ኢዮቤ ማጻፋ
ጊዶ ቆፋ
ኢዮቤ ማጻፋን ኑኒ ቤኢዛ ታሪኬይ ዎልቃማ ሜቶይኔ ቆሆይ ኢዛ ቦላ ጋኪዳ ኢሲ ሱሬ ኣሳ ጊሻስ ቆንጪሴስ። ሄ ኣዴዚካ ባ ናይታኔ ባ ሃሮ ኡባፌ ሜላ ኣቶይሳፌካ ቦላራ ኢታ ማዱንꬅ ማዱንጺዲ ዋዬቴስ፤ ሄሳፌ ጉዬ ጊንጾ ማላን ሄꬑቶ ሺቂዳ ሃሳያን ኢዮቢኔ ኢዛ ላጌቲ ሃ ኢታ ዋዪሲዛ ሜቶዛን ባስ ሴቴቲዛ ዮኦዛ ቆንጪሴቴስ፤ ዉርሴꬃንካ ጾሲ ኢዮቤስ ቆንጪሲዴስ።
ኢዮቤ ላጌቲ ኢዛ ቦላ ጋኪዳ ዋዬዛ ጊሻስ ካሴ ባንቲ ኤሪዛ ሃይማኖቴ ዎጋፔ ዴንዲዲ ባንታስ ዲዛ ዱማ ዱማ ቆፋ ሺሼቴስ፤ ሄሲካ፥ «ጾሲ ኪያ፤ ኣሳስ ሎኦ ዎጋ ኢሜስ፤ ኢታ ኣስ ጊዲኮ ቃጻዬስ» ጌቴስ። «ሄሳꬆካ ኢዮቤ ሃ ኡባ ሜቶይ ጋኪዳይ ኢዚ ናጋራ ኦꬂዳ ጊሻስ ጊዶንታ ኣጌና» ጌቴስ። ኢዮቤ ጊዲኮ ኢዛ ቦላ ዎሶይ ባይንዳዴኔ ሱሬ ኣስ ጊዲዳ ጊሻስ ሃይሳ ማላ ዎልቃማ ቂጻቴይ ኢዛስ ቤሴና። ኢዮቤ ማላ ሱሬ ኣሳ ቦላ ሃይሳ ማላ ዎልቃማ ሜቶይ ጋኪዳይሲ ቢርሼቶንታ ማሌꬆ ጊዲዴስ። ሃ ኡባ ሜቶዛን ኢዮቤ ኣማኖይ ያኔ ሃ ቃጾንታ ኣጊኮካ ቱማ ፒርዲዛ ጾሳይ ሊኬ ፒርዳ ኢዛስ ኢሚዲ ኢዛ ጋኪዳ ሜቶዛፔ ኬሳና ማላኔ ካሴ ዴኦዛ ኢዛስ ዛራና ማላ ጾሳ ሚኒዲ ዎሳፔኔ ኦይሾፔ ጉዬ ጊቤና።
ጾሲ ኢዮቤ ኢዛ ኦይቺዳ ኦይሻታስ ዛሮ ማራራ ማራራ ኢሞንታ ኣጊኮካ ኢዮቤስ ዲዛ ሚኖ ኣማኖዛ ናሺዲ ጾሲ ባ ዎልቃኔ ባ ኤራቴꬃ ማላሊሲዛ ኦጌራ ጊንጾን ኢዛስ ቆንጪሲዴስ። ሄሳፌ ጉዬ ኢዮቢ ጾሲ ባይራኔ ኤራ ጊዲዳይሳ ሻኪ ኤሪዴስ። ጾሳ ጾሳቴꬃ ሻኪ ኤሪዳፔ ጉዬ ካሴ ኢዚ ሃንቆን ኩሚዲ ኬሲዳ ዴጾ ቃላታ ጊሻስ ዬላቲዲ ማሮቴꬃን ጌሊዴስ።
ማጻፋስ ዉርሴꬃ ሼምፖይ ኢዮቢ ባና ጋኪዳ ሜቶዛፔ ዛሮ ዴሚዲ ካሴ ዴኦዛን ሲሚዳይሳኔ ቃሴካ ሃሮ ባጋራ ካሴይሳፌ ሃ ኣꬎ ዴሚዳይሳ ቆንጪሴስ። ሃራ ባጋራ ቃሴ ኢዮቤ ቦላ ጋኪዳ ሜቶይ ኣይ ጋሶን ኢዛ ቦላ ጋኪዳኮን ኢዮቤ ላጌታስ ጌሎንታ ጊሻስ ጾሳይ ኢስታ ሚንꬂ ሴሪዴስ።
ሎሴ ጊዲዳ ዱማ ዱማ ሃይማኖቴ ዎጋታፔ ጾሲ ባ ባጋራ ባይራ ጊዲዳይሳ ኢዮቢ ጻላላ ኤሪዳ ጊሻስ ባ ላጌታ ጊሻስ ዎሲዴስ፤ ጾሲካ ኢዛ ዎሳ ሲዪዴስ። ጾሲ ኢዮቤስ ዉርሴꬃ ዴኦዛ ኮይሮይሳፌ ኣꬂ ሎኤꬂዴስ።
