1 ዮርዳኖሴ ሻፋፔ ኣርሼይ ዉሊዛ ባጋራ ፑዴ ጌዜን ዲዛ ዴሬይ፥ ጋꬋን ዲዛ ዴሬይ ሊባኖሴ ጋካናስ ዲዛ ጊታ ኣባ ጋጻን ዲዛ ሂቴታ፥ ኣሞሬታ፥ ካናኔታ፥ ፓሪዜታ፥ ሂዌታኔ ያቡሴታ ካዎቲ ኡባይ ኢስራኤሌ ኣሳይ ጾኒዳይሳ ሲዪዳ። 2 ሂስቲዲ ኢያሶኔ ኢስራኤሌ ኣሳ ኦላናስ ኢሲ ቦላ ዴንዲ ዪዳ።

3 ጌባኦኔ ኣሳይ ጊዲኮ ኢያሶይ ኢያርኮ ካታማኒኔ ኣዬ ካታማን ኦꬂዳይሳ ሲዪዳ ዎዴ፥ 4 ባሌꬃናስ ኮዪዲ ጋልኣ ኦጎሮኔ ዎይኔ ኡሹ ኢዛን ዎꬂዛ ሲኬቲዳ ሉካሞ ሃሬን ጫኒዳ። 5 ኣሳቲ ጋልኣኔ ሲኬቲዳ ጫማ ኣꬂዳ፤ ጋልኣ ማይኦካ ማይኢዳ፤ ሜሊዲ ቡቂዳ ሺንቄ ኦይኪዳ። 6 ሄሳፌ ጉዬ ኢስቲ ኢያሶይ ዱንካኒዳሶ ጌልጌላ ቢዲ ኢያሶሲኔ ኢስራኤሌ ኣሳስ፥ «ኑኒ ሃሆ ቢታፌ ዪዶስ፤ ሃኢ ኑናራ ጫቄቲቴ» ጊዳ።

7 ኢስራኤሌ ኣሳይ ሂዌታስ፥ «ኢንቴ ኑ ማታን ዲዛ ኣሳኮ ኑ ኣይ ኤሪዲ ኢንቴናራ ጫቄታኔ?» ጊዳ። ኬሳ 23፡32፤ 34፡12፤ ዛሬ 7፡2

8 ኢስቲ ኢያሶስ፥ «ኑኒ ኔ ኣይሌታ» ጊዳ።

ኢያሶይ፥ «ኢንቴ ኦኔ? ኣዋፔ ዪዴቲ?» ጊዲ ኦይቺዴስ።

9 ኢስቲካ፥ «ኑኒ ኔ ኣይሌቲ ጎዳ ኔ ጾሳ ጊታቴꬅ ሲዪዲ ዳሮ ሃሆ ቢታፌ ዪዶስ። ኢዛ ጊታቴꬃኔ ኢዚ ጊብጼ ቢታን ኦꬂዳይሳ ኡባ ሲዪዶስ። 10 ቃሴ ዮርዳኖሴ ሻፋፔ ሄ ፒንꬃን ዲዛ ኣሞሬ ካዎታ ናምኣታ፥ ሄይቲካ ሃሴቦኔ ካዎ ሲሆኔ፥ ኣስታሮቴ ሃሪዛ ባሳኔ ካዎ ኣጌ ቦላ ኢዚ ኦꬂዳይሳካ ኑ ሲዪዶስ። ታይ 21፡21-35 11 ኑ ዴሬ ጪማቲኔ ኑ ቢታን ዲዛ ኣሳይ ኡባይ ኑና፥ ኢንቴስ ኦጌ ሺንቄ ኦይኪዲ ኢስታራ ቢዲ ጋይቲቴ፤ ኢስታስ፥ ‹ኑኒ ኢንቴስ ኣይሌታ ጊዳና፤ ኢንቴ ኑናራ ጫቄቲቴ› ጊዳ።

12 «ኑኒ ኢንቴኮ ያናስ ኑ ሶፔ ሃይሳ ሺንቄዚ ሆኦ ዲሺን ኤኪ ዪዶስ፤ ጊዶ ኣቲን ሜሊዳይሳኔ ቡቂዳይሳ ሃይሳ ቤኢቴ! 13 ሃይቲ ኤሳ ሉካሞቲ ኑኒ ኩንꬂዛ ዎዴ ኦራꬃ፤ ጊዶ ኣቲን ሃኢ ኢስቲ ዋኒ ዳኬቲዳኮ ቤኢቴ! ኑ ሃሆ ኦጌ ሄሜቲዳ ጊሻስ ኑ ማይኦይኔ ጫማይ ዉሪዴስ» ጊዳ። 14 ጎዳ ኦይቾንታ ኢስራኤሌ ኣሳይ ኢስታ ሺንቄፌ ጉꬃራ ኤኪዴስ። 15 ኢያሶይ ኢስቲ ሳሮን ዴኣና ማላ ኢስታራ ጫቄቲዴስ፤ ዴራ ካሌꬂዛይቲካ ሄ ጫቆዛ ሚንꬃናስ ቃላ ጌሊዳ።

