1 ጎዳ ቃላይ ናምኣንꬆ ዮናሳኮ፥ 2 «ዴንዳዳ ሄ ጊታ ካታማ ናናዌ ባዳ ታኒ ኔስ ዮቲዛ ቃላ ኢስታስ ኣዋጃ» ጊሼ ዪዴስ።

3 ሂስቲን ዮናሲ ዴንዲዲ ጎዳ ቃላꬆ ናናዌ ቢዴስ። ናናዌይ ኬሂ ጊታ ካታማ፤ ሃ ጋጻፔ ሄ ጋጻ ጋካናስ ሄꬑ ጋላስ ሄሜꬄስ። 4 ዮናሲ ናናዌ ካታማ ቢ ጋኪዲ ኢሲ ጋላሳ ኦጌ ማላ ካታማስ ጊዶ ቢዲ፥ «ኦይዱ ታሙ *ኦይዱ ታሙ ጊዛይሳ ላፑን ታሙ ኤራንቻታ ቢርሼꬃን ሄꬑ ጋላስ ጌስ። ጋላሳፌ ጉዬ ናናዌይ ꬋያና» ጊዲ ኣዋጂዴስ።

5 ሂስቲን ናናዌ ኣሳይ ጾሳ ኣማኒዲ ጾማ ኣዋጂዴስ፤ ጊታታፔ ጉꬃታ ጋካናስ ዉሪካ ማቃ ማይኢዳ። ማቶ 12፡41፤ ሉቃ 11፡32

6 ዮኦዚ ናናዌ ካዎኮ ጋኪን ኢዚ ባ ካዎቴꬃ ኣራታፔ ዎꬊዲ ካዎቴꬃ ማይኦ ማይኢዳይሳ ቃሪዲ ማቃ ማይኢዲ ቢዲንꬃን ኡቲዴስ። 7 ሂስቲዲ ናናዌ ኣሳስ፥ «ካዎዛፔኔ ካዎ ኦሳንቻታፔ ኢሜቲዳ ኣዛዞ ማላ ሃቺፌ ዶሚዲ ኣሲኔ ሜሄይ ኡባይ ኣይኮካ ሞፖ፤ ሃꬂካ ኡዮፖ። 8 ኣሳይካ ሜሄይካ ዉሪ ማቃ ማይኦ፤ ኣሲ ዉሪ ሚንꬂዲ ጾሳኮ ዋሶ፤ ባ ኢታ ኦጌፔኔ ቆሆ ኦሶፔካ ሲሞ። 9 ሂስቲኮ ጾሳይ ኑስ ቃꬌቲዲ ኑ ꬋዮንታ ማላ ባ ዎልቃማ ሃንቆፌ ሲማናኮ ኦኔ ኤሪዛይ» ጊዴስ።

10 ኢስቲ ባ ኢታ ኦጌፔ ሲሚዳይሳ ጾሳይ ቤኢዲ ኢስታስ ቃꬌቲዲ ኢስታ ቦላ ኤሃና ጊዳ ፒርዳ ኣጊዴስ።