ሃ ማጻፋይ ኦይኪዳ ኩሜꬃ ቆፋ
ኢዮቤ ጋኪዳ ሜቶታ 1፡1—2፡13
ኢዮቢ ባ ዬሌታ ጋላሳ ቃንጊዴስ 3፡1-26
ኮይሮ ዩሾ ሃሳያ 4፡1—14፡22
ናምኣንꬆ ዩሾ ሃሳያ 15፡1—21፡34
ሄꬓንꬆ ዩሾ ሃሳያ 22፡1—26፡14
ኢዮቤስ ዉርሴꬃ ሃሳያ 27፡1—31፡40
ኤሊሁ ሃሳያ 32፡1—37፡24
ጾሲ ኮይሮ ዩሾ ሃሳይዳ ሃሳያ 38፡1—39፡30
ናምኣንꬆ ዩሾ ጾሳ ሃሳያኔ ኢዮቤ ዛሮ 40፡1—42፡6
ጾሲ ኢዮቤስ ዛሮ ኢሚዲ ኣንጂዴስ 42፡7-17
1
ኢዮቤ ቦላ ጋኪዳ ፓጬ
1 ኡጼ ጌቴቲዛ ዴሬን ኢሲ ኢዮቤ ጌቴቲዛ ኣሲ ዴስ። ኢዚካ ኢታ ኡባፌ ሃኪዳዴ፤ ዎሶይ ኢዛ ቦላ ባይንዳዴ፤ ጾሳስ ያዪዛዴኔ ሱሬ ኣሳ። 2 ኢዛስ ላፑን ኣቱማ ናይቲኔ ሄꬑ ማጫ ናይቲ ዴቴስ። 3 ሃሮ ባጋራካ ኢዛስ 7,000 ዶርሳቲ፥ 3,000 ጋሜላቲ፥ 500 ዋꬃ ቦራቲኔ 500 ሃሬቲ ዴቴስ፤ ቃሴካ ኬሂ ዳሮ ኣይሌቲ ዴቴስ። ኣርሼይ ሞኪዛሶ ባጋራ ኢዛ ማላ ዱሬኔ ጊታ ኣሲ ሃራይ ዴና።
4 ኢዮቤ ኣቱማ ናይቲ ኢሶይ ኢሶይ ባሶን ታራን ታራን ዲጊሳ ጊግሲዲ ኢሲፌ ሺቂ ኡፋዬቴቴስ፤ ሄꬑ ሚቼታካ ባንታኮ ጼይጊሲዲ ኢስታራ ኢሲፌ ሜቴሲኔ ኡዬቴስ። 5 ዲጊሳ ጋላሳቲ ኣꬊዳፔ ጉዬ ኢዮቢ ዎንታራ ዴንዲዲ ባ ናይታ ጼይጊሲዲኔ ኢሳ ኢሳ ሱንꬃን ያርሾ ሺሼስ። ኢዚ ሄሳꬆ ኦꬂዛይ፥ «ታ ናይቲ ጌሊ ጊዳ ጾሳ ጫዪዲ ኣዉኮራ ናጋራ ኦꬂዳኮኔ!» ጉሳ ሂርጋን ናይታ ናጋራፔ ጌሻናስ ጊዲ ኦꬄስ። ኢዮቢ ሃይሳ ያርሾ ዎጋ ቃንጾንታ ኡባ ዎዴ ኦꬄስ።
6 ጋላሳታፔ ኢሲ ጋላስ ሳሎ ኪታንቻቲ ጎዳ ሲንꬅ ሺቂዳ ዎዴ ጻላኤይካ ኢስታራ ኢሲፌ ሺቂዴስ። ሜꬌ 6፡2 7 ጾሲካ፥ «ኣዋፔ ያዲ?» ጊዲ ጻላኤ ኦይቺዴስ። ጻላኤይካ፥ «ሳኣ ጋጻ ኡባ ያኔ ሃ ዩዬሬታዳ ያዲስ» ጊዲ ጎዳስ ዛሪዴስ።
8 ጎዳይ ጻላኤዛ፥ «ታ ኣይሌዛ ኢዮቤ ሎኤꬃ ቤያዲ? ኢዛ ማላ ኣማኔቲዳኔ ሱሬ ኣስ ቢታ ቦላ ቤቲቤና፤ ኢዚ ኢታ ኡባፌ ሃኪዲ ታስ ያዪዛ ሱሬ ኣሳ» ጊዴስ።
9 ጻላኤይካ ዛሪዲ፥ «ኢዮቢ ኔስ ጾሳስ ጮ ያዪዜ? 10 ኢዚ ኔስ ያዪዛይ ኔኒ ኢዛኔ ኢዛ ናይታ፥ ኢዛስ ዲዛ ሃሮ ኡባ ሎኤꬃ ናጊዳ ጊሻሳ፤ ኢዚ ኦꬂዛ ኦሶዛ ኩሜꬅ ኣንጂዳ ጊሻሲኔ ዳሮ ዉዴ ሜሄታ ኔ ኢዛስ ኢሚዳ ጊሻስ ጊዴኔ? 11 ኣኔ ኔ ኩሼ ዬዳዳ ኢዛስ ዲዛይሳ ኡባ ኔ ꬋይሲዳኮ ቱማ ኢዚ ኔና ቆንጬን ጫያና» ጊዴስ። ኣጁ 12፡10
