30
ጎዳይ ባ ዴራስ ኢሚዳ ሂዶታ ቃላ
1 ጎዳፔ ኤርማሳኮ ዪዳ ቃላይ ሃይሳፌ ካሊዛይሳ። 2 ጎዳ ኢስራኤሌ ጾሳይ ኤርማሳ፥ «ታኒ ኔስ ዮቲዳ ቃላ ኡባ ማጻፋን ጻፋ። 3 ታኒ ታ ዴሬ ኢስራኤሌኔ ዩሁዳ ካሴ ኢስታ ኣዋታስ ታ ኢሚዳ ቢታ ኢስታስ ዛራ ኤሃና ዎዴይ ጋኪዴስ፤ ኢስቲካ ላታና» ጌስ።
4 ጎዳይ ኢስራኤሌሲኔ ዩሁዳስ ዮቲዳ ቃላይ ሃይሳፌ ካሊዛይሳ።
5 ጎዳይ፥ «ታኒ ባቦኔ
ሺሮ ዋሶ ሲያይስ፤
ሳሮይካ ዴና።
6 ኣኔ ኦይቺቴኔ ኣኬኪቴ!
ኣዴይ ዬላናስ ዳንዳይዜ?
ሂስቲን ኣዴይ ኡባ
ሚጻይ ኦይኪዳ ማጫሳ ማላ
ባ ኩሼ ባ ኡሎ ቦላ ዎꬂን
ኣሳ ኡባ ሲንꬅ ካሬቲን
ታ ቤኢዛይ ኣዛሴ?
7 ሄ ጋላሳይ ኣይ ማላ
ዳጋንꬂዛ ጋላስ ጊዳኔ!
ሄሳ ማላ ጋላሲ ዴና፤
ሄ ጋላሳይ ያቆቤ
ዜሬꬃታስ
ሜቶ ጋላስ ጊዳና፤
ጊዶ ኣቲን ኢስቲ
ሄ ሜቶዛፔ ኣታና» ጌስ።
8 ጎዳይ ኡባፌ
ዎልቃማ ጾሳይ፥
«ሄ ጋላስ ታኒ ኢስታ ሞርጌፌ
ቃምባራ ሜንꬃና፤
ኢስቲ ቃሼቲዳ
ሳንሳላታካ ዱꬃና፤
ሃይሳፌ ጉዬን
ኣላጋይ ኢስታ ሃሬና።
9 ጊዶ ኣቲን ጎዳስ
ባንታ ጾሳሲኔ
ታኒ ኢስታስ ካዎꬂዳ
ካዎ ዳዊቴ ዛሬስ
ኢስቲ ሃሬታና» ጌስ።
10 «ሄሳ ጊሻስ ታ ኣይሌ
ያቆቤ ዛሬቶ ያዮፍቴ!
ኢንቴኖ ኢስራኤሌቶ ዳጋሞፍቴ!
ኢንቴ ሃሆሶን ዲሺን
ታኒ ኢንቴና ኣሻና፤
ኢንቴ ዛሬታካ ኢስቲ ዲኤቲዳ
ቢታፌ ኬሳ ኤካና፤
ያቆቤ ዛሬቲ ሲሚዲ
ሳሮኒኔ ዎፓን ኡታና፤
ኢስታ ያሺሳና
ኣይ ሚሺካ ዴና።
11 ታኒ ኢንቴና ኣሻናስ
ኢንቴናራ ዳይስ፤
ታኒ ኢንቴና
ካዎቴꬃታ ጊዶን ላላዲስ፤
ሄ ካዎቴꬃታ
ሙሌራ ꬋይሳና፤
ጊዶ ኣቲን ኢንቴና
ሙሌራ ꬋይሲኬ፤
ታኒ ቂጻቴይ ባይንዳ ጮ ኣጊኬ፤
ጊዲኮካ ታኒ ኢንቴና
ጊናራ ቃጻያና» ጌስ ጎዳይ። ኤር 46፡27-28
12 ጎዳይ፥ «ኢንቴ ሜቆይ ኮሌቴና፤
ኢንቴ ማዱንꬃይ ፓጼና።
13 ኢንቴ ጊሻስ ሞቴቲዛይ ዴና፤
ኢንቴ ማዱንꬃስካ ꬋሌይ ቤቴና፤
ኢንቴስ ፓጾይ ዴና።
14 ኢንቴ ላጌቲ ኡባይ ኢንቴና ዶጊዳ፤
ኢስቲ ኢንቴ ጊሻስ ዉዴቴቴና፤
ታኒ ኢንቴና
ሞርኬ ሾጪዛ ማላ ሾጫዲስ፤
ሜንጼ ኢታ ኣሳ ማላ
ታ ኢንቴና ቃጻያዲስ።
ጋሶይካ ኢንቴ ቆሆይ ጊታ፤
ኢንቴ ናጋራይካ ዳሮ።
15 ꬋሌይ ባይንዳ ኢንቴ ሃርጌሲኔ
ኢንቴ ማዱንꬃ ጊሻስ ኣይስ ዋሴቲ?
