1 ዮሴፌ ዛሬታ ጋኪዳ ቢታይ ኢያርኮ ማታን ዮርዳኖሴ ሻፋፔ ዶሚዲ ኢያርኮ ፑልቶታፔ ኣርሼይ ሞኪዛ ባጋራ ባዞ ካንꬂዲ ጌዜቲዛ ቢታራ ኣꬊዲ ቤቴሌ ጋኬስ። 2 ሎዛ ጌቴቲዛ ቤቴሌፔ ዴንዲዲ ኣጻሮቴ ጌቴቲዛ ኣርኬታ ቢታ ጋኬስ። 3 ሄሳፌ ኣርሼይ ዉሊዛ ባጋራ ዲዛ ያፋሌጼታ ቢታ ዱጉንꬃ ዱጌ ቤቲ-ሆሮኔ ዎꬊዲ ጌዜሬራ ካንꬂ ቢዲ ጊታ ኣባን ጌሌስ።

4 ዮሴፌ ቆሞ ሚናሴ ዛሬቲኔ ኤፍሬሜ ዛሬቲ ባንታና ጋኪዛ ቢታ ላቲዳ።

5 ኤፍሬሜ ዛሬታ ኢስታ ዛርኬን ዛርኬን ጋኪዳ ቢታይ ሃይሳፌ ካሊዛይሳ፤ ኢስታ ዛዋይ ኣርሼይ ሞኪዛ ባጋራ ዲዛ ኣጻሮቴ-ኣዳሬፔ ቢዲ ጋና ቤቲ-ሆሮኔ ጋኬስ። 6 ሄፔ ቢዲ ዎጋ ኣባን ጌሌስ። ቃሴ ፑዴሃ ባጋራ ዲዛ ዛዋይ ሚኪማታቴፔ ኣርሼይ ሞኪዛሶ ባጋ ታናቴ-ሺሎራ ሚርቄቲ ሲሚዲ፥ ኣርሼይ ሞኪዛሶ ባጋራ ዲዛ ያኖኬ ጋኬስ። 7 ያኖኬፔ ዱጌ ኣጻሮቴኔ ናራቴ ዱጉንꬃ ዎꬊዲ ኢያርኮራ ካንꬂ ቢዲ ዮርዳኖሴ ሻፋን ጌሌስ። 8 ዛዋዚ ታጱሄፔ ኣርሼይ ዉሊዛ ባጋራ ቢዲ ቃና ሻፋራ ዎꬊ ቢዲ ሜዲቴራኔ ኣባን ጌሌስ። ኤፍሬሜ ዛሬቲ ባ ዛርኬን ዛርኬን ላቲዳ ቢታይ ሃይሳ። 9 ሄሲ ሚናሴ ዛሬታ ቢታፌ ኤፍሬሜ ዛሬታስ ኢሚዳ ካታማታኔ ኢስታ ጉታታ ኡባ ጋꬂ ኦይኪዴስ። 10 ሃይሲ ኡባይ ሃኒንካ ኤፍሬሜ ዛሬቲ ጌዜሬ ካታማን ዲዛ ካናኔ ኣሳታ ኬሲ ጎዲቤቴና። ካናኔ ኣሳቲ ሃች ጋካናስ ኤፍሬሜ ዛሬታራ ኢሲፌ ዴቴስ። ጊዶ ኣቲን ኤፍሬሜ ዛሬቲ ኢስታ ዎልቃራ ኦሲሴቴስ። ዳና 1፡29