1 ሄ ዎዴ ዩሁዳ ካዎ ሴዴቂያሲ ካዎቲዳ ኦይዳንꬆ ላይꬃን ኢቻሻንꬆ ኣጊናን ጌባኦኔ ኣስ ኣዙሬ ና ናቤ ሃናኒያይ ጎዳ ኬꬃን ቄሴታ ሲንꬃኒኔ ዴሬ ኡባ ሲንꬃን ታስ፥ 2ካዎ 24፡18-20፤ 2ታሪ 36፡11-13 2 «ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎይ ኢንቴና ቶሲዳ ቃምባራ ታ ሜንꬃና። 3 ባቢሎኔ ካዎ ናቡካዳናጾሬይ ጎዳ ኬꬃፌ ዲኢ ኤኪዲ ኤፊዳ ሚሻታ ኡባ ታኒ ናምኡ ላይꬃ ጊዶን ዛራዳ ሃ ሶሆ ኤሃና። 4 ቃሴ ታኒ ዩሁዳ ካዎ ኢዮኣቄሜ ና ኢኮኒያኔኔ ዩሁዳፔ ዲኤቲዲ ባቢሎኔ ቢዳ ኣሳ ኡባ ዛራዳ ሃ ሶሆ ኤሃና። ጋሶይካ ባቢሎኔ ካዎይ ኢንቴና ቶሲዳ ቃምባራ ታ ሜንꬃና› ጌስ» ጊዴስ።

5 ሂስቲን ጎዳ ኬꬃ ጊዶን ኤቂዳ ቄሴታ ሲንꬃኒኔ ዴራ ሲንꬃን ናቤ ኤርማሲ ናቤ ሃናኒያስ፥ 6 «ኣሚን! ጎዳይ ኦꬆ! ጎዳ ኬꬃ ሚሻታኔ ዲኤቲዲ ቢዳ ኣሳ ኡባ ባቢሎኔፔ ዛሪ ኤሂዲ ጎዳይ ባ ዮቲዳ ቃላ ፖሎ! 7 ጊዲኮካ ኣኔ ታ ኔሲኔ ሃ ኣሳስ ዮቲዛ ቃላ ሲያ። 8 ኔፔኔ ታፔ ካሴ ሲንꬃን ዴኢዳ ናቤቲ ዳሮ ዴሬታ ቦላኔ ጊታ ካዎቴꬃታ ቦላ ኦላ ጊሻስ፥ ባሻ ጊሻሲኔ ኢታ ሃርጌ ጊሻስ ቲንቢቴ ዮቲዳ። 9 ጊዶ ኣቲን ሳሮቴꬃ ጊሻስ ቲንቢቴ ዮቲዳ ናቤይ ኢዚ ዮቲዳ ቃላይ ፖሌቲዛ ዎዴ ቱማፔ ጎዳይ ኢዛ ኪቲዳይሲ ሄሳን ኤሬቴስ» ጊዴስ።

10 ሄሳፌ ጉዬ ናቤ ሃናኒያይ ናቤ ኤርማሳ ሞርጌፌ ቃምባራ ኤኪዲ ሜንꬂዴስ። 11 ሂስቲዲ ሃናኒያይ ኣሳ ኡባ ሲንꬃን፥ «ጎዳይ፥ ‹ታኒ ናምኡ ላይꬃታ ጊዶን ባቢሎኔ ካዎ ናቡካዳናጾሬ ቃምባራ ካዎቴꬃታ ኡባ ሞርጌፌ ዴንꬃዳ ሃይሳꬆ ሜንꬃና› ጌስ» ጊዴስ። ሄ ዎዴ ናቤ ኤርማሲ ኣጋጊዲ ባ ኦጌ ቢዴስ።

12 ናቤ ሃናኒያይ ናቤ ኤርማሳ ሞርጌፌ ቃምባራ ሜንꬂዳ ጉꬃ ዎዴፔ ጉዬ ጎዳ ቃላይ ናቤ ኤርማሳኮ ዪዲ፥ 13 «ባዳ ሃናኒያስ፥ ‹ኔኒ ሚꬃ ቃምባራ ሜንꬃዳሳ፤ ታኒ ጊዲኮ ኢዛ ጊሻስ ቢራታ ቃምባራ ጊጊሳና› ጌስ ጎዳይ ጋዳ ዮታ። 14 ቃሴካ ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎ ናቡካዳናጾሬስ ሃጋዛና ማላ ታኒ ሃ ካዎቴꬃታ ኡባ ሞርጌን ቢራታ ቃምባራ ዎꬃና፤ ኢስቲካ ኢዛስ ሃሬታና። ሃራይ ኣቶሺን ዎራ ዶኣታ ቦላካ ጎዳቴꬅ ኢዛስ ኢማና› ጌስ» ጊዴስ።

15 ሄሳፌ ጉዬ ናቤ ኤርማሲ ናቤ ሃናኒያስ፥ «ሃናኒያ ሲያ! ጎዳይ ኔና ኪቲቤና፤ ጊዶ ኣቲን ኔኒ ሃ ኣሳይ ዎርዶ ሚሻን ኣማኔታና ማላ ኦꬃዳሳ። 16 ሄሳ ጊሻስ ጎዳይ፥ ‹ታኒ ኔና ሃ ሳኣ ቦላፌ ዲጋና፤ ኔኒ ጎዳ ቦላ ማካላ ሃሳይዳ ጊሻስ ኔ ሃ ላይꬅ ሃይቃና› ጌስ» ጊዴስ።

17 ናቤ ሃናኒያይ ሄ ላይꬅ ላፑንꬃ ኣጊናን ሃይቂዴስ።