ኣሞቶንታ ማላ፤

ታኒ ታ ኣይፌታራ ጫቆ ጌላዲስ።

ኣሳስ ኣይ ቃዳ ኢማንዴሻ?

ሳሎን ዲዛ ኡባ

ዳንዳይዛ ጾሳፌ

ኣሳስ ኢሜቲዳ ጊሻይ ኣዜሻ?

ናጋራንቻ ኣሳ ቦላካ ꬋዮይ

ጋካናይሲ ኤሬቲዳዝ ጊዴኔ?

ኡባ ቤዬኔ?

ታ ሄሜታካ ሻኪ ኤሬኔ?

ኣሳካ ባሌꬂዳ ጊዲኮ፤

ጌዳራን ጌዳሮ።

ታኒ ጺሎ ጊዲዳይሳ ሻኪ ኤሮ።

ታ ኣይፌይ ቤኢዳ ኡባ

ታ ዎዚናይ ኣሞቲዳ ጊዲኮ፥

ቃሴካ ታ ኩሼይ

ናጋራን ቱኒዳ ጊዲኮ፥

8 ታኒ ዜሪዳይሳ ሃራ ኣሲ ሞ።

ታ ጫሬቻዚካ ኩሜꬂ

ሾዴቲ ኦሌቶ።

ሃራ ማጫ ኣሞቲዳ ጊዲኮ፥

ታ ሾሮዛ ማቾ

ላይማታናስ ኢዛ ፔንጌን

ታ ዙጊዳ ጊዲኮ፥

10 ታ ማቻ ሃራ ኣሳስ ጋጩ፤

ቃሴካ ሃራ ኣዴይ ኢዚራ ዚንኦ።

ዎጋንካ ቃጻይሲዛ ናጋራ።

ጹጊዛ ጊሻስ

ታ ሃይሳ ኦꬂዳኮ

ታ ኣቆታ ጹጊ

ꬋይሳናኮሺን።

ታ ኣይሌቲ ታና ሞቲን

ኢስታ ሞቶዛ

ታ ካꬋዳ ኣጊዳ ጊዲኮ፥

ታኒ ዋናኔ?

ቃሴ ኢዚ ታና ኦይቺዛ ዎዴ

ታኒ ኣይ ዛሮ ኢማኔ?

ታ ኣይሌታካ ሜꬊዳይ

ኢዛ ጊዴኔ?

ኑና ኡባታካ

ኣዪ ኡሎን ሜꬊዳይ

ኢዛ ዴኔ?

ታ ዲጋ ኤሪኬ፤

ቃሴካ ኣምኤ ማጫሳታ

ሚንꬄꬆንታ

ኣጋ ኤሪኬ።

ታ ካꬅ ታርካ ማቤኬ።

ታኒ ኢስታ ኣዋ ማላ ዲቻዲስ፥

ታ ዴኦ ላይꬅ ኡባን

ኣምኤ ማጫሳታ ማዳዲስ።

ሜጎይ ዎꬊዛዴ፤

ዎይኮ ሜቶፔ ዴንዲዳይሳን

ካሎ ዲዛዴ ቤያዳ፥

20 ታ ዶርሳታ ኢስኬፌ

ኦሴቲዳ ማይኦ ታ ማይዚን፥

ኢዛዴ ሆኢን ታና ዛሪ ጋላቶንታ

ኣጊዳ ዎዴይ ዴና።

ላꬃናይሳ ኤራዳ

ኣዋይ ባይንዳ ናይታ

ናቂዳ ጊዲኮ፥

22 ታ ኩሼይ ሃሼፔ ኬኦ።

ታ ቄሴይካ ኩሬዛፔ ኮልዶ።

ያዪዛ ጊሻሲኔ

ኢዛ ቴማቴꬃስ ያዪዛ ጊሻስ

ሃይሳ ማላ ዮኦታ ኦꬃናዉ

ታ ዳንዳይኬ።

ኣቆታን ኣማኔታቤኬ።

ዎይኮ ፓያ ዎርቃካ

ታስ ኣማኔቲዛ

ሚሽ ኦꬃቤኬ።

ታኒ ዱሬቴꬃፌ ዴንዲዳይሳን

ዳሮ ሚሽ ዴማዲስ› ጋዳ

ኡፋዬታ ኤሪኬ።

ኣጊና ሎኤቴꬃ ቤያዳ፥

27 ታ ዎዚናን ኢስታ

ጌማራ ቦንቻቤኬ፤

ቃሴካ ታ ኩሼ ሚጫ ዬራዳ

ኢስታስ ጎይናቤኬ።

ሳሎን ዲዛ ጾሳ

ካዶ ጊዲዳ ጊሻስ

ሃይቲ ሃ ኦሶቲ

ታ ቦላ ፒርዳ ኤሂዛ ናጋራታ።

ታኒ ኡፋዬታቤኬ፤

ኢታ ሚሺ ኢስታ ቦላ

ጋኪሺንካ ሚጫቤኬ።

ናጋራ ኦꬃቤኬ።

ኢማꬃ ሞኪዛይሳ

ታሶ ኣይሌቲ

ታ ጊሻስ ማርካቴቴስ።

ኦጌራ ኣꬊ ቢዛ ማንዳራስ

ዶያ ዎꬃዲስ።

ሄሳ ጊሻስ ጋዴይ ቃሚን

ዪዳ ኢማꬂ

ካሬን ኣይሳ ኤሪኬ።

ሃራ ኣሳታ ማላ

ታ ናጋራካ ቆታቤኬ።

ሶ ኣሳታ ካꬎይ ዳጋንꬂን

ታኒ ታሶን ጮኡ ጋዳ

ቆቴቲዳ ዎዴይ ዴና።

ቤቴሬኔሺን!

ታኒካ ቴቄ ቃላ

ሺሻናኮሺን!

ኡባ ዳንዳይዛ ጾሳይ

ታ ጊዛይሳ ዛሮ ኢዚ ኢሞ!

ታና ሞቲዛ ሞታንቻይ

ታና ሞቲዛይሳ

ጻፊ ሺሺን

ታ ቤያርኪናሺን!

ታ ሃሼን ቶካናኮሺን፤

ካላቻ ማላካ

ታ ሁኤ ቦላ ጎጻና።

ጾሳ ሲንꬃን

ያዮንታ ኤቃዳ

ታ ኦꬂዳ ኡባ

ቆንጪሳ ዮታናኮሺን።

ቦንቃ ኤካዳ

ታኒ ጎዪዳ ጊዲኮ፥

39 ሄ ጋዳ ጎዳታ

ታ ሚሺሲዳ ጊዲኮ፥

ኣይኮካ ኢስታስ ኢሞንታ ዳሼ

ሞኪዳ ካꬃ

ታኒ ሚዳ ጊዲኮ፥

40 ሄ ታ ጎዪዛ ጎሻሶን ዲዛ

ጊስቴ ጊሻስ ኣጉንꬂ፥

ባንጋ ጊሻስ

ሻራፋይ ሞኮ» ጊዴስ።

ኢዮቢ ባ ሃሳያ

ሃይሳን ፖሊዴስ።