15
ኤልፋዜ ሃሳያ
1 ቴማኔ ዴሬ ኣስ ኤልፋዜይ ሂዝጊዴስ፤
2 «ቱሙ ኤራ ኣሲ
ጫርኮ ማላ ኩሼን ኦይኬቶንታ
ሚሽ ሃሳዪ ኤሪዜ?
ኢዛ ኡሎን ቆሂዛ ቆፋይ
ዳናስ ቤሲዜ?
3 ኤራ ኣሲ ኣይኮ
ጎኦንታ ቃላታኒኔ
ጎኣይ ባይንዳ ሃሳያን
ማርሼቲዜ?
4 ኔኒ ጾሳስ ያዪዛይሳ ኣጋዳሳ፤
ጾሳስ ቤሲዛ
ጎይኖዛካ ዲጋሳ።
5 ኔ ቆሃንቻ ጊዲዳይሲ
ኔ ሃሳያን ኤሬቴስ፤
ጊዶ ኣቲን
ጪንጫቴꬃ ሃሳያን
ካማናስ ባጼታሳ።
6 ኔ ቦላ ፒርዲዛይ
ኔ ዶናፔ ኣቲን
ታና ጊዲኬ፤
ኔ ሃሳያይ ኔናቴꬃ ቆንጪሴስ።
7 «ኣሳፔ ሲንꬃን
ዬሌቲዳይ ኔኔ?
ዙማቲ ሜꬌታናፔ
ሲንꬃን ኔ ዬሌታዲ?
8 ቱሙ ጾሳ ጹራ ሲያዲ?
ኣሳ ኤራቴꬅ ኤሪዛይ
ኔና ጻላ ኔስ ሚሳቲዜ?
9 ኑኒ ኤሪዛይሳፌ ዱማ ሚሽ
ኔ ኤሪዛይሲ ኣዜ?
ኑ ኤሪዛይሳፌ ኔስ ቆንጪዳ
ዱማ ሚሺ ኣዜ?
10 ዬሌታን ኔ ኣዋፔ ጪሚዛ
ሁኤይ ፑሉሚዳ ጪማቲ
ቆፋን ኑናራ ዴቴስ።
11 ኑ ባጋራ ኔስ ዮቴቲዛ
ጾሳፌ ኢሜቲዳ ሚንꬄꬆይ
ኔስ ጊዴኔ?
12 ኔና ኔ ዎዚናይ
ኣይስ ሃራሶ ኤፊዜ?
ኣይስ ሃንቆን ዴሬቃ ጼላይ?
13 ሃይሳꬆ ኦሶን ጾሳ ቦላ
ኔ ኣያና ዴንꬄꬃዳሳ።
ሃይሳ ማላ ሃንቆ ቃላ
ሃሳያናዉ ጋካዳሳ።
14 «ኣሲ ጌሽ ጊዳናስ ዳንዳይዜ?
ኣሾ ማይኢዳይ
ጺላናስ ዳንዳይዜ?
15 ጾሳይ ባ ኪታንቻታ ቦላ
ኣማኔቴና፤
ሳሎይካ ኢዛ ሲንꬃን
ጌሽ ጊዴና።
16 ሞሬቲዳይኔ ቱኒዳይ
ናጋራካ ሃꬃ ማላ
ኡዪዛ ኣሲ ኣይ ማላ ኢታ?ኢዮ 25፡4-6
17-18 «ኢስታ ኣዋቲ ቆቶንታ
ኢስታስ ኦꬂዳይሳ፥
ኤራንቻቲ ቆንጪሲዳይሳ፥
ታኒካ ፒልጊዳይሳ
ታ ኔና ኤሪሳይስ፤
ሲያ ታ ኔስ ዮታይስ።
19 ቢታያ ኢስታስ ጻላ ኢሜታዱስ፤
ኢማꬃቲካ ኢስታ ጊዶን
ዋላኬቲቤቴና።
20 ኣስ ዋዪሲሼ ዴኢዛ ኢታ ኣሲ
ባ ላይꬃ ኩሜꬃን
ዋዬቲሼ ዳና።
21 ዳጋንꬂዛ ጊሪስ ኢዚ
ባ ሃይꬃን ሲያና፤
ኡባ ሚሺ ሳሮ ሚሳቲዲ
ኢዛስ ቤቲዛ ዎዴ
ኢዛ ꬋይሲዛ ሚሺ
ኢዛ ቦላ ያና።
22 ኢዛስ ቃዳይ
ማሻን ሃይቆ ጊዲዳ ጊሻስ፥
ꬉማፔ ኣታና ሂዶታይ
ኢዛስ ዴና።
23 ካፎስ ዎራ ኣቲዳ ካꬃ ማላ
ኢዚ ዎራ ኣታና፤
ኢዚ ꬋያና ꬉማ ጋላሳይ
ኢዛኮ ማቲዳይሳ ኢዚ ኤሬስ።
24 ሜቶይኔ ጬጬይ ኢዛ ያሻና፤
ኦላስ ጊጌቲዳ ካዎ ማላ
ኢዛ ቦላ ሚናና።
25 ሃይሲ ሃናናይ ጾሳ ቦላ
ባ ኩሼ ዴንꬂዳ ጊሻሳ፤
ኡባ ዳንዳይዛ ጾሳ ቦላ
ጻሊዳ ጊሻሳ።
26 ኢዚ ባ ኦርዴኔ
ሚኖ ጎንዳሌ ኤኪዲ
ጾሳራ ኤቄታና ኬዚዴስ።
27 «ኢዛ ኣይፌይ ሞꬌን ጎዜቲዴስ፤
ኢዛ ጼሳይካ ኦርዲዴስ።
28 ሃይሲ ሃ ኣዴዚ
ሙሌራ ኩንዲዲ
ꬋይዳ ካታማታን፥
ላሌታናስ ማቲዳ
ካይሳ ኬꬃታ ጊዶን ዴስ።
29 ዱሬቴና፤ ኢዛ ሃሮይካ
ዳሮ ዎዴ ጋምኤና፤
ቢታ ቦላካ ኣኬና።
30 ꬉማፔ ኣቲ ባናዉ
ዳንዳዬና፤
ታማ ላጮይ ሃጋታ
ሜሊሲዳይሳ ማላኔ
ጪሻቲካ ጫርኮን
ቆኪዳ ሚꬃ ማላ ጊዳና።
31 ሃዳ ሚሻን ኣማኔቲሼ
ባና ባርካ ባሌꬆፎ፤
ሄሳንካ ኢዚ ጎኣይ ባይንዳይሳ
ጊዲ ኣታና።
32 ኢዚ ዎዴይ ጋኮንታ ዲሺን
ኡꬃይ ሜሊዛ ማላኔ
ሃጋቲካ ጪሊሎንታ
ሚꬃ ማላ ሃናና።
33 ኢዚ ቡሮን ካጾንታ ዲሼ
ኣይፌዚ ቆቆፌቲዛ
ዎይኔ ሚꬃ ማላኔ
ጪሻይ ቆቆፌቲዛ
ዎጋራ ሚꬃ ማላ ጊዳና።
34 ጾሳ ጾሳቴꬃ ኤሮንታ ኣሳታስ
ዜሬꬂ ዴኤና፤
ጉቦን ኦሴቲዳ ኬꬃቲካ
ታማን ዲፒ ጊ ጹጌታና።
35 ሃይሳ ማላ ኣሳቲ
ጌኔ ሚሽ ቆፔቴስ፤
ሜቶካ ሜꬌቴስ፤
ኢስታ ዎዚናይካ
ባሌꬆን ኩሚዴስ።»