15
ዩሁዳ ኣሳ ቦላ ጋካና ፒርዳ
1 ሄሳፌ ጉዬ ጎዳይ ታስ፥ «ሙሴይኔ ሳሜሊ ታ ሲንꬃን ኤቂዳኮካ ታ ዎዚናይ ሃ ዴራስ ሚሼቴና፤ ኢስታ ታ ሲንꬃፌ ዲጋ፤ ኢስቲ ቤቶ። ኬሳ 32፡11-14፤ ታይ 14፡13-19፤ 1ሳሜ 7፡5-9 2 ቃሴ ኢስቲ ኔና፥ ‹ኑኒ ኣዋ ቢኖ?› ጊ ኦይቺኮ፥
ኔ ኢስታስ፥ ‹ሃይቆስ
ፒርዴቲዳይቲ ሃይቃና፤
ማሻስ ፒርዴቲዳይቲ
ማሻን ሹኬታና፤
ኮሻስ ፒርዴቲዳይቲ
ኮሻን ዉራና፤
ዲኤታናስ ፒርዴቲዳይቲ
ዲኤቲ ባና።›ኣጁ 13፡10
3 «ጎዳይ፥ ‹ታኒ ኦይዱ ቆሞ ባሽ ኢስታ ቦላ ኤሃና፤ ሄይቲካ ኢስታ ዎꬋናስ ማሻ፥ ኢስታ ኣሃ ጎቻናስ ካናታ፥ ኢስታ ኣሾዛ ሚዲ ꬋይሳናስ ሳሎ ካፎታኔ ሳኣ ዶኣታ። 4 ሂዝቂያሳ ና፥ ዩሁዳ ካዎ ሚናሴይ ዬሩሳላሜን ኦꬂዳ ፓላ ጊሻስ ታኒ ኢስታ ቦላ ሳኣ ካዎቴꬃታ ኡባስ ዳጋንꬂዛዝ ኦꬃና› ጌስ ጋዳ ዮታ» ጊዴስ። 2ካዎ 21፡1-16፤ 2ታሪ 33፡1-9
5 «ሃኔ ዬሩሳላሜ!
ኔስ ኦኔ ቃꬌታናይ?
ኔስ ሚሼታናይ ኦኔ?
ኔ ሎኤቴꬃ
ጌሊ ኦይቻናይ
ኦኔ?» ጌስ።
6 «ኔ ታና ኣጋዳሳ፤
ጉዬ ጉዬ ባሳ፤
ሄሳ ጊሻስ ታኒ ኔ ቦላ
ታ ኩሼ ዴንꬃዳ
ኔና ꬋይሳና፤
ሃይሳፌ ጉዬ ኔስ ቃꬌቲኬ።
7 ታኒ ኢስታ ካꬅ ሱራጊዛ ማላ
ሱራጋዳ ካታማታ
ፔንጌን ላላና፤
ኢስቲ ባ ኦጌፔ
ሲሞንታ ኣጊዳ ጊሻስ
ታኒ ታ ዴሬዛ ካዮን ኩንꬃና፤
ኢስታ ቦላካ ባሽ ኤሃና።
8 ታኒ ኢስታ ኣምኤታ ቆዳ
ኣባን ዲዛ ኣጬፔካ ዳርሳና፤
ሚኖ ኣዬታ ꬋይሲዛዝ
ሴታ ጋላስ ታ ኢስታ ቦላ ኤሃና፤
ኢስቲ ቆፖንታ ዲሺን
ዳጋማኔ ሺሮ
ታ ኢስታ ቦላ ዬጋና።
9 ላፑን ናይቲ ሃይቂዳ ኣያ
ዳጋማን ዳቡራና፤
ፔኖራ ꬋያና
ኢዚስ ጋላሳይ ቃማና፤
ኢዛ ዬላታናኔ ካዉያና፤
ኣቲዳይታካ ሞርኬታ ማሻስ
ኣꬃ ኢማና» ጌስ ጎዳይ።
ኤርማሲ ባ ሜቶ ጎዳስ ማጋኒዴስ
10 ታ ኣዬ! ሃኖ ፖራ!