ኢንቴ ሞሮይ ጊታኔ
ኢንቴ ናጋራይ ዳሮ ጊዲዳ ጊሻስ
ሃይታ ኡባ ታ ኢንቴ ቦላ
ኦꬃዲስ» ጌስ።
16 «ጊዶ ኣቲን ኢንቴና
ዲፒ ሂስቲ ሚዳ ኡባቲ
ሄሳꬆ ሜቴታና፤
ኢንቴ ሞርኬ ኡባቲካ ዲኤቲ ባና፤
ኢንቴና ቦንቂዳይቲ ቦንቄታና፤
ኢንቴና ቦጊዛይቲ ቦጌታና።
17 ኢንቴና ጊዲኮ ታኒ ዛራዳ ፓዪሳና፤
ኢንቴ ማዱንꬃካ ፓꬃና።
ጋሶይካ ኢስታስ፥ ‹ካꬌቲዳሮ፤
ኦኒካ ኮዮንታ ጺዮኖ›
ጊዳ ጊሻሳ» ጌስ ጎዳይ።
18 ጎዳይ፥
«ታኒ ያቆቤ ኬꬅ ዛራ ኬጻና፤
ኢዚ ዲዛሶስካ ቃꬌታና፤
ካታማያካ ካሴ ባ ላሌቲዳሶን
ሲማ ኬጼታና፤
ካዎቴꬃ ኬꬃይካ ካሴ ባ ዲዛሶን
ሲሚ ኬጼታና።
19 ኢስታፌ ጋላታ ዬꬃይኔ
ኢሊሊሳ ጬንጉርሲ ሲዬታና፤
ታኒ ኢስታ ዳርሳና፤
ኢስታ ቆዳይካ ፓጬና፤
ታኒ ኢስታ ቦንቼቲዳ ዴሬ ኦꬃና፤
ኢስቲ ካꬌቲዳይታ ጊዴቴና።
20 ኢስታ ዜሬꬃይ
ቤኒ ዎዴ ዲዛ ማላ ዳና፤
ኢስታ ማባራይካ ታ ሲንꬃን
ሚኒ ኤቃና፤
ኢስታ ኡንኤꬂዛ ኡባካ
ታኒ ቃጻያና።
21 ኢስታ ካሌꬂዛይ ኢስታ ባጋፌ ጊዳና፤
ኢስታ ኣይሲዛይ
ኢስታ ጊዶፌ ዴንዳና፤
ታኒ ኢዛ ታኮ ሺሻና፤
ኢዚካ ታኮ ሺቃና።
ታ ሺሾንታ ዲሺን ጻሊዲ
ታኮ ሺቃናይ ኦኔ?
22 ሄሳ ጊሻስ ኢንቴ ታ ዴሬ ጊዳና፤
ታኒካ ኢንቴ ጾስ ጊዳና» ጌስ።
23 ቤኢቴ ጎዳ ሃንቆይ
ዳምባላ ማላ ዴንዴስ፤
ቡልኣኬቲዛ ጎቴ ጫርኮይ
ኢታታ ዎꬋና።
24 ኢዛ ዎዚና ቆፋ ፖሎንታ ጎዳ ሃንቆይ
ጮ ሃዳ ጉዬ ሲሜና፤
ሄሳ ዪዛ ዎዴታን ኢንቴ ኣኬካና።