።
12 ባ ዎልቃን ሳኣ ሜꬊዳይ፥
ባ ኣꬎ ኤራቴꬃን
ኣላሜ ኤሲዳይ፥
ባ ኣኬካን
ሳሎ ሚጪዳይ ጎዳ።
13 ኢዚ ጉሚዛ ዎዴ፥
ሳሎን ዲዛ ኡባይ ቃጼስ።
ኢዚ ሻራ ሳኣ ጋጻፔ
ፑዴ ዴንꬄስ።
ኢዚ ኢራራ ዳዳ ዬዴስ፤
ጫርኮካ ባ ሚንጃሶፔ ኬሴስ።
14 ኣሲ ኡባይ ኤራ ꬋይዲ ዳሚዴስ፤
ዎርቃ ሴሪሲዛ ኣሲ ኡባይ
ባ ኦꬂዳ ኤቃ ጾሳታን
ዬላቲዴስ።
ጋሶይካ ኤቃ ጾሳቲ ዎርዶ፤
ኢስታስ ሼምፖይ ዴና።
15 ኢስቲ ጮ ቂꬌስ
ሜꬌቲዳ ሚሻ።
ፒርዳይ ኢስታ ቦላ ጋኪዛ ዎዴ
ኢስቲ ꬋያና።
16 ጊዶ ኣቲን ያቆቤ ቃዳይ
ሄይታ ማላ ጊዴና።
ጋሶይካ ኢዚ ኡባ ሜꬊዳይሳ፤
ኢስራኤሌይ ዶሬቲዳ ዴሬ።
ኢዛ ዶሪዳይሳ ሱንꬃይ
ኡባፌ ዎልቃማ
ጎዳ ጾሳ።
ቡሮፔ ያና ኢታ
17 ኢንቴኖ ሞርኬይ ጊዶꬂዳይቶ!
ዲዛ ሚሽ ዲዛሶፔ ሺሺቴ።
18 ጋሶይካ ጎዳይ፥
«ታኒ ሃ ሳኣ ቦላ ዲዛ ኣሳ
ሃኢ ጌዴ ካሬ ኬሳዳ ጎዳና።
ኢስታስ ኤሬታና ማላ
ታ ኢስታ ቦላ ሜቶ ኤሃና» ጌስ።
19 ዋኖ ኣይ ሃኖ!
ታ ማዱንꬃይ
ፓጾንታ ማዱንꬃ።
ጊዶ ኣቲን ታ ታና፥
«ሃይሲ ታ ሃርጌ፤
ታኒ ዳንዳያናስ ቤሴስ» ጋዲስ።
20 ታ ዱንካኔይ ላሌቲዴስ፤
ኢዛ ዎዶሮይ ኡባይ ዱጼሬቲዴስ።
ታ ናይቲ ኡባይ
ታፔ ሻኬቲዲ ቢቺዳ፤
ሃይሳፌ ጉዬ ሲሜቴና፤
ታ ዱንካና ዛሪዲ ቶላናስ
ዎይኮ ታ ማጋላሻ ካቃናስ
ሃኢ ኢሲ ኣሲኔ ኣቲቤና።
21 ሄንꬃንቻቲ ዳሚዳ፤
ኢስቲ ጎዳ ኦይቺቤቴና።
ሄሳ ጊሻስ ኢስታስ ኢንጄቲቤና፤
ኢስታ ዉዴ ኡባይ ላሌቲዴስ።
22 ሲዪቴ! ኢታ ዮኦይ ዩሳ ቦላ ዴስ፤
ሄሲ፥ «ፑዴሃ ባጋራ ዲዛ
ካዎቴꬃን
ጊታ ቡልኣኬቴꬂ
ዩሳን ዴስ» ጊዛይሳ።
ኢዛ ኦላንቻቲ ዪዲ
ዩሁዳ ካታማታ ባዞኔ
ዎራካናታ ዱሳሶ ኬሳና።
23 ኣቤት ጎዳዉ! ኣሳ ዴኦይ
ኢዛዴ ኩሼን ዶንታይሳኔ
ባ ሄሜታካ ባርካ
ባ ሼኔ ማላ
ሎኤꬃና ዳንዳዮንታይሳ
ታ ኤራይስ።
24 ኣቤት ጎዳዉ! ታና ሴራ፤
ጊዶ ኣቲን ጊናራ ጊዶ።
ታኒ ሙሌራ ꬋዮንታ ማላ
ኔኒ ሃንቆራ ታ ቦላ ዮፓ፤
25 ያቆቤ ሙሌራ
ሚ ሚቲዳይታ ቦላኔ
ኔ ሱንꬃ ጼይጎንታ
ኣሳታ ቦላ ጉሳ።
ኢዛ ዱሳሶካ
ካይዚሲዳ ጊሻስ
ኔኒ ኔ ሃንቆዛ ኔና ኤሮንታ
ዴሬታ ቦላኔ
ኔ ሱንꬅ ጼይጎንታ
ካዎቴꬃታ ቦላ ጉሳ።