16 ኢስታራ ጫቄቲዳ ሄꬓንꬆ ጋላሳፌ ጉዬ ሄ ኣሳቲ ኢስታ ዶꬅ ጊዲዳይሳ ኢስራኤሌቲ ሲዪዳ። 17 ኢስራኤሌ ኣሳይ ሄꬑ ጋላስ ሄሜቲዲ ጌባኦኔ፥ ካፊሬ፥ ቢኤሮቴኔ ቂሪያቴ-ዪኣሪሜ ጌቴቲዛ ካታማታ ጋኪዴስ። 18 ጊዲኮካ ዴራ ካሌꬂዛይቲ ጎዳ ኢስራኤሌ ጾሳ ሱንꬃን ጫቂዳ ጊሻስ ኢስራኤሌቲ ኢስታ ኦሊቤቴና፤ ኩሜꬃ ማባራይካ ኢስታ ቦላ ዙዙሚዴስ። 19 ጊዶ ኣቲን ዴራ ካሌꬂዛይቲ፥ «ኑኒ ጎዳ ኢስራኤሌ ጾሳ ሱንꬃን ጫቂዳ ጊሻስ ሃኢ ሲሚዲ ኢስታ ቦላ ሜቶ ጋꬃናስ ዳንዳዮኮ። 20 ኑኒ ኢስታስ ኦꬃና ዳንዳይዛይ ኢስታስ ጌሊዳ ጫቆ ቃላ ሜንꬂን ሃንቆይ ኑ ቦላ ጋኮንታ ማላ ኢስታ ዎꬎፒቴ። 21 ጊዶ ኣቲን ኢስቲ ኩሜꬃ ማባራስ ሚꬅ ሚጺሼኔ ሃꬅ ዱቂሼ ዴቶ» ጊ ዛሪዳ። ሄሳ ጊሻስ ማባራ ካሌꬂዛይቲ ጌሊዳ ቃላይ ናጌቲዴስ።

22 ኢያሶይ ጌባኦኔ ኣሳታ ጼይጊዲ፥ «ኢንቴ ሃን ኑ ማታን ዴኢሼ፥ ‹ኑኒ ኬሂ ሃሆ ቢታፌ ዪዶስ› ጊዲ ኣይስ ኑና ባሌꬂዴቲ? 23 ሄሳ ጊሻስ ሃኢ ኢንቴ ቃንጌቲዳይታ፤ ጉꬃቲ ታ ጎዳ ኬꬃን ሚꬅ ሚጺዛኔ ሃꬅ ዱቂዛ ኣይሌታ ጊዳና» ጊዴስ።

24 ኢስቲ ኢያሶስ፥ «ኑኒ ኔ ኣይሌቲ ጎዳ ኔ ጾሳይ ሃ ቢታ ኡባ ኢንቴስ ኢማናይሳኔ ኢዛን ዲዛ ኣሳ ኡባ ኢንቴ ሲንꬃፌ ꬋይሳናስ ባ ኣይሌ ሙሴ ኣዛዚዳይሳ ጌሺ ሲዪዶስ። ሄሳ ጊሻስ ኢንቴፌ ዴንዶይሳን ኑ ሼምፖስ ሂርጊዲ ሃይሳ ኦꬂዶስ። 25 ሄኮ ሃኢ ኑኒ ኔ ኩሼን ዶስ፤ ኔስ ሎኦኔ ሱሬ ሚሳቲ ቤቲዳ ማላ ኑ ቦላ ኦꬃ» ጊ ዛሪዳ። 26 ሂስቲን ኢያሶይ ጌባኦኔ ኣሳታ ኢስራኤሌታ ኩሼፔ ኣሺዴስ፤ ኢስቲካ ዎꬊቤቴና። 27 ሄ ጋላስ ኢያሶይ ጌባኦኔ ኣሳታ ኢስራኤሌ ማባራሲኔ ጎዳይ ዶሪዳሶሆን ኤቂዳ ያርሾሶዛስ ኢስቲ ሃች ጋካናስ ሚꬅ ሚጻናሲኔ ሃꬅ ዱቃና ማላ ኦꬂዴስ።