ታኒ ኣስ ኡባስ ኦሻሲኔ
ፓላማስ ጊዳና ማላ
ኣይስ ታና ዬላዲ?
ታኒ ኦናስካ ታልኤ ኢማቤኬ፤
ኦናፔካ ታልኤ ኤካቤኬ፤
ጊዶ ኣቲን ኣሲ ኡባይ
ታና ቃንጌስ።
11 ጎዳይ፥ «ቱማፔ ታኒ ኔና
ሎኦ ሚሻስ ኣሻ ኤካና፤
ቱማፔ ኔ ሞርኬቲ
ሜቶ ዎዴኔ
ዋዬ ዎዴ
ኔና ሾባና ማላ
ታኒ ኦꬃና።
12 ኣሲ ቢራታ፥ ፑዴሃ ባጋፌ ዪዳ ቢራታ
ዎይኮ ጻርቂማላ
ሜንꬃና ዳንዳይዜ?
13 ኔ ዴሬ ኡባን ኦሴቲዳ
ናጋራ ጊሻስ
ኔ ኣቆታ ኡባ ዲኢዛይታስ
ጮ ኣꬃ ኢማና።
14 ታ ሃንቆይ ኢንቴ ቦላ
ታማ ማላ ኤጻና፤
ሄሳ ጊሻስ ኔኒ
ኔ ኤሮንታ ቢታን
ኔ ሞርኬታስ
ታኒ ኔና ኣይሌሳና» ጊዴስ።
15 ኣቤት ጎዳዉ! ኔ ኤራሳ።
ታና ቆፓ፤ ሞካካ ጼላ፤
ታና ዬዴꬂዛይታ ቦላ
ሃሎ ኬሳ፤
ኔ ዳንዳያንቻ ጊዲዳ
ጊሻስ ታና ꬋይሶፋ፤
ኔ ጋሶን ታና ጋኪዛ ካꬌዛ
ኔ ቆፓ።
16 ኣቤት ኡባፌ
ዎልቃማ ጎዳዉ!
ታኒ ኔ ሱንꬃን
ጼይጌቲዳ ጊሻስ
ኔ ቃላይ ታኮ ዪን ማዲስ፤
ሂስቲን ኔ ቃላይ ታስ ፓሽካኔ
ዎዚና ኡፋይስ ኢሚዴስ።
17 ጉፒዛይታራ ኡታቤኬ፤
ኢስታራካ ጉፓቤኬ።
ኔኒ ኔ ኩሼ ታ ቦላ
ዴንꬂዳ ጊሻሲኔ
ኔ ሃንቆ ታ ቦላ ዬዲዳ ጊሻስ
ታኒ ታርካ ኡታዲስ።
18 ታ ቦላ ሃርጌይ ኣይስ ሚኒዴ?
ታ ማዱንꬃይ
ኣይስ ዳሪ ዳሪ ቢዴ?
ኣይስ ፓጾንታ ኢጺዴ?
ኔኒ ታስ ባሌꬂዛ
ሻፋ ማላኔ
ጪሚዛ ፑልቶ ማላ
ኣይስ ጊዳዲ?
19 ሄሳ ጊሻስ ጎዳይ፥
«ኔኒ ሲሚኮ ታ ኔና
ዛራ ኤሳና፤
ኔካ ታስ ኦꬃና።
ሃዳ ዮኦ ኣጋዳ
ቦንቾ ቃላ ጻላ ሃሳይኮ
ኔኒ ታ ዶና ጊዳና።
ኢስቲ ኔኮ ሲማና ኣቲን
ኔ ኢስታኮ ሲማካ።
20 ታ ኔና ሃ ዴራስ
ጊምቤ ኦꬃና፤
ጻርቂማላፔ ኦሴቲዳ
ጊምቤ ማላ ሂስታና፤
ታኒ ኔና ኣሻናሲኔ
ዎꬃ ኤካናስ
ኔናራ ዲዛ ጊሻስ
ኢስቲ ኔናራ ኦሌታና ሺን
ኔና ጾኔቴና።
21 ኢታታ ኩሼፔ ታኒ ኔና ዎዛና፤
ሜንጼ ኢታታ ቆሆፔካ
ታ ኔና ኣሻና» ጌስ።