12 ጎዳይካ ጻላኤስ፥ «ኤሮ ኣኔ ኢዮቤ ቦላ ኢሲ ሜቶካ ጋꬆፋ ኣቲን ኢዛስ ዲዛ ሃሮዛ ቦላ ኔ ኮዪዳዚ ኦꬃናዉ ዳንዳያሳ» ጊዴስ። ሄሳፌ ጉዬ ጻላኤይ ጾሳ ሲንꬃፌ ኬኢዲ ቢዴስ።
ኢዮቤ ናይታ ሃይቆኔ ኢዛ ሃሮ ꬋዮ
13 ጋላሳታፔ ኢሲ ጋላስ ኢዮቤ ናይቲ ባይራ ኢሻሶን ዉሪ ሺቂዲ ሚዲኔ ዎይኔ ጫጄ ኡዪዲ ኡፋዬቴቴስ። 14 ሄ ጋላስ ኢሶይ ኪቴቲ ዪዲ፥ «ኑኒ ቦራታ ዋጺዲ ጎዪሺን፤ ሃሬቲካ ኑ ማታ ዴምባን ሄሜቲሺን፥ 15 ሳባ ዴሬ ኣሳቲ ዪዲ ኑ ቦላ ኦላ ዴንꬂዲ ኡባካ ዲኢ ኤኪ ቢዳ፤ ኔ ኣይሌታ ኡባታካ ማሻን ዎꬊዳ፤ ታኒ ጻላላ ኣታዳ ሃኒዳ ኡባ ኔስ ዮታናስ ያዲስ» ጊዴስ።
16 ኮይሮ ኪታንቻይ ባ ሃሳይዛ ሃሳያ ቡሮ ኦንጎንታ ዲሺን ናምኣንꬆ ኪታንቻይ ዪዲ፥ «ዶርሳታኔ ሄሚዛ ሄንꬃንቻ ኡባ ዎልቃንꬅ ሳሎፔ ዎꬊዲ ዎꬊዴስ፤ ታኒ ጻላ ኣታዳ ሃኒዳ ኡባ ኔስ ዮታናስ ያዲስ» ጊዴስ።
17 ሃይሳ ኪታንቻይ ሃሳዪ ኦንጎንታ ሃራ ኪታንቻይ ዪዲ፥ «ሄꬑ ቡቴን ሻኬቲዳ ቦንቂዛ ካላዳዌ ኣሳቲ ዪዲ ቆፖንታ ዲሺን ኑ ቦላ ኢታ ሜቶ ጋꬂዳ፤ ጋሜላታ ኡባ ዲኢ ኤፊቺዳ፤ ኔ ኣይሌታ ኡባ ማሻን ዎꬊዳ፤ ታኒ ጻላ ኣታዳ ሃኒዳ ሚሽ ኡባ ኔስ ዮታናስ ያዲስ» ጊዴስ።
18 ሃይሳ ሃ ኪታንቻይ ሃሳዪ ኦንጎንታ ሃራ ኪታንቻይ ዪዲ፥ «ኔ ናይቲ ኡባቲካ ባንታስ ባይራ ኢሻሶን ሺቂዲ ሚሼኔ ዎይኔ ጫጄ ኡዪሼ ኡፋዬቲዛ። 19 ባዞፌ ዪዳ ጎቴ ጫርኮይ ቆፖንታ ዲሺን ዪዲ ኬꬃ ኩሜꬅ ሺሬቺ ዬጊዴስ፤ ኬꬃዚካ ኢስታ ቦላ ዎꬊን ዉሪካ ሃይቂዳ፤ ታኒ ጻላ ኣታዳ ሃኒዳ ሚሽ ኡባ ኔስ ዮታናስ ያዲስ» ጊዴስ።
20 ሄሳፌ ጉዬ ኢዮቢ ዴንዲዲ ካዮቲዲ ባ ማይኦዛ ዳኪዴስ፤ ባ ሁኤ ቡሉሲዴስ፤ ቢታን ጉፋኒ ጎይኒዴስ። 21 «ታኒ ታ ኣዬይ ኡሎፔ ካሎ ዬሌታዲስ፤ ሃይቂዛ ዎዴካ ካሎ ባና፤ ጎዳይ ኢሚዴስ፤ ጎዳይ ኤኪዴስ፤ ጎዳ ሱንꬂ ጋላቴቲዳዝ ጊዶ» ጊዴስ።
22 ሃ ፓጬይ ኡባይ ኢዮቤ ቦላ ጋኪንካ ኢዚ ኡባካ ናጋራ ኦꬂቤና፤ ጾሳ ቦላካ ጫሞ ቃላ ኬሲቤና።